Luk 11

Yezu a tatəkadatara me ɗuley mey a gawla ŋga hay

(Mt 6.9-13)

1Pas ana daha Yezu a ɗuley aha mey ka slam ana daha. Andza ŋga ka ndəvada tsoy na, gawla ŋga asləta ma ləvar: «Bay’ərlam Yezu, tatəkadandar me ɗuley mey, andza ma Zaŋ ma tatəkadatara a gawla ŋga hay tey.» 2Ŋga ma ləvatar: «Kendzey ka ɗulam aha mey na, ləvam:

Baba,

hayna ɓadatara a ndaw hay tabiya ha kah ana na way.

Hayna sadərawa Slala ɗek

3Vəlandar peŋ na ma sandar ka pas ka pas ana.

4Safandar yam ba ka meŋgəsey la hay, hərway la na tey na, la safəmata ha yam ka ndaw ma kəmandar tek haya kakay ana hay tey.

Ka da gərafandar har ka pətənəmandar zlay.»

Guma ma mala ha ta meley ana ma dzam ndaw ma kar da vaw ana

5Yezu ma ləvatar sa: «Kendzey andza ndaw da walaŋ a kwar dzam aŋga daha, a daw a ndzafa ta wuzla dəvaɗ, a ləvar: ‹Dzam a ɗaw, dadəɗaya peŋ ba makar tey, 6kavəday dzam a ɗaw daha a husawa da dzaŋgal, tek a rafaya ma vəlar dakay›. 7Kendzey ndaw ana da 'ay ana a mbəɗafərawa kava: ‹Aŋga ka saya vaw zlay! Ekəɗey mambaw ɗaw ma wuɗa ha tsoy, wawa ɗaw hay ta yah ana ma naya tsoy, i slafəraɓa ma lətsaɓa ma da vəlaka peŋ sakay›. 8I ɓadakwar, kwa ma da lətsawa ŋga ma da vəlar ana na, ma vəday ŋga dzam aŋga seŋgey sakay, ma vəday a yada vaw kambəlaɓa, a da lətsawa ma da vəlar tek a ŋga me wuɗey tabiyaha na na.

Kwa way way a tsəhey na a ndzefey

(Mt 7.7-11)

9Ana təɗe, yah ekəɗey i ləvakwar: tsəham, aza a vələmakwar, səpam, aza ka ndzafam, fam mambaw, aza a wuradəmakwar. 10Hərway kwa way way me tsəhey na, a vəlamar, ndaw me səpey na a ndzefey, ndaw me fey mambaw na, a da wuradəmara. 11Baba ma bəzey ana andza da walaŋ a kwar kendzey wawa ŋga a tsəhafa kəlef na, a da vəlar govaŋ a veɗ ma kəlef ana, na way? 12Kendzey dakay a tsəhafa slesleɗ na, a da vəlar hərats ɗaw? 13Ta kuray a neney hayakakay ana hay dzay tekeɗe na, ka səradama me vəley tek hayna a wawa kwar hay tok na, sakwa Baba da 'ərlam a da vəlatar Mesəfrey Kokwoɗ ana a ndaw ma tsəhafama na hay sakay tok ɗaw?»

Yezu ta Belzebul

(Mt 9.32-34; 12.22-30; Mk 3.22-27)

14Yezu ma hara fakalaw, da vaw ma ndaw ana daha a weley mey kakay. Arka andza fakalaw ana ma bawa ba na, ndaw ana ma zlar me tsey guma. A rəzlata ndaw ma kusa na hay. 15Amana ndaw hay da walaŋ ata na, ma ləvam: «A harata fakalaw a neney hay na, ta gədaŋ ma Beezeboul, bay ma fakalaw hay.» 16Sa na hay a wuɗam ma ŋgafama gendeɗ na, ma tsəhafama ka katar zeheɗ ma sawa da 'ərlam ana. 17Ama ŋga na ma sərada 'ar ata me dzeley, ma ləvatar: «Mendzey ma slala ma tsa vaw aha ka ’ar vaw ŋga na na a da mbəzley, ’ay ana hay a mbəzlam ka ’ar vaw ta na. 18Haɗaw Sataŋ ma wanəka vaw aha ka 'ar vaw ŋga na na, slala ŋga na a da ndzey na teŋgey? Hərway ka ləvam i herey fakalaw hay na, ta gədaŋ ma Belzebul sana, 19Haɗaw i herey fakalaw ta har ma Belzebul na, gawla kwar hay a ɓələmata na, ta na ma ŋgway tok? Ma da kadakwar sariya kwar ana na taya. 20Ama haɗaw azlakwa i ɓəlata na ta har ma Bay ma Bəla na, na ŋga na na, Slala ma Bay'ərlam ka husafukurawa ba. 21Haɗaw ndaw gədaŋ aha ma ndza ha ta tek ma har aŋga ha da har, a hutey aha 'ay ŋga na, tek aŋga ma wa vaw ahiya. 22Ama, haɗaw ndaw gədaŋ aha mekelehe a sawa ka fənar 'ar ba na, a təɓadara tek ma har aŋga na hana hay ba, ma vəlar mawal ana ba, arka a həla zleley ŋga na hana hay, a wanəkadatara a ndaw hay. 23Ndaw ana ŋga ta yah kakay na, ndaw dugwan a ɗaw. Ndaw ma dzənaya ma tsəhada 'ar kakay na, a zlaɗada.»

Ma mawa ma fakalaw a vaw ma ndaw

(Mt 12.43-45)

24«Kendzey mesəfrey ma zləɓa na ka bawa ba da vaw ma ndaw na, a səpey slam ma da sesəkey vaw, a dzedzey da slam palah ana hay. Kendzey andza ka ndzefey kakay na, a ləvey ka 'ar vaw ŋga na: ‹I mey tek a ɗaw a 'ay ɗaw ana i ma bawa da huɗa na.› 25Andza ŋga me husey na, a da ndzafa na, ma patsa ha ba, ma ləma ha ba mambay aha. 26Arka tok na, a daw a ŋgəlawa fakalaw hay tsəla, həma hiya a fənama vaw ŋga na, a fuləkwam, a karham bəzay me ndzey da vaw ma ndaw ana tok. Arka mendzey ma ndaw ana na, a zakafa a fəna na tsəfəmey ana.»

Wuiya hayna

27Andza Yezu a tsey aha guma ŋga neney na, ŋgwas ana daha ma tsərawa guma ta magala ha, da walaŋ ma ndaw ma kusa hiya na hay, ma ləvar: «Ŋgwas ana ma zəgadəkawa da hwoɗ, ma vəlaka 'uwa na na, ŋga da wuiya!» 28Ama ŋga ma mbəɗar kava: «Dzadzak taya da wuiya na, ndaw na ma pamar sləmay a guma ma Bay ma Bəla, ma kadama mber ana hay.»

Ndaw hay a tsəham zeheɗ

(Mt 12.38-42)

29Andza ndaw hay a kusəmawa ha na, Yezu ma zlar me ləvey: «Ndaw ma bəla neney hay na, kwa haya hiya tikay, a tsəham zeheɗ. Akwa na zeheɗ ɗaw, a da vəlamar aha a dəba ma zeheɗ ma Zonas na dakay. 30Hərway andza Zonas ka tərafata ba zeheɗ aha ka ndaw ma Niniv hay na, Bəzey ma Ndaw tey na, a da tərafata zeheɗ aha, ka ndaw ma bəla neney hay tiyatsa. 31Da har ma sariya na, ŋgwas bay aha da Saba, a da lətsam ka vaw ta ndaw ma bəla neney hay, a da dzuwata, hərway ŋga ka lətsawa ba zla da bəzay lam, ma da paɓa sləmay ka ma səra ’ar ma Salomoŋ. Ekəɗey ka sləna na, ndaw ma fəna Salomoŋ, daha! 32Da har ma sariya na, ndaw ma Niniv hay a da lətsam ka vaw, ta ndaw ma bəla neney hay, a da dzuwəmata, hərway ka mbəɗadama mendzey ta ba, ka guma ma Zonas ma tələkadatara mey ana. Ekəɗey ka sləna na, ndaw ma fəna Zonas ana na, daha sa.»

Waw me nəkey dey ma vaw

(Mt 5.15; Mk 4.21; Lk 8.16)

33«Ɗaɗa ndaw ka key waw ka lalam ma da kəzlada kakay seŋgey. Ama, sey a padama na ka slam me luweyŋga na, hərway aza ndaw me fuləkwey a 'ay ana hay, ka nəkadama me wuɗey ŋga na.

34Lalam ma vaw na, dey. Haɗaw dey ɗek kweler kweler na, vaw ɗek tabiyaha mambay aha. Ama haɗaw dey ɗek a tsaka na, vaw ɗek a tiyatsa na ŋga da ləvaŋ. 35Dzadzəma tok na waw me nəkey dey ɗek ana, naŋgərhay ləvaŋ aha hegey. 36Kendzey vaw ɗek tabiyaha ŋga da dey dzidzay, mandzara ka zarawa da ləvaŋ na, a da wuɗey na tabiyaha vaw aha, andza ma lalam ma ɓafaka waw da me wuɗey ŋga na.»

Yezu a tsafata ka Fariziyeŋ hay, ta ndaw me sesəkey hay

(Mt 23.4, 6-7, 13, 25-27, 29-31, 34-36)

37Andza Yezu a tsey aha guma na, ndaw Fariziyeŋ ana daha ma wuna a 'ay ŋga, ma da zəmawa tek ma rəpas, me fuləkwey, me ndzey ka slam me zəmey tek. 38A rəzla ndaw Fariziyeŋ ana zləna, hərway a zəmey tek mandzara ka pəra har. 39Bay’ərlam Yezu ma ləvar: «Kuray Fariziyeŋ hay na, ka kwaslam na dəba ma vəliyem ta gandaf, ama hwoɗ a kwar ana hay na, ma rəha hiya ta tek mesey, ta seweɗ. 40Dəla ma yadakwar vaw zləna! Ndaw ma kərawa dəba na na, ma kərawa hwoɗ ana na, ŋga na satsa kakay ɗaw? 41Ŋgama tek ana da huɗa na na vəladama sadaka ha dzadzak, aza sa ma tek a kwar sa na hay na, a da təram na ma mbazləma ahiya. 42Tuwam vaw kwar, Fariziyeŋ a neney hay! Ka vəladama zaka ma zəɓak, ma ndzewelek, ma sa tek ana sa na hay ma pətsam tabiya ha da ’ay dzerne na hay, amana, ka mbəkadama guma ma dzerey ta ma wuɗa vaw ma Bay ma Bəla ba a tsakay. Akwa ha kam neney hay mandzara ha kamar masəfaya a sana. 43Tuwam vaw kwar kuray Fariziyeŋ a neney hay me wuɗey slam mendzey tsəfəmey ana hay da 'ay me ɗuley mey ana hay, ka tsəmakwar guma ka slam me kusey hay. 44Tuwam vaw kwar kuray a neney andza ɗay tsəvay na me sərey kakay ana hay, ma halam ta 'arra mandzara ka sərafama na.» 45Arka ndaw asləta da walaŋ ma ndaw me sesəkey mewey hay, ma ləvar a Yezu: «Miter, ka tsey andza ha na, ka tseɗey na la tiyatsa seŋgey.» 46Ŋga me mbəɗey kava: «Kuray a neney, ndaw me sesəkey Mewey ana hay tiyatsa na, tuwam vaw kwar! Ka pəmatar tek me ləhey kambəlaɓa ana hay ka 'ar ma ndaw hay, kuray ana na, ka ləmamar kwa ta bəzey har asləta a tek ana me ləhey ana kakay. 47Tuwam vaw kwar! Kuray a neney ma zladəmatara ɗay tsəvay ma ndaw sek ana hay, azlakwa zlay ma kəɗatərawa na baba kwar ana hay. 48Kəɗey na ka kam seydewe ma tek ma baba kwar a hay ma kəmawa na na a dakwar 'ar. Taya na ka kəɗəmatərawa ndaw sek hay ba, kuray tey na, ka zladəmatara ɗay tsəvay ta na hay. 49Hərway ma mey na, ma səra ’ar ma Bay ma Bəla na ta ’ar aŋga a ləvey na: i da sləratərawa ndaw sek hay, ta maslaŋ hay, a da kəɗəmata vagay ahiya, a da kadəmata tatakway. 50Ma aza ka da sadəmata malor ana na ta ndaw ma bəla neney hay, mambaz ma ndaw sek hay tabiyaha ma mbəɗawa zla da ma zlawa ma bəla na, 51zla ka mambaz ma Abel, kasl ka mambaz ma Zakari ma kəɗama da walaŋ ma ŋgwa kuley ta slam me durzey tek ana. Ayaw i ɓadakwar, ma da sa malor ana na ndaw ma bəla neney hay. 52Tuwam vaw kwar! Kuray ndaw me sesəkey Mewey a neney hay, kuray təɓarama lekile ma me sərey tek ba a huɗa har a kwar, kuray ana ta ’ar kwar ana ka fuləkwam kakay, ndaw ma wuɗam ma fuləkwey ana hay na, kuray təkarəmata ba.» 53Andza ŋga ma bawa ba da huɗa na, ndaw me sesəkey Mewey hay ta Fariziyeŋ hay mevel ma tsatar, ma tsəhafama bəzay ma guma hay haɗadzidzay gəle gəle, ma ka mbəɗafatərawa kava. 54Ma ŋgafama gendeɗ, ma ka da ndzafam bəzay ma guma da huɗa asləta.

Currently Selected:

Luk 11: MOF

Highlight

Copy