Luk 10
10
Yezu ma sləradata gawla ŋga kokurow tsəla kava tsew ana hay
(Mt 9.37-38; 10.7-16; Mk 6.8-11; Lk 9.3-5)
1A dəba na na, Bay’ərlam Yezu me gəɗəmey gawla mekele hiya kokurow tsəla kava tsew, ŋga ma sləradata ndaw tsew ta tsew ka mey ŋga a wuraw hay ta slam ana, na ŋga na ta ’ar aŋga na ma da daway ta huɗa na hay. 2Ŋga ma ləvatar: «Tek ka həvey ba kəras kəras, amana ndaw me key mber a hay a hətsam, kamar amboh a bay ma ley ana, ka slərawa ndaw ma mber hay ma da tsəhadara ’ar ta tek aŋga na. 3Dawam ekəɗey! I sləradakwar kal kal andza təɓaŋ hay a walaŋ ma gədey ma ley hay. 4Ka da həlam sumkwo zlay, ka da zəgam gabal zlay, ka da həlam tahərak zlay, ka da tsam guma ka tsakay tsəveɗ kwa a ndaw zlay. 5Ka fuləkwam na a 'ay waray waray na, ləvam ba ɗagay: ‹Zozoy ka ndzey ta 'ay eɗey.› 6Arka haɗaw ndaw ma zozoy da huɗa daha na, zozoy kwar a hana a ndzey ka ŋga. Haɗaw dakay tey na, zozoy kwar a hana a mawa tek a kwar ka kuray ana. 7Ndzam da 'ay ana, zəmam tek, sam tek na ma vələmakwar ana hay, hərway ndaw me key mber na, a zəmey na tek ma merɓey ŋga. Ka da zawam 'ay hay zlay. 8Kendzey ka fuləkwam na a wuraw waray waray na, ka ŋgələmakwar ba da huɗa na, a vələmakwar mey mey na, zəmam. 9Ndaladəmata ndaw dzedzey ma wuraw ana hay, ləvəmatar: ‹Slala ma Bay'ərlam ka husawa ba kasl ka kuray.› 10Ama kendzey kuray ka fuləkwam ba a wuraw waray waray na, ka ŋgələmakwar da huɗa kakay na, bəmawa tek a kwar ka slam me kusey, ləvam: 11‹Kwa burhway ma wuraw a kwar ana tekeɗe, ma kafandərawa ka sek a la na na, i tatukwadəmakwar tek a kwar. Ama hayna sərafama Slala ma Bay'ərlam ka husawa ba.›
12I ɓadakwar, ta pas ana ŋga na, me hətey ma Sodoma tekeɗe na, ka husada andza ma wuraw ana ŋga na kakay. 13Viya waray, Korazim! Viya waray, Betəsayda! Kendzey zeheɗ a neney hay ma kam da 'ay kwar ana hay na, kendzey ma ka hiya da Tir ta Sidoŋ na, akwatay na tsoy ka mbəɗadama mendzey ta ba Akwatay na ka kəlam zana ma burhwa ba, ma ndzaya da pətsaw meləmets. 14Ayaw! da har ma sariya na, banay mandza Tir ta Sidoŋ na, a da husey aha andza ma kwar kakay. 15Arka kah tey Kafarnawom, andza a kafaka na, a da tsakafəmaka kasl ka ndasl ma 'ərlam ɗaw? Ka da hərɗey na a tsəvay, ka slam ma ndaw ma mətsa na hay. 16Ndaw ma pakwar sləmay na, a pey sləmay na a yah ana. Ndaw ma rəsakwar na, a rəsey na yah ana. Ama ndaw ma rəsey yah na, a rəsey na Ndaw ma sləradiyawa na.»
Ma mawa ma gawla ma Yezu kokurow tsəla kava tsew ana hay
17Gawla ma Yezu na kokurow tsəla kava tsew ana hay ma məmawa ta wuiya ha, ma ləvam: «Bay’ərlam Yezu, ta mezəley ɗek na, kwa fakalaw hay tekeɗe na, ka tsənəmandərawa sləmay ba!» 18Yezu ma ləvatar: «I ma nəkada Sataŋ a kəlawa ha da 'ərlam andza yam meweteɗey. 19Nəkafama, i ma vələkurawa slam har ma ndarslada govaŋ hay, ta hərats hay, ta ma slafa ma ndaw dugwan ba tabiyaha, kwa tek ma da kakwar na dakay. 20Ŋgey! Na ma fakalaw hay ma tsənəmakwar sləmay ana na, ka da dakwar 'ar kambəlaɓa zlay. Ama, ka dakwar 'ar na, na mezəley kwar ma winda hiya ba da 'ərlam ana.»
Wuiya ma Yezu
(Mt 11.25-27)
21Ka slam ana deŋe tsana, Yezu me rəhey ta wuiya ta gədaŋ ma Mesəfrey Kokwoɗ ana, ŋga me ləvey: «I səmbəraka Baba, Bay’ərlam ma 'ərlam ta ma dala, hərway kah ma kəzlafata tek a neney hay ba, ka dey ma ndaw ma səra ’ar ana hay, ta ndaw ma səradama tek ana hay; ma da ɓadatara a ndaw bəza ketwəkəɗey ana hay. Ayaw Baba, me wuɗey andza ha na kah ana, da haya eɗek. 22Tek hay tabiyaha, Baba ka vəladaya ba. Ndaw ma sərada bəzey ana na wuyaway na dakay, sey Baba na dada. Ndaw ma sərada Baba na na wuyaway na dakay, sey Bəzey, arka sey na Bəzey ana me wuɗey ma ɓadatara na.»
23Arka Yezu me mbəɗey dey ma ləvatar a gawla ŋga na hay, ma kərata: «Kuray ndaw ma nəkadama tek a neney hay, ta dey kwar ana hay na, kuray da wuiya! 24Hərway i ɓadakwar ekəɗey, ndaw sek hay haɗadzidzay, bay hay haɗadzidzay ka wuɗam ba, ma nəkadama tek a kwar a neney hay, ma nəkadəmata na hay, amana taya ka nəkadəmərawa kakay. Ka wuɗam ba ma tsənadama tek a kwar a neney ma tsənadəmata na hay, amana ka tsənadəmərawa kakay.»
Ma wuɗa vaw na tsəveɗ ma mendzey ma ndəvey kakay ana
(Mt 22.34-40; Mk 12.28-31)
25Ndaw me sesəkey Mewey ana daha asləta me lətsey, a wuɗey ma ŋgafa gendeɗ ka Yezu, ŋga ma tsəhafa: «Miter, i da ndzefey mendzey me ndəvey kakay ana na, i ka key na mey?» 26Yezu ma ləvar: «Ma winda ha da Mewey na teŋgey? Ka dzaŋga na teŋgey?» 27Ŋga ma mbəɗar kava: «Ka da wuɗa Bay’ərlam Bay ɗek na, ta mevel eɗek adzay, ta mezek ɗek adzay, ta gədaŋ eɗek adzay, ta 'ar me dzeley ɗek adzay, arka wuɗa ndaw ka tsakay ɗek ana na, kal kal andza vaw ɗek ana.» 28Yezu ma ləvar: «Kah ka mbəɗafərawa ba kava kassla, key andza ha tok na, aza ka da ndzefey mendzey ma ndəvey kakay ana.»
Guma ma mala ha ta meley ana ma ndaw samariteŋ kokwaɗ ana
29Ama ŋga na a wuɗey ma ɓada dzerey ŋga na, ma ləvar a Yezu: «Ɗagay ndaw ka tsakay ɗaw ana na way?» 30Yezu me ləvey: «Ndaw ana daha a hərɗawa da Zeruzalem a Zeriko, a da kəley a har ma katsala hay, ma buwəmara zleley ŋga ta zana ŋga hay ba, ma kəɗama vaw ŋga na, a da mbəkadama na tsoy a zarawa həɗek həɗek kəɗey, ma dawam tek ata. 31Baba me key kuley ana daha a hərɗawa ha ta tsəveɗ ana, ŋga ma nəkada ndaw ana na, ma ŋgəɗar pew dəreŋ. 32Ndaw Levit ana daha ma husawa ta slam ana satsa, ŋga ma nəkada ndaw ana na, ŋga ma ŋgəɗar pew dəreŋ, me zəgey tsəveɗ aŋga. 33Ama ndaw Samariteŋ ana daha, a daway aha a dzaŋgal, me husey ka tsakay ma ndaw ana, ma nəkada na, a kar da vaw. 34Ŋga ma gurafa, ŋga ma radara mbəlek aŋga na hay, ma kafara mal ta zom aha kava, ma pada ka 'ar ma zuŋgow aŋga, ma dada a berkey, ma wafa vaw. 35Ma medew ana na, ŋga ma vəlar sulay tsew a ndaw ma berkey ana, ma ləvar: ‹Wafa vaw haya hayaha, haɗaw kah ka zəɗey sumkwo ba adiya na, i da mawa ta sləna na, aza i warkadaka tek eɗek.›» 36Da walaŋ ma ndaw a hana makar ana hay na, ka ndzey ka kah na, ma ɓada vaw ndaw ma ndaw a hana na, katsala hay ma kəɗama na na, ndaw waray?» 37Ndaw me sesəkey Mewey ana hana me ləvey waya: «Ndaw a hana ma wafa vaw ana.» Yezu ma ləvar: «Daway, da key andza ha tey.»
Yezu da 'ay ma ndza Marta ta Mariya
38Andza a dam aha ka tsəveɗ na, Yezu me fuləkwey a wuraw ana daha. Ŋgwas ana daha a zəlamar Marta, ma ŋgəla a 'ay ŋga. 39Malam aŋga na daha a zəlamar Mariya, ma ndza ha ka slam sek ma Bay’ərlam Yezu, a dzəkafa ha sləmay ka guma ŋga. 40Marta a yey aha vaw makəraŋga, ka mber ma gedzek, ŋga ma sawa me ləvey: «Bay’ərlam a ɗaw, ka tsar kava kakay na, ka nəkada malam a ɗaw a mbəkadaya mber ma gedzek a yah asləta tikay ɗaw? Ləvar: hayna ka sawa, ka da dzənaya tizləne.» 41Bay’ərlam Yezu ma mbəɗar kava: «Marta, Marta, ka dzəmey ka vaw, ka dzeley 'ar ka tek hay kambəlaɓa na ka mey? 42Tek hayna na ŋga asləta dada; Mariya na ka zəga na hayna ba, ɗaɗa ndaw ma da təɓadara ba na, dakay.»
Currently Selected:
Luk 10: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun
