Zɛnɛse 50

1Nya ƃe Zosɛ è tòo ǹâŋ kɔlɛ gɛ́ wɔ̀lɔ ma, gɛ́ ǹá-gbɔ sèe ma. 2Zosɛ è mò ŋɔsále kɛ́-ƃelai dîa a gɛɛ dí ǹâŋ saa kpɛtɛ. Zále kɛ́-ƃelai dí Zeeka saa kpɛ̂tɛ. 3Dí fólo buu náaŋ sìɣe zaai kpɛtɛ mɛni ma, kpɛ́ni fêi, ŋ̀ele-kuu-ŋai ŋí ƃé è kɛ̀ a sɛŋ dí zaai kpɛtɛ la. Ize-ƃelai dí maa wɔ̂lɔ kɛ̀ a fólo buu lɔ́ɔlu mɛi feerɛ.

4Tãi Zeeka maa wɔ̂lɔ ƃó tãi è tɛ̀ɛ lai, Zosɛ è lòno gâloŋ ŋɔpɛ́rɛi mu-ƃelai kélee pɔ́ ǹyɛɛ diai, “A kɛ̀ ḿalôŋ káa kâa, gɛ̀ ní ka kpera kâa ká mó gâloŋ ma kâa mai, 5‘Tãi ńâŋ è kɛ̀ pâi saâi lai, è ŋ́gɛ̀ ŋá ŋ́gono tée ǹyêei a gɛɛ ŋa pâi noôi gɔni-ƃoloŋ su nyii è dèe Keena lɔii sui. Mɛni ma, kpera yɛ̂ tɔɔ ŋa lí ŋá ńâŋ loo. Ŋa pâi pôlu.’ ”

6Nya ƃe gâloŋ è zu tòo ǹyɛɛi, “Lí í ínâŋ loo yɛ̂ɛ berei í íkono tèe la ǹyêei.”

7Nya ƃe Zosɛ è lì a gɛɛ é ǹâŋ loo. Gâloŋ ŋɔpɛ́rɛi mu-ƃelai kélee da ŋɔnúu pɔlɔ-ŋai kélee é pɛ́lɛ Ize lɔii su-nuu pɔlɔ-ŋai kélee dîa da Zosɛ-ni dí lí. 8Zosɛ ŋɔpɛ́rɛi mu-ƃelai máŋ é pɛ́lɛ ǹêɣe da ǹîa-ni dîa da ǹâŋ ŋɔpɛ́rɛi mu-ƃelai kélee dí lì. Nîa-pɛlɛɛi nɔ́ ƃé lɛ̀ɛ Gosɛŋ lɔii-kpiniŋ su da m̀ála-ŋai é pɛ́lɛ daa-tulɛ kpéli-ŋai dîa. 9Zosɛ è lì a kéleŋ támaa da soo sia-ƃela támaa. Ǹyaŋ kpɔŋ kɛ́tɛ ká kɛ̀ tí.

10Tãi dí sèri la Goreŋ Atai, ƃɛ́i nàa káa Zɔdiŋ Ya-leei pôlui, dí Zeeka saa wɔ̂lɔ kɛ̀ naa a zu kɛ́tɛ. Zosɛ è ǹâŋ maa wɔ̂lɔ kɛ̀ naa a fólo lɔ́ɔlu mɛi feerɛ. 11Tãi ǹɔii-ƃelai nyii-ŋai kɛ̀ a Keena-ƃelai, dí ŋ̀ɔ́lɔi ŋí kɛ̂i kàa la Goreŋ Atai, dí mò dîyɛɛi, “Malôŋ-mɛni kɛ́tɛ ká ŋí Ize-ŋai mɛni ma.” Mɛni ma dí nàa láa tòli a Ebɛɛ Mizaiŋ (zu-kulai ƃa Ize-ŋai dísaa-wɔlɔ kɛ̂i). Naa káa Zɔdiŋ Ya-leei pôlu.

12Zeeka ǹônii-sinaai dí gɛ̀ yɛ̂ɛ berei è mò la diai. 13Dí lì la Keena lɔii su dí ǹoo gɔni-ƃoloŋ su nyii gáa Mapela lɔii sui Mamera foloi kulâi-pere, nyii Eberaɣɛ̃ɛ è ǹya da ǹɔii kpuai Ita-nuui Ɛfɔŋ yêei a gɛɛ é kɛ́ a saa loôi. 14Zosɛ kpɛɛ a ǹâŋ looɔi, da ǹîa-ni é pɛ́lɛ diai kélee dîa lì zaa looɔi sui, dí lì pôlu Ize lɔii su.

Zosɛ è ŋɔlii lɛ̂lɛi lɛ̀ ŋɔ́nɔ ǹêɣe da ǹîa-ni dîa

15Tãi Zosɛ ǹêɣe da ǹîa-ni dí gàa la a gɛɛ dínâŋ a saâi, dí mò dîyɛɛi, “Tãi da Zosɛ a pâi kúkpɔarâi mɛni nyɔ́mɔɔi kélee kú gɛ̀ lai, é gbà kula kûa.” 16Nya ƃe dí worɛ̂ tɛ̀ɛ bɔ́ naa dîyɛɛi, “Ínâŋ è mɛni ŋí ƃò é lɛ́ɛ pâi saâi. È mò ǹyɛɛi, 17‘Ka mó Zosɛ ma a gɛɛ é kpéra é ǹêɣe da ǹîa-ni dísɔnyɔ̂ŋ-ŋai su-mɛni lɛɛ. Kpɛ́ni fêi, dí mɛni nyɔ́mɔɔ kɛ̀ la.’ Mɛni ma, kpera yɛ̂ kúsɔnyɔ̂ŋ su-mɛni lɛɛ kûai a ínâŋ Ɣâla yée mu-ƃelai.” Nya ƃe Zosɛ è wɔ̀lɔ tãi dí nyíŋi ƃò la mai.

18Ǹêɣe da ǹîa-ni dí pà dîa kpîŋ dí pɛ́lɛ gɔ́ mu díyɛɛ mai, “Gáa, kúkaa a íyee mu-ƃela.”

19Kɛ́lɛ Zosɛ è mò dîa ǹyɛɛi, “Káfe yào. Fa pɔ̂ri ŋ́gbîŋ kɛ̂i a Ɣâla. 20Ká mɛni nyɔ́mɔɔ kpɛ̀tɛ ḿɛni ma. Kɛ́lɛ Ɣâla è bène a mɛni lɛ́lɛɛ a gɛɛ tãi ŋí su nûa támaa dífulu-laai é lɛ́ɛ díyêei ńzârai yɛ̂ɛ berei gáa la sâai. 21Mɛni ma káfe yào. Ŋa pâi káŋaa kɔnîi ka kánîa-pɛlɛɛi.” È dílii làa a ŋ̀óo-ŋai ŋí.

Zosɛ è sàa

22Zosɛ da ǹâŋ ŋɔpɛ́rɛi mu-ƃelai dí nâa sèe Ize lɔii su. È kɛ̀ ɣele ma a kóraŋ ŋuŋ tɔnɔ pôlu puu (110). 23Zosɛ è lɛ̀ɛ ɣele ma é Ifiraŋ ǹônii da díwɔ̂ lonii káa. Manasɛ ǹóŋ Makii ŋɔnîa-pɛlɛɛi dí kɛ̀ máŋ a Zosɛ ŋɔpɛ́rɛi mu-ƃelai da. 24Nya ƃe Zosɛ è mò ǹêɣe da ǹîa-ni dîa ǹyɛɛi, “Ŋa pá nâa saâi, kɛ́lɛ Ɣâla a pâi kánaa kâai é kákula ǹɔii ŋí su é lí a káa ǹɔii su nyii è góno tèe la Eberaɣɛ̃ɛ yêei da Aise é pɛ́lɛ Zeeka mai.” 25Zosɛ è Zeeka ǹônii marê kɛ̀ a gɛɛ dí díkono tée ǹyêei. È mò dîa ǹyɛɛi, “Ka kákono tée a gɛɛ Ɣâla à káŋuŋ ma ƃò, ka pâi ŋ́gao kulâi ƃɛ́ ká lí la.” 26Zosɛ è nâa sàa. È kɛ̀ ɣele ma a kóraŋ ŋuŋ tɔnɔ pôlu puu (110). Nya ƃe dí zaa kpɛ̂tɛ, dí doo gãlai Ize lɔii su.

Currently Selected:

Zɛnɛse 50: KWB

Highlight

Compare

Copy