ZLI VIRZI 34

Simeyoŋ ati Levi mupulaka cuwal ngi mihinam ti sukum taŋ Dina

1Ti di numuŋ ada na, Dina, zuŋ Leya miya ti Zakopo, a bi nga pura ziri diili ngi hirwuy nah. 2Sikem, mangal ngi Hamor, mbur Hevit, buy ngi hirwuy nah vuna, a pura Dina tuwa, a ja, ara hin di ti gidaŋ. 3A slrup ti Dina slrap, a wuɗaŋ haɗi teˀe, a wuɗ ɓa Dina a hina mevele aseˀe. 4Dar Sikem a ɓa cine naŋ Hamoro na: «Zuɓiy zuŋ hana ɓa i ɗuvaŋ.» 5Zakop a cine na, Sikem a hirya zuŋ naŋ Dina le, naɓa ziri naŋ mizilehey a roko ti ginewey a ɓuh, amma naŋ teˀteˀ hã a moko. 6Hamor cine ngi Sikeme, a bi ɓa ara ɓa Zakopo. 7Ti ziri ngi Zakopoy mumoko ti ɓuh, taŋ micinaka ɓi nah cin si na, a ja taŋ mevel haɗi. A slikiɗam himaˀ fõh fõh, asi Sikem mihin ti zuŋ ngi Zakop na, a gi gwat ngi mesem le, anta a gam kanah angi hirwuy Israyele ta. 8Hamor a ɓa taŋ na: «Mangal ɗu Sikeme, mevele a hin le wãˀ asi zuŋ kumo, vulakaŋ di ɓa a ɗuva sini. 9Gukum jomo ar wala ndra: Ki sa vulam ndra ziri kumoy, yo ki zuɓaka ngi ndrahay aya. 10Ki sa cifam ati ndra, li ani, kisa pam anga, kisa gam gwat kumoy, kisa tiram taŋ ngi kumoy.» 11Sikem ti hirnga naŋ, a so ɓa cine ngi zuŋ ati sukum naŋhaya na: «Ambuh kum! Gwat kum mucufuɗam le gar na, yi sa vulukum di. 12Cufuɗikiy ɓa i vul zlili ar ngwasa haɗa waɗ gwat mekelemey ma, gwat kum mucufuɗam le gar na, i sa vula kaslsla, amma kum vulikiy zuŋ ɓa i ɗuvaŋ.» 13Ziri ngi Zakopoy a mbiɗaka da Sikem ati cine naŋ Hamoro ti wer, asi Sikem a ga gwat ngi mesem le da sukum taŋ Dina. 14A mbiɗaka taŋ di: «Ɓi ka miɓa hana, i gaka ta, yo mbur mici mizaw ta na, i vulakaŋ sukum ndra ta, naɓa a sa gi avu ndra, i gwat ngi mesem madiɗa. 15Ɓa i sa jumomˀay na, sey da ki mbiɗam le kaɓa ndra far. Mizli mizile kumoy gar na, ki caka taŋ a mizaw. 16Kine so na, i sa vulukum ziri ndraˀahaya, i sa zuɓaka ngi kumoyo da ndra ya, i sa cifam ati kum, i sa tiram sukwi purla. 17Da ki tiɓaka ci mizaw ndra ta na, i sa tiɓaka zuŋ ndra a muŋ, i cohom le.» 18Hamor ati mangal naŋ Sikeme, a hĩyãka mingiɓi taŋ le. 19Gawla a mur ngi ga gwat taŋ miɓaka na mata, asi ara wuɗ zuŋ ngi Zakopo. Asi mangal vuna i hirnga a hay cine. 20Hamor ati mangal naŋ Sikeme, a ram nga mizlingre ngi walahay taŋ madiɗa, a ɓaka mizli taŋhaya: 21«Mizli tayna taŋ zuy zuy ati ndra, anja a cifam asi hirwuy ndra, yo a gam gwat taŋhaya, anja hirwuy hana a ndir baŋ avu taŋ, zuɓukum ziri taŋhay, yo i vulaka taŋ ziri mongoso ndraˀahaya, a zuɓam aya. 22Ɓa a sa ngumam cifi ati ndra, yo ɓa i tiram sukwi purla na, sey da mizli mizile ndrahay gar a cam mizaw le ka taŋ na ya. 23Da i ngumam le si na, a sa cifam ati ndra, naɓa ginew taŋhay, zlili taŋhay, gwat misãmi taŋhay gar na, a sa ndiram da ndra takwa?» 24Mizli misi a mizlingre ngi walahay gar na, a tiɓaka ɓi ngi Hamor ati ngi mangal naŋ Sikeme le. A caka zileye gar a mizawa. 25Na, angi hin mimakir naŋ, naɓa ziley a roko ar bonoy aruŋ na, ziri ngi Zakopoy cuw, Simeyoŋ ati Levi sukum ngi Dinahaya, maslalam maslalam, a cam ng'ar walahay muro setetete, a kiɗaka mizli mizileheye gar vagay vagay, 26waɗ Hamor ati mangal naŋ Sikeme ma. Ti taŋ mabam le ti hay Sikeme na, a zuɓaka Dina a haŋ. 27Ziri mekelem ngi Zakopoyo, a ndilam vu kpis ar vagay ngi mizli tuwa, a sliraka gwat ngir walahaya slar slar, asi a gaka gwat ngi mesem le da sukum taŋ mongoso. 28A ɓulaka tumuŋhoy, ˀaway, slahay, zunguhoy, yo a hilaka gwat ngir walahaya waɗ ngir guvahaya gar. 29A hilaka zlili taŋhaya gar, ziri taŋhay ati ngwas taŋhaya gar, yo a sliraka gwat ngi hayaya slar slar gar. 30Dar Zakop a ɓa Simeyoŋ ati Levi na: «Wurenna ki cikiy le ar ɓi so, mizli Kanaˀanay ati Perizihey, a sa purikiy avu hiri ta. Ndra tuwa, ndra neˀkini, a sa jumom ar ya, a sa kiɗikiy, a sa ngizlam ndra ati hay ɗu gar.» 31Simeyoŋ ati Levi a mbiɗakaŋ di: «Anja mbak a gam ti sukum ndra ka sulome sukwa?»

Currently Selected:

ZLI VIRZI 34: BEGDC

Highlight

Copy