Yohanɛɛsɩ 5

Yesu laba nɛ kalɩkalaɣ nakɛyɛ yɔɔ cɛ

1Pʋwayɩ lɛ, Yesu wolo Yeruusalɛm Yuda ñɩma kazandʋ natʋyʋ yɔɔ. 2Lɩm kujomuu nakʋyʋ wɛ Yeruusalɛm tɛtʋ kámaɣ́ yɔɔ nɔnɔɔ ŋgá payaɣ se Heŋ Nɔnɔɔ yɔ kɔ-cɔlɔ. Paasiɣ kʋ-cɔlɔ laŋasɩ kagbaanzɩ nɛ pɛɛ. Payaɣ peeɖe nɛ Ebree taa se Betɛsda. 3Kʋdɔndɩnaa sakɩyɛ hɛnaɣ laŋasɩ ńzɩ́ sɩ-tɛɛ: yʋlʋmaa nɛ tala tɩnaa nɛ kalɩkalasɩ. [Paɖaŋaa se lɩm eciɣdi. 4Mbʋ́ pʋyɔɔ yɔ, Kɩpaɣlʋ tiyiyu nɔɔyʋ lɩɣaɣnɩ ɛsɔdaa wiɖiyi wiɖiyi nɛ etiki kɩ-taa nɛ eciɣdiɣ lɩm nɛ kʋdɔndʋ weyi ɛcalɩɣ tibu pɩ-taa alɩwaatʋ ńdʋ́ yɔ, ɛ-yɔɔ cɛkɩ. Paa ɛ-kʋdɔŋ ɛɛwɛ ɛzɩma.] 5Abalʋ nɔɔyʋ kɛwɛ peeɖe. Pɩnzɩ niidozo nɛ lutozo yɔ, pɩwɩɣʋ-ɩ yɔ. 6Pɩkɛdaa lɛ, Yesu na-ɩ, ɛhɛnaa nɛ ɛtɩlɩ se ɖooo lɔŋ ɛwɛ peeɖe. Pʋ-yɔɔ ɛpɔzɩ-ɩ se: «Ñe-liu wɛɛ se ñɔ-yɔɔ ɛcɛ naa we?» 7Kʋdɔndʋ ɛnʋ ecosi-i se: «Hayɩ Đajaa! Mɛnfɛyɩ nɔɔyʋ se ɛkpaɣ-m nɛ etisi-m lɩm taa alɩwaatʋ ndʋ́ peciɣdiɣ-pʋ yɔ. Mañakɩ pana se mowoki lɛ, nɔɔyʋ ñɛtɛm-m layʋʋ.» 8Peeɖe Yesu heyi-i se: «Kʋyɩ ŋkpaɣ ña-ñalʋʋ nɛ ŋɖɔ!» 9Ɛtɩyɔɔdɩ ḿbʋ́ lɛ, abalʋ ɛnʋ ɛ-yɔɔ cɛ nɛ ɛkpaɣ ɛ-ñalʋʋ nɛ ɛpazɩ ɖɔm.

Ŋgʋ́, pɩɩkɛ kɩyakʋ kɩhɛzʋʋ wiye. 10Pʋ-yɔɔ Yuda ñɩma awiya heyi-i se: «Sɔnɔ pɩkɛ kɩyakʋ kɩhɛzʋʋ, ɖa-paɣtʋ taha nʋmɔʋ se ŋsɩɣlɩ ña-ñalʋʋ.» 11Abalʋ ɛnʋ ecosi-wɛ se: «Weyi ɛlaba nɛ mɔ-yɔɔ cɛ yɔ, eheyi-m se mankpaɣ ma-ñalʋʋ nɛ mɔnɖɔ.» 12Peeɖe pɔpɔzɩ-ɩ se: «Anɩ ñeheyi-ŋ se ŋkpaɣ ña-ñalʋʋ nɛ ŋɖɔ?» 13Abalʋ ɛnʋ ecosi-wɛ se ɛtasɩm-ɩ. Toovenim lɛ, ɛtapɩzɩɣ se ɛsɩm-ɩ. Mbʋ́ pʋyɔɔ yɔ, ɛyáa samaɣ kɛwɛ peeɖe nɛ Yesu sʋʋ ka-taa nɛ ɛɖɛɛ.

14Pʋwayɩ lɛ, Yesu wolo Ɛsɔ ɖɩɣa taa nɛ ɛmaɣnɩ abalʋ weyi ɛ-yɔɔ cɛba ḿbʋ́ yɔ. Peeɖe eheyi-i se: «Welesi ŋnɩɩ, lɛɛlɛɛyɔ, ñɔ-yɔɔ cɛba. Taatasɩ kɩwɛɛkɩm labʋ nɛ nabʋyʋ tasɩ-ŋ labʋ nɛ pɩkɩlɩ ḿbʋ́.» 15Peeɖe abalʋ ɛnʋ ewobi eheyi Yuda ñɩma awiya se Yesu labɩna nɛ ɛ-yɔɔ cɛ. 16Pʋ-yɔɔ pakʋyɩ ɛ́lɛ́ yɔɔ, mbʋ́ pʋyɔɔ yɔ, kɩyakʋ kɩhɛzʋʋ wiye ɛlabɩ ḿbʋ́. 17Peeɖe Yesu heyi-wɛ se: «Man-Caa Ɛsɔ lakɩ tʋmɩyɛ tam, ma ɖɔɖɔ ḿbʋ́.» 18Ɛyɔɔdɩ ḿbʋ́ lɛ, Yuda ñɩma awiya tɛzɩɣ ñɩnʋʋ se pakʋ-ɩ. Mbʋ́ pʋyɔɔ yɔ, pɩtasɩɩnɩ se ɛtɔɖɔ kɩyakʋ kɩhɛzʋʋ paɣtʋ yɔɔ, ɛlɛ́, ɛtɔm ɖɔɖɔ se Ɛsɔ lɛ ɛ-Caa nɛ pɩwɩlɩɣ se ɛ nɛ ɩ pɛwɛ kɩmaŋ.

Caa cɛlɩ e-ɖoŋ tɩŋa ɛ-pɩyalʋ

19Peeɖe Yesu kaɖɩ-wɛ se: «Toovenim lɛ, meheyiɣ-mɩ se ma Ɛsɔ Pɩyalʋ lɛ, maapɩzɩɣ mala nabʋyʋ yem man-tɩ yɔɔ. Mbʋ́ man-Caa Ɛsɔ lakɩ nɛ manaɣ yɔ, pi-ɖeke koŋ malakɩ. Mbʋ́ pɩtɩŋa payɩ man-Caa lakɩ yɔ, ḿbʋ́ ɖɔɖɔ malakɩ. 20Mbʋ́ pʋyɔɔ yɔ, Caa Ɛsɔ sɔɔlɩ ɛ-Pɩyalʋ ma nɛ ɛwɩlɩɣ-m mbʋ́ pɩtɩŋa payɩ ɛlakɩ yɔ. Ɛkɔŋ-m wɩlʋʋ tʋma sɔsɔna wena akɩlɩ wena malaba ɛzʋnɔ yɔ nɛ mala nɛ pɩɖɩɣzɩ-mɩ. 21Toovenim lɛ, ɛzɩma mbʋ́ efeziɣ sɩɖaa nɛ ɛhaɣ-wɛ wezuu yɔ, ḿbʋ́ ɖɔɖɔ ɛ-Pɩyalʋ ma, mahaɣ mbá me-liu wɛɛ yɔ wezuu. 22Đɔɖɔ lɛ, Caa ɛɛhʋʋnɩ nɔɔyʋ. Ɛlɛ́, ɛha ɛ-Pɩyalʋ ma waɖɛ se mahʋʋnɩ ɛyáa tɩŋa payɩ tɔm 23nɛ piyele patɩŋa paɖʋ Ɛsɔ Pɩyalʋ hɩɖɛ ɛzɩ paɖʋʋ Caa Ɛsɔ yɔ. Weyi ɛɛɖʋʋ Ɛsɔ Pɩyalʋ hɩɖɛ yɔ, ɛɛɖʋʋ-ɖɩ ɖɔɖɔ Caa Ɛsɔ weyi etiyi-i yɔ.

24Toovenim lɛ, meheyiɣ-mɩ se weyi ewelesiɣ mɔn-tɔm nɛ ɛwɛnɩ lidaʋ weyi etiyi-m yɔ ɛ-yɔɔ yɔ, ehiɣ wezuu maatɛŋ. Paahʋʋnɩ-ɩ. Ɛtɛm lɩʋ sɩm taa nɛ ehiɣ wezuu maatɛŋ. 25Toovenim lɛ, meheyiɣ-mɩ se alɩwaatʋ natʋyʋ kɔŋ, halɩ tɩtɛm talʋʋ. Tɩ-taa sɩɖaa kɔŋ nɩʋ Ɛsɔ Pɩyalʋ nɔɔ nɛ mbá panɩɣ yɔ, pehiɣ wezuu. 26Ɛzɩma mbʋ́ wezuu lɩɣnɩ Caa Ɛsɔ cɔlɔ yɔ, ḿbʋ́ ɖɔɖɔ eyebi se kɩlɩɩnɩ ɛ-Pɩyalʋ ma mɔn-cɔlɔ. 27Ɛha-m waɖɛ se mahʋʋnɩ ɛyáa tɔm, mbʋ́ pʋyɔɔ yɔ, ma lɛ Ɛyʋ Pɩyalʋ. 28Pɩtaaɖɩɣzɩ-mɩ. Alɩwaatʋ natʋyʋ kɔŋ nɛ pɩlaŋ taa ñɩma tɩŋa payɩ nɩɩ mɔ-nɔɔ 29nɛ pefe. Mbá palabɩ mbʋ́ pʋwɛ ɖeu yɔ pe-wezuu caɣʋ taa yɔ, pehikiɣ wezuu maatɛŋ nɛ piyele mbá paba labɩ kɩdɛkɛdɩm yɔ, pahʋʋnɩ-wɛ nɛ pakʋ pɔ-tɔm.»

Ɛsɔ pɩyalʋ wɛnɩ aseɣɖe tɩnaa sakɩyɛ

30Yesu tasɩ yɔɔdʋʋ ɖɔɖɔ se: «Maapɩzɩɣ mala nabʋyʋ yem man-tɩ yɔɔ. Mahʋʋnɩ ɛyáa ɛzɩ Ɛsɔ heyuu-m yɔ. Mɔn-tɔm hʋʋ tʋʋzaa, mbʋ́ pʋyɔɔ yɔ, maacaɣ se mala me-liu ñɩm. Ɛlɛ́, malakɩ mbʋ́ weyi etiyi-m yɔ e-liu wɛɛ yɔ.»

31Yesu tasɩ yɔɔdʋʋ ɖɔɖɔ se: «Yee men-ɖeke maalɩzaɣnɩ man-tɩ tɩŋa ma-aseɣɖe yɔ, pɩɩwɩlaa se pɩtɛkɛ toovenim. 32Ɛlɛ́, nɔɔyʋ lɩzɩɣnɩ ma-aseɣɖe. Manawa se aseɣɖe nɖɩ́ ɛlɩzɩɣ mɔ-yɔɔ yɔ, ɖɩkɛ toovenim. 33Itiyi ɛyáa Yohanɛɛsɩ cɔlɔ se powolo pɔpɔzɩ-ɩ mɔn-tɔm nɛ ɛ́lɛ́ lɩzɩ ma-aseɣɖe toovenim. 34Ma lɛ, pɩtɛkɛnɩ kɩcɛyʋʋ se ɛyáa ɩlɩzɩ ma-aseɣɖe. Ɛlɛ́, mɔyɔɔdɩ Yohanɛɛsɩ tɔm se pɩya mɩ-ñʋʋ. 35Yohanɛɛsɩ lɛ, ɛ́lɛ́ ñaawɛ ɛzɩ kanɖʋ ŋgʋ́ pɔsɔba nɛ kɩ-ñalɩmɩyɛ ñalɩ mɩ-yɔɔ yɔ. Pʋ-yɔɔ mɩ-laŋa hʋlʋmɩnɩ ñalɩmɩyɛ ńɖɩ́ alɩwaatʋ pazɩ.

36Ma lɛ, malɩzɩɣ aseɣɖe nɖɩ́ ɖɩkɩlɩ Yohanɛɛsɩ ñɩnɖɛ yɔ. Mbʋ́ pʋyɔɔ yɔ, tʋma wena man-Caa ɖʋ-m nɛ malakɩ yɔ, a-maɣmaɣ alɩzɩɣnɩ ma-aseɣɖe se Caa Ɛsɔ tiyini-m. 37Man-Caa weyi etiyi-m yɔ, ɛ-tɩ tɩŋa ɛlɩzɩ ma-aseɣɖe ɖɔɖɔ. Ŋgʋ́, wiɖiyi ɩtanɩɩ ɛ-nɔɔ, ɩtana ɛ-ɛsɩndaa ɖɔɖɔ kaʋ. 38Ɩɩɖɔkʋʋ ɛ-tɔm camɩyɛ, mbʋ́ pʋyɔɔ yɔ, ɩfɛyɩnɩ lidaʋ weyi ma Caa Ɛsɔ tiyaa yɔ mɔ-yɔɔ.

39Ɩtazɩɣ tɔm ndʋ́ pama Ɛsɔtɔm Takayaɣ taa yɔ tɩ-taa, mbʋ́ pʋyɔɔ yɔ, ɩmaɣzɩɣ se tɩhaɣ-mɩ wezuu maatɛŋ. Meheyiɣ-mɩ se ńdʋ́ lɩzɩɣnɩ ma-aseɣɖe! 40Ŋgʋ́, ɩɩcaɣ se ɩkɔɔ mɔn-cɔlɔ nɛ ihiɣ wezuu ŋ́gʋ́!

41Pɩtɛkɛ ɛyáa samtʋ mañɩnɩɣ. 42Mansɩm-mɩ: Ɛsɔ sɔɔlɩm fɛyɩ mɩ-taa! 43Mɔnkɔm man-Caa lone taa, ɛlɛ́, ɩɩcaɣ se ɩmʋ-m. Ŋgʋ́, yee nɔɔyʋ ɛkɔmnɩ ɛ-maɣmaɣ e-ɖoŋ yɔ, ɩmʋʋ-ɩ nesi naalɛ. 44Mbá mɩ ɩyɩɣyɩɣ ɖama nɛ ɩɩcaɣ se Ɛsɔ ɖeke koŋ ɛyɩɣyɩnɩ-mɩ yɔ, ɛzɩma ɩpɩzɩɣ ɩwɛnɩ lidaʋ mɔ-yɔɔ?

45Paa ḿbʋ́ yɔ, ɩtaamaɣzɩ se mowoki man-Caa Ɛsɔ cɔlɔ nɛ mankʋyɩ mɩ-yɔɔ. Ɛlɛ́, Mooyiizi weyi ɩtaɣ-ɩ liu yɔ, ɛnʋ wokina nɛ ɛkʋyɩ mɩ-yɔɔ. 46Mɔyɔɔdʋʋ ḿbʋ́, mbʋ́ pʋyɔɔ yɔ, mɔn-tɔm ɛmawa. Toovenim lɛ, yee iitisi ɛ-tɔm yɔ, iitisi ma-ñɩndʋ ɖɔɖɔ. 47Ɛlɛ́, yee itetisi tɔm ndʋ́ Mooyiizi mawa yɔ lɛ, ɛzɩma ɩpɩzɩɣ itisi ma-ñɩndʋ yɔ?»

Currently Selected:

Yohanɛɛsɩ 5: KABI

Highlight

Copy