San Marcos 4
4
Tarheriri uandantskua terukutantskua
(Mt 13.1-9; Lc 8.4-8)
1Jesusi ménderu japundarhu uanamukuni jurhentpexapti, jimboka uánekua tángorhenhantaspka, ima k'éri icharhutarhu ma jataspti ka jima uaxarhukuspti ka k'uiripu uanamukutini pakaraspti.#4.1 Mk 3.7-9; Lc 5.1-3. 2Ka uánekua ambeteru terukutantskuechani#4.2 Uandantskua terukutarantskua jinguni. jimbo jurhentpexapti arhiaparini:
3“Kurha je sési: Ma xanhari tarheri ma tríju jatsini niraspti, 4ka eka na k'uájpani jápka, máruksï xanharirhu andatseraspti, ka kuínichaksï ántaspti. 5Ka máteruksï tsakapendu andatseraspti, jima enga echeri no káni jápka; jima sóntku andaraspti, jimbokaksï no kánekua inchatsespka, 6ka enga tata jurhiata andarapka, no ióndaspti k'arhiraani, jimbokaksï sïrangua no iauani páspka. 7Ka máru tríju, uitsakuarhu andatseraspti, ka uitsakua sóntku tríjuni ópchakuraspti ka no úspti jaiarani. 8Ka máteruksï tríju ambakiti echerindu andatseraspti, andarasptiksï ka k'éranksï, ka uánhachaniksï jukani; máruksï ma ekuatse ka témbenichani (30), máteruksï tanimu ekuatsechani (60), ka máteruksï iúmu ekuatsechani. (100)”
9Ka Jesusi arhiasptiteru: “Ekajtsï jurhenaka kurhani, sési kurhangu je.”
Andisï Jesusi terukutantskuechani jimbo uandajki
(Mt 13.10-17; Lc 8.9-10)
10Tátsekua, enga ninhantapkia, Jesusi pakaraspti témbeni tsimani jurhengorhericha jinguni, ka imaksï andarheraspti ka kurhamarhesptiksï, ima uandantskua terukutantskua ambe arhikuekasïrempki. 11Ka Jesusi arhiaspti: “Chájtsï mítetaranhaxaka Diósïri juramukua, enga nónema míteka, ka imechani engaksï uérakua jaka, terukutarantskuechani jimbojkuni aianguauaka. 12Ka náuejkiksï jángorhentani jarhani uékani exeni, nóksï exeati, ka náuejkiksï jángorhentani jarhani kurhani, nóksï úati kurhanguni; ásïksï imajtu andarhente Diósïni ka púamenhantanksï.”#4.12 Is 6.9-10; Jn 12.40; Uk 28.26-27.
Jesusi tríju jatsikutiri uandantskuani jánhastpesti
(Mt 13.18-23; Lc 8.11-15)
13Ka ístu arhiaspti: “¿Nójtsï kurhanguntasïnki ambe enga arhikuekajka i terukutantskua? ¿Andi nénajtsï kurhangua máteru terukutantskuechani? 14Tríju jatsikuti, uandakua aiangpitisti. 15Ka tríju enga xanhari jimbo andatseraka, k'uiripunisï arhikuekani jati enga uandakuani jakajkujka, ka enga tátsekua Nóambakiti jurhajka mirikutaraani imani ambe engaksï kurhapkia. 16Máteruksï ísïsti eska tríju enga tsakapurhu andatserapka: Kurhasïndiksï uandakuani, ka tsípepariniksï jakajkuni, 17ka nóksï úsïndi sïrangua sési inchaskuni; ka engaksï imeri jakajkukua jimbo ts'éjkunhajka ka nóksï xénhchanhani, jurarkusïndiksï jakajkukuani. 18Máteruksï ísïsti eska tríju enga uitsakuarhu andatserka: Kurhasïndiksï uandakuani 19ka parhakpeni anapu ambe tsitikua, jatsikorhenhchakua enga tandojchpírika, ka máteru ambe xénhchakua, ka kánhchakua, andasïndiksï uandakuani ka nóksï úsïndi sési k'uiripeni. 20Ka jarhastiksï máteru engaksï uandakuani mintsita jinguni kurhajka ka jakajkunksï, ísï eska tríju enga ambakiti echerindu andatserajka. Imaksï k'óru sési k'uiripesïndi ka uánhachanksï íntspentasïndi, ma ekuatse ka témbenichani (30), tanimu ekuatsechani (60), ka iúmu ekuatsechani (100) ísï táchani.”
Erajkutarakueri uandantskua terukutantskua
(Lc 8.16-18)
21Ka Jesusi arhiasptijtu: “Nónema erajkutarakua kápchakurasïndi o jatátsekuarhu ma inchajchukurini jískani. Erajkutarakua iótakuarhusï péranhajti, jima enga erajkutpeaka.#4.21 Mt 5.15; Lc 11.33. 22Ístu nómbema úsïndi jískakata jarhani, iámu ambe mítekorheati.#4.22 Mt 10.26; Lc 8.17; 12.2-3. 23Ekajtsï jurhenaka kurhani, sési kurhangu je.” 24Ka arhiasptiteru: “Sési kurhangu je. Ísï eskajtsï na ts'éretpeaka, májkuenijtsï ts'éretamenhantaaka ka jamberijtsï kúndamenhaaka.#4.24 Mt 7.2; Lc 6.38. 25Jimboka ne enga jatsikorherikia, sánderu intsïnhaaka. Ka ima enga no jatsikorheka, sáni enga jatsikorheka imani jamberi euanhantaati.”#4.25 Mt 13.12; 25.29; Lc 8.18; 19.26.
Tarheteri uandantskua terukutantskua
26Ka Jesusi uandasïremptijtu: “Diósïri juramukua májkuenisti eska tsíri jatsikua: 27Nájkiruka tarheri k'uíni jauaka o tsínharhitini jarhani, chúrekua ka jurhiakua pirani andarani jarhasïndi ka tarheta k'éni jarhasïndi, ka tarheri no mítesti néna k'éski. 28Jimboka iámendu ambe echerirhu inchatsetini úkorheni jarahasïnga: Pirani urheta andarasïndi, k'ésïndi ka píntsïta andatani, ka tátsekua tiriapu jukani. 29Ka enga xánini úkorhejka, p'ikunhantasïndia.”#4.29 Jl 3.13 (4.13); Uk 14.15.
Xakua ikarakueri uandantskua terukutantskua
(Mt 13.31-32; Lc 13.18-19)
30Ka Jesusi arhiasptijtu: “¿Andi Diósïri juramukua ambeni jáxeski? ¿Ambechi jinguni terukutantapirinki? 31Xakua mostaseri ikarakueni jáxesti enga echerirhu ikaranhajka. Ma parhakpeni imeri tskípu sánderu sapinharhisti. 32K'óru, enga andarka, iámendu xakuechani jinguni ima sánderu k'ésïndi, k'éxkurhisïndi, ka kánekua k'umantskasïndi ka jamberiksï kuínicha jima xerekua úsïndi.”#4.32 Es 17.23; 31.6; Dn 4.12 (9), 20-21 (17-18).
Jesusi terukutantskuechani úraasïndi
(Mt 13.34-35)
33Ka Jesusi ísï aianguasïrempti, eskaksï xántku úpiringa kurhanguni. 34Ka xántku isï járhati ambe jimbo aiangpesïrempti, ka mínhakorhetini imeri jurhengorherichanderku sési kurhangutarasïrempti.
Jesusi tarhiatani anhaxustaspti
(Mt 8.23-27; Lc 8.22-25)
35Imani jurhiatekua xatini, Jesusi arhiaspti imeri jurhengorherichani:
–Juia je japundarhu parhimeni.
36Jarharpentasptiksï, ka pántasptisksï Jesusini imani icharhuta jimbo enga jatarini jápka, ka máteru icharhutechajtuksï chúxapaaspti, 37Ka mátirku uénaspti nósesi tarhiani, ka k'érati jenguerani, ka icharhutarhu itsï uinixaptia. 38Ka Jesusi icharhutarhu tátsepani k'uíxapti, sési iájchakorhetini, ka tsínharhitasptiksï ka arhinksï:
–¡Jurhentpiri, uarhimexakachia! ¿Nájkiri t'u nómbema uandajki?
39Jesusi jauaraspti ka tarhiatani xukani, ka japundani arhini:
–¡Ísku ja! ¡Pínasku!
Tarhiata anhakuatsespti, ka iámu ambe sési niántaspti. 40Ka imeri jurhengorherichani arhiaspti:
–¿Andijtsïsï chérakorhejki? ¿Andijtsïsï no jakajkujki?
41Imaksï kánekua chérakorhespti ka arhijperanksï:
–¿Néski i, enga tarhiata ka japunda jamberi kurhajchajka?#4.39-41 Pir 107.28-29.
Currently Selected:
San Marcos 4: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
