Nuumero 13
13
Moisees jiyaramiquishacari manujunuucua
1Pueyasoori naa Moisees sequereequij:
2—Moiseesnaa, puetunu Israel pueyaranojanaa cua niquitiosocoriquiano Canaan jiya manujunuucua pueya quia jiyaramiquiri. Cuno quia jiyaramiquishocoriquiano pueya cuaara quiiria niquiriyatu pueyano puetunu cuno doce Israel niquiohuacuajinio caneno pueyajinijiniojuanaa. Cuno pojori cuaara quiiria saa tojishano pueyaja.
3Moiseesri Pueyaso sequesano miiquiaari taa Pueyaso sequequiaari nojuacuajani. Naacuatej, Moiseesri na saquiriojosano pueya jiyaramiquiquiaari Paran cariiquia jiyajiniji. Puetunu nojorijianaari tojishano rerequetesoo pueya quiriquiase narta Israel pueyajinijinio. 17Moiseesri nojori jiyaramiquiquiaari Canaan jiya manujunuucua. Jiyacari naa cuno pojori sequereeri:
—Cariiquia Neeguev jiyaaco nia quiaare, niocua socua tuhuananuhuacua tacatama. 18Niocua maninia niquinijionuure cuno jiya taamuecatejanojoni. Niocua tii quijiaca pueya niquirijuhuaj, ¿nujuatajacatejanojoni, miaquejosaatiajacuaja soj? Niocua na niquirijuhuaj, ¿queraraquitii, secaja soj? 19Niocua nojori quijia niquirijuhuaj. ¿Taamuecajiniaaco quijiaca pueyajatejanojoni, nareja suhuortucuajiniaaco quijiaca pueyatee? ¿Nojori tiaca shocuatee saijiniji sohuacacaraca, maja soj? Niocua nojori quijia jiya niquirijuhuaj, ¿seetanujuanaa natoojojuara jiya maniniutii, maja soj? 20Naajuhuaj, niocua cuno jiya niquiri, ¿nacuhuanacatee maja soj? Majaari najuhuana puerenu. Niocua cuno jiyajiniji naana jajau nitiootaarohua canaaraaja canaa niquishocoriquiano.
Cunoori quiriquiaa uva jiyapuera carajotasacari.
25Cuno pojoriiri cuarenta juuca shocotejoquiaari jiya manujunuucua nojori quishacari. 26Na nuhuaji Cades jiyanishanojiniara riujiuutiaquiaariuhuari cariiquia Paran jiyajinia. Tii nojoriicuaji quitiuriquiaari Moisees, Aaroon, puetunu Israel pueyajanaanio. Nojoriiri jiyacari pohuataree puetunu nojori niquishanojanaa. Nojori tiuquitiasanohua naana jajau narta pueya niquititiuriijaariuhuaj. 27Nojoriiri jiyacari naa Moisees sequeturee:
—Canaa tari quiquioocuaa noo jiya manujunuucuani, teyanoocua canaa quia jiyaramiquiquianucuajani. Cuno jiyari seetanujuanaa jiya maniniu. Miasanoori queraatia quiya cuno jiyajinia. Nataacuacaari maninia nujuaa tiijiuhuaj. Nia niquishurij, nioori tijinio naana jajau. 28Tii camaruhuari miaquetoojonu niishijiajuhuaj, jiyanohua puereetuuca tiacaracaari saa na tiaca shocua matacacaracaja. Canaari jiyaconaja Anaccuajinio caneno pueya niquiriucuaajaniuhuaj. 29Naajuhuaj, cariiquia Neeguev jiya jamatuni, cunoori Amalecita taucuaca jiya. Tuhuananuhuaraca jiya saniniunijia, cunoori Hitita, Jebuseocuaca, Amorreocuaca jiya saniniuujia. Shoniniacu caminia shuriuquioco saniniuujia, Jordaan moo shuriuquiocojuhuaj, puetunu cuno jiyajanaari Cananeocuaca jiya.
30Calebri jiyacari Moisees tacoji maano narta pueya sanaajaree. Naa nojori sequereeri:
—¡Tuma na cohuanashitiaj! Cuno jiyacuajaari puerano. Coteenu na camaruhua pa miaquejore tiji. Pa naatacuaja nojori miaquejonu.
31Manujunuucua nata quiojono narta pueyari saniniuujia naa na riucuatureecujua:
—Maja, maja pa naata cuno taucuaca miaquejonu. Nojoriiri socua cumueeca pajaniyajiniji.
32Nojorijianaa niquiniuucua manujunuucua nojori quishacari, nojoricuajaari naacua maninia niishiriquiaa puetunu nojori niquishanojanaari seetanujuanaa quiriquiaa. Naajaa naa narta Israel pueya sequetujuaari:
—Cuno jiya canaa na manujucoocuaani, cuno jiyari tama tii quijiaca na pueyajaaja puecoojua. Puetunu cuno jiyajinia quijiaca canaa niquishano taucuacajanaari jiyanohua jiyaconaja taucuaca. 33Canaari jiyaconaja pueya niquiriucuaajaniuhuaj. Nojoricuajaari tariucuacaanu Anac niquiohuacuajinio caneno taucuaca. Naacuatej, nojori tajinia canaa quishacari, canaari juhua muerucuntuniyojua quiquianuni. Canaari seetanujuanaa naa quiquianu nojoririani.
Currently Selected:
Nuumero 13: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.