Zɛnɛse 49
49
Zeeka ŋɔwóoi gbɛɛ-ŋai
1Zeeka è ǹônii-sinaai tòli ǹyɛɛ diai, “Ka káŋaa tɛ́ gîe ma a gɛɛ mɛnii pâi kɛ̂i a káa tínaa tuɛ-perei, ŋá mó kâa.
2“Ka káŋa tɛ́ ma ká ŋ́oo mɛni,
Óo ǹônii-sinaai. Ka káwoli tɔ́ ŋ́oo ma.
3“Lubiŋ, yá ƃa ńoŋ maa-ŋuŋ, íkaa a ŋáwala-walai.
Í ƃò a ŋáwala-walai ŋɔƃá maa-ŋuŋ.
Íyoŋkaai ítɔɔ̂i, íwala-walai ńônii kéelee sáma.
4Íkaa yɛ̂ɛ ya-fɛɛ,
Kɛ́lɛ ítɔɔ̂i fé pâi ŋɔ́nɔ kɛ̂i a gɛ́tɛ.
Kpɛ́ni fêi, í lɔ̀ pɔ̂rɔŋ a ŋánɛnîi,
í ƃâa kula ínâŋ mà.
5“Simiɔŋ da Liva díkaa a lee kaa tɔnɔ.
Da ŋwana-lɔ̂ɔ kɛ̀ a díƃoa-sɔkpɔ-ŋai.
6Fé pâi kɛ̂i a díloo-pere su lono-ŋai kɛ́-nuu da.
Fé pâi kɛ̂i a díkoyâŋ su-nuu da.
Kpɛ́ni fêi, dílii à ŋwàna, da núu pàa,
Díkɛ niŋa-sîrɛ-ŋa kɔ̃̀liŋ a díŋwana-lɔ̂ɔ perei.
7Náɣaŋ káa dílii-wanai ma, kpɛ́ni fêi, maa yikîɛi,
náɣaŋ kɛ́ ƃò díkpɔarai-tuai mâ, kpɛ́ni fêi, gáa a ŋwana-lɔɔ.
Ŋa pâi díŋaa kɔlɛ̂i Eezuɛ lɔii gwaa kélee.
Ŋá dítaa-taa ŋɔnûai sáma.
8“Zuda, ílêɣe da ílîa-ni da pâi ílaa ma tɛ̂i.
Íyee a pâi kɛ̂i íkpɔara-ƃelai kɔŋ mâ.
Ínâŋ ǹônii-sinaai da pâi pɛlɛ̂i íkɔɔ mu.
9Zuda káa yɛ̂ɛ yala-sûlu-loŋ.
A kpɛɛ ŋɔsuai miɛɛ ma, a lî pôlu bɔ́ taai.
A lâa é sãa yɛ̂ɛ yala-sulu.
Ǹyaŋ núu da fé naa é lɛ́ɣɛ ma.
10Zuda ŋɔkâloŋ-wurii fé pâi kulâi ǹyêei.
Ŋɔsuui su ƃelai da pâi wɔ́lɔ kɛ̂i nɔ́ a kâloŋ ŋa.
Lɔii-ŋuŋ ŋai da pâi kɛ̂i nɔ́ ŋuŋ-fela-fei tɛɛ̂i bɔ́.
11A ŋɔwɛlɛ-sôoi ɣîri gbɔmɔi-ƃa kpɔmɔ ma.
Gbɔmɔi nyii ǹɛ́lɛɛi mâ.
É ŋɔseɣei wáa ŋwãai kpɔlu su.
12Ŋ̀ɛ́i-gao a pâi kpɔlûi a ŋwãai kpeleɛɛ,
Ǹyíŋ kɛ́ kòle a niŋa ŋíni-ya kpeleɛɛ.
13“Zɛbulɔŋ a pâi seêi ǹyái kɔlɛ.
Nàa a pâi kɛ̂i a yá ŋá-keleŋ pîlanii.
Ŋɔlɔii a pâi serîi Sidɔŋ.
14“Isaka wála-walaai yɛ̂ɛ wɛlɛ-sôo.
A lâa ŋwɛlɛ-sôo síɣe kpiri-ŋai loai.
15È gàa a gɛɛ víi tɔɔ̂i lɛ̂lɛɛi,
é ŋɔ́nɔ gáa berei ǹɔii lɛ̂lɛɛi lai,
È màa pɛ̂lɛ gbîrii síɣe mɛni ma.
Ǹyaŋ è nâa kɛ̀ tíi kpanaŋ kɛ̂i yɛ̂ɛ luɛ.
16“Daŋ a pâi ŋɔnûai dítɔ̃yâi maa kɔ̃ɔ̂i.
Da pâi kɛ̂i Eezuɛ-ŋai dísuui kpêli-ŋai.
17Daŋ a pâi kɛ̂i yɛ̂ɛ kali ƃé perêi,
Yɛ̂ɛ kali líi-ŋwanaa ƃé pere ma,
Nyii a soo nyîŋ gɔ́ɔ ma
a gɛɛ zia-nuui é kúla bôlu é toôi.
18“Óo Yâwɛɛ, ŋa íƃalo-laai maa kpɛ̂nii.
19“Ŋúma-ƃela da pâi pɛlɛ̂i Gâa ma.
Kɛ́lɛ a pâi kɔ̂i dípɔ é díyee mɛi ɣále.
20“Asɛ ŋɔlɔii a pâi mii-sɛŋ támaa kpɛtɛ̂i,
Nyii ǹɛ́lɛɛi kâloŋ mɛni mai.
21“Nɛfɛtɛli káa yɛ̂ɛ kîrɛ ŋánaa siɣe fɛnɛ-sɛŋ.
Nyii a lóŋ lɛ́lɛɛ kâai.
22“Zosɛ káa yɛ̂ɛ ƃá-kpɔmɔ nyii gáa yá kɔlɛi.
Ŋoŋo-ŋai naŋîŋɔɔi ziɣãŋ mɛi.
23Ŋɔkpɔara-ƃelai da tínaŋ ma.
Díkɛ gbɛ̀ a díkerâŋ-ŋai da dítɔ̃a-ŋai a ŋwana-lɔ̂ɔ-pere.
24Kɛ́lɛ ŋɔkerâŋ fé pâi ɣálei.
Ǹyée su fé pâi saâi.
Zeeka ŋɔwála-wala kélee Ɣalai ŋɔwála-wala sârai,
Nyii gáa a m̀ála mɛi-kaa-nuui da Eezuɛ Maa-kɔ̃ɔ-nuui.
25Ínâŋ ŋɔɣâlai a pâi kpɔnîi yâ.
Ŋ̀wála-wâla kélee Ɣalai a pâi lûwa lâai yâ.
A dunai nyii a kulâi ŋ̀elei su
da ǹyái nyii a kula ǹɔii mui.
Inɛyâai da pâi lóŋ kâai da í taa-tulɛ-ŋai.
26Ínâŋ ŋɔlûwai tɛɛ̂i ŋɔ́lɔ-wɔlɔ yee-ŋai dílûwai mâ,
Tɔɔ ǹûa-ŋai ŋí dí kɛ́ Zosɛ mà,
nyii dí gùla ǹîa-ni sámai.
27“Bɛŋsima káa yɛ̂ɛ baníŋ nyii a sua pâai.
A gɔnɔŋ pàa Ŋ̀ele-wâlai da ŋ̀ele-wulii.”
28Eezuɛ ŋɔsuu puu káo feerɛi ká ŋí. Ǹyaŋ mɛni-ŋai ká ŋí dínâŋ è mò diai. Ǹûwai nyii ǹɛ́lɛɛi kɛ̀ dímɛni ma tɛi-tɛi, è dɛ̀ɛ dípɔ.
Zeeka è sàa dí ǹoo
29Zeeka è mò ǹônii dîa ǹyɛɛi, “Ŋa pâi liî ŋánûai pɔ́. Ka ńoo ńâŋ-ni kɔlɛ gɔni-ƃoloŋ su nyii gáa Ita-nuui Ɛfɔŋ ŋɔlɔii mai. 30Ka ńoo gɔni-ƃoloŋ su nyii gáa Mapela lɔii ma, Mamera foloi kulâi-pere Keena lɔii su, nyii Eberaɣɛ̃ɛ è ǹya da ǹɔii kpuai Ita-nuui Ɛfɔŋ yêei mâ gɛɛ é kɛ́ a ŋɔsaa loôi. 31Nàa ƃe dí Eberaɣɛ̃ɛ da ŋɔnɛnîi Seera lòo naa. Dí Aise da ŋɔnɛnîi Lubɛka lóo naa. Ŋá ŋánɛnîi Liɛ loo naa. 32Dí ǹɔii da gɔni-loai yâ Ita-ŋai yêei.” 33Tãi Zeeka è kpɛ̀ɛ la a mɛni-ŋai ŋí ƃóɔɔ ǹônii diai, è gɔ́ɔ tɛ̀ pôlu ŋɔgbìŋ ŋá é sáa é lí ŋɔnûa pɔlɔ-ŋai pɔ́.
Currently Selected:
Zɛnɛse 49: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia
