Yohanɛɛsɩ 6

Yesu ha tɔɔnaɣ samaɣ sɔsɔɔ nɛ kɔtɔɔ

(Mat 14.13-21; Mrk 6.30-44; Luk 9.10-17)

1Pʋwayɩ lɛ, Yesu tɛzɩ Galilee teŋgu ŋgʋ́ payaɣ-kʋ ɖɔɖɔ se Tiberiyaadɩ teŋgu yɔ. 2Ɛtalɩ peeɖe lɛ, ɛyáa samaɣ tɩŋɩɣ ɛ-wayɩ, mbʋ́ pʋyɔɔ yɔ, paana hama lakasɩ nzɩ́ ɛlakaɣ nɛ kʋdɔndɩnaa yɔɔ cɛkɩ yɔ. 3Peeɖe ɛ nɛ ɛ-tɔmkpɛlɩkɩyaa pakpa pʋʋ yɔɔ nɛ pacaɣ. 4Yuda ñɩma kazandʋ ndʋ́ payaɣ-tʋ se Paska yɔ, tɩwɩzaa. 5Pɩkɛdaa lɛ, ɛkʋsɩ ɛ-ɛsɛ nɛ ɛna ɛyáa samaɣ sɔsɔɔ nakɛyɛ wokaɣ ɛ-cɔlɔ. Ɛlɛ́, ɛpɔzɩ Filiipu se: «Le ɖɩpɩzɩɣ ɖɩya tɔɔnaɣ nɛ ɛyáa panɛ patɩŋa payɩ pehiɣ pɔtɔɔ?» 6Ɛyɔɔdaɣ ḿbʋ́ faŋŋ se ɛna ndʋ́ Filiipu cosuu yɔ, mbʋ́ pʋyɔɔ yɔ, ɛtɛm sɩm mbʋ́ ɛlakɩ yɔ. 7Filiipu cosi-i se: «Paa ɖɩɩyabɩ tɔɔnaɣ kɩyakɩŋ nasɩlɛ tʋmɩyɛ liidiye yɔ, pɩɩtalɩɣ se pehiɣ pazɩ pazɩ.» 8Peeɖe ɛ-tɔmkpɛlɩkɩyaa taa lɛlʋ weyi payaɣ se Andree nɛ ɛkɛ Siimɔɔ Pɩyɛ neu yɔ, eheyi-i se: 9«Abalɩbɩɣa nakɛyɛ wɛ cɩnɛ, kɛwɛnɩ tindine hɔɔlasɩ kagbaanzɩ nɛ kpakpasɩ naalɛ. Ɛlɛ́, ɛzɩma pɩpɩzɩɣ pɩtalɩ samaɣ kanɛ?» 10Peeɖe Yesu tɔm se: «Iheyi ɛyáa ḿbá se pacaɣ.» Ñɩtʋ kɛwɛ lone ńɖɩ́ ɖɩ-taa pɩtɩɩfɛyɩ. Peheyi-wɛ lɛ, pacaɣ ɖɔɖɔ. Mbá paacaɣaɣ yɔ, pa-taa abalaa katalɩ ɛzɩ kutokiŋ kagbaanzɩ yɔ. 11Peeɖe ɛkpaɣ tindine nɛ ɛsa Ɛsɔ ɖɩ-yɔɔ nɛ ɛtayɩ-ɖɩ ɛyáa ḿbá. Pʋwayɩ lɛ, ɛla ḿbʋ́ ɖɔɖɔ kpakpasɩ yɔɔ nɛ ɛtayɩ-wɛ nɛ pɔtɔɔ nɛ pe-liu sɩ. 12Pɔtɔwaa pahaɣ lɛ, Yesu heyi ɛ-tɔmkpɛlɩkɩyaa se: «Ikpeɣli hɔɔlasɩ nzɩ́ sɩkazaa yɔ, nakɛyɛ ɛtaale.» 13Peeɖe pekpeɣli mbʋ́ pɩkazɩ tindine hɔɔlasɩ kagbaanzɩ ńzɩ́ sɩ-taa yɔ nɛ pusu ɖɔkɩŋ hiu nɛ naalɛ.

14Ɛyáa ḿbá, pana hama lakasɩ nzɩ́ Yesu laba yɔ lɛ, pɔtɔ se: «Toovenim, ɛnɛ lɛ náyʋ weyi paayɔɔdaa se ɛkɔŋ kedeŋa yɔɔ yɔ.» 15Ŋgʋ́, Yesu kɛtɛm naʋ se pacaɣ pakpa-ɩ nɛ ɖoŋ nɛ pɛcɛlɩ-ɩ kewiyaɣ. Pʋ-yɔɔ ɛɖaɣnɩ kpaʋ pʋʋ yɔɔ nɛ ɛcaɣ e-ɖeke.

Yesu ɖɔŋ lɩm yɔɔ

(Mat 14.22-33; Mrk 6.45-52)

16Đanaɣ ɖanaa lɛ, Yesu tɔmkpɛlɩkɩyaa tii powolo teŋgu nɔɔ 17nɛ pakpa kpɩyʋʋ nakʋyʋ taa se pɛtɛzɩɣ Kapɛrnayum. Alɩwaatʋ ńdʋ́ lɛ, ɖoó kɛtɛm yuu, ɛlɛ́, Yesu taawobidi pɔ-cɔlɔ. 18Pɩkɛdaa lɛ, heɣlim sɔsɔm nabʋyʋ makɩ nɛ teŋgu lɩm taŋgatɩɣ. 19Pɛɖɛwa ɛzɩ kiloomɛtanaa kagbaanzɩ yaa loɖo yɔ lɛ, panaɣ Yesu ɖɔŋ lɩm yɔɔ nɛ ewoki pɔ-cɔlɔ, ɛlɛ́ sɔɔndʋ kpa-wɛ. 20Peeɖe eheyi-wɛ se: «Ma Yesu, sɔɔndʋ ɛtaakpa mɩ!» 21Pacaɣaɣ se pakpaɣ-ɩ kpɩyʋʋ taa, ɛlɛ́, patɩŋ patalɩ ɖenɖe powokaɣ yɔ.

Ɛyáa samaɣ ñɩnɩɣ Yesu

22Tɛʋ fema lɛ, mbá pɛwɛ teŋgu wayɩ yɔ, peɖiɣzina se kpɩyʋʋ kʋɖʋmʋʋ kɛwɛna. Đɔɖɔ lɛ, Yesu tɔmkpɛlɩkɩyaa ɖeke kakpanɩ kɩ-taa nɛ pɛɖɛɛ, ɛtaawɛɛ pɔ-cɔlɔ. 23Ɛlɛ́, kpɩyɩŋ lɛɛŋ ñaalɩnɩ Tiberiyaadɩ tɛtʋ taa nɛ ɩtalɩ ɖenɖe Kɩpaɣlʋ kasam Ɛsɔ tindine yɔɔ nɛ pɔtɔɔ-ɖɩ yɔ. 24Ɛyáa samaɣ nawa se Yesu nɛ ɛ-tɔmkpɛlɩkɩyaa pɛfɛyɩ peeɖe lɛ, pa-maɣmaɣ pasʋʋ kpɩyɩŋ ɩnʋ nɛ powolo Kapɛrnayum se pañɩnɩ-ɩ.

Yesu kɛ tindine nɖɩ́ ɖɩhaɣ wezuu yɔ

25Pɛtɛzɩ teŋgu wayɩ nɛ pana Yesu lɛ, pɔpɔzɩ-ɩ se: «Wɩlɩyʋ! Đooye ŋtalɩ cɩnɛ?» 26Ɛ́lɛ́ cosi-wɛ se: «Toovenim lɛ, mankaɖɩɣ-mɩ se pɩtɛkɛ hama lakasɩ nzɩ́ malaba nɛ ɩna yɔ, sɩ-yɔɔ ɩñɩnɩɣ-m. Ɛlɛ́, ɩtɔɔ tindine nɛ ɩhaɣ yɔɔ ɩñɩnɩɣ-m. 27Ɩtaala tʋmɩyɛ tɔɔnaɣ ŋgá kɛwɛɛkɩɣ yɔ kɔ-yɔɔ. Ɛlɛ́, ɩla ŋgá kacakɩ tam nɛ kahaɣ wezuu maatɛŋ yɔ kɔ-yɔɔ. Ɛyʋ Pɩyalʋ kɔŋnɩ-mɩ-kɛ haʋ, mbʋ́ pʋyɔɔ yɔ, Caa Ɛsɔ ñɩɣ ɛ-yɔɔ nesi.» 28Ɛlɛ́, pɔpɔzɩ-ɩ se: «Ɛzɩma pʋwɛɛ se ɖɩtɩŋ nɛ ɖɩpɩzɩ ɖɩla tʋma wena Ɛsɔ liu wɛɛ yɔ?» 29Ecosi-wɛ se: «Tʋmɩyɛ nɖɩ́ Ɛsɔ liu wɛɛ se ɩla yɔ lɛ se ɩwɛnɩ lidaʋ weyi ma etiyaa yɔ mɔ-yɔɔ.» 30Ɛlɛ́, pɔpɔzɩ-ɩ se: «Hama lakasɩ nzɩ́ ŋpɩzɩɣ ŋla nɛ ɖɩna nɛ ɖɩwɛnɩ lidaʋ ñɔ-yɔɔ? Ɛbɛ ŋpɩzɩɣ ŋla? 31Ɖɔ-cɔzɔnaa tɔɔ tɔɔnaɣ ŋgá kalɩnɩ ɛsɔdaa nɛ payaɣ-kɛ se maanɩ yɔ lakʋ taa. Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se: ‹Ɛha-wɛ tɔɔnaɣ ŋgá kalɩnɩ ɛsɔdaa yɔ se pɔtɔɔ.› »

32Peeɖe Yesu cosi-wɛ se: «Toovenim lɛ, mankaɖɩɣ-mɩ se pɩtɛkɛ Mooyiizi hanɩ-mɩ tɔɔnaɣ ŋgá kalɩnɩ ɛsɔdaa yɔ. Ɛlɛ́, man-Caa haɣnɩ-mɩ tɔɔnaɣ ŋgá kalɩnɩ ɛsɔdaa yɔ ka-maɣmaɣ siŋŋ. 33Mbʋ́ pʋyɔɔ yɔ, tɔɔnaɣ ŋgá Ɛsɔ haɣ yɔ lɛ ɛyʋ weyi ɛlɩnɩ ɛsɔdaa nɛ ɛhaɣ ɛyáa wezuu yɔ.» 34Ɛlɛ́, peheyi-i se: «Wɩlɩyʋ! Wɛɛ ŋhaɣ-ɖʋ tɔɔnaɣ ŋ́gá.» 35Peeɖe Yesu kaɖɩ-wɛ se: «Ma lɛ tɔɔnaɣ ŋgá kahaɣ wezuu yɔ. Weyi ɛkɔŋ mɔn-cɔlɔ yɔ, ñɔɔsɩ ɛɛwɩɣ-ɩ wiɖiyi kaʋ, weyi ɛ́lɛ́ wɛɣnɩ lidaʋ mɔ-yɔɔ yɔ, lɔkɔtʋ ɛɛɖɔkʋʋ-ɩ ɖɔɖɔ kaʋ. 36Ŋgʋ́, meheyi-mɩ nɛ ɩna-m, ɛlɛ́, ɩfɛyɩnɩ lidaʋ mɔ-yɔɔ. 37Ɛyáa mbá patɩŋa man-Caa cɛlɩɣ-m yɔ, pɔkɔŋ mɔn-cɔlɔ, maakiziɣ pa-taa nɔɔyʋ kaʋ. 38Mbʋ́ pʋyɔɔ yɔ, malɩnɩ ɛsɔdaa mentii se mala mbʋ́ weyi etiyi-m yɔ e-liu wɛɛ yɔ. Mɔntɔkɔɔ se mala mbʋ́ me-liu wɛɛ yɔ. 39Ɩɩnaɣ mbʋ́ weyi etiyi-m yɔ e-liu wɛɛ yɔ. Ḿbʋ́ lɛ se: mantaalesi mbá ɛcɛlɩ-m yɔ pa-taa nɔɔyʋ. Ɛlɛ́, menfezi patɩŋa payɩ kɛtɛzaɣ kɩyakʋ wiye nɛ sɩm taa nɛ pɛwɛɛ wezuu. 40Ɩɩnaɣ mbʋ́ man-Caa liu wɛɛ yɔ: weyi ɛnaɣ ɛ-Pɩyalʋ ma nɛ ɛwɛnɩ lidaʋ mɔ-yɔɔ yɔ, ehikiɣ wezuu maatɛŋ. Menfeziɣ-i kɛtɛzaɣ kɩyakʋ wiye nɛ sɩm taa.»

41Yuda ñɩma midaɣnɩ Yesu pe-liŋ tɛɛ se ɛyɔɔdaa se: «Ma lɛ tɔɔnaɣ ŋgá kalɩnɩ ɛsɔdaa nɛ ketii yɔ.» 42Peeɖe pɔpɔzaɣ pa-tɩ se: «Pɩtɛkɛ ɛnʋ lɛ Yozɛɛfʋ pɩyalʋ Yesu? Đɩsɩm ɛ-caa nɛ e-ɖoo, ɛzɩma ɛpɩzɩɣ ɛyɔɔdɩ lɛɛlɛɛyɔ se ɛlɩnɩ ɛsɔdaa nɛ etii» yɔ? 43Ɛlɛ́, Yesu heyi-wɛ se: «Iyele miduu ḿbʋ́. 44Man-Caa weyi etiyi-m yɔ, yee ɛtɔkɔnɩ nɔɔyʋ mɔn-cɔlɔ yɔ, pʋdʋ ɛɛpɩzɩɣ ɛkɔɔ. Weyi ɛkɔŋ mɔn-cɔlɔ yɔ, menfeziɣ-i kɛtɛzaɣ kɩyakʋ wiye nɛ sɩm taa. 45Náyaa ma pa-takayɩsɩ taa se: ‹Ɛsɔ kɔŋ patɩŋa payɩ kpɛlɩkʋʋ.› Yee ḿbʋ́, paa weyi, ɛnɩ Caa tɔm nɛ ɛkpɛlɩkɩ mbʋ́ ɛwɩlɩ-ɩ yɔ yɔ, ɛkɔŋ mɔn-cɔlɔ. 46Pʋnɛ pɩwɩlɩɣ se nɔɔyʋ tana Caa. Weyi ma malɩnɩ Ɛsɔ cɔlɔ yɔ, men-ɖeke koŋ mananɩ-ɩ.

47Toovenim lɛ, mankaɖɩɣ-mɩ se: weyi ɛwɛnɩ lidaʋ mɔ-yɔɔ yɔ, ehiɣ wezuu maatɛŋ. 48Ma lɛ tɔɔnaɣ ŋgá kahaɣ wezuu yɔ. 49Mɩ-cɔzɔnaa tɔɔ tɔɔnaɣ ŋgá kalɩnɩ ɛsɔdaa yɔ lakʋ taa, ɛlɛ́, pasɩba. 50Tɔɔnaɣ ŋgá kaka lɩnɩ ɛsɔdaa yɔ, ŋ́gá yɔ. Weyi ɛtɔɔ-kɛ yɔ, ɛɛsɩkɩ. 51Ma lɛ wezuu tɔɔnaɣ ŋgá kalɩnɩ ɛsɔdaa yɔ. Yee nɔɔyʋ ɛtɔɔ-kɛ yɔ, ɛcakɩ wezuu tam. Tɔɔnaɣ ŋgá mɔnkɔŋ haʋ yɔ, ŋ́gá lɛ mon-tomnaɣ. Mahaɣ-kɛ se kedeŋa kpeekpe ɛyáa ehiɣ wezuu.» 52Ɛyɔɔdɩ ḿbʋ́ lɛ, Yuda ñɩma pazɩ you pa-taa pe-ɖeke nɛ pɔpɔzʋʋ pa-tɩ se: «Ɛzɩma ɛnɛ ɛtɔŋ se ɛhaɣ-ɖʋ e-tomnaɣ nɛ ɖɩtɔɔ?» 53Peeɖe Yesu heyi-wɛ se: «Toovenim lɛ, mankaɖɩɣ-mɩ se: yee ɩtɔtɔɔ Ɛyʋ Pɩyalʋ ma mon-tomnaɣ nɛ ɩñɔɔ man-calɩm yɔ, ɩɩwɛɣ wezuu. 54Weyi ɛtɔkɩ mon-tomnaɣ nɛ ɛñɔɔ man-calɩm yɔ, ɛtɛm hiɣu wezuu maatɛŋ. Mɔnkɔŋ-ɩ fezuu kɛtɛzaɣ kɩyakʋ wiye nɛ sɩm taa. 55Mbʋ́ pʋyɔɔ yɔ, mon-tomnaɣ lɛ tɔɔnaɣ siŋŋ nɛ man-calɩm lɛ sʋlʋm siŋŋ. 56Weyi ɛtɔkɩ mon-tomnaɣ nɛ ɛñɔɔ man-calɩm yɔ, ma nɛ ɩ ɖɩwɛ ɖama taa. 57Caa weyi etiyini-m yɔ, ɛwɛnɩ wezuu, ɛ-yɔɔ mɛwɛnɩ wezuu ɖɔɖɔ. Ḿbʋ́ ɖɔɖɔ weyi ɛtɔkɩ-m yɔ, ɛwɛɣnɩ wezuu mɔ-yɔɔ. 58Tɔɔnaɣ ŋgá kalɩnɩ ɛsɔdaa yɔ, ŋ́gá lɛ. Kɛfɛyɩ ɛzɩ ŋgá mɩ-cɔzɔnaa tɔwaa yɔ: paba ñasɩba. Weyi ɛtɔkɩ-kɛ yɔ, ɛcakɩ wezuu tam.» 59Alɩwaatʋ ndʋ́ Yesu wɩlaɣ ɛyáa Ɛsɔtɔm Kapɛrnayum Yuda ñɩma Ɛsɔ ɖɩsɛyɛ taa yɔ, ɛyɔɔdɩ tɔm tʋnɛ.

Tiyiyaa nabɛyɛ kʋyaa peyele Yesu

60Yesu tɔmkpɛlɩkɩyaa nɩ ḿbʋ́ lɛ, pa-taa sakɩyɛ yɔɔdɩ se: «Tɔm tʋnɛ, tɩwɛ kaɖɛ. Apɩzɩɣ etisi-tʋ?»

61Ɛlɛ́, Yesu na ɛ-taa se tɔm ńdʋ́ ɛ-tɔmkpɛlɩkɩyaa midiɣna nɛ ɛpɔzɩ-wɛ se: «Ndʋ́ mɔyɔɔdaa yɔ, ńdʋ́ cɛyɩɣnɩ-mɩ yaa we? 62Yee ḿbʋ́ lɛ, ɛzɩma pɩkaɣ labʋ alɩwaatʋ ndʋ́ ɩnaɣ Ɛyʋ Pɩyalʋ kitiɣ ɛkpa ɖenɖe ɛɛwɛɛ yɔ? 63Fezuu Kiɖeɖeu haɣnɩ wezuu. Ɛyʋ ɛɛpɩzɩɣ ɛla pʋyʋ. Tɔm ndʋ́ meheyi-mɩ yɔ, tɩ-yɔɔ kɩtɩŋɩɣna nɛ kɩhaɣ wezuu. 64Ɛlɛ́, mɩ-taa lɛlaa eetisiɣ.»

Yesu yɔɔdaɣ ḿbʋ́, mbʋ́ pʋyɔɔ yɔ, ɛtɛm sɩm mbá paatisiɣ yɔ nɛ weyi ɛkɔŋ ɛ-wayɩ lɩʋ yɔ. 65Ɛtasɩ yɔɔdʋʋ se: «Pʋ-yɔɔ meheyi-mɩ se nɔɔyʋ fɛyɩ se ɛkɔŋ mɔn-cɔlɔ nɛ man-Caa taha-ɩ nʋmɔʋ.»

66Pɩkpaɣnɩ alɩwaatʋ ńdʋ́ lɛ, ɛ-tɔmkpɛlɩkɩyaa sakɩyɛ ha-ɩ siɣ́ye nɛ paatasɩɣ-ɩ tɩŋʋʋ. 67Pʋ-yɔɔ ɛpɔzɩ ɛ-tɔmkpɛlɩkɩyaa hiu nɛ naalɛ se: «Nɛ mɩ yɔ, miiyeki-m ɖɔɖɔ yaa we?» 68Peeɖe Siimɔɔ Pɩyɛ cosi-i se: «Kɩpaɣlʋ! A-cɔlɔ ɖiwoki? Ñɔ-cɔlɔ tɔm ndʋ́ tɩhaɣ wezuu maatɛŋ yɔ tɩwɛɛ. 69Đɩwɛnɩ lidaʋ ñɔ-yɔɔ nɛ ɖɩtɩlɩ se ña lɛ Ɛsɔ Ñɩnʋ.» 70Ɛlɛ́ Yesu pɔzɩ-wɛ se: «Pɩtɛkɛ malɩzɩnɩ mi-hiu nɛ naalɛ yaa we? Ŋgʋ́, mɩ-taa lɛlʋ kɛ eleeu!» 71Siimɔɔ Iskarɩyɔɔtɩ pɩyalʋ Yudaasɩ tɔm ɛyɔɔdaɣ. Mbʋ́ pʋyɔɔ yɔ, paa ɛɛkɛ ɛ-tɔmkpɛlɩkɩyaa hiu nɛ naalɛ taa lɛlʋ yɔ, ɛnʋ kɔŋnɩ ɛ-wayɩ lɩʋ.

Currently Selected:

Yohanɛɛsɩ 6: KABI

Highlight

Copy