San Marcos 3

Jesusi p'amenchatini ma sábadu jurhiatekua ambakerantasti

(Mt 12.9-14; Lc 6.6-11)

1Jesusi ménderu k'umanchekua tángorhentskuarhu inchaspti, ka jima jarhaspti acheti ma enga mápuru k'urhujkupka. 2Máruksï jinguntku jarhaspti Jesusini exeni enga k'urhujkurhani sábadu jurhiatekua ambakerantapiringa, ka xékuntanksï ambe arhiparhatani. 3Jimajkani Jesusi acheti k'urhujkurhani arhispti:

–Jauara ka terupekua niára. Arhini.

4Ka kurhamarhpespti:

–¿Ambesï sési jaki jiájkani sábadu jurhiatekua niátani: Sési ambe o nósesi ambe? ¿Nemani ambakerantani o jurajkuni eska uarhiaka?#3.4 Lc 14.3.

Imaksï pínasku pakareraspti. 5Jimajkani, Jesusi ikiatini erateaspti, jimbokaksï mintsitani chuperaspka, ka acheti k'urhujkurhani arhispti:

–Ióxurhantsï. Arhini.

Ka ima acheti ióxurhantaspti ka ambaxurhantani. 6Ka engaksï fariseuecha uéntapka tángorhentskuarhu, Erodesiri eratsekua chúngumaticha#3.6 Irecha Erodesiri eratsekua chungumaticha. Mt 22.16. jingunksï úskuxapti, nénaksï jámapirini Jesusini uándikuni.

Japundarhu uanamukutini uánenhantasti

7Tátsekua Jesusi niraspti japundarhu uanamukuni isï imeri jurhengorhericha jinguni, ka enga mítekorhepka eska k'éri ambe úsïrempka, uáni Galilea isï anapuechaksï chúxapaspti, ístuksï niraspti Judea uanondani isï anapuecha, 8ka Jerusaleni anapuecha, ka Idumea#3.8 Mt 4.25. Idumea: Judea kétsemani isï uanondani, engaksï no judiouecha irekapka. uanondani isï anapuecha, ka Jordani iurhekuarhu parhikutini isï anapuecha, Tiro ka Sidoni#3.8 Tiro ka Sidoni: K'éri iretecha no judiouecheri engaksï Israeli karhamani jaka. uanondani anapuecha jamberiksï niraspti. 9Jimajkani Jesusi arhiaspti imeri jurhengorherichani eskaksï jinguntku jatsipiringa icharhuta ma, jimbokaksï jámapiringa pucharani, 10jimbokaksï xáni uáni p'amenchatichespkia engaksï jatajchakuni jápkia p'árhekuekani, ísï exeparini eska uáni ambakerantaaspkia.#3.9-10 Mk 4.1; Lc 5.1-3. 11Ka engaksï nóambarhati espirituecha ísï exempka, tinguikuatsekusïremptiksï ka uinhachapariniksï arhisïrempti:

–¡T'úri Diósï Uájpeska!#3.11 Mk 1.24,34; 5.7; Lc 4.41.

12Ka Jesusi xukaasïrempti eskaksï no jámapiringa uandantani.

Jesusi erakuasti uandakua párichani

(Mt 10.1-4; Lc 6.12-16)

13Tátsekua Jesusi juátarhu ma karhamaspti, ka imechantku pájtaaspti enga ima erakuapka. Ka eka na márku janhapkia 14témbeni tsimani erakuaspti engaksï pámbetapiringa ka enga axaapiringa arhijtsïkpetaraani. 15Ka íntsaaspti juramukua eskaksï úpiringa nóambakitichani petarhpeantaani. 16Arini témbeni tsimani erakuaspti: Simonini, enga tátsekua Pédru jakangurhipka; 17Santiagu ka imeri erachi Juánu, Sebedeu uájpecha, enga tátsekua Boanerjesi arhiauempka, enga “Charandirecha”#3.17 Ebreo jimbo uandakua ma. arhikuekajka; 18ka arijtuksï erakunhaspti: Andresï, Felipe, Bartolome, Mateo, Tomasi, Santiagu Alfeu uájpa, Tadeo,#3.18 Engajtuksï arhimpka Lebeo ka Júdasï Santiagu uájpa: Mt 10.3; Lc 6.16; Uk 1.13. Simoni (enga uarhipitipka) 19ka Júdasï Iskarioti, ima enga tátsekua Jesusini sïpatapka.

Espiritu Sántuni útakuni

(Mt 12.22-32; Lc 11.14-23; 12.10)

20Tátsekua Jesusi jurhengorhericha jinguni k'umanchekuarhu ma niáraspti. Ka nóksï jamberi úspti t'ireni jimboka xáni uáni tángorhenhantaspka. 21Engaksï Jesusiri márkuecha mítepka, nirasptiksï p'íntani, jimboka uandanhasïrempka eska míakua tsítaspka.#3.21 Jn 10.20.

22Ka juramukua jurhentpiricha engaksï Jerusaleni uératini júpka, uandasïremptiksï: “Nóambakiti K'éri #3.22 Belsebu: Mt 12.24. íntskusïndi uinhapekua enga újka nóambakitichani petarhejpeantaani.”#3.22 Mt 9.34; 10.25. 23Ka Jesusi ióarhiaspti imechani, ka terukutantskuechani jimbo aianguaspti: “¿Néna Nóambakiti jandiojku chúntakorhea? 24Eka ma juramukuarhu arhukurhinhaaka, imani juramukuarhu xerekorhenhaati. 25Ka enga ma k'umanchekuarhu arhukurhinhaaka, imani k'umanchekuarhu k'amakurhinhaati. 26Ka eka Nóambakiti arhukurhitini jauaka, ima xerekorhentaati ka k'amakurhini.”

27“Nónema úati acheti uinhapitini ma inchakuni ambe sïpakuni, urheta jótani uétarheati ka ísï k'óru úati iámendu ambe sïpakuni.”

28“Jíksïni sési jimbo arhixaka eska ne uéjki púamenhantaaka iámendu jásï k'amanharhintskuechani, nájkiruka nósesi uandariuaka. 29K'óru ima enga Espiritu Sántuni nósesi ambe arhiaka, nómeni púamenhantaati.”#3.28-29 Mt 12.32; Lc 12.10; 2 Ts 1.8-9; Eb 6.4-6; 10.26-29; 1 Jn 5.16-17.

30Íni ambe arhiaspti Jesusi, jimbokaksï arhispka eska nósesi jásï espirituni kámaxapka.

Jesusiri amamba ka erachicha

(Mt 12.46-50; Lc 8.19-21)

31Ka enga i ambe úkorheni jápka, Jesusiri amamba ka erachi jémbechaksï niáraspti, ka uérakua jatiniksï uandajpatarkorhespti, jimbokaksï no úspka inchani. 32Ka ima engaksï Jesusini uaxandatini jápka, arhistiksï:

–Chéti nánde, ka chéti erachichaksïni uandajpaxati, uérakuaksï jarhasti.

33Ka ima arhiaspti:

–¿Andi nésï jucheti nánde, ka andi néksïsï jucheti erachi?

34Ka imechani erateaparini engaksï uaxandatini jápka, uandaspti:

–Íksïsï jucheti nándeti ka juchetiksï erachini. 35Jimboka ne enga imani ambe újka enga Diósï uéjka, imasï jucheti erachiti ka jucheti pirenchini ka jucheti nándeni.

Currently Selected:

San Marcos 3: DKPJ

Highlight

Copy