Bula lə Israɛlje 19
19
Bu maŋg gə́ kas
1Njesigənea̰ ula Moyis gə Aaro̰ pana: 2Aa ooje, ta neelé to godndu gə́ Njesigənea̰ un ndia dɔ’g njaŋg pana: Maji kar sí ulaje Israɛlje mba kar dee ree gə maŋg gə́ kas gə́ rəa ila ɓal el ləm, rəa ya̰ maree el ləma, d’ila néməməna̰ gwɔbee’g gɔl kára kara el ləm tɔ d’ar sí. 3Seḭ a karje Eləajar gə́ to njekinjanéməs ndá yeḛ a kar dee d’aw ne gir loo-si dee’g, tɔɓəi d’a kinja gwɔbee nea̰’g. 4Eləajar gə́ to njekinjanéməs lé a kula ŋgaw jia dan məs maŋg’d neelé ndá yeḛ a saga par gə́ no̰ kəi-kubu-kiŋga-na̰’g as gɔl siri. 5D’a roo maŋg neelé kəmee’g, d’a roo ndaree ləm, gə dakasee gə məsee ləma, gə siḭyee gə́ mée’g na̰’d ləm tɔ. 6Njekinjanéməs lé a kun kag-sɛdrə ləm, gə barkəm gərgənd ləma, gə kubu gə́ kas njir-njir ləm tɔ ndá yeḛ a kɔm dee dan pər’d gə́ deḛ roo ne maŋg lé. 7Njekinjanéməs lé a togo kubuje ləa ləm, a ndogo mán ləm tɔ, tɔɓəi yeḛ a tel kaw loo-si dee’g nɛ rəa a mina̰ saar kàr a kandə ɓa. 8Yeḛ gə́ njeroo maŋg neelé a togo kubuje ləa ləm, a ndogo mán ləm tɔ ndá rəa a mina̰ saar kàr a kandə ɓa tɔ. 9Dəw gə́ rəa àr ŋgad-ŋgad lé a kwa bu maŋg lé ndá a kɔm gir loo-si dee’g mee loo gə́ àr ŋgad-ŋgad’g, d’a ŋgəm mbata koso-dəwje gə́ Israɛl gə mba kar dee d’ɔm dan mán togo won rɔ’g. Yee ɓa to mán gə́ wɔji dɔ kuga dɔ kaiya lé#Ǝbr 9.13. 10Yeḛ gə́ wa bu maŋg neelé a togo kubuje ləa, ndá rəa a mina̰ saar kàr a kandə. Yee neelé ɓa a to godndu gə́ a to gə no̰ mbata lə Israɛlje ləm, mbata lə dəw-dɔ-ɓee gə́ si mbuna dee’g ləm tɔ.
Godndu gə́ wɔji dɔ rɔ kàr ŋgad-ŋgad lé
11Yeḛ gə́ ɔrɔ rɔ nin dəw gə́ rara kara ndá rəa a mina̰ saar as ndɔ siri. 12Yeḛ a kɔr won rəa gə mán neelé mee ndɔ gə́ njekɔm’g munda’g ləm, gə ndɔ gə́ njekɔm’g siri’g ləm tɔ ndá rəa a kàr ne ŋgad-ŋgad, nɛ ɓó lé yeḛ ɔr won rəa mee ndɔ gə́ njekɔm’g munda’g el ləm, gə ndɔ gə́ njekɔm’g siri’g el ləm tɔ ndá rəa a kàr ŋgad-ŋgad el tɔ. 13Yeḛ gə́ ɔrɔ rɔ nin dəw ɓa ɔr won rəa el ar kəi-kubu lə Njesigənea̰ mina̰ ne ndá debee neelé d’a kɔree mbuna Israɛlje’g. To gə́ yeḛ ar mán togo won rɔ oso dəa’g teŋ el lé ndá yeḛ mina̰ ne ləm, ar rɔ mina̰ ləa kara nai dəa’g ɓəi ləm tɔ.
14Aa oo, godndu gə́ raŋg ɓa nee: Loo gə́ dəw a kwəi mee kəi-kubu’g ndá nana ɓa gə́ andə mee kəi-kubu’g neelé ləm, nana ɓa gə́ si mee kəi-kubu’g neelé ləm tɔ ndá debee neelé rəa a mina̰ as ndɔ siri tɔ. 15Nékula gə́ rara gə́ to keneŋ gə́ təa to tag ar kidatea godo ndá a mina̰ ya. 16Nana ɓa gə́ aw mee wala’g ɓa ɔrɔ rɔ nin dəw gə́ tɔlee gə kiambas, əsé nin dəw gə́ wəi kari ba, əsé siŋga dəwje, əsé dɔɓar ndá debee neelé rəa a mina̰ as ndɔ siri. 17D’a dḭ bu maŋg gə́ roo d’uga ne dɔ kaiya lé ndá d’a kɔm dan mán gə́ ula yal-yal gə́ to mee jo’g mbata lə yeḛ gə́ rəa mina̰ lé. 18Dəw gə́ rəa àr ŋgad-ŋgad lé a kun barkəm gərgənd ndá a kula dan mán’g lé, tɔɓəi yeḛ a saga dɔ kəi-kubu’g lé ləm, dɔ nékulaje’g lai ləm, dɔ dəwje gə́ d’isi keneŋ ləm, dɔ yeḛ gə́ ɔrɔ rɔ siŋga dəw lé ləm, əsé dəw gə́ deḛ tɔlee ləm, əsé dəw gə́ wəi kari ba ləma, əsé dɔɓar ləm tɔ. 19Yeḛ gə́ rəa àr ŋgad-ŋgad lé a saga mán dɔ yeḛ gə́ rəa mina̰’g mee ndɔ gə́ njekɔm’g munda’g ləm, gə mee ndɔ gə́ njekɔm’g siri’g ləm tɔ ndá yeḛ a kɔr wonee mee ndɔ gə́ njekɔm’g siri’g lé ya. Bèe ɓa yeḛ a togo kubuje ləa-yeḛ ləm, a ndogo mán ləm tɔ ndá loo gə́ kàr andə ndá rəa a kàr tɔ.
20Dəw gə́ rəa a mina̰ ɓa ɔr won rəa el ndá d’a kɔree mbuna koso-dəwje’g mbata yeḛ ar kəi-kubu-si-Ala gə́ Njesigənea̰ lé mina̰, mbata mán togo won rɔ oso dəa’g teŋ el ndá yeḛ mina̰ ya.
21Yee ɓa a to godndu gə́ a to mbata lə dee gə no̰ ya. Yeḛ gə́ a saga mán kɔr won rɔ lé a togo kubuje ləa ləm, yeḛ gə́ a kɔrɔ rɔ mán kɔr won rɔ lé kara rəa a mina̰ saar kar kàr andə ləm tɔ. 22Né gə́ rara gə́ dəw gə́ rəa mina̰ ɔrɔ lé ndá né neelé kara tel mina̰ ya ləm, dəw gə́ ɔrɔ rɔ né neelé kara rəa a mina̰ saar kar kàr andə ləm tɔ.
Currently Selected:
Bula lə Israɛlje 19: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.