Nɔŋba 24
24
1Tãi Bâlaŋ è nâa gɔ̀lɔŋ la a gɛɛ gáa a Yâwɛɛ nîa-mɛni a gɛɛ é lûwa láa Eezuɛ-ŋai diai, vé ŋɔ́nɔ ŋɛi-kɛ-ma-sãa kɔ́ri-ni yɛ̂ɛ berei è gɛ̀ la a bɔlɔi, kɛ́lɛ è tìnaŋ vɛ̃ɛ-kpâlaŋ pɔ́ naa-pere. 2Nàa ƃé è Eezuɛ-ŋai kàa naa díƃûu-ŋai púɔɔ dísuu ma tɛi-tɛi. Yâwɛɛ ŋɔmɔ̂leŋ è pà bɔ́, 3gɛ́ ŋ̀óo-ŋai ŋí ƃò.
“Beo ǹóŋ Bâlaŋ wóo-ŋa ká ŋí.
Ǹúui a kwaa kâai ŋ̀óo ká ŋí,
4Ǹúui a Ɣâla wóo mɛ̀ni
Ŋá zĩa kàa a ŋá kwaa káa ŋɛ́i
Zĩai nyii kula Ŋ̀wála-wâla kélee Ɣalai yêei.
5Óo Eezuɛ, ŋɔƃûu-ŋai lɛ̂lɛɛi,
6Díkaa yɛ̂ɛ diŋ-tiŋ su-kɛ́tɛ gɛ̀ lì kwaa kôya-mà.
Díkaa yɛ̂ɛ sûa-ŋa nyii gáa yá kɔlɛi.
Yɛ̂ɛ wúru kuŋ nɛ̃ɛ nyii Yâwɛɛ è zìi.
Kpaa máŋ yɛ̂ɛ sîda wuru nyii dɔɔ̂i yá kɔlɛi.
7Tuna támaa a pâi pûi dílɔii su
Da pâi ŋɔsí-sɛŋ sîi yá-lɔii ma.
Díkâloŋ ŋɔkâloŋ-laai a pâi kɛ̂i a gɛtɛ tɛ́ɛ Aga
Ŋɔkâloŋ-laa a pâi kɛ̂i a zu kɛ́tɛ.
8Ɣâla è díkùla Ize lɔii su,
Gɛ́ kɔ̀ dímɛni ma yɛ̂ɛ tou-sirɛ.
Eezuɛ a ŋɔkpɔara-ƃelai su karâi,
É díkao ɣále-ɣale é díŋɔtɔ̃a-ŋai kara.
9Eezuɛ káa yɛ̂ɛ yala-sulu wála-walaa.
A kɛ̀ nyîi, núu da fé naa é lɛ́ɣɛ mà.
Ǹúui a lûwa làa Eezuɛ mai lûwa káa mà.
Ǹúui a Eezuɛ fooi, foo-woo a pâi kɛ̂i maa ǹúui ma.”
10Nya ƃe Bâla líi è ŋwàna Bâlaŋ ma é ǹyée ŋá túa, ǹyɛɛ mai, “Ŋá ítòli a gɛɛ í ŋákpɔara-ƃelai fóo. Kɛ́lɛ gáa ƃa lûwa láa dîa gîei saaƃa. 11Mɛni ma kula ƃɛ́ í lí pôlu ípɔ-naa. Ŋá ŋ́gono tée íyêei a gɛɛ ŋa pâi íbɛlɛ seêi, kɛ́lɛ Yâwɛɛ fé fáa ní ma.”
12Bâlaŋ è ŋ̀óo su tòo ǹyɛɛ mai, “Ŋá mò íkela-ŋai dîa, 13a gɛɛ a nɛ̃ɛ ma kpîŋ í ípɛrɛi láa fɛ́ɛ a káne da gôo í dɛɛ ḿbɔ, fa pɔ̂ri Yâwɛɛ wóo pilîi a dɔnɔ kpîŋ. Mɛnii nɔ́ Yâwɛɛ a pâi môi ḿâi, ǹyaa nɔ́ ƃé ŋa pâi gɛ̂i.”
Bâlaŋ ŋɔɣâla-woo ƃóɔɔi gbɛɛ-ŋai
14Gáa, ŋa pâi liî pôlu ŋánûai pɔ́ naa kɛ́lɛ ŋá lɛ́ɛ pâi liî pôlu, ŋa pâi mɛnii lɛ̂i yâ Eezuɛ-ŋai da pâi gɛ̂i a ínûai tínaa-tuɛ-perei. 15Nya ƃe è ŋ̀óo-ŋai ŋí ƃò ǹyɛɛi,
“Bêɔ ǹóŋ Bâlaŋ wóo ká ŋí.
Ǹúui a kwaa kâa a ǹɛ́lɛɛi ŋ̀óo ká ŋí.
16Ǹúui a m̀ɛnii mɛ̂ni Ɣâla a mòi,
è dárei kɔ́lɔŋ a kûla Ŋ̀wála-wâla kélee Ɣalai yêei.
Ŋá zĩa kàa a ŋákwaa káa ŋɛ́i.
Zĩai nyii kula Ŋ̀wála-wâla kélee Ɣalai yêei
17Ŋa tinaa-tuɛ pere kàa,
ǹya ƃe ŋá Eezuɛ lɔii kâa.
Kâloŋ tɔnɔ a pâi kulâi dílɔii su gɛ́ fòlo yɛ̂ɛ pɛmɛlɛŋ-kao.
Kâloŋ-wuru a pâi kulâi Eezuɛ.
A pâi Môa-ŋai tuɛ-ƃelai su karâi.
É Sɛ̂ ŋɔsuui su-ƃelai kélee yée mɛi ɣále.
18A pâi ŋɔkpɔara-ƃelai yée mɛi ɣalêi Idɔŋ.
É dílɔii kɛ́ a gɔ̂liŋ.
A pâi kɛ̂i nɔ́ a ŋwala-walaa.
19Eezuɛ lɔii a pâi kɛ̂i ŋɔkpɔara-ƃelai mɛi,
ǹyaŋ a pâi diai lɛɛ a dífului yée mɛi ɣâlei dítaa-lee-ŋai su.”
20Tãi Bâlaŋ è Amɛlɛka-ŋai kàa la zĩai sui è ŋ̀óo-ŋai ŋí ƃò ǹyɛɛi,
“Amɛlɛka-ŋai dílɔii ƃé kɛ̀ a ǹɔii maa-ŋuŋ,
kɛ́lɛ dísu a pâi pûi a tãi gbɛɛ-ŋa wɔlɔ-wɔlɔ da wɔlɔ-wɔlɔ.”
21Tãi è Kɛŋ-ŋai kàa la zĩai sui, è ŋ̀óo-ŋai ŋí ƃò ǹyɛɛi,
“Berei máŋ Kataai tɔɔ̂i lɛ̂lɛɛi lai,
berei máŋ kápɛrɛ-ŋai tɔɔ̂i la kɔni-wolo sui,
22É máŋ kɛ́ tí, Asiria-ŋai da pâi káai a Kɛŋ-ŋai káyee mɛi ɣâlei
Asiria a pâi ká kɛ́ a kɔ-soŋ-ŋa.”
23Bâlaŋ è ŋɔ́nɔ zĩai-su wóo-ŋai ŋí ƃò ǹyɛɛi,
“Gbɛ̂ɛ ƃé pâi lɛ̂ɛi ɣele mâ tãi Ɣâla a pâi nyiŋi kɛ̂i lai?
24Ǹûai da pâi kulâi Kitiŋ lɔii su
Da pâi Asiria-ŋai da Ɛƃɛ-ŋai yée-mɛi ɣâlei.
Kɛ́lɛ dia máŋ da pâi sâai wɔlɔ-wɔlɔ da wɔlɔ-wɔlɔ.”
25Nya ƃe Bâlaŋ è mù sìɣe é lí bɔ́ taai. Bâla máŋ è lì bɔ́ naa pere.
Currently Selected:
Nɔŋba 24: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia