Ɛsedɔ 32
32
Eelɔŋ è gôo niŋa-loŋ pɔkɔɔŋ kpɛ̀tɛ
(Dutɛrɔnome 9:6-29)
1Tãi ǹûai dí gàa la a gɛɛ Mose è kɛ̀ tûai ǹyéei ma vé kɛ́ ní pâi a maa felai, dí díŋa tɛ̀ gîe ma Eelɔŋ ŋɛ́i-tuɛ dîyɛɛ mai, “Pá í ɣâla kpɛtɛ kúmɛni ma a gɛɛ é tɔ́ɔ kútuɛ, kpɛ́ni fei, kúfe mɛnii kɔ́lɔŋ kɛ̂i a Mose nyii kú kula Ize lɔii su.”
2Nya ƃe Eelɔŋ è mò dîa ǹyɛɛi, “Ka ŋ̀ôlii-sãai kúla kánɛyâai, kálônii-sinaai, da kálônii-nɛyãai wôli, ká pá a dia ḿbɔ.” 3Nya ƃe ǹûai kélee dí díwôlii-sãai kùla díwôlii dí pá a dia Eelɔŋ pɔ́. 4Eelɔŋ è ŋ̀ôlii-sãai sòŋ é zéɣeŋ é gbɛtɛ yɛ̂ɛ niŋa-sirɛ pɔkɔɔŋ.
Nya ƃe ǹûai dí mò dîyɛɛi, “Óo Eezuɛ-ŋai kúɣâlai ká ŋí nyii kú kùla Ize lɔii sui!”
5Tãi Eelɔŋ è nyíŋi káa lai, è Ɣâla-teƃele kpɛ̀tɛ niŋa-sirɛ pɔkɔɔŋ ŋɛ́i-tuɛ, é mó ǹûai dîa ǹyɛɛi, “Kwa tínaa kúu kɛ̂i Yâwɛɛ ma.” 6Nya ƃe ǹûai dí dímu sìɣe a bôlu ma ɣele-wala pɛ̀pɛi, dí kéreŋ sala kula dí lii-see sala kula. Dí sée dí dílaa míi, dí dímu sìɣe dí pɛ́lɛ pêle kɛ́ɛ ma.
7Yâwɛɛ è mò Mose mà ǹyɛɛi, “Yeŋ ǹyéei kwára. Kpɛ́ni fêi, ínûai í díkùla Ize lɔii sui da ŋumɛ-mɛni kɛ́i. 8Berei ŋá nɛ̀i da siɣe ma. Da niŋa-sirɛ pɔkɔɔŋ kpɛtɛ a gôo díkpîŋ mɛni ma díkɛ vɛ̀li díkɛ sâla kùla ma. Díkɛ mò dîyɛɛ ŋ̀âlai díkùla Ize lɔii sui ǹyaa ká tí.” 9É ŋɔ́nɔ mò Mose ma ǹyɛɛi, “Ŋá ǹûai ŋí kɔ́lɔŋ. Díŋuŋ su kpanaŋɔ̂ɔi. 10Tɔɔ ŋá dísu kara a ŋálii-ŋwanai. Kɛ́lɛ, ŋa pâi ka ínûai ká kɛ̂i a lɔii-ŋuŋ su kɛ́tɛ.”
11Kɛ́lɛ Mose è Ŋɔɣâla Yâwɛɛ kperai fè ǹyɛɛ mai, “Óo Yâwɛɛ, ƃa pâi ínûai nyii-ŋai í díkula Ize lɔii su a íwala-laai kɛ́tɛi su-karai a ílii-ŋwanai lé mɛni ma? 12Ƃà nyíŋi kɛ̀, gɛ̀ ní Ize-ŋai da pâi môi a gɛɛ í díkùla Ize a gɛɛ í pá a dia ǹyéei ma í díŋuŋ la píli naa. Ílii maa fáleŋ í ílii ŋáa yéŋ. Ífe pà a mɛni-kpɔlui ŋí ínûai pɔ́. 13Íkili ŋá sía í bîlaŋ ítii kɛ́-ƃelai Eberaɣɛ̃ɛ, Aise da Zeeka-ni dîa nyii-ŋai í íkono tèe díyêei í mó dîa yɛ̂ɛi, ‘Ŋa pâi kásuui tâmai yɛ̂ɛ bɛ̂mɛlɛŋ-kao-ŋai díkaa ŋ̀elei sui, ŋá ǹɔii-ŋai ŋí tɛ́ɛ kásuui pɔ́ nyii ŋá ŋ́gono tèe la káyêei, nyii pâi kɛ̂i a dípɔɔ wɔlɔ-wɔlɔ da wɔlɔ-wɔlɔi.’ ” 14Nya ƃe Yâwɛɛ è ǹíi maa fàleŋ. Vé ŋɔ́nɔ m̀ɛnii kɛ́ ní a ǹûai nyii è kɛ̀ ŋ̀wɛ̂lii a gɛɛ é gɛ́ a diai.
15Nya ƃe Mose è tìnaŋ é yéŋ ǹyéei kwára a gɔni-ƃela feerɛi nyii-ŋai kɛ̀ a bɔ̃yɛɛ gwaa feerɛ mai. 16Ɣâla ǹyaa kpîŋ ƃé gɔni-ƃela-ŋai sàa é ŋɔwóo-ŋai pɔ̃yɛɛ dîa.
17Tãi Zasua è ǹûai láɣi-woo mɛ̀ni lai, è mò Mose ma ǹyɛɛi, “Ŋa kɔ́-kɔ woo mɛnii mûui su.”
18Kɛ́lɛ Mose è mò mà ǹyɛɛi, “Dífe lâɣii a gɛɛ dí kɔ́ yée mɛi ɣále kpaa máŋ da lâɣii a gɛɛ kɔ́ a díyee mɛi ɣále. Kɛ́lɛ ŋa díwoo mɛnîi yɛ̂ɛ wule-woo.”
19Kɛ́lɛ tãi Mose è lɛ̀ɣɛ la mûui kɔlɛi é niŋa-sirɛ pɔkɔɔŋ káa, é ǹûai káa díkɛ mãla. Ǹíi è ŋwàna kpɔ́ a ŋánaa. Gɔni-ƃela-ŋai è kɛ̀ liî a diai è dítòo ǹyéei kwára é díwolo-wolo. 20È niŋa-sirɛ pɔkɔɔŋ kèreŋ é vũa-fũa é bú ǹyái su é Eezuɛ-ŋai kɛ́ dí gbele. 21Nya ƃe Mose è mò Eelɔŋ ma ǹyɛɛi, “Lé ƃé ǹûai dí gɛ̀ a yá ǹyaa ƃa díkɛ, díkɛ sɔnyɔ̂ŋ kɛ́ɛ ŋí kɛi?”
22Eelɔŋ è mò Mose ma ǹyɛɛi, “Ífe ílii ŋwàna ḿâ mɛi-nuui. Kpɛ́ni fêi, ínûai ŋí kɔ́lɔŋ berei dílii kpanaŋɔ̂ɔi la sɔnyɔ̂ŋ kɛ́-mɛni mai. 23Dí mò ḿâ a gɛɛ ŋá ɣâla kpɛtɛ dîɛ a gɛɛ é tɔ́ɔ dítuɛ. Kpɛ́ni fêi, Mose nyii díkùla Ize lɔii sui, dífe kɛ́ ní a mɛnii kɔ́lɔŋɔɔ kɛ̀ kɛ̂i lai. 24Nya ƃe ŋá mò dîa a gɛɛ ǹúui kélee gôo káa ǹyêei é gula é dɛɛ ḿbɔ. Nya ƃe dí dɛ̀ɛ ḿbɔ ŋá doo ŋɔŋ ŋá é séɣeŋ ŋá ǹiŋa-sirɛ pɔkɔɔŋ ŋí kpɛtɛ la!”
25Mose è gàa a gɛɛ ǹûai ŋuŋ-su-ɣɛli a tée, kpɛ́ni fêi, Eelɔŋ è díkùla woo-mɛni mu é dílɛɛ naa dí dípôlu fé Ɣâla mì díkpɔara-ƃelai sáma. 26Nya ƃe Mose è tɔ̀ɔ mûui ŋɔsiɣãŋ lá ǹyɛɛ diai, “Gbɛ̂ɛ ƃé gáa Yâwɛɛ ŋɔƃéla ma-pere? Maa-ƃelai dí pá ḿbɔ.” Nya ƃe Livai-ŋai kélee dí tìnaŋ mà. 27È mò ǹyɛɛi, “Yâwɛɛ Ɣâla nyii gáa a Eezuɛ-ŋai Díɣâlai, è mò ǹyɛɛ, ‘Kákelee ká káƃoa-sɔkpɔ-ŋai síɣe ká lí mûui su gwaa kélee é kúla ziɣãŋ ŋí ma é lí gbéli ma, ká káƃarâai páa da kálêɣe-ni é pɛ́lɛ kálîa-ni dîa.’ ” 28Nya ƃe Livai-ŋai dí gɛ̀ yɛ̂ɛ berei Mose è mò la diai. Dí núu pàa kpɔ́ a ŋ̀elei tí yɛ̂ɛ núu wála saaƃa (3,000). 29Mose è mò dîa ǹyɛɛi, “Ka sâa kákpîŋ see a Ɣâla ŋɔsâla láa-soŋ tii-kɛ-ƃela a káƃarâai páa da kálîa-ni é pɛ́lɛ kálêɣe-ni dîa. Mɛni ma Yâwɛɛ a sâa lûwa láa kâa.”
30Mose è mò ǹûai dîa a bôlu ma-ɣelei ǹyɛɛi, “Ka sɔnyɔ̂ŋ kɛ́tɛ kɛ́. Ǹyaŋ ŋa pâi tɛ̂i ǹyéei ma Yâwɛɛ pɔ́ naa, tãi da ŋa pâi kásɔnyɔ̂ŋ maa kpera-fe kɛ̂i.” 31Nya ƃe Mose è lì pôlu Yâwɛɛ pɔ́ naa ǹyɛɛ mai, “Ǹûai da sɔnyɔ̂ŋ kɛ́tɛ kɛ́. Da niŋa-sirɛ pɔkɔɔŋ kpɛtɛ dímɛni ma a gôo. 32Kɛ́lɛ ŋa íkpera fé a gɛɛ í dísu-mɛni lɛɛ. A wàla kɛ́ tí, fɛ̂ɛ nɔ́ í ǹáa kúla gɔlɔi su í bɔ̃yɛɛi.”
33Kɛ́lɛ Yâwɛɛ è mò Mose ma ǹyɛɛi, “Ǹúui a sɔnyɔ̂ŋ kɛ̀ ŋɛ́i-tuɛi, maa nuui ƃé ŋa pâi ǹáa kulâi ŋákɔlɔi ŋá. 34Lí nâa a ǹûai ƃɛ́i ŋá nàa lɛ̀ yâi. É kɛ́ íkili ŋá a gɛɛ ŋákelai a pâi tɔɔ̂i kátuɛ. Kɛ́lɛ tãi ŋa pâi dínaa kâai lai, ŋa pâi dísɔnyɔ̂ŋ maa tɔ̂ŋ kpɛ̂i dîa.”
35Nya ƃe Yâwɛɛ è kɔlɔ-fela pìli ǹûai sáma. Kpɛ́ni fêi, dí Eelɔŋ kɛ̀ é niŋa-sirɛ pɔkɔɔŋ kpɛtɛ dîɛ a díɣâla.
Currently Selected:
Ɛsedɔ 32: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
