Geenesis 9
9
Seetanujuanaa na miishocoriquiano Pueyaso sequesano Noee
1Pueyasoori maninia rupaajinia naa sequeno Noee, necohuajaajanio:
—Pueyanaa, jiyanohua queraatia nia mueture. Nia niquiohuacuajinio caneno pueya cuaara caneera tiquiyocua puetunu nio jiyajiniajanaa. 2Mijiria nio jiyajinia quijiaca casamini, puetunu cuno casamijianaari nia puerejaca quiniutianiya. Puetunu jaacuatujuaca casaajanaani, jiyocua quijiaca casaajuhuaj, shoniniacu caminiajinia quijia casaanio, puetunu cuno casaajanaari nia jiitiasocoriquiano. 3Quiarijiajiniji nia naatacuajaari puetunu cuno casamijinijinio casaajanaa miaquenu nia panishano, nia nataacuacajinijinio naajuhuaj. Janiyajanaacuajaari nia niquitioyaquinioj. 4Saaja niquiriyatu casaa cutaraari maja cua paniniu nia miaquenura. Cunoori nio: Majaari na nanacataja miaquenu shu. Nia quiniucuajaari nia nanacajinia quiya. 5Naajuhuaj, maninia nia tojiri niaarano nio cua sequesano: Janiyari narta pueyano puecooru saniitioriquianoni pueyano sooru casaajuhuaj. Cunoori pueyano nanaca na shootenuucua. Janiyacuajaari sequeyani, janiyajanaari naa saniitioriquiano puetunu pueyano puecoorujanaani narta pueyano puecooru na quiniuucua.
6Pueyasocuajaari pueyano shipiniquiaari juhua nojuaja niquishanojua. Naacuatej pueyano jaara narta pueyano more, tamonu pueyanoori na monuucua na moriquiano saniniuujia. 7Niajaniya saniniuujia, ¡jiyanohua queraatia nia mueture! Niaacuajinio caneno cuaara caneera puetunu jiyacajiniajanaa.
8Naajuhuaj, Pueyasoori naa sequequiaari Noeetej, necohuajaajanio:
9—Pueyanaa, cua tojitiuri. Nio cua sequesanoni, cunoori seetanujuanaa puetunu niaaranojuanaa, na nuhuaji niaacuajinio caneriquiano pueyaranojaajanio. 10Nio cua sequesanoni, cunoori puetunu niaata botejinia cureeno casamirianojuhuaj, teyonutucuaja nio jiyajinia caneriquianohuani. Cuno casamicuajaari jaacuatujuaca, seesano casami, pueyano rupueyaquishoo nacujiniaacoji casamijiaajanio. 11Nio, niaarano seetanujuanaa cua sequesanoni, cunoori tojetaarucuajanaa jataaquiriquiano. Cuno seetanujuanaa cua sequesano niaaranoni, cunoori nio: Majaari socua cua caminiu quiniutianiuhua nio jiya cua nucutenura pajaa pueya cusonuunura, puetunu mijiria quijiaca casamijianaanio. Majaari socua tamonu pajaa quiniu quiniutianiuhua puetunu nio jiyajinia quijiacajanaa na shaajanura. 12Niocuajaari nia niishiniuria cua sequesano seetanujuanaa pueyaracaanu niaarano, puetunu nio jiyajinia quijiaca casamiriajanaanio. Naa niaa niishiniutianiyani: 13Janiyacuajaari cua naashi nujuateree jiya cajiniocuani. Niaa jaara na niquiriquianoj niocua seetanujuanaa cua sequesano niajaniya niishiriquia. 14Naacuatej pueyanaa, janiya jaara maru niquitioojoteriquiani, cua naashiiri niquishaariquiano jiya cajiniocua nujuaano. 15Naacuatej, janiyajanaa jaara cua naashi niquiriquiani, janiyari jiyacari niishiniutianiyani cuno naashiiri niaara cua nujuatesano, puetunu mijiria quijiaca casamirianojuanaanio; cunoori maja nia cuaracashitiniuria seetanujuanaa cua sequesano niaarano. Cunoori seetanujuanaa, majaari socua jiya pajaashitianu quiniutianiuhua na cusojuanura puetunu niajaniyajanaa. 16Naacuatej, naashi cua niquishacari nujuaano, janiyari pueyaracaanu niaarano seetanujuanaa cua sequesano niishiniutianiya jiyacarini, puetunu mijiria quijiaca casamiriano cua sequesanojaajanio. 17Cunocuajaari seetanujuanaa cua sequesano pueyarano, puetunu mijiria quijiaca casamiriajanaanio.— Niocuajaari naa Pueyaso sequesano Noeetej.
18Nioori Noee niquiohua sesaca: Sem, Cam, Jafet. Nojoricuajaari botejinia cureequiaari. Cam jiyanishanoni, nojuajaari Canaan que. Nio jiuujianaraca pueyajinijinioni, nojorijinijinio canequiaariuhuari puetunu nio jiyajinia quijiaca pueyajanaa. 28Jiya nucunu nuhuaji, Noeeri socua tresciento cincuenta marijia shocotejoquiaari na quishacarijia. Naacuatej, Noeeri noveciento marijia rishiquiaari mijiria, na nuhuaji socua shaajequiaariiri.
Currently Selected:
Geenesis 9: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
