Ɛsedɔ 35
35
Vii-tɔɔ-ɣelei maa tɔ̂ŋ-ŋai
1Mose è Eezuɛ-ŋai kélee ŋá tɛ̀ ma ǹyɛɛ diai, “Mɛni-ŋai ká ŋí Yâwɛɛ è mò a gɛɛ ká gɛ́i. 2Ka kátii-ŋai kɛ́ a fólo lɔ́ɔlu mɛi da. Kɛ́lɛ mɛi feerɛ ɣelei káa a fii-tɔɔ ɣele maa waa Yâwɛɛ mɛni ma. Ǹúui kélee pâi tíi kɛ̂i a ŋ̀ele-kûui tíi, maa nûui a pâi sâai. 3Káfe ŋɔŋ tôo kápɛrɛ-ŋai mu a Vii-tɔɔ-ɣelei.”
Yâwɛɛ ŋɔsua-kɔlɔ seɣe-pɛrɛ maa waai maa sama-sɛŋ
(Ɛsedɔ 25:1-9)
4Mose è mò Eezuɛ-ŋai kélee dîa ǹyɛɛi, “Mɛni-ŋai ká ŋí Yâwɛɛ è mòi. 5Ka sama-sɛŋ tɛɛ Yâwɛɛ mɛni ma. Diai kélee ŋ̀wɛ̂lii dí dísama-sɛŋ tɛ́ɛ a lii-nɛ̃ɛi, dí pá la. Dí pá a gôo, kane da ƃara, 6yee buluŋ kɛ́ɛ, yee-kpɔ̂lu m̀u tɛiɣɛɛ, ƃála-leɣa kpɔ̂lu, seɣe kole nɛnɛ-fɛfɛɛ lɛ́lɛɛ, ƃoli-lêɣa seɣe, 7ƃála-kɔlɔ pâa nyii dí bɔ̃yɛ tôo a kpɔ̂lu, da sua kɔlɔ lɛ́lɛɛ, kpitili, 8wulɔ laŋpoi mɛni ma, kúŋ-sɛŋ nyii da bù, bù-ŋua wulɔi da kéreŋ-sɛŋ kúŋ nɛ̃ɛ sui mɛni ma. 9Dí pá a kɔni sɔ̃ɔ kpanaŋɔɔ-ŋa da maa ɣîri-sãa sɔ̃ɔ kpanaŋɔɔ-ŋa nyii-ŋai díkaa zâla láa soŋ-nuu kɛ́tɛi geŋe-la seɣe kpuai da ɛfɔi dímɛni mai.”
Yâwɛɛ ŋɔpɛ́rɛi tɔɔ-sãai
(Ɛsedɔ 39:32-43)
10“Tɔɔ ǹyɛrɛ kɛ́-ƃelai kélee kásamai dí pá dí mɛni-ŋai kɛ́ Yâwɛɛ è mòi. 11Dí Ɣâla ŋɔpɛ́rɛi tɔ́ɔ da mɛi pɛlɛ-sãa, gólo-ŋa da bîlaŋ wuru-ŋa, ǹaa-ŋ̀a-wúru koya-ŋa, seɣe sɛ̂lɛŋ-wuru kôya-ŋa da bîleki. 12Gãlai da ziɣe-wuru-ŋai, gãlai mɛi-pɛlɛ-sɛŋ da bɛ́rɛi láƃelei seɣei, 13teƃelei da ziɣe-wuru-ŋa é pɛ́lɛ ŋ̀á sɛŋ-folo-ŋai kélee dîa da gbólo maa waai. 14Dí laŋpo see-wuru kpɛ̀tɛ da maa tii kɛ́-sãai kélee é pɛ́lɛ laŋpo-ŋai dîa da laŋpo wulɔi, 15zâla-sɛŋ kéreŋ teƃelei da ziɣe wuru-ŋai, ŋ̀úlɔi da bù núu-ŋûai, kéreŋ-sɛŋ kúŋ nɛ̃ɛ da bɛrɛi láƃelei seɣei, 16géreŋ sala kula teƃelei da ƃara-ƃela palaai, ziɣe-wuru-ŋai da maa tii kɛ́-sãai kélee, ƃara sɛŋ-folo da zee-sɛŋ, 17zeɣe dí dinaŋ a koraŋ da zeɣe soŋ-wûru-ŋai é pɛ́lɛ bîleki-ŋai dîa nyii-ŋai ŋ̀úru-ŋai da pâi pîlanii zui, da góraŋ láƃelei seɣei. 18Bɛ́rɛi da góraŋ dítɔɔ-sãai da maa ɣɛli-ŋai, 19zâla láa soŋ-ƃelai maa ɣîri seɣe lɛ́lɛɛ-ŋai gáa dítii kɛ́-mɛni ma Gwaa Maa Waai mai. Eelɔŋ nyii gáa a zâla láa soŋ-nuui kɛ́tɛi ŋɔseɣe maa waa-ŋai é pɛ́lɛ ǹônii díseɣe maa-waa-ŋai díkaa díɣâla-tii kɛ́-mɛni mai dîa.”
Ǹûai dí pà a dísama-sãai
20Nya ƃe Eezuɛ-ŋai kélee dí Mose lɛ̀ɛ naa dí lí. 21Diai kélee kɛ̀ ŋ̀wɛ̂lii kpaa máŋ nyii-ŋai kélee dílii è kùlai, dí pà a sama-sãa Yâwɛɛ pɔ́ tɛi-tɛi a gɛɛ dí tíi kɛ́ la Bɛ́rɛ maa waai mɛni ma. Dí ŋɔnɔ pà a sama-sɛŋ Bɛrɛi mu-tii kélee kɛ́ mɛni ma é pɛ́lɛ zeɣe ma waa-ŋai dîa. 22Sinâa da nɛyâa dí pà. Diai kélee gùla dílii sui dí pà a maa-ɣili-sãa nyii da gana seɣe mai da-ni, wôlii-sãa da gbono-ŋa, kɔŋ mâ yɔlɛ-ŋa da gôo maa ɣiri-sãa sii támaa. Diai kélee gôo maa ɣiri-sãai lâai kɛ̀ Yâwɛɛ mɛni mai, dí pà la bɔ́. 23Diai kélee yee bûluŋ kɛ́ɛ è kɛ̀ díyêei da yee-kpɔ̂lu m̀u tɛiɣɛɛ, yee kpɔlu, seɣe kole nɛnɛ-fɛfɛɛ lɛ́lɛɛ, ƃoli leɣa-seɣe, ƃála kɔlɔ kpɔlu é pɛ́lɛ ƃoli kɔlɔ mai, dí pà a dia bɔ. 24Diai kélee da pɔ̂ri kɛ̀ pâi a káne kpaa máŋ ƃarai, dí pà dia a Yâwɛɛ ŋɔsama-sɛŋ. Diai kélee kpitili wuru è kɛ̀ díyêei da pɔ̂ri kɛ̀ díi-ŋai kélee da kɛ̂i lai, dí pà la. 25Nyɛrɛ nɛyâai kélee dí yee pɔ̃lɔ a bûluŋ kɛ́ɛ, gbɔlu mu tɛiɣɛɛ da ƃála-ɣela kpɔ̂lu dí pá a dia. 26Nyɛrɛ nɛyâai kélee dí ƃoli leɣa pɔ̃lɔ. 27Ǹúu túɛ-ƃelai dí pà a kɔni sɔ̃ɔ kpanaŋɔɔ-ŋa nyii-ŋai díkaa zâla láa soŋ-nuu kɛ́tɛi ŋɔɛfɔi mɛni ma da geŋe lá seɣe kpuai, 28wúru-ya kúŋ nɛ̃ɛ da wúlɔ, laŋpo-ŋai, bu-ŋua wulɔi da géreŋ-sɛŋ kúŋ nɛ̃ɛi mɛni ma. 29Eezuɛ nɛyâai da zinaâi nyii-ŋai ŋwɛ̀li a gɛɛ dí sama-sɛŋ tɛɛ díi-ŋai kélee mɛni mai, Yâwɛɛ è mò Mose ma a gɛɛ dí gɛ́i, dí pà a sama-sãa Yâwɛɛ pɔ́ é kúla dílii su.
Dí Bɛzale tòli da Oôlia
(Ɛsedɔ 31:1-11)
30Nya ƃe Mose è mò Eezuɛ-ŋai dîa ǹyɛɛi, “Ka gáa Yâwɛɛ a Bɛzale lɛ́ nyii gáa a Ɔ̂ɔ ǹóŋ Uli ŋɔlóŋ nyii kùla Zuda ŋɔsuui sui. 31A ǹáa fɛ́ɛ a Ɣâla ŋɔmɔ̂leŋ, táre, mɛni-ŋa káa da yɛrɛ tii sii kélee kɛ́ mɛni ma, 32a gɛɛ é yɛrɛ tii-ŋa kɛ́ a gôo, káne da ƃara. 33A táre tɛ́ɛ ƃɔ kɔni sɔ̃ɔ kpanaŋɔɔ tee-mɛni da zèe mɛni ma, wúru saa-mɛni da yɛrɛ tii da kpɛ́ni-ŋa. 34Yâwɛɛ a sɛŋ lɛ́ tare tɛɛ Bɛzale pɔ́ da Aisama ǹóŋ Oôlia nyii kùla Daŋ ŋɔsuui sui pɔ́ a gɛɛ dí yɛrɛ-kɛ-tii lɛ́ ǹûai dîa. 35È táre tɛ̀ɛ dípɔ a gɛɛ dí yɛrɛ-kɛ tii sii kélee kɛ́ yɛ̂ɛ gôo ɣale tîi, seɣe pɔ̃yɛ-tôo tii, seɣe palaa a yee bûluŋ kɛ́ɛ, yee-kpɔ̂lu m̀u tɛiɣɛɛ, yee kpɔlu da seɣe kole nɛnɛ-fɛfɛɛ lɛ́lɛɛ. Da pɔ̂ri yɛrɛ tii sii kélee kɛ̂i.”
Currently Selected:
Ɛsedɔ 35: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
