Luk 9

Yezu a sləradata gawla ŋga kurow kava tsew ana hay

(Mt 10.1-9, 11-14; Mk 6.6-13)

1Andza Yezu ma tsəhadatara 'ar ta gawla ŋga kurow kava tsew ana hay na, ma vəlatar gədaŋ ta maram ka fakalaw hay tabiyaha, ta ma ndaladata ndaw dzedzey ana hay. 2Ŋga ma sləradata ma tələkada mey ta Slala ma Bay'ərlam, ta ma ndaladata ndaw hay. 3Arka ma ləvatar: «Ka dam aha ka tsəveɗ na ka da həlam tek a har zlay, kwa tapay, kwa gabal, kwa tek me zəmey, kwa sumkwo zlay, ka da dam ta zana tsew da har zlay. 4Ka fuləkwam a 'ay waray waray na, ndzam da huɗa ha ka ma da daw kwar. 5Kendzey ka ŋgələmakwar da wuraw ana kakay na, ka da bəma ha tek a kwar da wuraw ana na, bazləmama burhway ma wuraw ana ba ka sek a kwar, ma aza ka da təratar seydewe ma malay ta ha.» 6Taya ma dawam tok, ma halam ka wuraw ka wuraw, a tələkadama mey ta Mey Hayna Wayna, a ndalam ndaw hay ka waray ka waray.

Erod ta Yezu

(Mt 14.1-2; Mk 6.14-16)

7Andza bay Erod ma tsənada tek a neney hay na, a rəzla kambəlaɓa. Hərway sa ma ndaw hay a ləvam waya Zaŋ Batist ka mbəlawa ba da walaŋ ma ndaw ma mətsa na hay. 8Sa na hay waya Elyi ma bawa. Sa na hay tey na waya ndaw asləta da walaŋ ma ndaw sek zlezle na hay ma mbəlawa. 9Erod me ləvey: «Zaŋ na, yah ana ta 'ar a ɗaw ana, ma rətsadara 'ar. Ama ɗagay neney ana na ndaw waray sa waray? Na i ma tsənada a tsam aha a key tek hay andza neney ana hay na?» Arka ŋga me səpey a wuɗey ka nəkada Yezu.

Yezu a rəhata ndaw hay gabal zlam

(Mt 14.13-21; Mk 6.30-44)

10Andza ma mawa ta ba na, maslaŋ ma Yezu hay ma təkəradəmara tek ata ma kəmawa na hay tabiyaha. Ŋga ma ŋgəlata gədzah ta tsakay ma wuraw ana daha a zəlamar Betəsayda. 11Andza taya ma sərafama ba na, ndaw ma kusa na hay ma səpama, Yezu ma ŋgəlata, ŋga ma tsatar ka Slala ma Bay'ərlam, ŋga ma ndaladata ndaw dzedzey ana hay, na ma wuɗam me ndeley ana hay. 12Ama andza pas a kəley aha na, gawla ŋga kurow kava tsew ana hay ma gurafama, ma ləvamar: «Mbəkadata ndaw ana ma kusa na hay ka dawam ka da nam da wuraw ɗuhwa na hay ta wuraw a neney bəza na ka tsakay ana hay, ka da səpam tek mezəmey, hərway ka sləna na, lakwa da slam palah aha seŋgey.» 13Ama ŋga ma ləvatar: «Kuray ana, vələmatar tek me zəmey ana kwa!» Arka taya ma ləvam: «A rafandar ka sləna daha na, a fəna peŋ zlam ta kəlef tsew kakay. Ŋgama la na ma dawam ta 'ar ala na, ma da haɗəkawa tek me zəmey a səkway a neney ana tabiyaha far.» 14A key ka slam ana na ndaw gabal zlam. Ŋga ma ləvatar a gawla ŋga hay: «Ndzadəmata ndaw ana hay dzo dzo, ndaw kokurow zlam, kokurow zlam.» 15Taya ma kama andza ha na, ma ndzadəmata tabiyaha. 16Yezu ma həlata peŋ a hana hay zlam ana, ta kəlef hay tsew ana, ma tsakafa da dey a 'ərlam, ma pəsafa mey, ma tsada, ma vəladatara a gawla ŋga hay, ma ka vəladəmatara a ndaw ma kusa na hay. 17Taya ma zəmam, ha ma rəham tobiya ta ha. Ma tsakalama sa na ma zawa na na, me rəhey tsakarak kurow kava tsew.

Piyer a ɓada waya Yezu na Ndaw ma vahara 'ar ana

(Mt 16.13-21; Mk 8.27-31)

18Arka andza a ɗuley aha mey gədzah kəɗey na, gawla ŋga hay taya ka tsakay ŋga. Arka ŋga ma tsəhafata: «Ɗagay ndaw hay a ləvafəmaya waya, ɗagay yah ana na way?» 19Taya ma mbəɗamar kava: «Waya kah na Zaŋ Batist, sa na hay waya kah na Elyi, ndaw sa na hay sa tey, waya kah na ndaw asləta da walaŋ ma ndaw sek zlezle na hay ma mbəlawa.» 20Ŋga ma ləvatar: «Ama ekəɗey kuray tey na, ka ləvafəmaya yah ana na way?» Piyer ma mbəɗar kava, ma ləvar: «Kah na Kriste ma Bay ma Bəla.» 21Arka ŋga na, ta me bebətsey aha na, ma ləvatar ɗaɗa ka da tsam a ndaw zlay. 22Ŋga ma wandzaladatara: «Hayna Bəzey ma Ndaw ka key tsetseh ba haɗadzidzay ɗagay, ndaw ma səka na hay, baba ɗuhwa na me key kuley ana hay, ta ndaw me sesəkey Mewey hay, a da kəladama, a dafa na ka kəɗama vagay aha, arka da meney ma makar ana na, a da mbəlawa.»

Ɗagay ma səpar bəzay a Yezu na, teŋgey

(Mt 16.24-28; Mk 8.34—9.1)

23Arka Yezu ma ləvatar tobiya ta ha: «Haɗaw ndaw ana a wuɗey ma səpaya bəzay na, ka mbəɗar mey ba a bay ’ar ma vaw ŋga na, ka zəga tuwaw aŋga ma gazləlaha na ka pas ka pas na, ka səpaya. 24Akwa haɗaw ndaw me wuɗey ma wafa vaw ka mendzey ŋga na, a da zəɗada. Ama ndaw ma zəɗada mendzey ŋga kavəday ɗaw na, a da buwama. 25A da nafar a ndaw ana na mey, kendzey ka vəladəmara bəla tabiyaha, haɗaw a haɗəka ta mesəfrey ŋga, ma da zəɗada bay ’ar va vaw ŋga na na? 26Haɗaw kendzey ndaw a kadaya hwaray ta yah, dakay ta guma ɗaw na, Bəzey ma Ndaw a da kada hwaray tey andza a da sawa da maram aŋga, da maram ma Baba ŋga ta madurlam aŋga kokwaɗ ana hay na. 27I ɓadakwar dərka na, da walaŋ ma ndaw a neney hay ka sləna na hay na, a da mətsam aha mandzara ka nəkadama Slala ma Bay'ərlam kakay.»

Yezu ma ɓada maram ŋga ka 'ar ma mamba

(Mt 17.1-8; Mk 9.2-8)

28Arka me key meney tsakar a dəba ma guma ŋga neney hay na, Yezu me tsəley a 'ar ma mamba ma da ɗulawa mey. Ŋga me ŋgəley ka bəzay na: Piyer, Zaŋ ta Zak. 29Andza Yezu a ɗuley aha mey na, mey dey ŋga me mbəɗey pəla, a wezley dey. Zana ŋga me tərey babara ha teyye. 30A da sərafama na, a tsam aha guma ta ndaw ana hay daha tsew, andza Moyiz ta Elyi. 31A bəmawa na da maram. A tsam na, ka ma da daw ŋga ma da ndaslada da Zeruzalem ana. 32Piyer ta mandala ŋga hay ma nara hiya kaɗ kaɗ. Ama me pərkey ta na, ma nəkadama maram ma Yezu ta ndaw hay tsew, ma lətsa hiya ka tsakay ŋga na hay. 33Arka andza ndaw a hana hay ma dawam tek ata na, Piyer ma ləvar a Yezu: «Miter, lakwa ka ndzakwa ka sləna na, hayaha seŋgey, ŋgarakwa gwadzavok hay makar, asləta a kah, asləta a Moyiz kaw a Elyi.» A sərada ŋga ka ləvey teŋgey sakay. 34Andza a tsey aha guma neney mba na, pazlay ma harɗawa, ma sahətata. Zluwer ma katar andza pazlay a sahətata ha na. 35Arka vəɗe ma ɗay ma tsənawa da pazlay a hana me ləvey: «Neney na Bəzey ɗaw, na i ma gaɗəma na, tsənamar sləmay!» 36Andza ma vəɗe ma ɗay ma tsənawa ba na, ma zawa na, Yezu asləta makəraŋga. Gawla ŋga hay na ma ndzam tek a ta tete, kwa ka ɓadama tek ata, na ma nəkadəmərawa na a ndaw kakay da har ana ŋga na na.

Yezu a ndeley wawa na daha ta fakalaw aha da 'ar

(Mt 17.14-18; Mk 9.14-27)

37Andza ma medew ana a hərɗəmawa ha da mamba na, ndaw ma kusa hiya haɗadzidzay ma dawam 'ar ka tsakay ma Yezu ma da zlam 'ar. 38Arka ndaw asləta da walaŋ ma ndaw ana ma kusa na hay, me wudey: «Miter i kaka amboh, nəkafərawa dey ka bəzey ɗaw a neney tey! Hərway wawa ɗaw ana ŋga asləta!» 39Fakalaw ana ka zlar ba na, da mey asləta tsa na, a wudey, a gutsey ma gədaŋ ha ma hwasləpay po po da mey. A da bey na ta ger aha, a da mbəkada na ka taləkwaɗa tsoy. 40I ma katar amboh a gawla ɗek hay, ma ka harama na, amana ka slafama kakay.» 41Yezu na me mbəɗey kava, me ləvey: «Kuray ndaw a neney ekəɗey ana hay me pey 'ar ka Bay'ərlam kakay ana hay ŋgey! A zariyawa me ndzey ta kuray na hadzəgay saŋgay? I da ɓəsakwar na kasl ka waray? Hadərawa wawa ɗek ana ka sləna.» 42Andza ma husawa ma wawa na na, fakalaw ana ma təɗada wawa na ka dala, ma gutsada guts guts. Ama Yezu na ma babətsafa ka fakalaw ana, ma ndalada wawa na, ma vəladara a baba na. 43Ɗuhwa ma gədaŋ ma Bay ma Bəla ana me key ana na, a gagətsata ndaw hay kambəlaɓa.

Yezu a ɓada ma da key tsetseh aŋga, dey metsetsew ana

(Mt 17.22-23; Mk 9.30-32)

Andza tek aŋga hana me key ana a gagətsata ha ndaw hay mba na, Yezu ma ləvatar a gawla ŋga hay: 44«Dzəkam sləmay haya hayaha, ka guma ɗaw eɗey i ma da tsakwar ana: a da mbəkafama har ka Bəzey ma ndaw a har ma ndaw hay.» 45Amana, a tsənadama bəzay ma guma na kakay: ka vəday bəzay ma guma na na, ma sahəta ha, ma ka tsənadama a ɓey mey zlay; arka na a wasam ma tsəhafama bəzay ma guma na.

Ɗagay ɗuhwaha na way?

(Mt 18.1-5; Mk 9.33-37)

46Guma asləta ma satərawa a 'ar, me tsəhey waya ɗagay ɗuhwa ha da walaŋ ata na na way? 47Yezu na ma sərada bəzay ma guma ta na ma tsəham ana, me zəgey bəzey bəza ha, ma ndzada kəreh ka tsakay ŋga. 48Ŋga ma ləvatar: «Ndaw ma ŋgəla wawa ɗey da mezəley ɗaw na, a ŋgəley na yah ana. Ndaw me ŋgəley yah ana ta ’ar a ɗaw ana, a ŋgəley na Ndaw ma sləradiyawa na. Hərway ndaw ma tərada vaw ŋga bəza ha da walaŋ a kwar tabiyaha na, ɗuhwa ha na ŋga tok.»

Ndaw dugwan a kwar kakay na ndaw a kwar

(Mk 9.38-41)

49Zaŋ ma zlar ma ləvar: «Miter, la ma nəkadama ndaw ana daha a ɓəley aha fakalaw hay ta mezəley ɗek, la wuɗam ma təkama ba zləna, a səpaka ha bezay ta lakwa kakay seŋgey.» 50Ama Yezu me ləvey: «Ka da təkama zlay, hərway ndaw dugwan a kwar kakay na, ndaw a kwar.»

Ndaw ma Samari hay a wuɗam ma ŋgəlama Yezu kakay

51Arka har ana ma husawa ma da zəgama ba ka bəla neney na, Yezu me sey mevel me zəgey tsəveɗ ma daway 'ar a Zeruzalem. 52Ŋga me kuyey maslaŋ aŋga hay ka mey, taya ma dawam, ma husam a wuraw ma Samariteŋ hay, ma da ləmada ma sawa ma Yezu. 53Ama a wuɗam ma ŋgəlama kakay zləna, hərway ma mey na, a da daway ’ar a Zeruzalem. 54Ma nəkadama tek a neney me key ana na, gawla ŋga hay andza Zak ta Zaŋ ma ləvam: «Bay’ərlam, a saka na la ka ləvam waw ka harɗawa da 'ərlam ka təɓata ba ɗaw?» 55Ama Yezu ma mbəɗafata dey, ma katar say. 56Arka taya ma dawam tek ata ’ar a wuraw mekelehe.

Ma mbəkada tek hay tabiya ha ma da səpey Yezu

(Mt 8.19-22)

57Andza a dawam aha tek ata ka tsakay tsəveɗ na, ndaw ana daha ma ləvar a Yezu: «Kendzey ka daway ta waray ta waray na i səpaka bəzay.» 58Yezu ma ləvar: «Mezerem hay ta 'ay ta hiya da tsəvay, ɗiyeŋ ma ’ərlam hay ta 'ay ta hiya atsa, Bəzey ma Ndaw na, ŋga na, slam aŋga me pey ’ar dakay.» 59Ŋga ma ləvar a ndaw mekelehe: «Səpaya bəzay.» Ndaw ana ma mbəɗar kava: «Vəlaya tsəveɗ i ka daway ka zlələrawa baba ɗaw ba ɗagay.» 60Ama Yezu ma ləvar: «Mbəkadata vagay hay ka zləlam vagay ta: ama kah na, daway da tələkada mey ta Slala ma Bay'ərlam.» 61Ndaw mekelehe ma ləvar sa: «Bay’ərlam, a saya ma səpaka bəzay; amana vəlaya tsəveɗ i ka daw i ka mbəɗatərawa mey ba a ndaw ma 'ay ɗaw hay ɗagay.» 62Yezu ma ləvar: «Kwa way way a həvey aha ta zlagwam ma sla na, a nəkey dey ta dəba na, ma ka ha na, ma Slala ma Bay'ərlam sakay.»

Currently Selected:

Luk 9: MOF

Highlight

Copy