ዮሃኒሳ 4

ዬሱሳኔ ሳማሪያ ሚሺራቶ

1-3ዬሱሲ ዮሃኒሳዋፔ ዳሪያ ባሬና ካሊያዋንታ ባሬኮ ሺሼኔ ፃማቄ ጊያዋ ፓሪሳዋቱ ሲሴዳዋ ዬሱሲ ኤሬዳ ዎዴ፥ ዪሁዳ ኣጊዴ፥ ጋሊላ ቤዳ፤ ጊዶፔኔ፥ ዬሱሳ ካሊያዋንቱ ፃማቄዳዋፔ ኣቲን፥ ዬሱሲ ባሬ ሁጴው ኦናኔ ፃማቂቤና። 4ጋሊላ ቢዴ፥ ሳማሪያና ኣናዌ ኣ ኣሼናባ ጊዴዳ።

5ሄዋ ዲራው፥ ያዪቆቢ ባሬ ናዓ ዮሴፎ ኢሜዳ ጋዲያ ማታን ዴዒያ ሲካሮ ጌቴቲያ ሳማሪያ ካታማ ቤዳ። #ዶም 33፡19፤ ኢያ 24፡32 6ሄ ሳዓን ያዪቆባ ሃ ኦላይ ዴዔ፤ ዬሱሲ ሃሜታን ዳቡሪዴ፥ ሄ ሃ ኦላ ማታን ኡቴዳ። ሄ ዎዴ ሳዓይ ኡሱፑን ሳቲያ ሄራ።

7ሳማሪያ ሚሺራታ ሃ ዱቃናው ዬዳዉኖ ዬሱሲ፥ «ታና ሃ ኡሻሪኪ!» ያጌዳ። 8ዬሱሳ ካሊያዋንቱ ቁማ ሻማናው ካታማ ቤዲኖ።

9ሄ ሚሺራታ ዛራዴ ኣ፥ «ኔኒ ኣዪሁዳ ኣሳ ጊዳዴ፥ ሳማሪያ ማጫ ኣሳ ጊዴዳ ታና፥ ዎታ ዴዑዋ ኢሚያ ሃ ኡሻ ጋይ?» ያጋዱ፤ ኣዪሲ ጎፔ፥ ኣዪሁዳቶኔ ሳማሪያ ኣሳው ኢቲፔቴይ ባይና ዲራሳ። #ኤዝር 4፡1-5፤ ናህ 4፡1-2

10ዬሱሲ ዛሪዴ ኢዞ፥ «ኔኒ ፆሳ ኢሞታኔ ቃሲ ኔና ‹ታና ሃ ኡሻ› ጊያዌ ኦኔንቶ ኤሪያዋ ጊዲንቶ፥ ኣ ዎሳናሳ፤ ኢካ ኔው ዴዑዋ ኢሚያ ሃ ኢማና» ያጌዳ።

11ሚሺራታ ዛራዴ፥ «ጎዳው፥ ኔው ዱቂያባይ ባዋ፤ ኦላይካ ጪሙዋ። ያቲና፥ ዴዑዋ ኢሚያ ሃ ሃቃፔ ኣካኒ? 12ኑሲ ሃ ሃ ኦላ ኢሜዳ ኑ ኣዉዋ ያዪቆባፔ ኔኒ ዳራይ? ኢ፥ ኣ ናናይኔ ኣ ሜሂ ሃዋፔ ኡሼዲኖ» ያጋዱ።

13ዬሱሲ ዛሪዴ፥ «ሃ ሃፔ ኡሺያ ኦኒኔ ላዔንዋ ሳሜታናዋ። 14ሺን ታኒ ኢሚያ ሃ ኡሺያ ኦኒኔ ላዔንዋ ሳሜቴና። ታኒ ኢሚያ ሃይ ሄ ኣ ጊዶን ሜና ዴዑዋሲ ፑልቲያ ፑልቱዋ ጊዳናዋ» ያጌዳ።

15ሚሺራታ፥ «ጎዳው፥ ታኒ ሳሜቴና ማላኔ ሃ ቲካናዉካ ሃ ዬና ማላ፥ ታው ሄ ሃ ኢማ!» ያጋዱ።

16ዬሱሲ ኢዞ፥ «ባዴ ኔ ኣሲና ፄሳዴ ሃ ሲማ» ያጌዳ።

17ሚሺራታ ዛራዴ፥ «ታው ኣሲናይ ባዋ» ያጋዱ።

ዬሱሲ፥ «ታው ኣሲናይ ባዋ ጊያዋን ቱሙዋ ጋዳ። 18ኔኒ ኢቼሹ ኣሲና ጌላዳ፤ ሃዒ ኔናና ዴዒያ ቢታኒ ኔ ኣሲና ጊዴና። ኔኒ ሃዒ ታው ኦዴዳዌ ቱማ» ያጌዳ።

19ሚሺራታ ቃይ፥ «ጎዳው፥ ኔኒ ናቢያ ጊዲያዋ ታ ሃዒ ኤራዲ፤ 20ኑ ሳማሪያ ኣሳ ኣዋቱ ሃ ዴሪያን #4፡20 ሃ ዴሪያን፥ ጊያዌ ዴሪያ ጌሪዛና ጊዲዴ ሴኬማ ጌቴቲያ ካታማ ማታን ዴዒያዋ። ጎዪኔዲኖ፤ ሺን ኣዪሁዳቱ ሂንቴንቱ ኣሳይ ፆሳው ጎዪናናው ቤሲያ ሳዓይ ዬሩሳላሜና ያጊታ» ያጋዱ።

21ዬሱሲ፥ «ሃ ሚሺራቴ፥ ታና ኣማና፤ ሃ ዴሪያን ዎይ ዬሩሳላሜን ኣዉዋ ፆሳው ሂንቴንቱ ጎዪኔና ዎዲ ያናዋ። 22ሂንቴንቱ ሳማሪያ ኣሳይ ሂንቴ ኤሬናባው ጎዪኒታ፤ ፆሳይ ኑና ኣዪሁዳቱዋ ጎዔቲዴ ኣቶቴ ኣሂያ ዲራው፥ ኑኒ ኑ ኤሪያዎ ጎዪኔቶ። 23ሺን ኣዉዋ ፆሳው ቱሙዋፔ ጎዪኒያዋንቱ ኣ፥ ጌሻ ኣያና ዎልቃኒኔ ፆሳ ፆሳቴዳን ጎዪኒያ ዎዲ ማታቴዳ፤ ኡባ ሃዒካ ጋኬዳ። ኣዪሲ ጎፔ፥ ኣሳ ባሬው ጎዪናና ማላ፥ ኣዉ ፆሳይካ ሃ ኦጊያን ጎዪኒያዋንታ ኮዬ። 24ፆሳይ ኣያና፤ ኣው ጎዪኒያዋንቱካ ጌሻ ኣያና ዎልቃኒ ፆሳ ፆሳቴዳን ጎዪናናው ቤሴ» ያጌዳ።

25ሚሺራታ፥ «ማሲሂያ ጌቴቲያ ኦኬቶዌ ያናዋ ታኒ ኤራይ። ኢ ዪያ ዎዴ ኑሲ ኡባባ ኦዳናዋ» ያጋዱ።

26ዬሱሲ፥ «ሃ ኔናና ሃሳዪያዌ ታኒ ኣ» ያጌዳ።

27ሃዋ ኡንቱንቱ ሃሳዪሺን፥ ዬሱሳ ካሊያዋንቱ ቤዳሳፔ ሲሜዲኖ። ዬሱሲ ሚሺራቲና ሃሳዪሺን ኡንቱንቱ ቤዒዴ ዳሪሲ ማላሌቴዲኖ፤ ሺን ሚሺራቶ፥ «ኣያ ኮያይ?» ዎይ ዬሱሳ፥ «ኢናና ኣዪሲ ሃሳያይ?» ጊዴ ኦቾዌ ኦኒኔ ባዋ።

28ሄዋፔ ጉዪያን፥ ሚሺራታ ባሬ ሃ ኦቱዋ ኣጋ ባሻ ጉዬ ካታማ ባዴ ኣሳው፥ 29«ታኒ ኦዳዋ ኡባ ታው ኦዴዳ ቢታኒያ ቤዓናው ዴንዲቴ፤ ሄዌ ኪሪስቶሳ ጊዳንዴሻ?» ያጋዱ። 30ኣሳይ ካታማፔ ኬሲዴ፥ ዬሱሳኮ ቤዳ።

31ሄዌ ሃኒሺን፥ ኣ ካሊያዋንቱ ዬሱሳ፥ «ጉባ ማሪኪ!» ያጊዴ ዎሴዲኖ።

32ሺን ኢ፥ «ታው ሂንቴንቱ ኤሬና ቁማይ ታኒ ሚያዌ ዴዔ» ያጌዳ።

33ሄዋ ዲራው፥ ኣ ካሊያዋንቱ ባሬንቱ ጊዶን፥ «ኣው ሚያባ ኣሄዳ ኣሳይ ዴዓንዴሻ?» ያጌዲኖ።

34ዬሱሲ ኡንቱንቱሲ፥ «ታ ቁማይ ታና ኪቴዳዋ ሼኒያ ኡዱሳኔ ኣ ኦሱዋ ፖሉሳ። 35ሂንቴንቱ፥ ‹ኦይዱ ኣጌናፔ ጉዪያን፥ ካይ ጫኬታናዋ› ጊኪቴዬ? ታኒ ሂንቴንቱሲ ኦዳይ፤ ጎሻ ሎይ ፄሊቴ፤ ካይ ጫካ ቤሴዳ። 36ዜሪያዌኔ ጫኪያዌ ኢቲፔ ናሼታና ማላ፥ ጫኪያዌ ዲርጉዋ ኣኬኔ ካ ሜና ዴዖ ሺሼ። 37ሃ ጋሱዋን፥ ‹ኢቱ ዜሬ፤ ቃሲ ኢቱ ጫኬ› ጊያ ሃሳያይ ቱማ። 38ሂንቴንቱ ዳቡሪቤናዋ ጫካና ማላ፥ ታኒ ሂንቴንታ ኪታዲ፤ ሃራቱ ኦ ዳቡሬዲኖ፤ ሂንቴንቱ ሃራቱዋ ዳቡራን ጌሌዲታ» ያጌዳ።

39ሚሺራታ፥ «ኢ ታኒ ኦዳ ኡባባ ኦዴዳ» ጋዴ ማርካቴዳ ዲራው፥ ሄ ካታማን ዴዒያ ሳማሪያ ኣሳፔ ጮራይ ዬሱሳ ኣማኔዳ። 40ሳማሪያ ኣሳይ ዬሱሳኮ ዬዳ ዎዴ፥ ባሬንቱ ማታን ጋሚዓና ማላ፥ ዬሱሳ ዎሲና ኢ ያኒ ላዑ ጋላሳ ኡቴዳ።

41ኢ ኦዲያ ቃላ ዲራው፥ ካሴዋፔ ጮራ ኣሳይ ኣማኔዳ፤ 42ቃሲ ኡንቱንቱ ሚሺራቶ፥ «ኑኒ ኑ ሁጴው ኢ ጊያዋ ሲሲዴ ኣማኔዳዋፔ ኣቲን፥ ኔኒ ማርካቴዳ ዲራሳ ጊዴና፤ ኢ ቱሙ ኣላሚያ ኣሳ ኣሺያዋ ጊዲያዋካ ኑኒ ኤሬዶ» ያጌዲኖ።

ዬሱሲ ኢቲ ካፑዋ ናዓ ፓዳ

43ላዑ ጋላሳፔ ጉዪያን፥ ዬሱሲ ሳማሪያፔ ኬሲዴ፥ ጋሊላ ጋዲያ ቤዳ። 44ኣዪሲ ጎፔ፥ ኢ ባሬ ሁጴው፥ «ናቢ ባሬ ጋዲያን ቦንቼቴና» ያጊ ኦዴዳ። 45ዬሱሲ ጋሊላ ጋኬዳ ዎዴ፥ ጋሊላ ኣሳይ ኣ ሞኬዳ፤ ፓሲጋ ቦንቺያ ጋላሲ ኡንቱንቱ ዬሩሳላሜን ዴዒያ ዲራው፥ ኢ ኦዳ ኡባባ ቤዔዲኖ።

46ዬሱሲ ሃ ዎዪኒያ ኡሻ ኬሴዳ፥ ጋሊላን ዴዒያ ቃና ካታማ ቤዳ። ቂፊሪናሆማን ኣ ናዓይ ሳኬቲያ፥ ካቲያ ጎሌን ኦያ ኢቲ ካፑ ዴዔ። 47ዬሱሲ ዪሁዳፔ ጋሊላ ዬዳዋ ሄ ካፑ ሲሲዴ፥ ኣኮ ዪዴ ሃይቃናው ማቴዳ ባሬ ናዓ ቢዴ ፓና ማላ፥ ዬሱሳ ዎሴዳ።

48ዬሱሲ ሄ ካፑዋ፥ «ፆሳይ ኦያ ማላታኔ ሄቾ ጊሲያባ ቤዔናኒ ዴዒዴ፥ ሂንቴንቱ ኣዪኔ ኣማኒኪታ» ያጌዳ።

49ሄ ካፑ ዛሪዴ፥ «ጎዳው፥ ታ ናዓይ ሃይቄናን ዴዒሺን፥ ታናና ባሪኪ» ያጌዳ።

50ዬሱሲ፥ «ባ፤ ኔ ናዓይ ፓፃ ዴዓናዋ!» ያጌዳ።

ሄ ካፑ ዬሱሲ ጌዳዋ ኣማኒዴ ቤዳ። 51ኢ ባሬ ጎሌ ቢሺን፥ ኣ ቆማቱ ኣናና ኦጊያን ጋኬቲዴ ኣ፥ «ኔ ናዓይ ፓፃ ዴዔ» ጌዲኖ።

52ኢ ባሬ ቆማቱዋ ባሬ ናዓው ኣይ ሳቲያን ኬኬዴንቶ ኦቺና ኡንቱንቱ፥ «ዚኖ ላፑ ሳቲያን ቆፁ ኣ ኣጌዳ» ያጌዲኖ። 53ናዓ ኣዉ ዬሱሲ ባሬው፥ «ኔ ናዓይ ፓፃ ዴዓናዋ» ጌዳዌ ሄ ሳቲያና ጊዴዳዋ ሃሳዬዳ። ሄዋ ዲራው፥ ኢኔ ኣ ሶይ ኣሳይ ኡባይ ኣማኔዲኖ።

54ሃዌ ዬሱሲ ዪሁዳፔ ጋሊላ ዪዴ ኦዳ ላዔን ማላታ።

Currently Selected:

ዮሃኒሳ 4: dwrENT

Highlight

Copy