Luk 13
13
Yezu a wunata ndaw hay ma mbəɗada mendzey
1Da har ana ŋga na na, ndaw hay ma səmawa ma tsamar ka ndaw ma Galiley hay, na Pilat ma kəɗata vagay ahiya da har a kam aha kuley ana. 2Ŋga ma mbəɗatar kava: «Taya ma sam banay andza neney na, ka kuray ma dzalama na, a kaɗəmata na, taya ma ŋgəsa hiya a fənəmata sa ma ndaw ma Galiley ana sana hay ɗaw? 3a ’ay i ləvakwar; ama haɗaw kuray ka mbəɗadama mendzey kwar hay kakay na, ka da bazlam na kalas andza ma ta neney ana. 4Kuray ma dzalama na ndaw ana ŋga na hay kurow kava tsakar ana, segendel ma mbəzlafata da Silowey ma mətsam ana na, ka ŋgəsam ba a fənəmata sa ma ndaw ma Zeruzalem a sa na hay ɗaw? 5a ’ay i ləvakwar; ama haɗaw kuray ka mbəɗadama mendzey kwar hay kakay na, ka da bazlam na kalas andza ma ta neney ana satsa»
Guma ma mala ha te meley ana ma vəɗe tek me yey kakay ana
6Ŋga ma tsadatara bəzay ma guma neney ma malaha ta meley ana: «Ndaw ana daha vəɗe tek ma rəva ha da ley ma viŋe ŋga. Andza ma sawa a da ŋgəlaɓa bəzey ŋga na tok na, a da ndzafa na ma yaha kakay. 7Ŋga ma ləvar a ndaw ma nəkafara dey ka ley ana: ‹Nəkafa, ka key mevey makar i sawa ma da ŋgəlaɓa bəzey ma vəɗe tek a neney tok na, kwa i ka ndzefey kakay. Rətsa ba zləna, a sasəɓa dala tedehe na ka mey?› 8Ama ŋga ma mbəɗar kava: ‹Bay, ma teleɗey na mbəkada ɗagay, i zləlara bəzay ŋga na tserlew na, i par bobor. 9Naŋgərhay ka mey na, a da yey dakay na, azambay ka rətsa tok.›»
Yezu ma ndalada ŋgwas ana daha ma təra ha ta pas ma mesley
10Ta pas ma mesley ana daha, Yezu a tatəkadata ha ndaw hay da 'ay me ɗuley mey. 11Ŋgwas ana daha da huɗa, ta fakalaw aha da 'ar ma tərada ka key mevey kurow kava tsakar. A heley na ta megweɗəkwey, zləna a slafa ma lətsada dəba kalkal sakay. 12Andza Yezu ma nəkada ba na, ŋga ma tsəraɓa guma, ma ləvar: «Ŋgwas eɗey, nəkafa kah ka ləhawa ba da me tərey ɗek.» 13Ŋga ma bazləhafa har, arka tsana, ŋga me lətsey dender dender. Arka ŋga ma zlar ma səmbəra Bay ma Bəla. 14A ndalar a bay ma 'ay me ɗuley mey ana bəzakakay; hərway a ndalada ŋgwas ana na, ta pas ma mesley. Ŋga me tsey guma, ma ləvatar a ndaw ma kusa hiya na hay: «Pas me key mber na dəvaɗ mukwa, hayna səmawa ta pas ana ŋga na na hay da ndaləmaɓa vaw kwar kwa, ama na ta pas ma mesley zlay.» 15Bay’ərlam Yezu ma mbəɗar kava: «Kuray a neney ndaw mbaɗa mbaɗa na hay! Ta pas ma mesley na, ndaw da walaŋ a kwar ma pasəkərawa sla ŋga, dakay na zuŋgow aŋga, ma da vələrawa yam na dakay ɗaw? 16Ŋgwas a neney na dem ma Abraham tiyatsa, nəkafa Setene ma dzuwada mevey kurow kava tsakar na, təɗe a dafa ma pasəka ba da me dzuwey ŋga neney na ta pas ma mesley kakay ɗaw?» 17Ka guma ŋga neney na, hwaray ma katar a ndaw dugwan aŋga hay tabiyaha. Ama ndaw ma kusa hiya na hay na, a datar 'ar bəzakakay, ka tek aŋga hayna hay me key ana.
Guma ma mala ha ta meley ana ma bəzay ma guma ma bəzey ma ɓəzaŋ
(Mt 13.31-33; Mk 4.30-32)
18Yezu me ləvey arka tok: «Təɗe ma malada Slala ma Bay'ərlam na ta mey? I ka malada na ta tek a mey? 19Ma meley ŋga na na, ta bəzey ma ɓəzaŋ, ndaw me zəgey ma sləkey ay dzerne ŋga, ŋga ma pətsawa, me gəley ha me tərey vəɗe ma tek ɗuhwa ha, arka na ɗiyeŋ ma ’ərlam hay ma kam 'ay ta ka hawal ana hay.»
Bəzay ma guma ma is
20Ŋga me ləvey sa: «I ka malada Slala ma Bay'ərlam na ta mey? 21Ma meley ŋga na na ta is, ŋgwas me həley, ma haləɓada ka vaw ta hapa haɗadzidzay. Arka ma zlambaradərawa hapa na hana, tabiyaha.»
Mambaw tsəzlehehe na
22Ŋga ma daway ta wuraw ɗuhwa na hay ta wuraw bəza na hay, a tatəkadata ndaw hay paɗ tsəveɗ aŋga ma daw ’ar a Zeruzalem ana.
23Ndaw ma tsəhafa: «Bay’ərlam a ɗaw, ndaw na ma da buwəmata na hay na nekəɗey dada ɗaw?» Ŋga ma ləvatar tok: 24«Kam gədaŋ me fuləkwey na, ta mambaw ana ŋga na tsəzlehehe na, zləna, hərway i ɓadakwar, ndaw hay haɗadzidzay a da səpam me fuləkwey, amana a da slafama ha kakay.
25A dəba na na, bay ma 'ay ana a da lətsawa, a da wuɗada mambaw, kuray na ma da zarəmawa da bəla na hay na, ka da zlamar me fey mambaw, ta me ləvey aha kava: ‹Bay’ərlam, wurandar mambaw tey!› A da mbəɗəkurawa kava: ‹Kuray ɗaw, i səradakwar ka səmawa da mey tikay!›
26Arka ka təɗafama me ləvey tok: ‹La zəməwa tek, la səmawa tek na ka slam dey ɗek, ka tatəkadatərawa ndaw hay na, ka slam ma 'ay la na seŋgey.› 27Arka a da ləvəmakwar: ‹Kuray a neney hay ɗaw? I səradakwar ka səmawa da may tikay, dam ba dəreŋ ka tsakay ɗaw, kuray a neney me key tek haya kakay ana hay na.›
28Andza aza ka da nəkadəmata Abraham, Izak ta Zakob, ta ndaw sek hay tabiyaha da Slala ma Bay'ərlam, ama kuray na, ma kuya hiya da bəla na, ka da tuwam ta me pəɗey sler aha. 29Arka ndaw hay tabiyaha, a da səmawa da bəzay, da mey ŋgwa, da tsakay lam, da mey dzoŋdzor ma da ndzefey slam, ma da zəmey hwahwaɓay da Slala ma Bay'ərlam.
30Kəɗey tok na, da walaŋ ma ndaw madakway dok ana hay na, ndaw ma da tərey ndaw tsəfəmey ana hay na daha. Da walaŋ ma ndaw tsəfəmey ana hay na, ndaw ma da tərey ndaw madakwaydok ana hay, daha.»
Yezu ta Zeruzalem
(Mt 23.37-39)
31Da har ana ŋga na na, Fariziyeŋ hay nekəɗey ma gurəmawa ka tsakay ma Yezu ma ləvamar: «Daw ba, ka sləna ɗey, hərway Erod a wuɗey ma da kəɗaka vagay aha.» 32Ŋga ma ləvatar: «Dam ləvamar a mezerem ana ŋga na na: ekəɗey ana na, i ɓəley aha fakalaw hay, i ndeley aha ndaw hay teseɗey ta medew adzay, dəvaɗ mamakar ana, i ndəvada. 33Ama a dafa na, i ka səpa tsəveɗ a ɗaw ma teseɗey, ma medew, ta meney ka mey ana, hərway a dafa na ndaw sek ka da mətsey da 'ar bəla ma Zeruzalem zlay. 34Zeruzalem, Zeruzalem, kah a neney ma kəɗata ndaw sek hay ba vagay ahiya na, ma kwaytsata ndaw na Bay'ərlam ma slərəkawa na hay ba na! Zla ekəɗey kakay akwa a saya ma kusata bəzey ɗek hay, andza ma may gogwar ma kusata bəzey ŋga hay a gwarɓasla ŋga hay, amana, ka wuɗam kakay. 35Kəɗey tok na, a da mbəkadəmakwar 'ay kwar ana. I ɓadakwar: ka da nəkadəmaya ha sakay, ha kasl ka har ana, kuray ma da ləvam: Ndaw ma sawa da mezəley ma Bay’ərlam ana na, ma pəsa mey aha ba!»
Currently Selected:
Luk 13: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun
