Nɔŋba 1
1
Eezuɛ-ŋai lóno-mɛni maa-ŋuŋ
1Yâwɛɛ è lòno Mose pɔ́ Ɣâla ŋɔsua kɔlɔ seɣe pɛrɛ maa waai mu Sana Yeei mâ vɛ̃ɛ-kpâlaŋ su. È kɛ̀ góraŋ veerɛi su ŋaloŋ veerɛi ŋɔɣele-kuui m̀aa-ŋuŋ díkulaa Ize lɔii su pôlu ma. È lòno bɔ́ ǹyɛɛi, 2“Ka Eezuɛ-ŋai kélee lóno dísuu mâ da dípɛrɛ-ŋai yɛ̂ɛ berei dílaa káa lai. Ka zinâai kélee lóno. 3Zinâai nyii-ŋai díkoraŋ káa é síɣe buu feerɛ ma é tɛ́ tuɛ-pere, nyii-ŋai da pɔ̂ri kɔ́ kɔ̂i. Ka Eelɔŋ ká dílono díkpulu mâ. 4Ka núu tɛi-tɛi kúla dísuu tɛi-tɛi kélee su, nyii-ŋai díkaa dínâŋ-ni dípɛrɛi-ŋai mɛi a gɛɛ dí kpɔŋ kâa. 5Ǹyaŋ maa-ƃelai láa ká ŋí. Sidu ǹóŋ Ilizu, nyii kùla Lubiŋ ŋɔsuui sui, 6Zurisadai ǹóŋ Silumiɛ, nyii kùla Simiɔŋ ŋɔsuui, 7Aminɛda ǹóŋ Nasuŋ, nyii kùla Zuda ŋɔsuui sui, 8Zûa ǹóŋ Nɛtaniɛ, nyii kùla Isaka ŋɔsuui sui, 9Ɛlɔŋ ǹóŋ Ilia, nyii kùla Zɛbulɔŋ ŋɔsuui sui, 10Amiyu ǹóŋ Ilisama, nyii kùla Zosɛ ǹóŋ Ifiraŋ ŋɔsuui sui, da Pedazɔ ǹóŋ Gamaliɛ, nyii kùla Zosɛ ǹóŋ Manasɛ ŋɔsuui sui, 11Gidioni ǹóŋ Abidaŋ, nyii kùla Bɛŋsima ŋɔsuui sui, 12Amisadai ǹóŋ Aizɛ, nyii kùla Daŋ ŋɔsuui sui, 13Okaŋ ǹóŋ Pagiɛ, nyii kùla Asɛ ŋɔsuui sui, 14Dɛuɛ ǹóŋ Iliasa, nyii kùla Gâa ŋɔsuui sui, 15Inaŋ ǹóŋ Aila, nyii kùla Nɛfɛtɛli ŋɔsuui sui.” 16Ǹûai ká ŋí dí dílɛ̀, nyii-ŋai kɛ̀ a dísuu-ŋai túɛ-ƃela da dínâŋ-ni dípɛrɛ-ŋai mɛi-ƃelai.
17Mose da Eelɔŋ dí ǹûai ŋí sìɣe, nyii-ŋai dí dílaa siɣei, 18dí ǹûai kélee ŋá tɛ̀ díkîe ma a maa ŋ̀elei tí. Dí ǹûai láa sìɣe dísuu mâ da dípɛrɛi-ŋai yɛ̂ɛ berei dílaa káa lai. Dí dílòno yɛ̂ɛ berei díkoraŋ káa la é síɣe kóraŋ buu feerɛ ma é tɛ́ tuɛ-pere, 19yɛ̂ɛ berei Yâwɛɛ è mò la Mose mai. È dílòno Sana Yeei ma fɛ̃ɛ-kpalaŋ su.
20-46Zinâai nyii-ŋai díkoraŋ è kɛ̀ é síɣe kóraŋ buu feerɛ ma é tɛ́ tuɛ-pere, nyii-ŋai da pɔ̂ri kɛ̀ kɔ́ kɔ̂i, dí dílaa sìɣe yɛ̂ɛ berei dísuui è kɛ̀ la da dípɛrɛ-ŋai. Dí gɔ́ɔ pìlaŋ Lubiŋ ŋɔsuui mâ nyii kɛ̀ a Zeeka ǹóŋ-surɔŋ maa-ŋuŋ. Maa-nûai kélee láa ká ŋí da dínɔŋbai-ŋai. Lubiŋ, wála buu náa káo lɔ́ɔlu mɛi da pôlu ŋuŋ lɔ́ɔlu (46,500). Simiɔŋ, wála buu lɔ́ɔlu káo lɔ́ɔlu mɛi náaŋ pôlu ŋuŋ saaƃa (59,300). Gâa, wála buu náaŋ káo lɔ́ɔlu pôlu ŋuŋ lɔ́ɔlu mɛi da pôlu buu lɔ́ɔlu (45,650). Zuda, wála buu lɔ́ɔlu mɛi feerɛ káo náaŋ pôlu ŋuŋ lɔ́ɔlu mɛi da (74,600). Isaka, wála buu lɔ́ɔlu káo náaŋ pôlu ŋuŋ náaŋ (54,400). Zɛbulɔŋ, wála buu lɔ́ɔlu káo lɔ́ɔlu mɛi-feerɛ pôlu ŋuŋ náaŋ (57,400). Ifiraŋ, wála buu náaŋ pôlu ŋuŋ lɔ́ɔlu (40,500). Manasɛ, wála ŋuŋ saaƃa káo feerɛ pôlu ŋuŋ feerɛ (32,200). Bɛŋsima, wála buu saaƃa káo lɔ́ɔlu pôlu ŋuŋ náaŋ (35,400). Daŋ, wála buu lɔ́ɔlu mɛi-da káo feerɛ pôlu ŋuŋ lɔ́ɔlu mɛi feerɛ (62,700). Asɛ, wála ŋuŋ náaŋ káo tɔnɔ pôlu ŋuŋ lɔ́ɔlu (41,500). Nɛfɛtɛli, wála buu lɔ́ɔlu káo saaƃa pôlu ŋuŋ náaŋ (53,400). Gélee púɔɔ gîe mà è kɛ̀ a wála ŋuŋ lɔ́ɔlu mɛi da káo saaƃa pôlu ŋuŋ lɔ́ɔlu pôlu buu lɔ́ɔlu (603,550).
47Kɛ́lɛ dífe Livai-ŋai láa siɣe ní. 48Kpɛni fêi, Yâwɛɛ è mò Mose ma ǹyɛɛi, 49“Ífe Livai-ŋai láa sìɣe. Ífe dílono Eezuɛ-ŋai sáma. 50Kɛ́lɛ Livai-ŋai kɛ́ ŋásua kɔlɔ seɣe pɛrɛ maa waai mɛi da maa-sãa kélee. Dia nɔ́ ƃa pɔ̂ri liî a maa sãa kélee. Ƃɛ́i kélee da lî naai dí bîlaŋ, dí díƃûui tɔ́o dí dínaŋ ma. Dia nɔ́ ƃa pɔ̂ri tíi kɛ̂i mu. 51Livai-ŋai nɔ́ ƃa pɔ̂ri ŋásua kɔlɔ seɣe pɛrɛ maa waai pîlanii dí gula. Núu da kpɛ́ni kélee à lɛ̀ɣɛ ŋásua kɔlɔ seɣe pɛrɛ maa waai kɔlɛ, maa-nuui a pâi sâai. 52Fɛ̂ɛ Eezuɛ-ŋai gbeli-ŋai dí díƃûu-ŋai tɔ́ɔ díƃenâ-ŋai mu díkpulu ma yɛ̂ɛ berei dísuu-ŋai láa káa lai. 53Kɛ́lɛ Livai-ŋai nɔ́ ƃa pɔ̂ri díƃûui tînanii zua kɔlɔ seɣe pɛrɛ maa waai ma, dí mɛi káa a gɛɛ núu da fé la pá la naa é ŋ́gɛ ńii é ŋwána Eezuɛ-ŋai dîa.” 54Ǹyaŋ bere nɔ́ ƃé Eezuɛ-ŋai dí gɛ̀ la. Dí gɛ̀ nɔ́ yɛ̂ɛ berei Yâwɛɛ è mò la Mose mai.
Currently Selected:
Nɔŋba 1: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia