Levetekɔ 11
11
Zuai maa nɛɛ̂i ká miî da nyii maa fé nɛ̃ɛ ní ká miî.
(Dutɛrɔnome 14:3-21)
1Yâwɛɛ è mò Mose ma da Eelɔŋ ǹyɛɛi, 2“Ka m̀ó Eezuɛ-ŋai dîa kâai, zua-ŋai ŋí ƃé ka pɔ̂ri miî ǹɔ́ɔ fɛnɛ-sãai kélee sáma ǹɔii mai. 3Ka pɔ̂ri fɛnɛ-sɛŋ miî nyii zôlo ƃelai, gɛ́ ǹáa mii-sɛŋ miî kɛ̀ gîei feerɛi. 4Zua-ŋai sáma nyii-ŋai da dílaa mii-sɛŋ miî kɛ̀ gîei feerɛ, kɛ́lɛ dísolo fé béla níi, káfe da miî. Fɛnɛ-sɛŋ kɛ́ɛ yɛ̂ɛ soo-fáleŋ, a ǹáa mii-sɛŋ miî kɛ̀ giei feerɛ, kɛ́lɛ zolo fé ƃela ní. Mɛni ma, maa fé waa ní. 5Fɛnɛ-sɛŋ kɛ́ɛ yɛ̂ɛ wâra, a ǹáa mii-sɛŋ miî kɛ̀ gîei feerɛ, kɛ́lɛ zolo fé ƃéla ní, mɛni ma maa fé waa ní. 6Fɛnɛ-sɛŋ kɛ́ɛ yɛ̂ɛ ŋ̀ela a ǹáa mii-sɛŋ miî kɛ̀ gîei feerɛ, kɛ́lɛ zolo fé ƃéla ní. Mɛni ma maa fé waa ní. Fɛnɛ-sãa kɛ́ɛ yɛ̂ɛ soo-fáleŋ, wâra da ŋ̀ela, da dílaa mii-sɛŋ miî kɛ̀ gîei feerɛ, kɛ́lɛ dísolo fé ƃéla ní. Mɛni ma dímaa fé waa ní. 7Káfe ƃoi mîi. Zôlo ƃelâi, kɛ́lɛ va ǹáa mii-sɛŋ miî kɛ̀ gîei feerɛ. Mɛni ma maa fé waa ní. 8Káfe vɛnɛ-sãai ŋí dísua da m̀ii kpaa máŋ ka lɛɣɛ dípoma ma. Dímaa fé waa ní.
9“Ka pɔ̂ri nyɛ̃́ɛ sîi kélee miî nyii gala káa m̀a da vilii. 10Káfe yái fɛnɛ-sɛŋ sii kélee da miî nyii gala fé ma da vilii. Káfe vɛnɛ-sã̂ai ŋí da mii. Dí káa a kátĩ̂a. 11Vɛnɛ-sãai ŋí maa fé waa ní. Káfe da miî a dɔnɔ kpîŋ, kpaa máŋ ká lɛ́ɣɛ dípoma ḿâ. 12Ya fɛnɛ-sɛŋ nyii kélee gala fé ma da vilii, káa a kátĩ̂a.
13“Kuɛ, gɔ̃ɔ, kuɛ-kpãaŋ, 14Korô soŋ kpãaŋ da dísîi kélee, 15pôna ŋɔni da dísîi kélee, 16sòloŋ-kɔ̃nɔ, lawɔ-kpɔ̂lui muu, ya kɔrɔ-kɔrɔ, kpãaŋ da dísîi kélee. 17Mûu da maa sîi kélee, kwíi-tɛɛ da maa sîi kélee, niŋa pôlu lɛɛŋ-kpɛŋ 18da dísîi kélee. 19Ŋɔni-ŋai ŋí kélee da dísîi kélee, fɔ̂ŋ da lɔfu.
20“Káfe koôŋ kolo sii kélee da miî nyii gɔ́ɔ tâmaai é tɛ́ɛ feerɛ mai. 21Kɛ́lɛ ka pɔ̂ri goôŋ koloi miî nyii a pili-pilii. 22Ka pɔ̂ri gotó sii kélee miî, zɛ̃ɛ sii kélee da gba-gba toniŋ sii kélee. 23Káfe koôŋ kolo sii kélee mii nyii a tɔarai. Maa fé waa ní.
24“Ǹúui kélee a lɛ̂ɣɛ zãâi ŋí da poma mai, maa nuui fé pâi kɛ̂i a m̀aa waa é lɛ́ɛ la zu ɣele wulii é kɛ́. 25Ǹúui kélee a tela da poma siɣei, fɛ̂ɛ maa nuui é ŋɔseɣei waa ǹyaŋ maa nuui maa fé pâi kɛ̂i a ŋ̀waa é lɛ́ɛ la zu ɣele wulii é kɛ́. 26Vɛnɛ-sãai nyii kélee zôlo su fé ƃéla ní, va téla ǹáa mii-sɛŋ miî kɛ̀ gîei feerɛi maa fé waa ní kámɛni ma. Ǹúui kélee a lɛɣɛ diai, maa fé waa ní. 27Vɛnɛ-sãai nyii kélee a sia gɔ́ɔ lîi maa fé waa ní kámɛni ma. Ǹúui kélee a lɛɣɛ da poma mai, maa nuui maa fé pâi kɛ̂i a ŋ̀wáa é lɛ́ɛ la zu ɣele wulii é kɛ́. 28Ǹúui a téla lɛ̀ɣɛ poma mai, fɛ̂ɛ maa nuui é ŋɔseɣei wáa. Maa nuui fé pâi kɛ̂i a maa waa é lɛ́ɛ la zu ɣele wulli é kɛ́. Díkaa a vɛnɛ-sãai nyii-ŋai dímaa fé waa ní kámɛni mai.
29“Vɛnɛ-sãai ŋí maa fé waa ní kámɛni ma tɔara fɛnɛ-sãa sáma. Turî, ŋína, korô da dísîi kélee. 30Ŋũyɛ, fale, korô kole da dísîi kélee da lolô. 31Vɛnɛ-sãai ŋí maa fé waa ní kámɛni ma tɔara-sãa-ŋa sáma. Ǹúui a lɛɣɛ da poma mai, maa nuui maa fé pâi kɛ̂i a ŋ̀waa é lɛ́ɛ la zu ɣele wulii é kɛ́. 32Sɛŋ nyii kélee vɛnɛ-sãai ŋí da poma a lɛɣɛ mai, maa sɛŋ maa fé pâi kɛ̂i a ŋ̀waa. E máŋ kɛ́ yɛ̂ɛ sɛŋ nyii kélee gbɛtɛɛi a wúrui, seɣe, sua kɔlɔ, ƃɔrɔ-saa kpaa máŋ sɛŋ-folo sii kélee da. Fɛ̂ɛ í maa sɛŋ maa waa yá su. Kɛ́lɛ, maa fé pâi kɛ̂i a ŋ̀waa é lɛ́ɛ la zu ɣele wulii é kɛ́. 33Ǹyaŋ à kɛ̀ da poma a tòo pɔ̂rɔ leɣi da su, zãai kélee maa pɔ̂rɔ leɣii sui maa fé waa ní, fɛ̂ɛ í maa pɔ̂rɔ leɣii wólo. 34Ǹeɣii ŋí su ya da a pù mii-sɛŋ da ma, maa mii-sɛŋ maa fé waa ní. Ǹeɣii sîi ŋí su ya kélee da maa fé waa ní gbèle mɛni ma. 35Sɛŋ nyii kélee vɛnɛ-sãai ŋí da poma a tôo mai, maa sɛŋ maa fé waa ní. E máŋ kɛ́ a kpólo kpɛtɛ sɛŋ, kpaa máŋ leɣii ɣíli sɛ́ŋ kpɛtɛɛ a pɔ̂rɔ, fɛ̂ɛ í maa sɛŋ wólo. M̀aa fé waa ní kámɛni ma. 36Kɛ́lɛ à kɛ̀ da poma a tòo ya-tôŋ da ma, kpaa máŋ ya-lôa da su, maa yâi maa waâi, berei máŋ da poma a lɛɣɛ la sɛŋ da ma maa fé waa níi. 37Da à tòo mii-sɛŋ da ma nyii ya pâi zîi, maa sí-sɛŋ kaoi maa waai. 38Kɛ́lɛ da poma a lɛɣɛ sí-sɛŋ kao da ma nyii ǹyɔɔ̂i, maa sí-sɛŋ kaoi maa fé waa ní.
39“Ǹyaŋ vɛnɛ-sɛŋ nyii kélee m̀aa waai m̀ii mɛ̂ni mai da à saa, ǹúui a lɛ̀ɣɛ buma mai, maa nuui maa fé pâi kɛ̂i a ŋ̀waa é lɛ́ɛ la zu ɣele wulii é kɛ́. 40À kɛ̀ núu da a vɛnɛ-sɛŋ ŋí zua da mii, fɛ̂ɛ maa nuui é ŋɔseɣei wáa ǹyaŋ maa nuui maa fé pâi kɛ̂i a ŋ̀wáa é lɛ́ɛ la zu ɣele wúlii é kɛ́. Núu da a tela da poma siɣe fɛ̂ɛ maa nuui é ŋɔseɣei waa, kɛ́lɛ maa fé pâi kɛ̂i a waa é lɛ́ɛ la zu ɣele wulii é kɛ́.
41“Káfe vɛnɛ-sãa pɛlɛɛ-ŋai ŋí da kélee mii nyii-ŋai da tɔara ǹɔii mai. Díkaa a kátĩ̂a. 42Sɛŋ nyii-ŋai kélee da ɣâla ǹɔii ma yɛ̂ɛ kali-ŋa, nyii kélee a tɔ̀ara ǹɔii ma yɛ̂ɛ korô-ŋa, kpaa máŋ nyii-ŋai díkɔɔ tâmaai yɛ̂ɛ gbɔlɔ-keleŋ-ŋai, káfe da mii. Díkaa a kátĩ̂a. 43Ka zãai ŋí da miî, kámaa fé pâi kɛ̂i a ŋ̀wáa. 44Ńyãa ƃa Yâwɛɛ ka Ɣâlai. Fɛ̂ɛ ká kákpîŋ maa waa, kpɛ́ni Ḿaa waâi. 45Ńyãa ƃa Yâwɛɛ nyii kákùla Ize lɔii sui a gɛɛ ŋá kɛ́ a Káɣâlai. Fɛ̂ɛ ká kɛ́ a kámaa waa, kpɛ́ni fêi, ḿaa waâi.
46“Dɔ̂ŋ-ŋai ká ŋí nyii bîlaŋɔɔi fɛnɛ sàa kélee dîa, ŋɔni-ŋai kélee, zãai kélee da sìa ǹyái sui da nyii ŋai kélee da tɔara ǹɔii mai diai. 47Fɛ̂ɛ ka zãai ŋí loai kɔ́lɔŋ. Nyii-ŋai dímaa waâi da nyii-ŋai dímaa fé waa ní. Vɛnɛ-sãai nyii-ŋai maa nɛ̃ɛ̂i kà mìi, kpaa káfe dí mîi.”
Currently Selected:
Levetekɔ 11: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia