Luk 8

Ŋgwas ma səpamar bəzay a Yezu ana hay

1Arka a dəba na na, Yezu me tezlerey ta wuraw ɗuhwa na hay ta na bəza na hay, a tələkey mey, a ɓada Mey Hayna Wayna ma Slala ma Bay'ərlam. Taya andza gawla ŋga kurow kava tsew ana hay. 2Taya andza ŋgwas ana hay daha satsa. Na ŋga na ma ɓəlafata fakalaw hay ba da 'ar, ta ma ndaladata dzedzey ta na hay: Mariya na ma ləvam ma Magədala na, na fakalaw hay tsəla ma bəmawa da 'ar aŋga na. 3Zane ŋgwas ma Kuza bəzey ma mey ver ma bay Erod, Suzan ta sa ma ŋgwas ana sa na hay ma dzənəmata ta zleley ta na hay.

Bəzay ma guma ma mala ha ta ndaw me sləkey

(Mt 13.1-9; Mk 4.1-9)

4Andza ndaw hay haɗadzidzay ma kusəmawa, arka da wuraw hay tabiyaha ma səmawa ka tsakay ŋga na, ŋga ma tsey ta bəzay ma guma ma mala ha ta meley ana. 5«Ndaw me sləkey ma bawa da 'ay ŋga ma da sləkey. Andza a sləkey aha na, haləfaw ma kuyafa ka tsakay tsəveɗ, ndaw hay ma halam ka 'arra, ɗiyeŋ hay ma ndama ba tabiyaha. 6Sa ma haləfaw ana ma kuyafa ka sek pəray, ma pətsawa, amana me ŋgweley təŋga, hərway slam ana ma yəmaha kakay. 7Sa ma haləfaw ma kuyafa 'ay ndak, ma pətsawa ka vaw na, ndak ma margaɗa ba. 8Sa ma haləfaw ana ma kuyafa ka dala hayna tok, ma pətsawa, me gəley, me nəhey kava temere.» Arka na Yezu me tələkey mey: «Ndaw ana sləmay ŋga daha na, ka dzəkey sləmay na, ka tsənada!»

Ɗagay, Yezu a tsey guma a maladata ta meley na ka mey?

(Mt 13.10-13; Mk 4.10-12)

9Gawla ŋga hay ma tsəhafama waya ɗagay bəzay ma guma neney ana na, ka ləva na teŋgey? 10Ŋga ma ləvatar: «Tek na ma kəzla na hay, na ma Slala ma Bay'ərlam na, ma kwar na, ma vəla ha ma kuray ka səradama. Ama a sa ma ndaw sana hay na, a maladəmatara ta tek hay, ma taya ka nəkam dey mandzara ka nəkadama, taya ka dzəkam sləmay mandza ka tsənadama.

Ma wendzeley ma guma ma mala ha ta meley ana ma ndaw me sləkey

(Mt 13.18-23; Mk 4.13-20)

11Nəkafama bəzay ma guma neney ma mala ha ta me ley ana, ka ləva na: haləfaw na: guma ma Bay ma Bəla. 12Na ma kuyam ka tsəveɗ ana hay na, ndaw na ma tsənada na hay, amana Setene a sawa a badərawa guma na ba da mevel ata, a wesey na, a da pam 'ar na, tsefe a da buwəmata ba. 13Na ka sek pəray ana na, ndaw ma təɓama guma na ta wuiya ha, andza ma tsənadama ba tsa na, amana, ka pey slasləlay kakay. Da mendzey nekəɗey na a pam 'ar, amana, da har ma pafəmata wuiya na, a mbəkadama. 14Na ma kuyam 'ay ndak ana na, andza ndaw ma tsənadama na, ama tok na, viya ta me dzeley 'ar ka zleley, ta tek me sey ma mendzey ma bəla neney hay na, ma margaɗata ka tsakay tsəveɗ na, tsoy a slafa me nəhey sakay. 15Na ma kuyam ka dala hayna na, na ŋga na ndaw ma tsənadama guma na ta mevel hayna, dzerey ana, ma təɓama ka mevel ata, ma wafama vaw, hərway ka mətsatar har kakay, arka na a yam kava hərway ma matanduroŋ ata.»

Bəzay ma guma ma lalam

(Mk 4.21-25)

16«Ɗaɗa ndaw ka key waw ka lalam, ma da hwarkwafa 'uwaŋ kava, dakay na ma da pada a bəzay ma arŋgawa kakay seŋgey; ama a padama na tsaŋ ka slam me luwey lalam, hərway aza ndaw me fuləkwey a 'ay ana hay, ka nəkadama dey. 17Hərway tek na ma kəzla na hay tabiya ha na, a da nəkam. Tek na ka tsəney zlay ana hay na a da səram, a da ɓey vaw ta wuzla rəpas. 18Wam daw ka vaw tok, kendzey andza ka dzəkam aha sləmay na. Hərway tek ma ndaw ana daha na, a da vəlamar adiya. Ma ndaw ana dakay tey na, kwa na ŋga me dzeley ma ŋga ketekuɗey daha na na, a da təɓadəmara ba.»

Ndaw ma veɗ 'ay ma Yezu ɗerre na hay

(Mt 12.46-50; Mk 3.31-35)

19Maya ma Yezu, ta malam aŋga hay akwa, a satar me husey ka tsakay ŋga. Amana a slafama me husey kakay, kavəday ma ndaw ma kusa hiya na. 20Ma ɓadəmara waya: «May ɗek, ta malam eɗek hay taya da bəla, a tsəhəmaka.» 21Ŋga ma mbəɗatar kava: «May ɗaw ta malam a ɗaw hay na, ndaw na ma dzəkam sləmay ka guma ma Bay ma Bəla, ma kama andza ha na hay.»

Yezu a watar 'ar a memeɗ ta bəlay

(Mt 8.18, 23-27; Mk 4.35-41)

22Arka pas asləta na, Yezu ma tsəlam a kombiwal andza gawla ŋga hay. Ŋga ma ləvatar: «Tasakwa a diya ma ɗakal naŋgar.» Taya ma tazlaram ta wuzlah ma bəlay ana. 23Andza a tazlaram aha na, Yezu me nerey təŋga. Vavəray ma lətsawa, ma tsada ɗaŋgwala ta bəlay, kombiwal ata a rəhey aha ta yam. A kafata na ka zəɗam tsoy. 24Gawla ŋga hay ma gurafama, ma parkadama, ma ləvamar: «Miter! Miter! la da zəɗakwa.» Yezu me pərkey, ma babətsafata ka vavəray ana ta yam; arka memeɗ me rey ba ɗeɗek, kwa tek me ɓəley dasakay. 25Arka Yezu ma ləvatar: «Me pey 'ar a kwar ana na, ŋga da may? Da zluwer ata na hana na ma katar ana na, taya ma rəzla hiya ta wuiya. Ha taya ma ləvam ka 'ar vaw ta na hay: «Ɗagay ŋga na na way, ha ŋga ma watar 'ar a memeɗ ta yam ana, ma tsənamar sləmay na na?»

Yezu a ndeley ndaw ana daha ta fakalaw aha da 'ar

(Mt 8.28-34; Mk 5.1-20)

26Taya ma husam a dala ma Zerzezeniyeŋ hay soŋ soŋ ta Galiley. 27Andza a harɗəmawa ha ka dala na, ndaw ana daha da wuraw ana, fakalaw hay da 'ar aŋga, ma sawa ka tsakay ŋga. Ka key mevey haɗadzidzay a pey aha zana ka vaw sakay, ma na ha da 'ay sakay. Amana, ma na ha da tsəvay ma vagay hay. 28Andza ŋga ma nəkada Yezu ba na, ŋga me kəley a həvam aŋga, ta me wudey aha ta magala ha: «Ka wuɗafaya mey, Yezu Bəzey ma Bay ma Bəla tsaŋ da mekekəle ŋga na? I kaka amboh, ka da sadaya banay zlay.» 29Akwa Yezu a war ’ar fakalaw ana na, ka bawa ba da vaw ma ndaw ana. Hərway ma mey na, a key dey haɗadzidzay ka zlar ba na, a daradama aha ta megesele ta tsalalaw ma ka ndzey da mbaw, amana a darətsadata ba. Fakalaw ana da vaw ŋga na na, sey a dahəɗa na a slam palah aha. 30Yezu ma tsəhafa: «Ɗagay mezəley ɗek na, mey?.» Ŋga me mbəɗey kava: «Wermeɗ wermeɗ.» Hərway fakalaw hay haɗadzidzay ka fuləkwam ba a vaw ŋga. 31Arka ma kamar amboh a Yezu, ma ka da harata a babaŋ tsəvay zlay. 32Azlakwa ka slam ana na, gaduru hay haɗadzidzay a pəɗam aha zəmay ka ɗay mamba. Fakalaw ana hana hay ma kamar amboh a Yezu, ma ka vəlatar tsəveɗ me fuləkwey a vaw ma gaduru a hay. Arka ŋga ma vəlatar tsəveɗ. 33Fakalaw ana a hay ma bəmawa da vaw ma ndaw aha na ma fuləkwam a gaduru hay. Welde ma gaduru ana hana hay ma tsəmawa ɗay zla da ɗay mamba a hana a bəlay, ma mətsam tabiyaha. 34Andza ndaw me tsukurey ana hay ma nəkadama tek a neney ana me key ana na, ma hwam ta vaw ta, ma dam ma ɓadama da wuraw ɗuhwa na ta na bəza na hay. 35Ndaw hay ma səmawa ma da tsənaɓa gwaray ma tek ana hana na me key ana. Taya ma husam ka tsakay ma Yezu, ma ndzafama ndaw ana hana na, fakalaw hay haɗadzidzay ma bəmawa da vaw ŋga na, ma ndzaha ka slam sek ma Yezu, ta zana ha ka vaw, tsoy a sərada 'ar ka dəba. Taya na ma wasam ka vaw. 36Ndaw na tek ana me key ma dey ta na hay, ma təkəradəmatara a sa ma ndaw hay, andza na ma ndaladama ndaw ana hana na ta fakalaw da 'ar ana na, teŋgey teŋgey? 37Arka ndaw ma dala ma Zerzezeniyeŋ hay tabiyaha ma ləvamar a Yezu, ma ka daw ba da dala ta, hərway a katar zluwer kambəlaɓa. Ŋga me tsəley a kombiwal na, ma mawa təŋga ta dəba. 38Ndaw a hana ma badəmərawa fakalaw hay da vaw ŋga na, ma kar amboh a Yezu ma tsəhafa, a wuɗey ma səpar bəzay. Amana Yezu ma mbəɗar mey ma ləvar: 39«Mey a mbaw, da ɓadatara a ndaw ma 'ay ɗek hay, tek ma Bay ma Bəla a neney ma kaka tabiyaha na.» Ndaw ana, ma daway, ma tələkada mey tabiyaha da wuraw ta tek ma Yezu ana hana ma kərawa ana.

Yezu ma ndalada ŋgwas ana daha, ma mbəladərawa dem ma Zayros

(Mt 9.18-26; Mk 5.21-43)

40Andza ma mawa ŋga na, ndaw ma kusa hiya na hay ma ŋgəlama har tsew tsew, hərway ma ndza hiya a hutama ha tobiya ta ha. 41Arka tsana ndaw ana daha a zəlamar Zayros; ŋga bay ma 'ay me ɗuley mey. Me kəley a həvam ma Yezu, ma kar amboh ma ka daway 'ay ŋga, 42hərway dem aŋga daha malay aha, mevey ŋga a key kurow kava tsew, a ɓerzley aha. Andza Yezu a daway aha na, ndaw hay a ŋgaɗətsama ta sləna ta sləna. 43Ka slam na na, ŋgwas ana daha dzedzey aha. A guvawa mambaz, ka key mevey kurow kava tsew; ŋga ma gusəfada zleley ŋga tabiyaha da 'ay ndaw ma sidem hay, amana kwa ndaw asləta ka slafa ma ndalada kakay. 44Ŋga ma gurafa ta dəba, ma ləmar a mey ma zana ma Yezu. Arka deŋe ka slam aŋga na hana tsana, mambaz aŋga na hana me rey ba. 45Yezu me tsəhey: «Ɗagay ndaw ana ma ləmaya na na way?» Andza kwa way way a mbəɗey aha mey ka vaw ŋga na, Piyer me ləvey: «Miter, ma ŋgaɗətsaka, ma dahəɗaka na ndaw hay.» 46Ama Yezu me ləvey: «Ndaw ka ləmaya ba; i ka sərafa ba gədaŋ ka bawa ba da vaw ɗaw.» 47Andza ŋgwas ana ma nəkada a slafa ma kəzlada sakay na, ma sawa ta me wesey aha, me kəley ka slam sek aŋga; ma ɓada ka slam dey ma səkway tabiyaha ɗagay a da ləmar na, ma vəday ma mey, arka ɗagay a da ndeley deŋe ka slam ana tsa na teŋgey. 48Arka ŋga ma ləvar: «Dem a ɗaw, me pey 'ar eɗek ka buwaka ba, daway da zoy.» 49Andza a tsey aha guma mba na, ndaw ma sawa da 'ay bay ma 'ay me ɗuley mey ana hana na, me ləvey: «Dem eɗek ana ka mətsey tsoy. Ka yada vaw ta Miter ana sazlay.» 50Ama Yezu ma tsənada na, ma ləvar a Zayros: «Ka wesey zlay; pey 'ar tsana, aza a buwama.» 51Andza ŋga me husey a 'ay ana na, me ŋgəley ka fuləkwey na sey Piyer, Zaŋ ta Zak, ka zəgawa baba ta maya ma wawa na. 52Tobiyaha a tuwam aha ta sesermey aha hərway ma dem ana. Yezu me ləvey: «Ka tuwam zlay; ma mətsa ha kakay, ma nara ha.» 53Arka na ma saŋgərafama dəla da ’ar, hərway a səradama dey ta kava ma mətsa ha təŋga. 54Ama ŋga na ma zəga da har ana, ma zəla, ma ləvar: «Dem aɗaw, pərkey!.» 55Mesəfrey ŋga ma mawa, arka deŋe ka slam ana tsana, ŋga me lətsey. Arka Yezu ma ləvatar ka vəlamar tek me zəmey. 56A rəzlata baba na ta maya na kambəlaɓa. Yezu ma ləvatar ka da ɓadama tek a neney me key ana a ndaw zlay.

Currently Selected:

Luk 8: MOF

Highlight

Copy