Génesis 17
17
Marca niacotacaisoꞌ camaitërinsoꞌ
1Apran iscon shonca iscon piꞌipitasoꞌ, Siniorori yaꞌnotahuaton, itapon:
—Caso Yosëco, yaꞌipi nanitaparahuë. Natëtonco, nohuantërahuësoráchin niquëꞌ. 2Napohuatan, quëmarëꞌco anoyatarahuë. Ca nohuanto, huaꞌhuayátërahuë shiparinpita yaꞌhuëtarinquën, itërin. 3Naporoꞌ Apransoꞌ, isonin. Isonin quëran, noꞌpaquë huarëꞌ monshomarin. Inapoaso Yosëri shaꞌhuitaantarin:
4—Niꞌquëꞌ, iso pochin quëmarëꞌco anoyatarahuë. Quëmá quëran naꞌa nacionoꞌsa pipiarin. 5Naporahuaton, co huachi Apran itaponënhuëꞌ. Ipora quëran huarëꞌ Apraan itaponën. Ca nohuanto naꞌa nacionoꞌsa quëmá quëran pipipona niꞌton, ina pochin nohuitaponën. 6Carinquën catahuaranquën niꞌton, notohuaroꞌ shiparinpita yaꞌhuëtarinquën. Aꞌnaquën shiparinpita, copirno yaꞌconaponaꞌ. Aꞌnaquëontaꞌ, nacionoꞌsa ocoiaponaꞌ. 7Quëmarëꞌco ipora nani anoyatërahuë. Shiparinpitarëꞌconta aꞌna tahuëri anoyatarahuë. Yosënënco niꞌto, catahuaráponquën. Shiparinpitanta inapotápo. 8Yaꞌipi Canaan noꞌpaꞌ ipora yaꞌhuëranquë, huaꞌanëntacaso marëꞌ quëtaranquën. Shiparinpitanta iso noꞌpa chachin huaꞌanëntomiataponaꞌ. Inapitantaꞌ, casáchin chinotaponaco, itërin.
9Napotahuaton, taantarin:
—Napoaponahuëꞌ, quëmarëꞌcoso nani anoyatërahuë niꞌton, natëco. Inapochachin shiparinpitanta natëinaco. 10Ina pochin canpitarëꞌco anoyatërahuë. Canpitanta anoyatërëhuaso yonquicamaso marëꞌ yaꞌipi quëmapinquëmaꞌ, marcahuanamaso yaꞌhuërin. Naporahuaton, yaꞌipi shiparimapitanta inachachin natëinaꞌ. 11Taparonëmaquë, shaꞌhuëchin imorayatërinsoꞌ, niyashitëtocoꞌ. Inaporamasoꞌ, ayonquiarinquëma carëꞌquëma anoyatëramasoꞌ. 12Ipora quëran huarëꞌ yaꞌipi quëmapinquëma ninamasopita, nasitërin quëran posa tahuëritapasoꞌ, marcanën acotocoꞌ. Huiꞌnamantaꞌ, inapotocoꞌ. Piyapinëma nisharoꞌsa paꞌantëramasonta inapotocoꞌ. 13Yaꞌipinquëma niacotacaso yaꞌhuërin. Co aꞌnaya tëranta topinan nicamaso yaꞌhuërinhuëꞌ. Inapohuatamaꞌ, canpitarëꞌco anoyatërahuësoꞌ, nonëmaquë chachin chiminamaquë huarëꞌ yaꞌhuëápon. 14Nipirinhuëꞌ, insosona co marcanën niacotohuachinhuëꞌ, yaꞌhuërama quëran ocoimiatocoꞌ. Canpitarëꞌco anoyatërahuësoꞌ, co natërinhuë niꞌton, inapotocoꞌ, itërin.
15Naporo chachin, Yosëri Apraan itaantarin:
—Saꞌaontaꞌ Sarai itopiramahuëꞌ, co huachi inapochin nohuitaramahuëꞌ. Ipora quëran huarëꞌ Sara#17.15 Sarasoꞌ: Copirno huiꞌnin tapon naporin. itapomaꞌ. 16Inanta noya nicato catahuararahuë niꞌton, huaꞌhuanarin huachi. Tëhuënchachin cari noya nicato inapotarahuë. Naꞌa nacionoꞌsaꞌ, ina quëran pipiponaꞌ. Ina quëran pipipisopita aꞌnaquënsoꞌ, copirno yaꞌconaponaꞌ, itërin.
17Napotohuachina, Apraanso isonin. Isonin quëran noꞌpaquë huarëꞌ monshorahuaton tëhuarin. Tëhuapon pochin yonquirin: “¡Pasa piꞌipitohuachinara, co huachi huiꞌnahuanpihuëꞌ! ¡Saranta iscon shonca piꞌipitaton, co huachi onporonta nanitërinhuë huaꞌhuanacasoꞌ!” tënin yonquinënquë. 18Napoaton iso pochin Yosë nontërin:
—¡Maꞌcha Sinioro shaꞌhuitërancoso chachin Ismairo catahuaranhuë paya! itërin.
19Yosëriso nipirinhuëꞌ, itapon:
—Saꞌanquë chachin huiꞌnahuanaran taꞌto, napotaranquën. Huiꞌnan nasitohuachin, Isaco#17.19 Isacosoꞌ: Tëhuarinsoꞌ tapon naporin. itaran. Quëmarëꞌco anoyatërahuësoꞌ, inanta shaꞌhuitarahuë. Shaꞌhuitërahuëso chachin, shinpitanta catahuamiatarahuë. 20Ismairo marënta nontërancosoꞌ, nani natananquën. Inanta catahuarahuë. Ca nohuanto naꞌa huiꞌninpita yaꞌhuëtapon. Ina quëran pipipisopita naꞌamiataponaꞌ. Shonca cato huaꞌanoꞌsa nicacaisoꞌ huiꞌnahuanapon. Ina shinpita quëran panca nacion pipipon. 21Napoaponahuëꞌ quëmaroꞌco anoyatato shaꞌhuitëranquënsopitasoꞌ, Sara huaꞌhuinquën nisarin. Aꞌna piꞌi quëran, ipora tahuëriꞌsa pochin, Isaco nasitapon, itërin. 22Apraan nontërinso tonitahuaton, Yosëso ina quëran paꞌnin huachi.
23Naporo tahuëri chachin Apraansoꞌ, huiꞌnin Ismairo itërinso marca acotërin. Piyapinënpita pëinënquë chachin nasitopisontaꞌ, inapotërin. Aꞌnapitanta coriquinën quëran paꞌaninsoꞌ, acotërin. Yaꞌipi quëmapiꞌsa Apraan pëinënquë yaꞌhuëpisopita, marca niacotopi huachi. Yosë camaitërinso chachin nipi. 24-25Apraan iscon shonca iscon piꞌipitasoꞌ, taparonën shaꞌhuëchin yashitëtopi. Ismaironta shonca cara piꞌipitasoꞌ, inapotopi. 26-27Naporo tahuëri chachin yaꞌipi quëmapiꞌsa nipisopita marca niacotopi. Apraan, Ismairo, inapita niacotopi. Piyapinënpitanta inapopi. Aꞌnaquën pëinënquë chachin nasitopi. Aꞌnaquënsoꞌ, coriquinën quëran nisharoꞌsa paꞌantërin. Yaꞌipiya niacotopi huachi.
Currently Selected:
Génesis 17: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
