Ɛsedɔ 36

1“Bɛzale da Oôlia é pɛ́lɛ nyɛrɛ kɛ́-ƃelai kélee nyii-ŋai Yâwɛɛ è táre da mɛni ŋá-kaa tɛ̀ɛ dípɔ a gɛɛ díɣâla ŋɔpɛ́rɛi tɔɔ-sãa kélee kɛ́-pere kɔ́lɔŋ, dí gélee kɛ́ yɛ̂ɛ berei Yâwɛɛ è mò lai.”

Ǹûai dí pà a sama-sãa támaa

2Nya ƃe Mose è Bɛzale tòli da Oôlia é pɛ́lɛ nyɛrɛ-ƃelai kélee dîa nyii-ŋai Yâwɛɛ è táre tɛ̀ɛ dípɔ da nyii-ŋai kɛ̀ ŋ̀wɛ̂lii a gɛɛ dí kpɔŋ-maa kɛ́i, a gɛɛ dí pá dí díi kɛ́. 3Zama-sãai kélee ǹûai dí pà la Ɣâla ŋɔpɛ́rɛi tɔɔ mɛni mai, Mose è dɛ̀ɛ nyɛrɛ kɛ́-ƃelai pɔ́. Eezuɛ-ŋai dí kɛ̀ nɔ́ niî pâi a sama-sãa a ɣele wâla kélee. 4Nyɛrɛ kɛ́-ƃelai kɛ̀ tíi kɛ̂i bɛ́rɛi mai, dí kula dítii kɛ́-kwaa-ŋai mâ dí pá, 5dí mó Mose mà dîyɛɛi, “Zama-sãai ǹûai da pâi lai dâmaai é tɛ́ɛ nyii ma gáa díi kɛ́-mɛni ma bɛ́rɛi ma yɛ̂ɛ berei Yâwɛɛ è mò la a gɛɛ é kɛ́i.”

6Nya ƃe Mose è ŋ̀óo tɛ̀ɛ m̀ûui su gwaa kélee mâ ǹyɛɛ ǹûai diai, “Núu da kélee fé ŋɔ́nɔ pà a sama-sɛŋ bɛ́rɛi tɔɔ mɛni ma.” Mɛni ma ǹûai dí nâa kpèra pâi a sama-sãa. 7Kpɛ́ni fêi, zãâi dí pà lai è kɛ̀ a dámaa é tɛ́ɛ bɛ́rɛi ŋɔtíi ma.

Yâwɛɛ ŋɔpɛ́rɛi tɔɔ mɛni

(Ɛsedɔ 26:1-37)

8Nya ƃe nyɛrɛ kɛ́-ƃelai kélee kɛ̀ díi kɛ́-ƃelai sámai, dí Ɣâla ŋɔpɛ́rɛi tɔ̀ɔ a seɣe-ƃela puu, nyii-ŋai kɛ̀ a balaa a seɣe kole nɛnɛ-fɛfɛɛ nyii dí bala a yee bûluŋ kɛ́ɛ, ƃála-leɣa kpɔ̂lu m̀u tɛiɣɛɛ da ƃála-leɣa kpɔ̂lu. Ɣâla-taa kooŋ-sãa pɔkɔɔŋ-ŋa dí kɛ́ a bɔ̃yɛ dîa a ǹɛ́lɛɛ. 9Zeɣe-ƃelai dɔnɔ ŋɔkôya è kɛ̀ a kɔ́ɔ-ƃɔlɔnii buu náaŋ káo feerɛ, ŋɔŋa-kɛtɛ kɛ́ ƃò a kɔ́ɔ-ƃɔlɔnii lɔ́ɔlu mɛi da. Zeɣe-ƃela-ŋai kélee dí kɛ́ a dípɔ̂riɛɛ. 10È ǹɔ́ɔlu sɔ̀lɔ gîe ma é ǹɔ́ɔlu kpélii sɔ́lɔ gîe ma máŋ. 11È sɛ́lɛŋ-ŋa kpɛtɛ zeɣe-ƃela lɔ́ɔlu sɔ́lɔɔ gîe ŋái maa-ŋuŋ m̀éla dɔnɔ ma a seɣe-ƃela bûluŋ kɛ́ɛ. È gɛ̀ ŋɔ́nɔ tí a zeɣe-ƃela lɔ́ɔlu sɔ́lɔɔ gîe mai veerɛi. 12È sɛ́lɛŋ buu lɔ́ɔlu pù zeɣe-ƃela sɔ́lɔɔ gîe ŋái maa-ŋuŋ mâ é buu lɔ́ɔlu pú veerɛi gbɛɛ ŋái mâ. Zɛ́lɛŋ-ŋai ŋí díkɛ̀ díkîe-ni téniŋ mâ. 13È gôo kpua buu lɔ́ɔlu kpɛ̀tɛ é díkolo kɛ́ dîa a gɛɛ dí zeɣe feerɛi m̀éla see gîe ma. Nyíŋi è nâa bɛ́rɛi kɛ̀ a pɛ́rɛ tɔnɔ.

14È seɣe puu káo tɔnɔɔ kpɛ̀tɛ a ƃoli-leɣa é bɛ́rɛi mɛi pɛ́lɛ la. 15Zeɣe-ŋai ŋí dɔnɔ ŋɔkôya è kɛ̀ a kɔ́ɔ-ƃɔlɔnii buu náaŋ káo lɔ́ɔlu, ŋɔŋa-kɛtɛ kɛ́ ƃò a kɔ́ɔ-ƃɔlɔnii lɔ́ɔlu mɛi da. Zeɣe puu káo tɔnɔ̀ɔi ŋí kélee dí kɛ́ a dípɔriɛɛ. 16È ǹɔ́ɔlu sɔlɔ gîe ŋá, é ǹɔ́ɔlu mɛi da sɔ́lɔ gîe ŋá. 17È sɛ́lɛŋ buu lɔ́ɔlu kpɛ̀tɛ zeɣei maa-ŋuŋ m̀éla maa-ŋuŋ wóli lá, é sɛ́lɛŋ buu lɔ́ɔlu kpɛtɛ veerɛi m̀éla dɔnɔ wóli lá. 18È ƃara buu lɔ́ɔlu kpɛ̀tɛ é díkolo kɛ́ dîa é dípili zɛ́lɛŋ-ŋai su a gɛɛ zeɣe feerɛi m̀éla veerɛ é sée gîe ma dí kɛ́ a seɣe tɔnɔ. 19È bɛ́rɛi mɛi-pɛlɛ-sɛŋ kpɛ̀tɛ a ƃála-sirɛ kɔlɔ kpɔ̂lu. É mɛi pɛ̀lɛ ŋɔ́nɔ a sua-kɔlɔ paâ lɛ́lɛɛ.

20È bɛ́rɛi pîlaŋ wûru-ŋai kɛ̀ a kpitili. 21Díkôya è kɛ̀ a kɔ́ɔ-ƃɔlɔnii puu káo lɔ́ɔlu, díŋa kɛ̂tɛ kɛ́ ƃò a kɔ́ɔ-ƃɔlɔnii feerɛ. 22È ŋ̀úru-ŋai tɔ̀ɔ gîe-ni kɔlɛ feerɛ-feerɛ é gbamo gîe ma a wúru-ƃela kpua-kpua. È bɛ́rɛ pîlaŋ wûru-ŋai kélee kɛ̀ tí. 23Berei è bɛ́rɛ-wûru-ŋai pîlaŋ lai ǹyaa ká ŋí. È buu feerɛ pìlaŋ bɛ́rɛ-ƃelai kwára-pere. 24È bîleki buu náaŋ kpɛ̀tɛ a káne é lóa tée gélee su tɛi-tɛi é dísee bɛ́rɛ-wûru buu feerɛi kɔ́ɔ mu. È veerɛ sèe ŋ̀úrii dɔnɔ kɔ́ɔ mu a gɛɛ gɔ́ɔ veerɛ dí lɔ́ zu. 25È bɛ́rɛ-wurii buu feerɛ pîlaŋ máŋ bɛ́rɛi ŋɔyá-ŋûa-pere ƃelai mâ. 26È bîleki buu náaŋ kpɛ̀tɛ a káne é veerɛ sée ŋ̀úrii kélee kɔ́ɔ mu tɛi-tɛi. 27È wúru lɔ́ɔlu mɛi da pîlaŋ bɛ́rɛi ŋɔfólo-lii pere. 28È wúru feerɛ-feerɛ tɔ́ɔ bɛ́rɛi pôlu-pere sonoŋ feerɛi su. 29Zonoŋ-su wuru feerɛi ŋí dí kɛ̀ a díŋa kɔlɛɛ díkɔɔ-pilanii, kɛ́lɛ gélee púɔɔ gîe ma ŋ̀elei-pere. Zonoŋ feerɛi su-wuru-ŋai tɔɔ-pere è kɛ̀ nɔ́ tí. 30Dí kɛ̀ a wúru lɔ́ɔlu mɛi saaƃa da bîleki puu káo lɔ́ɔlu mɛi da nyii-ŋai kɛ̀ a gbɛtɛɛ a kánei, veerɛ kɛ́ ƃò ŋ̀úrii dɔnɔ mu, veerɛ kɛ́ ƃò gbéli-ŋai mu tɛi-tɛi.

31È wúru kôya-ŋa kpɛ̀tɛ a kpitili-ƃela, è ǹɔ́ɔlu lâa bɛ́rɛ pîlaŋ wûru-ŋai ŋá bɛ́rɛ-ƃelai dɔnɔ mâ. 32É ŋɔnɔ ǹɔ́ɔlu láa bɛ́rɛ pîlaŋ wûru-ŋai ŋá bɛ́rɛ-ƃelai kpéli mâ. É ǹɔ́ɔlu láa bɛ́rɛ pîlaŋ wûru-ŋai ŋá bɛ́rɛi pôlu-pere voloi liî pere. 33È wúru kôya tɔnɔ kpɛ̀tɛ é ǹaa bɛ́rɛ pîlaŋ wuru-ŋai samai é siɣe bɛrɛi m̀éla tɔnɔ mâ é seri gbeli ma. 34È gôo pù bɛ́rɛ pîlaŋ wuru-ŋai dîa é ŋ̀úru kôyai soŋ-sɛŋ kpɛtɛ dîa a gôo. È gôo pù ŋ̀úru kôya-ŋai dîa máŋ.

35È zeɣei kpɛ̀tɛ a yee bûluŋ kɛ́ɛ, yee kpɔ̂lu m̀u tɛiɣɛɛ da ƃála-leɣa kpɔ̂lu. È Ɣâla-taa kooŋ-sãa pɔkɔɔŋ-ŋa kpɛ̀tɛ ma a ǹɛ́lɛɛ. 36È zeɣei sɛ̀lɛŋ wúru kôya náaŋ kpɛtɛ a kpitili-ƃelai zeɣe-ŋai sɛlɛŋ mɛni ma. È gôo pù ŋ̀úru kôya náaŋ ŋí ma é díkolo kɛ́ dîa. È bîleki náaŋ kpɛ̀tɛ a káne é lóa tée zu é ŋ̀úru kôya náaŋ pîlaŋ zu. 37È seɣe kpɛ̀tɛ bɛ́rɛi láƃelei mɛni ma a yee bûluŋ kɛ́ɛ, yee kpɔ̂lu m̀u tɛiɣɛɛ da ƃála-leɣa kpɔ̂lu. Yɛrɛ-nuu é bɔ̃yɛ a ǹɛ́lɛɛ. 38È wúru kôya lɔ́ɔlu kpɛ̀tɛ é díkoloi kɛ́ dîa. È gôo pù ŋ̀úru kôya-ŋai ŋûa é da pú díɣiri-sãai dîa. È bîleki lɔ́ɔlu kpɛ̀tɛ a ƃara é lóa tée zu ŋ̀úru kôya-ŋai mɛni ma.

Currently Selected:

Ɛsedɔ 36: KWB

Highlight

Compare

Copy