ZLI VIRZI 33

Zakop mijam hirnga ati Esaw

1Zakop a zuɓa hiri, keɗ na, Esaw ara ndilawa ti mizli skat skat mufaɗ aseˀe. A wunka ziri da ti Leya, Rasel waɗ beke mucuwoy tuwa. 2A pa bekehey ati ziri taŋhay sek a mbuŋ, mi ɓaˀ asi taŋ kwana, i Leya ati ziri naŋhay waɗ Rasel ati Zozef. 3Zakop ti hirnga naŋ a ki ɓaˀ a mbuŋ taŋ, a guɓ durus durus is tarnaˀ hã ara ndila sukum naŋ. 4Esaw a kil nga ji di hirnga, a luw vikiciw ng'asi ˀay naŋ, a jaŋ kuɓuy, a tuwam cuw taŋ. 5Ti Esaw mizuɓa hiri, keɗ na, ngwasay ati ziri, a cufuɗaŋ: «Makusoko kahana i waniy ka?» Zakop a mbiɗaŋ di: «I ziri Buymisemvuŋ muvula taŋ da gawla ɗiki.» 6Bekehey a kirohoko ati ziri taŋhaya, a hurukom huruk huruk a mbuŋ naŋ. 7Leya a kirahawa ati ziri naŋhaya ya, a hurukom huruk huruk. Dar Zozef a kirohoko ati Rasel, a hurukom huruk huruk a. 8Esaw a ɓaŋ: «Gezleŋ ngi ginewey, ya miji taŋ hirnga na, kisa gi taŋ mike?» Zakop a mbiɗaŋ di: «Yi wuɗ zleˀe ɓa i lum gi mezle avu ka buy ɗu.» 9Esaw a ɓaŋ: «Nga yahay ada lot lot haɗi sukum ɗu, anja gwat ngi ɗik a ndir da ka!» 10Zakop a ɓaŋ: «Ambuh, kanah ta! Da ki jiy a kwacay mata na, tiɓa gwat ya mavuluw di na. Naŋ kine, yi pura mihiri ɗike kaɓa mapuram mihiri ngi Buymisemuŋ, ki giy mezle le haɗi wãˀ. 11Tiɓa gwat ya muslunuw di na so, asi mike na, Buymisemuŋ a giy mezle le, gwatay ada cek a vi ya.» Zakop a hurdum di hirdam, hã a tiɓaŋ. 12Esaw a ɓaŋ: «Slikuɗukum, a kum le, y'ada ati ka.» 13Zakop a mbiɗaŋ di: «Buy ɗu, ki si na le, ziri taŋ luwuy luwuy aruŋ, yo y'ada ti tumuŋ ati slahay misi ti ziri masam ɗuwa, sey i ki slimiɗ ar taŋ. Da ani i tikaka taŋ ˀay le, ɓa i ram angi hin purla si na, naɓa ginewey gar a sa micam. 14Ambuh buy ɗu, ki a mbuŋ. Ya gawla ɗike kwana, i ki ɓaˀ asi ka, zayãˀ zayãˀ asi gwat ɗuwoy misi a mbuŋ, yo weˀe avu ru ngi ziri, hã i sa ndil avu ka buy ɗu a ruwuy Seˀir» 15Esaw a ɓaŋ: «Yi wuɗ i puluw mizli mikisoko ya na cah da ka.» Zakop a mbiɗaŋ di: «Kay! Ngi gi mi maka? Ki giy mezle le si ma na buy ɗu, naŋ muk ti ya si.» 16Kalla tapasa, Esaw a zuɓ jiviɗ kini ngir ti Seˀire. 17Zakopo kwana, aru nga Sukkot. A ndira hay a diga, waɗ gezleŋ muhurɗuk hurɗukoy, cap cap da gineweye. Vurˀe, a zila li hana Sukkot, mbiɗeˀvra: gezleŋ cap cap hurɗuk.

Zakop mipa hay naŋ gweˀ avu hirwuy Sikem

18Zakop mimawa baɗ ti ruwuy Mezopotami vay ngi muŋ na, a ndil zuy zuy a Sikem, walahay madiɗaŋ, angi hirwuy Kanaˀana, a ɗiya guɗuko gweˀ avu walahaya. 19A hiɗik guva puɗwulaˀ, suloy skat#33.19 Suloy a ka na, suloy purla nga taŋ, i cikili ngi tumuŋ purla, pura Zoz 24.3 2; Jop 42.1 1 , avu dideˀ ngi Hamoroy, mbur mipa Sikem, a ɗiya guɗuk naŋ a diga. 20A ɗiyi li gi mikuli anga ma, a zila «El, Buymisemuŋ ngi Israyel.»

Currently Selected:

ZLI VIRZI 33: BEGDC

Highlight

Copy