Matalikilo 25
25
Bamulunyungu lwakwe Abulaamu bamwi
(1 Maka 1:32-33)
1Abulaamu wakeeba aumwi mwanakashi uyo wakalinga kwiitwa ayi Ketula. 2Muli wooyo wakashalilaamo Simulani, Jokishani, Medani, Midyani, Ishibaki alimwi aShuwa. 3Jokishani ngoishi Sheba aDedani. Bamulunyungu lwakwe Dedani bakalinga bene Ashuwa, bene Letushi, abene Leyumi. 4Bana bakwe Midyani basankwa bakalinga Efa, Efeli, Anoki, Abida alimwi aEluda. Aba boonse bakalinga bamulunyungu lwakwe Ketula.
5Ono Abulaamu wakashiya shoonse nshaakalinga kucite mumaansaakwe Isaki. 6Nakubi boobo kaacili muumi baana ba bamakaakwe bamwi wakabapa shipo. Lyalo wakabatuma kucishi ca kwicwe kwaamba ayi bashiye Isaki mwanaakwe eenka,
Abulaamu mbwaakafwa akubikwa
7Abulaamu wakekala myaaka ili 175. 8Wakafwa kaali paciimo cakwiinga ayi wakalya weenkula, amyaaka imweelete. 9Isaki aIshimaeli bana bakwe basankwa bakamubika mucimfwengo ca Makipela, mumuunda wakalinga kwicwe lya Mamule uyo wakalinga wakwe Efuloni mwanaakwe Sowa mwine Iti. 10Uyo ngomuunda Abulaamu ngwaakoola kubene Iti. Boonse bobilo lakwe aSaala mukaakwe bakabikwa mweenka umo.#Mata 23:3-16 11Abulaamu ndyaakafwa, Lesa wakapa coolwe abuumbi Isaki mwanaakwe, uyo wakalinga kwikala pafwaafwi aMukalo wa Wooyo Muumi Umbona.
Bamulunyungu lwakwe Ishimaeli
(1 Maka 1:28-31)
12Ishimaeli uyo Abulaamu ngwaakashalila muli Aga, musha wakwe Saala, mwine Ijipiti, 13wakashala baana basankwa bakonkelene kweelana ambobakashalwa. Nkokwaamba ayi Nebayoti, Keda, Adibilu, Mibisamu, 14Mishima, Duma, Masa, 15Adadi, Tema, Jetuli, Nafishi alimwi aKedema. 16Aba bakalinga mbobashali bakulukulu ba mishobo ili likumi ayobilo iyo icite meena aya. Meena abo akalinga kutumbwa mishi yabo amobakalinga kuya ciyaka misumba. 17Ishimaeli wakekala myaaka ili 137. Lyalo wakafwa. 18Bamulunyungu lwakwe Ishimaeli bakalinga kwikala mucishi cakalinga pakati ka Afila aShuwa kwicwe lya Ijipiti na utooya kuAsilya. Bakapansaana kwikala abamulunyungu lwakwe Abulaamu bamwi mukwiinga bakalinga kupatene.
Kushalwa kwakwe Esau aJakobo
19Ici ncikani ca pali Isaki mwanaakwe Abulaamu musankwa. 20Isaki wakalinga kucite myaaka ili 40 ndyaakeeba Labeka mwanaakwe Betiwelo uyo wakalinga mwine Alamiya kuswa kuMesopotamya, alimwi nankashi yakwe Labani. 21Labeka taakalinga kukonsha kushala, aboobo Isaki wakamupaililaako kuMwaami Lesa. Lesa alakwe wakakumbula mupailo wakwe lyalo wakamita. 22Wakamita bampundu, ono kabatana kushalwa bakalinga kulwishanya mumala. Mpeeke wakalyaamboosha ayi, “Ino cintu ca mushobo uyu inga cancitikila buyani?” Lyalo wakaya weepusha kuMwaami Lesa.
23Mwaami Lesa wakamwaambila ayi,
“Mumala umo uliyumwite mishobo ya bantu yobilo
Ulaakutumbuka bantu ba mishobo yobilo bapatene.
Mushobo womwi ulaakunoocite nkusu kwiinda umwi,
munenebantu ulaakunoosebensela mwanikebantu.”#Loma 9:12
24Ciindi ndicakashikila wakatumbuka baana bansankwa bobilo. 25Mutaanshi wakalinga musalala alimwi cikanda cakwe cakalinga anga ncakufwala ca peculu cabooyabooya. Paceebo ceeco wakatumbwa ayi Esau. 26Wabili wakashalwa kaacatite cankusu kukashindi kakwe Esau. Paceebo ceeco wakatumbwa ayi Jakobo. Isaki wakalinga kucite myaaka ili 60 ndibakashalwa.
Esau mbwaakakaka bunenebantu bwakwe
27Basankwa bobilo abo bakakula. Esau wakaba mufwimi ucibwene alimwi wakalinga kusunishi buumi bwakuya muluundu, sombi Jakobo wakalinga kuumwite abuumbi alimwi usuni kucanikabo paŋanda. 28Isaki wakalinga kusunishi Esau ceebo wakalinga kusuni kulya tunyama ntwaakalinga kucaya, sombi Labeka wakalinga kusunishi Jakobo.
29Bumwi bushiku Jakobo ndyaakalinga kuteleka musushi wa cileemba, Esau wakapola kuswa mukufwima kaafwite nsala. 30Aboobo wakaambila Jakobo ayi, “Endesha mpeewo musushi usalala uyo, ndafwa nsala.” Nceceeco ncaakalinga kwiitilwa ayi Edomu. 31Jakobo wakakumbula ayi, “Ntookupa na umpe bunenebantu bwako.” 32Esau wakaamba ayi, “Cilibo kabotu! Ntooyanda kufwa pano. Ono bunenebantu butooncafwanshi?” 33Jakobo wakakumbula ayi, “Taanguna shomesha cakulumbila ayi utoompa bunenebantu bwako.”#Ebulu 12:16
Esau wakashomesha cakulumbila akupa Jakobo bunenebantu bwakwe. 34Lyalo Jakobo wakamupaawo shinkwa amusushi umwi. Wakalya, amanishe wakanyamuka, waya. Ubo Esau mbwaakakaka bunenebantu bwakwe.
Currently Selected:
Matalikilo 25: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
