تكوين 33
33
يوم مُلاقاة يَعْقُوب مع عِيسُو
1وَ يَعْقُوبْ رَفَعْ رَاسَهْ وَ شَافْ أَخُوهْ عِيسُو جَايِ بِـ 400 رَاجِلْ مَعَايَهْ. وَ يَعْقُوبْ قَسَّمْ عِيَالَهْ أَمْبَيْن لَيْئَةْ وَ رَاحِيلْ وَ خَدَّامَاتَهْ الْإِتْنَيْن. 2وَ قَدَّمْ الْخَدَّامَاتْ قِدَّامْ مَعَ عِيَالْهُمْ وَ وَرَاهُمْ لَيْئَةْ مَعَ عِيَالْهَا وَ فِي الأَخِيرْ رَاحِيلْ مَعَ يُوسُفْ. 3وَ يَعْقُوبْ كَمَانْ قَدَّمْ قِدَّامْهُمْ وَ سَجَدْ سَبْعَةْ مَرَّاتْ لَحَدِّي قَرَّبْ لِأَخُوهْ.
4وَ عِيسُو جَرَى لَاقَى أَخُوهْ، حَضَنَهْ وَ حَبَّاهْ وَ هُمَّنْ التِّنَيْن قَمَّوْا بَكَوْا. 5وَ بَعَدْ دَا، عِيسُو رَفَعْ رَاسَهْ وَ شَافْ الْعَوِينْ وَ الْعِيَالْ وَ قَالْ: «دَوْل يَاتُمَّنْ الْمَعَاكْ؟» وَ يَعْقُوبْ قَالْ: «دِي الرَّحْمَةْ الْأَنْطَاهَا الرَّبّ لَيِّ أَنَا عَبْدَكْ.»
6وَ الْخَدَّامَاتْ قَرَّبَوْا مَعَ عِيَالْهُمْ وَ سَجَدَوْا. 7وَ لَيْئَةْ كُلَ قَرَّبَتْ مَعَ عِيَالْهَا وَ سَجَدَوْا. وَ بَعَدْ دَا، قَرَّبْ يُوسُفْ مَعَ رَاحِيلْ كُلَ سَجَدَوْا.
8وَ عِيسُو قَالْ: «تِدَوْر تِسَوِّي شُنُو بِكُلَّ الْمَالْ الْأَنَا لَاقَيْتَهْ؟» وَ يَعْقُوبْ قَالْ لَيَّهْ: «نِدَوْر تَرْضَى لَيِّ، يَا سِيدِي.» 9وَ عِيسُو قَالْ: «أَنَا عِنْدِي مَالْ كَتِيرْ. خَلِّي مَالَكْ يَقْعُدْ لَيْك، يَا أَخُويِ.» 10وَ يَعْقُوبْ قَالْ: «لَا. كَنْ إِنْتَ رَضْيَانْ بَيِّ، أَقْبَلْ هَدِيّتِي الْقَدَّمْتَهَا لَيْك. أَنَا مِنْ شِفْت وِجْهَكْ دَا، مِثِلْ شِفْت وِجِهْ الرَّبّ أَشَانْ إِنْتَ رِضِيتْ لَيِّ. 11وَ هَسَّعْ دَا أَقْبَلْ مِنِّي هَدِيّتِي الْقَدَّمْتَهَا لَيْك أَشَانْ الرَّبّ أَنْطَانِي نِعْمَةْ وَ عِنْدِي كُلَّ شَيّءْ.» وَ يَعْقُوبْ حَنَّسَهْ وَ خَلَاصْ عِيسُو قِبِلْ.
12وَ عِيسُو قَالْ لَيَّهْ: «قُمّ نَمْشُوا وَ أَنَا نَمْشِي مَعَاكْ فِي مَشِيكْ.» 13وَ يَعْقُوبْ رَدَّ لَيَّهْ وَ قَالْ: «يَا سِيدِي، إِنْتَ تَعَرِفْ كَدَرْ الْعِيَالْ ضَعِيفِينْ وَ عِنْدِي مَعَايِ الْغَنَمْ وَ الْبَقَرْ الْبِرَضُّعُوا. وَ كَنْ عَصَرْتُهُمْ فِي يَوْم وَاحِدْ، كُلَّ الْبَهَايِمْ يُمُوتُوا. 14مِنْ فَضْلَكْ، يَا سِيدِي، هَسَّعْ دَا إِنْتَ قَدِّمْ قِدَّامِي. وَ أَنَا عَبْدَكْ كَمَانْ نُرُوغْ بِشَيْش فِي رُوَاغَةْ هَنَا الْبَهَايِمْ وَ فِي رُوَاغَةْ هَنَا الْعِيَالْ لَحَدِّي نَوْصَلَوْا بَكَانَكْ إِنْتَ سِيدِي فِي سَعِيرْ.» 15وَ عِيسُو قَالْ لَيَّهْ: «وَ كَنْ كَيْ دَا، نِخَلِّي مَعَاكْ مِنْ نَاسِي الْجِينَا سَوَا.» وَ يَعْقُوبْ قَالْ: «وَ مَالَا؟ أَنَا مِنْ لِقِيتْ رِضَاكْ دَا، خَلَاصْ يَا سِيدِي!» 16وَ خَلَاصْ فِي نَفْس الْيَوْم عِيسُو قَبَّلْ سَعِيرْ.
يَعْقُوب في كَنْعَان
17وَ يَعْقُوبْ قَمَّ مَشَى سُكُّوتْ وَ بَنَى لَيَّهْ بَيْت وَ كُوزِي لِبَهَايْمَهْ. أَشَانْ دَا بَسْ، سَمَّوْا الْبَكَانْ دَا سُكُّوتْ (مَعَنَاتَهْ لِقْدَابَةْ). 18وَ يَعْقُوبْ تَابَعْ سَفَرَهْ مِنْ فَدَّانْ أَرَامْ لَحَدِّي وَصَّلْ بِصِحَّةْ وَ سَلَامَةْ فِي حِلَّةْ شَكِيمْ الْقَاعِدَةْ فِي بَلَدْ كَنْعَانْ. وَ هُو قَابَلْ الْحِلَّةْ دِي وَ سَكَنْ. 19وَ شَرَى مِنْ عِيَالْ حَمُورْ أَبُو شَكِيمْ بَكَانْ الْبَنَى فَوْقَهْ خَيْمِتَهْ بِمِيَةْ حَجَرْ فُضَّةْ. 20وَ فِي الْبَكَانْ دَا، بَنَى لَيَّهْ مَدْبَحْ لِيِقَدِّمْ فَوْقَهْ ضَحِيَّةْ لِلرَّبّ وَ سَمَّاهْ أَيْل إِلٰـهْ بَنِي إِسْرَائِيلْ.
Currently Selected:
تكوين 33: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
