Matalikilo 26
26
Isaki mbwaakekala kuGela
1Kwakaba aimwi nsala mucishi ico kuleka imwi yakataanguna muciindi cakwe Abulaamu. Isaki wakaya kuli Abimeleki, mwaami wa bene Filisiti, kuGela. 2Mwaami Lesa wakaboneka kuli Isaki akwaamba ayi, “Utayi kuIjipiti, ukale mucishi muno mondakakwaambila. 3Kala muno, alimwi ndanooli awebo akukupa coolwe. Ndaakupa cishi coonse ici kuli ndiwe abamulunyungu lwako. Ndaakucita kweelana ambondakalasha iso Abulaamu. 4Ndaakukupa bamulunyungu lwako baanji bweenka mboobona nyenyeenshi mwiculu, alimwi ndaakubapa cishi coonse ici. Ndaakupa coolwe mishobo yoonse pacishi ca panshi kwiinda mubamulunyungu lwako#Mata 22:16-18 5mukwiinga Abulaamu wakanyumfwila akukonkela milawo yangu yoonse anshindakamulwiita ayi acite.”
6Aboobo Isaki wakekala kuGela. 7Ono basankwa bakooko na bamwiipusha pamukaakwe, wakalinga kubaambila ayi ngunankashi yakwe. Taakalinga kusumina ayi ngumukaakwe kuloonda ayi inga bamucaya mukuyanda kubwesa Labeka uyo wakalinga mubotu abuumbi.#Mata 12:13; 20:2
8Isaki ndyaakekalaako ciindi cilaamfuuko uko, bumwi bushiku Abimeleki ndyaakalangilisha pambwelyo, wakabona Isaki batoolyana nkwela aLabeka. 9Abimeleki wakatuma nkombe ayi ese. Lyalo wakamwaambila ayi, “Anu ngumukaako! Ino wakaambilanshi ayi ngunankashi yako?” Isaki wakakumbula ayi, “Ndakayeeya ayi ntoocaikwa na ŋambe ayi ngumukaangu.” 10Abimeleki wakaamba ayi, “Ono nceciinshi ici ncewacita kuli ndiswe? Calinga cuubu womwi pabasankwa bangu koona amukaako ono naakwiinga ndiwe walengesha kwaamba ayi tube amulandu.” 11Mpeeke Abimeleki wakacenjesha bantu boonse ayi, “Uyo woonse eshi akatakooshe musankwa uyu nabi mukaakwe ulaakucaikwa.”
12Isaki wakalima mucishi ico alimwi mwaaka uyo wakatebula shili mwaanda kwiinda pasheesho nshaakashanga, mukwiinga Mwaami Lesa wakamupa coolwe. 13Wakatolelela kumusumpula kushikila wabila abuumbi. 14Ono ceebo cakwaamba ayi wakalinga kucite mbelele aŋombe shiinji alimwi abasebenshi baanji, bene Filisiti bakamufwita munyono. 15Mpeeke mikalo yoonse yakalinga yakaba basebenshi bakwe Abulaamu kaacili muumi, bakeefukila.
16Lyalo Abimeleki wakaambila Isaki ayi, “Swa mucishi cesu. Webo waba ankusu kwiinda ndiswe.” 17Aboobo Isaki wakanyamuka waya wayaka misumba muliwesa lya Gela umo mwaakekala ciindi ciniini. 18Wakakalula mikalo yeenka yakalinga yakabwa muciindi cakwe Abulaamu, iyo bene Filisiti njebakalinga bafukila Abulaamu ndyaakafwa. Isaki wakapa meena mikalo eenka ishi ngwaakalinga weepa.
19Basebenshi bakwe Isaki bakakaba mukalo mucinyika akucana maanshi. 20Bumwi bushiku beembeshi ba muGela bakaambana abeembeshi bakwe Isaki akwaamba ayi, “Maanshi aya ngesu.” Paceebo ceeco Isaki wakatumba mukalo uyo ayi, “Eseki” nkokwaamba ayi, “Kwaambana.”
21Basebenshi bakwe Isaki bakakaba aumwi mukalo sombi awalo pakaba shakwaambana. Paceebo ceeco wakautumba ayi, “Sitina” nkokwaamba ayi, “Kupatwa.” 22Wakalonga apo akukaba aumwi mukalo. Sombi pa wooyu tapakwe kubaawo shakwaambana. Aboobo mukalo uyu wakautumba ayi, “Lewoboti” nkokwaamba ayi, “Lwaanguluko.” paceebo ceeci wakaamba ayi, “Ono Mwaami Lesa watupa lwaanguluko kwikala mucishi muno akunsumpula.”
23Isaki wakanyamuka waya kuBiyasheba. 24Mashiku ayo Mwaami wakaboneka kuli nguwe akwaamba ayi, “Ndime Lesa wakwe iso Abulaamu. Utaloondi, ndi awebo. Ndaakukupa coolwe abamulunyungu lwako ceebo ca kulasha nkondakalasha musebenshi wangu Abulaamu.” 25Isaki wakayaka cipaililo apo akulambila Mwaami Lesa. Lyalo wakayaka musumba apo, mpeeke basebenshi bakwe bakakaba aumwi mukalo.
Isaki mbwaakapangana aAbimeleki
26Abimeleki wakesa kuswa kuGela aAusati shikumulwiitaako, pantu pomwi aPiko munene wa bashilumamba, mukubona Isaki.#Mata 21:22 27Mpeeke Isaki wakabeepusha ayi, “Ceebonshi sunu mwesa mukumbona kakuli mwakancita anga ngumulwani akuntanda mucishi canu?”
28Bakakumbula ayi, “Ono tweshiiba ayi Mwaami Lesa uli awebo. Aboobo twayeeya ayi pakati kesu awebo pabe cipangano cakulumbila. Tulisuni kwaamba ayi ushomeshe 29ayi teshi ukatuciteewo cibiibi bweenka swebo mbotutakwe kukucitilaawo cibiibi. Twakalinga kweendabo kabotu awebo, alimwi twakakukusha mucishi cesu muluumuno. Ono caboneka patuba kwaamba ayi Mwaami Lesa wakupa coolwe.” 30Isaki wakabamba shakulya kwaamba ayi basekelele, lyalo bakalya akunwa. 31Macuunsacuunsa bushiku bwakaboolaawo, womwi awomwi wakashomesha cakulumbila. Lyalo Isaki wakabashindikila, mpeeke bakapansaana kabali beshicibusa.
32Pabushiku ubo basebenshi bakesa balwiita Isaki shamukalo ngobakakaba. Bakaamba ayi, “Twaacana maanshi.” 33Mukalo uyo wakautumba ayi, “Sheba” nkokwaamba ayi, “Kushomesha cakulumbila.” Ubo mboboobo ndabala inene ya Biyasheba mboyakapekwa liina.
Bamakaakwe Esau baswamashi
34Esau ndyaakaba amyaaka ili 40, wakeeba banakashi bene Iti bobilo, Judisi mwanaakwe Biyeli aBesimati mwanaakwe Eloni. 35Aba bantu bakalengesha bwikaalo bwakwe Isaki aLabeka kuyuma.
Currently Selected:
Matalikilo 26: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
