Nɔŋba 23
23
1Nya ƃe Bâlaŋ è mò Bâla mà, ǹyɛɛi, “Ɣâla-teƃele lɔ́ɔlu mɛi feerɛ tɔ́ɔ mî ƃɛ́, í pá a niŋa-sirɛ lɔ́ɔlu mɛi feerɛ da ƃála-sirɛ lɔ́ɔlu mɛi feerɛ.” 2Bâla è gɛ̀ yɛ̂ɛ berei Bâlaŋ è mò la mai. Bâla da Bâlaŋ dí sâla kùla ŋ̀âla-teƃele-ŋai dîa tɛi-tɛi a niŋa-sirɛ tɔnɔ tɔ́nɔ da ƃála-sirɛ tɔnɔ tɔ́nɔ. 3Bâlaŋ è mò Bâla mà ǹyɛɛi, “Tɔɔ íkereŋ-salai kɔlɛ. Ŋa pâi liî ŋá gáa a kɛ̀ Yâwɛɛ a ŋ̀wɛ̂lii é lóno ḿbɔ. Mɛnii kélee a pâi nɛ̂i mâi, ŋa pâi môi yâ.” Nya ƃe è lì é tɛ́ yée tɔnɔ tôŋ su. 4Nàa ƃé Ɣâla è gbîŋ lɛ̀ naa Bâlaŋ mà. Bâlaŋ è mò mà ǹyɛɛi, “Ŋá Ɣâla-teƃele lɔ́ɔlu mɛi feerɛ tɔ̀ɔ. Ŋá sâla kùla dîa tɛi-tɛi a niŋa-sirɛ tɔnɔ tɔ́nɔ da ƃála-sirɛ tɔnɔ tɔ́nɔ.”
5Nya ƃe Yâwɛɛ è ŋ̀óo tɛ̀ɛ a Bâlaŋ ǹyɛɛ mai, “Lí pôlu í ŋ̀óo-ŋai ŋí ƃó Bâla ma.” 6Nya ƃe è lì pôlu é Bâla da ŋɔnúu túɛ-ƃelai kélee káa tɔɔ ni ŋɔkéreŋ-salai kɔlɛ.
7Nya ƃe Bâlaŋ è ŋ̀óo-ŋai ŋí ƃò ǹyɛɛi,
“Môa kaloŋ Bâla è ŋ́gula,
Siria vóloi-kulai pere yee-ŋai ma.
Ǹyɛɛ mâ, ‘Pa í Zeeka fóo ḿî.
Pá í kpalo ƃéla Eezuɛ-ŋai dîa.’
8Ŋa pɔ̂ri dífôoi léŋ ǹyaŋ Ɣâla fé dífoo ni?
Ŋa kpalo ƃéla dîa léŋ ǹyaŋ Yâwɛɛ fé kpalo ƃéla ní dîa?
9Ŋ́gaa tɔɔ ni kɔni-yeei tôŋ su ŋ́gɛ díkaa.
Ŋ́gaa ǹyéei ma ŋ́gɛ dímaa kpɛɛ.
Dí káa nɔ́ a lɔii-ŋuŋ nyii gáa seêi nɔ́ ǹya tee-tee.
Dífa díkpîŋ sìɣe yɛ̂ɛ lɔii da kpɛ́ni su-ƃela.
10Zeeka ŋɔsuui-su ƃelai tâmaai yɛ̂ɛ ŋɛya.
Núu fa pɔ̂ri dí lônoi.
Tɔɔ ŋá sáa yɛ̂ɛ Ɣâla ŋɔnûai.
Tɔɔ ŋá sáa yɛ̂ɛ deniŋ ƃô ƃelai.”
11Nya ƃe Bâla è mò Bâlaŋ mà ǹyɛɛi, “Lé ƃé ŋí ƃa gɛ́ a ńyãai? Ŋá ítòli ƃɛ́ a gɛɛ é ŋákpɔara-ƃelai fóo, kɛ́lɛ íkaa nɔ́ lûwa tôoi dîa.”
12Bâlaŋ è ŋ̀óo su tòo ǹyɛɛi, “Mɛnii nɔ́ ŋa pɔ̂ri môi ǹya ƃa nyii Ɣâla a bù ńaai.”
Bâlaŋ ŋɔɣala-woo-ƃoɔɔi veerɛi
13Nya ƃe Bâla è mò Bâlaŋ mà ǹyɛɛi, “Kú lí kwaa ta kpɛ́ni ma ƃɛ́i ƃa pɔ̂ri Eezuɛ-ŋai da-ni kâai naai. Nàa ƃé í dífoo naa ḿî.” 14È lì la Zofiŋ ǹɔɔi su Piga yeei tôŋ su. È Ɣâla-teƃele lɔ́ɔlu mɛi feerɛ tɔ̀ɔ naa é niŋa-sirɛ tɔnɔ da ƃála-sirɛ tɔnɔ kula dîa tɛi-tɛi a sâla. 15Bâlaŋ è mò Bâla mà ǹyɛɛi, “Tɔɔ ƃɛ́ íkereŋ-salai kɔlɛ, ŋá lí ŋá gáa a kɛ̀ Yâwɛɛ a ŋ̀wɛ̂lii é lóno ḿbɔ.” 16Nya ƃe Yâwɛɛ è ŋ̀óo tɛ́ɛ a Bâlaŋ ǹyɛɛ mai, “Lí pôlu í ŋ̀óo-ŋai ŋí ƃó Bâla ma.” 17Nya ƃe è lì pôlu é Bâla da Môa-nuu túɛ-ƃelai káa tɔɔ ni ŋɔkéreŋ-salai kɔlɛ. Bâla è marê kɛ̀ ǹyɛɛ mai, “Yâwɛɛ ǹyɛɛ lé?” 18Nya ƃe Bâlaŋ è ŋ̀óo-ŋai ŋí ƃò ǹyɛɛi,
“Zîpo ǹóŋ Bâla pá,
Íwoli tɔ́ɔ ŋ́oo mà.
19Ɣâla fa lɛ́ɛ kɛ̀ yɛ̂ɛ berei núu kpune a gɛ̀ lai.
Va ǹíi maa fâleŋ yɛ̂ɛ berei núu-kpune a gɛ̀ lai.
A ŋɔkono-tee-wooi ŋ̀á-see kɛ̀.
Mɛnii a mòi, a ŋ̀á-see kɛ̀.
20Ɣâla a ŋ́gɛ a gɛɛ ŋa ŋɔlûwai tóo,
Mɛni mà fa pɔ̂ri ŋɔlûwa-wooi maa falenîi.
21Ŋa gáa a gɛɛ Eezuɛ ŋɔtínaa tuɛ-pere,
Mɛni kpɔ̂lu fé pâi kulâi mà, kpaa máŋ mɛni-sôli.
Yâwɛɛ, Díɣâlai káa díkɔlɛ.
Da mò dîɛ ǹyaa ƃa Díkâloŋ ma.
22Ɣâla a díkùla Ize lɔii su,
A kɔ̀ dímaa mɛ̂ni mà yɛ̂ɛ tou-sirɛ.
23Núu ŋɔsále nyɔ́mɔɔ kpaa máŋ wulu-nuu
Fa sɛŋ tá kɛ̀ a Eezuɛ ŋɔnûai.
Dímaa tɛli kpɛ́ɛ káa nɔ́ kpɛ́ni-kpɛni.
Nûa da pâi môi dîyɛɛi,
‘Ka mɛnii káa Ɣâla a gɛ́ dîɛi.’
24Eezuɛ káa yɛ̂ɛ yala-sulu wála-walaa.
Víi fa kpɛ̀ɛ é lɛ́ɛ la zu é ǹáa-mii suai,
É lɛ́ɛ la zu é diai è dí pâai ŋãa kpéle.”
25Nya ƃe Bâla è mò Bâlaŋ mà ǹyɛɛi, “À kɛ̀ ƃà wàla kɛ́ ŋ̀wɛ̂lii í Eezuɛ-ŋai fóo, ífe lûwa làa dîa.”
26Bâlaŋ è ŋ̀óo su tòo ǹyɛɛi, “Fé m̀ó ní yâ a gɛɛ mɛnii nɔ́ ŋa pɔ̂ri môi ǹya ƃa nyii Ɣâla a bù ńai?”
Bâlaŋ ŋɔɣâla-woo Ƃóɔɔ zaaƃai
27Bâla è mò ǹyɛɛi, “Pá kú lí kwaa da kpɛ́ni ma. Tãi da Ɣâla a pâi fâai ma a gɛɛ í Eezuɛ-ŋai fóo naa mî.” 28Nya ƃe dí tɛ̀ Pio yeei tôŋ su nyii dɔɔ̂i vɛ̃ɛ-kpâlaŋ mɛi. 29Bâlaŋ è mò mà ǹyɛɛi, “Ɣâla-teƃele lɔ́ɔlu mɛi feerɛ tɔ́ɔ mî ƃɛ́ í pá a niŋa-sirɛ lɔ́ɔlu mɛi feerɛ da ƃála sirɛ lɔ́ɔlu mɛi feerɛ.” 30Bâla è gɛ̀ yɛ̂ɛ berei Bâlaŋ è mò la mai, é sâla kula ŋ̀âla-teƃele-ŋai dîa tɛi-tɛi a niŋa-sirɛ tɔnɔ tɔ́nɔ da ƃála-sirɛ tɔnɔ tɔ́nɔ.
Currently Selected:
Nɔŋba 23: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia