Nɔŋba Tuɛ mɛni ƃóɔɔ
Tuɛ mɛni ƃóɔɔ
Ŋ̀âla-kɔlɔi su-kɔlɔ-ŋai nyii-ŋai díkaa Gbanaŋ-woo-kɛɛ Pɔlɔi sui, ǹáaŋ ɣelei ká ŋí. Ǹyaŋ Nɔŋba-kɔlɔi ŋí a Eezuɛ-ŋai maa-mɛni pɔlɔi lɛ́ kûa góraŋ buu náaŋ yée mu é síɣe tãi mâ dí kùla la Sana Yeei mâ dí lí ǹɔii koyaŋ ma vóloi kulâi pere nyii Ɣâla è góno tèe la díyêei a gɛɛ é dɛɛ dípɔi. Gɔlɔi ŋí láa a è kùla Eezuɛ-ŋai lóno mɛni su nyii Mose è gɛ̀ gîei feerɛ gɔlɔi ŋí sui. È ǹûai lòno a maa-ŋuŋ dí lɛ́ɛ pâi kulâi Sana Yeei mâ. Nàa pôlu ma è dílono ŋɔ́nɔ Môa lɔii su Zɔdiŋ Ya-leei lá vóloi kulâi pere kóraŋ buu saaƃa tɛɛ pôlu ma. É síɣe tãi ma dí Eezuɛ-ŋai lòno la a maa-ŋuŋ é lí tãi ma dí dílòno la ŋɔ́nɔ a veerɛ-ɣelei, Eezuɛ-ŋai dí seri Kedɛ Bania Keena lɔii kwára-pere. Kɛ́lɛ dífe pɔ̂ri ní tɛɛ̂i naa-pere a gɛɛ dí lí gono-tee lɔii ma. Kóraŋ támaa tɛɛ pôlu ma dí kɛ́ɛ naa-perei, dí ŋɔ́nɔ lì Zɔdiŋ Ya-leei vóloi kulâi-pere. Nàa ƃé díta-ni dí sèe na, kɛ́lɛ núui gbêli-ŋai dí díkpîŋ kpɛ̀tɛ a gɛɛ dí Zɔdiŋ Ya-leei tíyeŋ dí lí Keena lɔii su.
Nɔŋba-kɔlɔi a mɛni-ŋai lɛ̀ kûa é pîlaŋ la ǹûai dîa diai dí líi è tòo pôlu a tãi támaa, díkɛ yào ŋɔ́nɔ a gɛɛ dí mɛni-soli káa, díkɛ tɔɔ Ɣâla ma da Mose nyii Ɣâla è zèe dímɛi. Gáa a mɛni pɔlɔ é pîlaŋ la Ɣâla ŋɔlaa-lai ma da ŋɔwɛli kɛ́-maai nyii gáa ŋɔnûai mɛni ma. Ɣâla è kɛ̀ a gbáaŋɔɔ dímɛni ma a nɛ̃ɛ ma máŋ dí kɛ́ a fii-kpɛɛ da woo-kara-ƃela. Gáa a mɛni pɔlɔ é pîlaŋ Mose mà nyii kɛ̀ a fɔrɔ-nuu. Berei máŋ ǹíi è ŋwàna la diai, kɛ́lɛ é gbîŋ tɛɛ Ɣâla pɔ́ da ŋɔnûai.
M̀ɛni-ŋûŋ-ŋai gɔlɔi ŋí sui
Eezuɛ-ŋai da díkpîŋ kpɛtɛ a gɛɛ dí kúla Sana Yeei ma (1:1--9:23)
Ǹûai lónoɔɔ maa-ŋuŋ (1:1--4:49)
Tɔ̂ŋ da kpɛ́ni-ŋa (5:1--8:26)
Dɛɛ Mɛi Kûui veerɛi (9:1-23)
É síɣe Sana Yeei ma é tóo Môa (10:1--21:35)
M̀ɛni-ŋai kɛ̀ Moai (22:1--32:42)
M̀ɛni-ŋai kélee kɛ̀ berei ma é síɣe Ize é tóo Môa (33:1-49)
M̀ɛni-ŋai maa nɛ̃ɛ̂i dí gɔ́lɔŋ dí lɛ́ɛ pâi Zɔdiŋ Ya-leei tíyeŋ nii (33:50--36:13)
Currently Selected:
Nɔŋba Tuɛ mɛni ƃóɔɔ: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia