Levetekɔ 21
21
Zâla Láa soŋ-ƃelai Maa Waa mɛni
1Yâwɛɛ è mò Mose ma ǹyɛɛi, “M̀ó Eelɔŋ ǹônii nyii-ŋai díkaa a zâla láa soŋ-ƃelai dîa a gɛɛ dífe pêle kɛ̀ saa kûu su. Da gɛ̀ tí dífe pâi kɛ̂i a dímaa waa. 2Fɛ̂ɛ ǹúui saai a kɛ̀ a zâla láa soŋ-nuui kpîŋ ǹee, kpaa máŋ ǹâŋ, ǹóŋ nɛnî, kpaa ǹóŋ surɔ̂ŋ, ǹîa surɔ̂ŋ, kpaa máŋ ǹêɣe surɔ̂ŋ, 3kpaa máŋ záaƃɔ̂lɔ nyii da ǹyaa díkaa pɛ́rɛ tɔnɔ mu surɔ̂ŋ fé ǹyêei. (A pɔ̂ri nyíŋi kɛ̂i nɔ́ zaaƃɔlɔ mɛni ma nyii pâi gɛ̂i maa fé pâi kɛ̂i a ŋ̀waai.) 4À kɛ̀ a lì núu da saa kûu su nyii da ǹyaa díkaai nɔ́ nɛnî káa ŋɔpere su, m̀aa fé pâi kɛ̂i a ŋwaa. 5Zâla láa soŋ nuui da fé ŋ̀uŋ gwaa da ma leɣa pu, ǹáa leɣa kpaa máŋ é pɔ́ɔ kɛ́ gɔlɔ gwaa da ma nyii pâi ǹɛ̂i a gɛɛ a malôŋ toɔɔ̂i ma ŋɔnúu da saa mɛni mai. 6Fɛ̂ɛ zâla láa soŋ-ƃelai díkɛ a dímaa waa Díɣâlai ŋɛ́i, dífe ƃâa kùla ǹáa ma, kpɛ́ni fêi, dia ƃé da m̀ii-sɛŋ sala sãai kêreŋ Yâwɛɛ mɛni ma. M̀ɛni ma, fɛ̂ɛ dí kɛ́ a dímaa waa. 7Dífe wulu-wulu kpɛ́ nɛnî kùla kpaa máŋ ǹɛnîi nyii surɔ̂ŋ mɛni kɔ́lɔŋ. Dífe tela ǹɛnîi kula nyii ŋɔsurɔ̂ŋ a ǹɛɛi, kpɛ́ni fêi, dímaa waai Díɣâlai ŋɛ́i. 8Fɛ̂ɛ ká zâla láa soŋ-ƃelai síɣe a dímaa waa kpɛ́ni fêi, dia ƃé da m̀ii-sɛŋ salai kula sãai kêreŋ Yâwɛɛ mɛni ma. Ńyãai a Yâwɛɛ nyii kámaa waai, Ḿaa waai. 9À kɛ̀ zâla láa soŋ-nuui da ǹóŋ nɛnî a gbîŋ kɛ̀ a wulu-wulu kpɛ̂ nɛnî, gɛ̀ ni a ƃâa kula ǹâŋ ma. Fɛ̂ɛ dí géreŋ a ŋɔŋ é sáa. 10Zâla láa soŋ-nuui kɛ́tɛi nyii da wulɔ pú ŋ̀ûa, da m̀aa waa, da zâla láa soŋ seɣei tɛ́ɛ bɔ́i, é kɛ́ ŋ̀uŋ su kulâi, vé ŋɔseɣei fâla a gɛ́ɛ malôŋ sèe ƃôi ŋɔnúu da saa mɛ̂ni ma. 11Vé lɔ́ bɛ́rɛi mu nyii saa káa naai, a nɛ̃ɛ ma kpîŋ è kɛ́ a ǹâŋ kpaa máŋ ǹee. À gɛ̀ tí m̀aa fé pâi kɛ̂i a ŋ̀waa. 12Vé tela kula zua kɔlɔ seɣe pɛrɛ maa waai mu nyii pâi pâi a laa kâra Ɣâla ŋɔpɛ́rɛi mu, kpɛ́ni fêi, da wúlɔ pú ŋ̀ûa Ɣâla ŋɔtíi kɛ́ mɛni ma. Ńyãa ƃa Yâwɛɛ. 13É nɛnî kúla nyii vé surɔ̂ŋ mɛni kɔ́lɔŋ. 14Vé pɔ́ɔ nɛni kula kpaa máŋ ǹɛnîi nyii ŋɔsurɔ̂ŋ a ǹɛɛi, kpaa máŋ ǹɛnîi nyii maa fé waa nii, kpaa máŋ wulu-wulu kpɛ́ nɛnî. Kɛ́lɛ é nɛnî kula ŋɔnûai sáma nyii vé surɔ̂ŋ mɛni kɔ́lɔŋ, 15a wàla kɛ́ tí ŋɔnîa-pɛlɛɛi nyii-ŋai maa nɛ̃ɛi dí kɛ́ a dímaa waai, dímaa fé pâi kɛ̂i a ŋ̀waa. Ńyãa ƃa Yâwɛɛ nyii m̀aa waai.” 16Yâwɛɛ è mò Mose ǹyɛɛi, 17“M̀ó Eelɔŋ ma a gɛɛ ǹóŋ nyii gɔ̃liŋɔɔi vé mii-sɛŋ sala kula Ɣâla ma. Dɔ̂ŋ ŋí káa ŋɔsuui kélee mɛni ma wɔlɔ-wɔlɔ da wɔlɔ-wɔlɔ. 18Ǹúui nyii kélee gɔ̃liŋɔɔi vé pà ŋ̀âla-teƃelei kɔlɛ, a nɛ̃ɛ ma é kɛ́ a ŋɛi pu nuu, kpaa máŋ kɔɔ pu nuu, kpaa máŋ ŋowo da kôyaa é tɛ́ɛ m̀arâai dîa máŋ nuui nyii ŋowo da teɛɛi m̀ai, 19kpaa máŋ nuui sɛŋ ŋánaa é gɛ̀ gɔ́ɔ kpaa máŋ ǹyée mai, 20kpaa máŋ kpîri-kpaŋ namu, kpaa máŋ kunu nuu, kpaa máŋ nuu nyii kɔlɔ fela káa ŋɛ́i, kpaa máŋ gbono mai, kpaa máŋ nuu nyii gbaŋ-kao fé zui. 21Eelɔŋ nyii gáa a zâla láa soŋ-nuui ǹóŋ nyii gɔ̃liŋɔɔi vé pà a gɛɛ é Yâwɛɛ ŋɔmii-sɛŋ sala-sɛŋ kéreŋ. 22A pɔ̂ri mii-sɛŋ sala-sɛŋ da mîi nyii maa waai Yâwɛɛ mɛni mai. 23Kɛ́lɛ vé pà zeɣe-ƃelai nyii sɛlɛnii kɔlɛ gwaa ma waai ŋɛ́i tuɛ kpaa máŋ ŋ̀âla-teƃelei kɔlɛ. À gɛ̀ tí gɛ̀ ní a ƃâa kula ŋá kwa ma waai ḿâ. Ńyãa ƃa Yâwɛɛ nyii dímaa waai.” 24Nya ƃe Mose è m̀ɛni-ŋai ŋí ƃò Eelɔŋ ma da ǹônii é pɛ́lɛ Eezuɛ-ŋai kélee dîa.
Currently Selected:
Levetekɔ 21: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia