Luk 12

Yezu a katar ka 'ar ɗaf a gawla ŋga hay

(Mt 10.26-33, 19-20)

1Andza ndaw hay ka kusəmawa tsoy ɓertsetse a key gabal haɗadzidzay, a ŋgaɗətsam vaw na, Yezu ma zlar ma ləvatar a gawla ŋga hay: «Tsufəmey aha na, wam daw ka vaw ka is ma Fariziyeŋ hay, ka ləva na mbaɗa mbaɗa ta. 2Tek na ma sahəta na hay na tabiyaha a da wurəmata. Tek na ma kəzla na hay tabiyaha a da səram. 3Kavəday ma mey na tek na kuray ma tsənadama da dey zeŋ zeŋ ana hay tabiyaha na, ka da tsənadəmata ta rəpas, na kuray ma sasukwam a veɗ sləmay da bəzay 'ay ana hay na, a da tələkadama mey ka mazaŋ. 4I ləvakwar a kuray dzam a ɗaw hay, ka da wasam ta ndaw me kəɗey tapay ma vaw a neney vagay aha dada na zlay, hərway a dəba na na, a slafa me key tek mekelehe dasakay. 5I da ɓafakwar ka ndaw na kuray ka wasadama na: wasam na ta ndaw na tsoy ka kəɗaka ba vagay aha na na, a slafa ma kəladaka a waw ma laɓa ha na. Ayaw i ɓadakwar, wasam na ta ndaw ana ŋga na na tok. 6Ka sisey tsew na, a vəlam ɗiyeŋ kava zlam kakay ɗaw? Amana kwa da ɗəma asləta Bay ma Bəla a mətada 'ar kakay. 7A fəna satsa na, kwa mbez 'ar a kwar hay tekeɗe na ma mbəsla hiya, ka wasam zlay, ka fənəmata ɗiyeŋ hay tabiyaha. 8I ləvakwar: kwa way way ma ɓada vaw ŋga ka slam dey ma ndaw hay, ŋga ndaw aɗaw na, Bəzey ma Ndaw tey na, a da ləvafa ŋga ndaw aŋga, ka slam dey ma madurlam ma Bay ma Bəla hay tiyatsa. 9Ama kendzey ndaw ana a mbəɗey mey ka slam dey ma ndaw hay waya: a səradaya kakay na, a da mbəɗam ka slam dey ma madurlam ma Bay ma Bəla hay a səradama ŋga na kaka tiyatsa. 10Kwa way way ma tsafa guma haya kakay aha ka Bəzey ma Ndaw na, a da safama yam; ama ndaw ana me tsey guma haya kakay aha ka Mesəfrey Kokwoɗ ana na, me sey yam ŋga na na daha tikay. 11Kendzey ka haləmakwar ba ka dala ma sariya da 'ay me ɗuley mey, da 'ay bay hay, da 'ay ndaw me wey dala hay na, ka da dzəmam ka vaw ka guma kwar ma da tsey me mbəɗey mey ka vaw kwar ana zlay. 12Hərway ka slam ana na, Mesəfrey Kokwoɗ ana a da tatəkadakwar guma na kuray ma da tsam ana hay.»

Bəzay ma guma ma ndaw zleley ma sərada 'ar kakay ana

13Da walaŋ ma ndaw ma kusa hiya na hay na, ndaw asləta ma ləvar a Yezu: «Miter, ləvar a malam a ɗaw na, la ka wanəkadama zleley ma baba la ma gəradandar ana.» 14Yezu ma ləvar: «Ma padaya ndaw me key sariya kwar aha, dakay na ndaw me wunəkey tek a kwar aha na wuyaway?» 15Arka ŋga ma ləvatar: «Wam daw ka vaw ka me wuɗey zleley kwar a neney kambəlaɓa na, mavəday ma ndaw ŋga zleley aha na, ka ləva na ŋga ka ndzafa mendzey ŋga tsoy da zleley ŋga kakay»

Guma ma mala ha ta meley ana ma ndaw zleley dəla ha na

16Arka ŋga ma tsatar bəzay ma guma ma mala ha ta meley ana: «Ndaw ana daha zleley aha, tek ka həvar ba da ley ŋga kəras kəras. 17Ŋga me ləvey ka 'ar vaw ŋga na: ‹I da key na teŋgey? Hərway slam a rafaya ma da pada tek a ɗaw ana i ma həva na dakay›. 18Arka ŋga me ləvey: ‹I da key na andza neney: i da pəsladata dey ɗaw hay ba, i da ndərata ɗuhwa hiya, arka aza i da ɓətsadata daw a ɗaw ta sa ma zleley ɗaw hay tabiyaha a ɗəma. 19Arka i da ləvey ka 'ar vaw ɗaw ana: ekəɗey na tek eɗek ma həva ha haɗa, ma mevey haɗadzidzay sana, sesəkey vaw ka dəba tok, zəmey tek, sey tok, key wuiya ɗek›. 20Ama Bay ma Bəla ma ləvar: ‹Kah ana na dəla ha zləna! Teseɗey ta dəvaɗ na, a da zəgama mesəfrey ɗek, arka tek eɗek ana tabiyaha ma ɓətsa ha na na, ma da zəma na way tok?› 21Nəkafama ka tek ma da safərawa ka ndaw me kwersey zleley ma bay ’ar ma vaw ŋga na, akwa hana ka key zleley na na ka tsakay ma Bay ma Bəla na.»

Me ndzey ta hahaya ma Bay ma Bəla

(Mt 6.25-33)

22Yezu ma ləvatar a gawla ŋga hay: «Nəkafama i ma tsakwar andza neney ana na: ka da dzalam 'ar ka mendzey kwar, ka tek a kwar ma da zəmey ana zlay, kwa ma vaw kwar ma da pey ka vaw mey zlay. 23Hərway mendzey na a fəna tek me zəmey, vaw tey na a fəna zana. 24Nəkafəmata ka maŋgəhak hay, a sləkam kakay, kwa a ɓətsam tek a dey kakay, kwa sewene ta dakay, kwa dey ta dakay, amana Bay ma Bəla a vəlatar aha tek me zəmey. Ka fənəmata ɗiyeŋ hay na, dey nday! 25Ndaw da walaŋ a kwar ma slafa ta 'ar me dzeley ŋga, ma slafa ma səkada mendzey ŋga dal kəɗey na way? 26Haɗaw azlakwa ka slafama me key tek na ketekwəɗey ana kakay na, ɗagay ka dzəmam ka sa na hay na, ka mey? 27Nəkafəmata ka meverzey hay da ley: a ɗəmam gogumay kakay, kwa a tsam tsaka kakay; i ləvakwar, kwa bay Salomoŋ ta ’ar a ŋga na ta maram aŋga tekeɗe na, ɗaɗa ka pey zana andza ma meverzey ana asləta da huɗa, kakay. 28Haɗaw azlakwa teseɗey Bay ma Bəla a kəlar zana ka vaw a guzer da ley, medew a kəladama a waw na, a kuray na a da kakwar a fəna na dey nday, ndaw a neney ta ’ar me pey ketewɗey ana hay! 29Kuray na, ka da səpam tek akwar ma da zəmey ana zlay, kwa na ma da sam ana hay zlay, ka pəsladama 'ar a kwar hay zlay. 30Tek a neney hay tabiyaha na, ndaw Zuif ahiya kakay ma bəla neney hay, a səpama mandzara me sesəkey vaw. Ama kuray na, Baba kwar a sərada tek a kwar ma sakwar ana. 31Səpam ka mey na Slala ŋga, aza sana hay tabiyaha na, a da vəladəmakwar ka 'arra adiya. 32Ka da wesey zlay bəzey welde ɗey, Baba kwar ma nəkafa na hayaha, ma da vəlakwar Slala na na.

Zleley hayna da 'ərlam

(Mt 6.19-21)

33Haɗəkadəmata zleley kwar hay, vəladama sadaka ha, ham bertete na mala me ŋgəsey kakay ana hay; kwarsam zleley na me dedəfey kakay ana hay da 'ərlam. Da huɗa na, kwa mahal a husafa kakay, kwa həraŋ a zəma kakay. 34Hərway kendzey zleley kwar ma pa ha da slam ana na, mevel a kwar ŋga da ɗəma tiyatsa.

Guma ma mala ha te meley ana ma mendzey tsekerkerre

(Mt 24.43-51)

35Ndzam na ta zana ma mber a kwar ahiya, lalam a kwar hay ka ndzam na ma həra hiya. 36Hayna ndzam na kal kal andza ma gawla ma 'ay hay, a hutam aha bay ma 'ay ta, a mawa ha da magurlam me zəgey kokwa. Andza ka husawa ba a fey aha mambaw tsana, a wuradəmara. 37Gawla ma 'ay ana hay ma ndzam ta dey ha kasl ka ma da mawa ma bay ta na na, taya da wuiya. I ɓadakwar dərkana, bay ma 'ay ana hana na a da pey zana ma mber, a da ndzadata ka slam me zəmey tek, a da həladatərawa tek me zəmey ka har. 38Kendzey bay ma 'ay ana a da mawa ta wuzla dəvaɗ, dakay na ta lamɗa, ama re a ndzafata ta dey na, na ŋga na na wuiya ɗuhwa ha ka taya seŋgey. 39Ka səradama ha seŋgey: kendzey bay ma 'ay a sərada ha mahal a da sawa 'ay ŋga lam kəɗey kəɗey ma dəvaɗ na, a da mbəkada ha ŋga ka sləlara 'ay ŋga kakay seŋgey. 40Kuray ana tiyatsa na, ndzam ma həla vaw ahiya, hərway Bəzey ma Ndaw a da sawa na ka har ana kuray ma səradama kakay ana.»

Gawla ma 'ay hayna, ta na haya kakay ana

41Piyer me ləvey tok: «Bay’ərlam a ɗaw, ka tsa guma neney ma mala ha ta meley ana na a la dada tsukuɗu, ma ndaw hay tabiyaha ɗaw?» 42Bay’ərlam ma ləvar: «Ɗuhwa ma gawla ma 'ay hay na way? Dzerey aha, bay ta ka vəladara tek me zəmey ta ba a har aŋga, ma ka wanəkadatara tek me zəmey kassla ka har ana. 43Gawla ma 'ay ana ŋga na na, ŋga da wuiya! Kendzey bay ma 'ay ana a sawa, a ndzafa a key aha mber ana na. 44I ɓadakwar dərkana: a pada ma nəkafa dey ka zleley ŋga hay tabiyaha. 45Ama haɗaw gawla ma 'ay ana a ləvey ka 'ar vaw ŋga na: ‹Bay ɗaw ana a sawa ha bəse tsaray kakay sana›, ŋga tsəkam ndzafata ma kəɗata sa ma gawla ma 'ay a sana hay, ta dem me key mber da 'ay ana hay, ŋga ma təɗafa me zəmey tek a vaw ŋga na, me sey zom ha mawey kambəlaɓa. 46Bay ma gawla na, a da ndzafərawa na ta pas ana ŋga na a par aha dey kakay ana, da har a ŋga na, a sərada kakay ana; a da hara ba, a da hətama na andza ma ndaw zuif ahiya kakay ana hay. 47Gawla ma 'ay ana ŋga na ma sərada tek ma bay ŋga me wuɗey ana, amana, ŋga ka həlada vaw kwa me key tek, andza ma bay ŋga me wuɗey ana kakay na, a da ndzefey me kəɗey na kambəlaɓa. 48Ndaw na ma sərada tek ma bay ŋga me wuɗey ka kama andza ha kakay ana na, kwa ka key tek ba akwa a da kəɗama kava na, a da ndzefey me kəɗey na, nekəɗey dada. Ka vəlamar tek ba a ndaw ana haɗadzidzay na, a da tsəhafama haɗadzidzay tey; ka pamar tek ba a har ma ndaw ana haɗadzidzay na, a da təɓama na haɗadzidzay tiyatsa.

Yezu na a sadərawa me tsey vaw

(Mt 10.34-36)

49I sawa na ma da kəlaɓa waw ka dala, akwa a saya hana na, waw ana a təɓey aha ka dəba! 50I da ndzefey na me dzuhəɓey, kwa andza a ləhaya ha tekeɗe na, ha aza ka ndesley. 51Ka kuray ma dzalama i zəgawa ka dala na zozoy ɗaw? A'ay, i ɓadakwar, dzadzak na me tsey vaw. 52Hərway ma mey na, zla ekəɗey na, ndaw hay da 'ay ta zlam na, a da tsam ka vaw, ndaw makar ka ndaw tsew, ndaw tsew ka ndaw makar. 53A da tsam ka vaw, baba a da mbəɗafa 'ar ka bəzey, bəzey a da mbəɗafa 'ar ka baba ŋga. Maya a da mbəɗafa 'ar ka dem aŋga, dem tey a da mbəɗafa 'ar ka may ŋga. Maya ma zel a da mbəɗafa 'ar ka kokwa ma bəzey ŋga, kokwa a da mbəɗafa 'ar ka maya ma zel aŋga.»

Ma sərada zeheɗ ma tek hay

(Mt 16.2-3)

54Yezu ma ləvatar a ndaw hay ma kusa hiya sa: «Andza kuray ka nəkadama pazlay ba a lawa ta mey ŋgwa na, arka ka ləvam tsa na: yam a da sawa, arka na a key andza ha. 55Kuray ka nəkadama memeɗ ba a mey aha a mey dzaŋdzor na ka ləvam: merɓey a da key kambəlaɓa, arka na a key andza ha. 56Kuray a neney na, ndaw maləwaɗay hay zləna! Ka səradama me key ma tek ma dala hay, ta na ma 'ərlam hay tok na, tek na me key ekəɗey ana tok na, ka səradama sakay na teŋgey tok?

Dazladama mey ta ndaw dugwan eɗek

(Mt 5.25-26)

57Ɗagay ka kama sariya ka 'ar vaw kwar ana satsa na, ta na dzerey aha kakay na, ka mey? 58Kəɗey na kendzey ka dawam aha ta ndaw dugwan eɗek a slam ma sariya na, key wewer ma parətawa vaw ba da har aŋga zla ka tsakay tsəveɗ, zləna me wesey na, a da vahaka ka slam ma ndaw me key sariya, arka ndaw me key sariya a da vəladaka a har ma sowedzey, sowedzey tey a da kəladəmaka a daŋgay. 59I ɓadaka, ɗaɗa ka da bawa ha da huɗa kakay, haɗaw kah ka warka tərre ta sisey adzay kakay ana.»

Currently Selected:

Luk 12: MOF

Highlight

Copy