Bula lə Israɛlje 20
20
Man gə́ teḛ kaar mbal gə́ Meriba’g
1Koso-dəwje gə́ Israɛl lai ree dɔdilaloo gə́ Sin mee naḭ gə́ dɔtar tɔɓəi deḛ d’isi loo gə́ Kades. Lée neelé ɓa Miriam wəi ar dee dubee keneŋ.
2Man kai koso-dəwje godo, ndá deḛ ra ta gə Moyis gə Aaro̰ keneŋ. 3Koso-dəwje lé d’aar gə Moyis gə ta jələ-jələ. Deḛ pana: Kar sí j’wəije gə ŋgako̰ síje gə́ d’wəi no̰ Njesigənea̰’g lé maji el wa. 4See gelee ban ɓa seḭ arje koso-dəwje lə Njesigənea̰ ree dɔdilaloo’g neelé mba kar sí j’wəije keneŋ gə nékulje lə sí na̰’d bèe wa. 5See gelee ban ɓa seḭ ar sí j’undaje loo mee ɓee gə́ Ejiptə n’teḛje raga gə mba ree sə sí mee loo gə́ majel gə́ nee bèe wa. To loo gə́ dəw askəm dubu kó keneŋ el ləm, kag-kodé, gə nduú gə kag-dḭ godo keneŋ ləma, mán-kai kara godo keneŋ ləm tɔ.
6Moyis gə Aaro̰ sa rɔ dee rɔ koso-dəwje’g neelé d’aw tarəw kəi-kubu-kiŋga-na̰’g. Deḛ toso naŋg bəbərə-bəbərə ndá rɔnduba lə Njesigənea̰ teḛ kəm dee’g. 7Njesigənea̰ ula Moyis pana: 8Un kag-tɔs ndá i seḭ gə ŋgokɔḭ Aaro̰, mbo̰je koso-dəwje dɔ na̰’d. Seḭ a kulaje mbal ta kəm dee’g, ndá mbal lé a kar dee mán: i a kar mán teḛ kaar mbal’g neelé kar dee ndá i a kar koso-dəwje gə nékulje lə dee d’ai ya.
9Moyis aw un kag-tɔs gə́ to no̰ Njesigənea̰’g to gə́ yeḛ un ne ndia aree lé. 10Moyis gə Aaro̰ mbo̰ koso-dəwje dɔ na̰’d kaar mbal’g. Tɔɓəi Moyis ula dee pana: Ooje ta ɓa, seḭ njékɔsta-rəwje! See jeḛ j’askəm kar mán teḛ kaar mbal’g neelé ar sí wa.
11Yen ŋga Moyis un jia gə́ tar unda ne mbal gə kag-tɔs ləa gɔl joo. Ndá mán teḛ kaar mbal’g tir-tir ar koso-dəwje gə nékulje lə dee d’ai tɔ. 12Yen ŋga Njesigənea̰ ula Moyis gə Aaro̰ pana: Mbata kɔm gə́ seḭ ɔmje meḛ sí dɔm’g gə mba kundam gə kəmee kəm Israɛlje’g el lé gelee gə́ nee ɓa, seḭ a karje koso-dəwje neelé d’andə ne mee ɓee gə́ ma m’ar dee lé el gə mbəa.
13Yee ɓa to mán gə́ Meriba, loo gə́ Israɛlje d’oma̰ gə Njesigənea̰ nɛ yeḛ riba dɔ meenda londoŋ ləa mbuna dee’g lé.
Edɔmje d’ɔg Israɛlje loo dəs mee ɓee’g lə dee
14Loo gə́ d’isi Kades lé Moyis ula njékaḭkulaje rɔ mbai gə́ Edɔm mba kar dee d’ulá pana: Aa oo, ta gə́ ŋgakɔḭje gə́ to Israɛlje pa ɓa nee: Némeeko̰je lai gə́ teḛ dɔ sí’g lé i oo gao ya. 15Bausije-je d’aw mee ɓee gə́ Ejiptə ləm, jeḛ j’isije keneŋ kur sí əw ləm tɔ. Nɛ njé gə́ Ejiptə lé ra sə sí majel, jeḛ gə bɔ síje-je lé tɔ. 16Jeḛ no̰ rɔ Njesigənea̰’g ndá yeḛ oo ndu no̰ lə sí ya. Yeḛ ula kura ləa gə́ dara aree ar sí j’undaje loo mee ɓee gə́ Ejiptə n’teḛje. Aa oo, ɓasinè j’isije Kades, ɓee-boo gə́ to ŋgaŋ dɔ naŋg ɓee’g ləi. 17Maji kari ya̰ loo ar sí n’dəsje mee ɓee’g ləi, j’a kundaje mee ndɔje əsé loo nduúje gaŋg dana el ləm, j’a kaije mán gə́ mee bwa-manje’g lə sí el ləm tɔ, j’a njaaje gə rəw-kwɔi lə mbai ɓó j’a kawje yo-yo nee-nee el saar j’a kundaje ne dɔ naŋg ɓee ləi gaŋgje.
18Edɔm tel ila dee keneŋ pana: Seḭ a dəsje mee ɓee’g ləm nda̰ el, ɓó lé seḭ dəsje ndá m’a teḛ tila kəm sí gə kiambas.
19Israɛlje d’ilá keneŋ pana: Jeḛ j’a kawje gə rəw-kwɔi ɓa, ɓó lé jeḛ gə nékulje lə sí j’aije mán ləi ndá j’a kogaije laree, j’a dəsje gə gɔl sí tar ya ɓó j’a raje né gə́ raŋg el.
20Yeḛ tel ila dee’g pana: Seḭ a dəsje nda̰ el! Ndá Edɔm teḛ tila kəm dee gə boo-njérɔje gə́ ji dee ɓar mèr-mèr. 21Togə́bè ɓa Edɔm ɔg Israɛlje loo dəs dɔ naŋg ɓee’g ləa. Bèe ɓa Israɛlje d’ɔs tel d’un rəw gə́ raŋg tɔ.
Kwəi lə Aaro̰
22Koso-dəwje gə́ Israɛl lai d’ḭ ɓee gə́ Kades d’aw ndá deḛ teḛ mbal gə́ Hɔr. 23Njesigənea̰ ula Moyis gə Aaro̰ ta mbɔr mbal gə́ Hɔr gə́ to rəw-nim-ɓee gə́ Edɔm pana: 24Aaro̰ a gə kwəi kaw kiŋga njé’g ləa, yeḛ a kandə mee ɓee gə́ ma m’ar Israɛlje lé el mbata seḭ ɔsje ndukun ləm gə́ wɔji dɔ mán gə́ Meriba lé rəw. 25Maji kari ar Aaro̰ gə ŋgonee Eləajar d’uba dɔ mbal gə́ Hɔr. 26Maji kari tɔr kubuje gə́ rɔ Aaro̰’g tula rɔ ŋgonee Eləajar’g. Lée neelé ɓa Aaro̰ a gə kwəi keneŋ kaw kiŋga njé’g ləa. 27Moyis ra né gə́ Njesigənea̰ un ndia mba karee ra lé. Deḛ d’uba dɔ mbal gə́ ria lə Hɔr kəm koso-dəwje lai gə́ mbo̰ dɔ na̰ lé tɔ. 28Moyis tɔr kubuje rɔ Aaro̰’g tel tula rɔ ŋgonee Eləajar’g. Lée neelé ɓa Aaro̰ wəi keneŋ dɔ sém mbal’g tɔ. Ndá Moyis gə Eləajar ɓa risi dɔ mbal’g lé d’ur naŋg#Tr 29.29, BI 33.38, TtG 10.6. 29Loo gə́ koso-dəwje lai d’oo to gə́ kəmə lə Aaro̰ godo mba̰ ndá njémeekəije lə Israɛl lai lé no̰ d’wa ne ndòo yoo Aaro̰ as ndɔ dee rɔ-munda tɔ.
Currently Selected:
Bula lə Israɛlje 20: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.