Luka 1

Luka yɔɔdʋʋ mbʋ́ pʋwɛ ɛ-takayaɣ taa yɔ pʋ-tɔm

1‏-2Ɛyáa nabɛyɛ na mbʋ́ Ɛsɔ laba ɖɛ-tɛ yɔ ɖooo kajalaɣ taa. Pʋwayɩ lɛ, posusi Ɛsɔtɔm. Pʋbʋ wayɩ lɛ, pɛkɛdɩ-ɖʋ mbʋ́ pɩtɩŋa payɩ palaba yɔ nɛ ɖa-taa ɛyáa sakɩyɛ pazɩ-tʋ maʋ. 3Pʋ-yɔɔ ma ɖɔɖɔ mañɩnaa nɛ mana mbʋ́ pɩtɩŋa payɩ pɩlaba ɖooo kiɖe tɛɛ ɖeyi ɖeyi yɔ lɛ, mana se ña ɖa-caa Tewofiili lɛ, pʋmʋnaa se mama-tʋ ti-lona taa nɛ mɛnkɛdɩ-ŋ. 4Malakɩ ḿbʋ́ se ŋpɩzɩ ŋtɩlɩ se tɔm ndʋ́ tɩtɩŋa payɩ pawɩlɩ-ŋ yɔ, tɩkɛ toovenim.

Zakaarii nɛ Elizaabɛɛtɩ pɔ-tɔm

5Alɩwaatʋ ndʋ́ Eroodi kɛ wiyaʋ sɔsɔ Yudee egeetiye taa yɔ, cɔjɔ nɔɔyʋ kɛwɛɛ nɛ payaɣ-ɩ se Zakaarii. Ɛɛkɛ Abiya hɔʋ taa tʋ lɛlʋ. Payaɣ ɛ-halʋ se Elizaabɛɛtɩ, ɛ́lɛ́ ñɛkɛ Aarɔɔnɩ liɖe taa tʋ. 6Pe-wezuu caɣʋ wɛ ɖeu Ɛsɔ ɛsɩndaa nɛ pɔɖɔŋ Kɩpaɣlʋ paɣtʋ tɩŋa yɔɔ camɩyɛ, natʋyʋ fɛyɩ se paawanɩ-wɛ. 7Ɛlɛ́, pɛfɛyɩnɩ pɩɣa. Mbʋ́ pʋyɔɔ yɔ, Elizaabɛɛtɩ kɛ kaalʋlaɣ, ŋgʋ́ pa-naalɛ pakpadɩyɩ pɩŋŋ.

Ɛsɔ tiyiyu nɔɔyʋ heyi Zakaarii se ɛlʋlʋʋ abalɩbɩɣa

8Nakʋyʋ wiye lɛ, pɩtalɩnɩ Zakaarii hɔʋ taa ñɩma se pala tʋmɩyɛ Ɛsɔ ɛsɩndaa nɛ Zakaarii wɛɛ ɛlakɩ ɛ-cɔjɔtʋ tʋmɩyɛ. 9Peeɖe paɖʋ miika nɛ palɩzɩ-ɩ ɛzɩ palakʋʋ Yuda ñɩma cɔjɔnaa sɔnzɩ taa yɔ se ɛsʋʋ Kɩpaɣlʋ ɖɩɣa taa lone kaɖɛ ñɩnɖɛ taa nɛ ɛɖʋ tɩlaaɖɩ miŋ taa. 10Ɛsʋwa nɛ ɛɖʋʋ lɛ, ɛyáa samaɣ tɩŋa wɛɛ awayɩ nɛ pɛsɛɣ Ɛsɔ. 11Peeɖe Kɩpaɣlʋ tiyiyu nɔɔyʋ lɩ ɛ-yɔɔ nɛ ɛsɩŋ lone kɩbanɖɛ taa tɩlaaɖɩ ɖɩhɔɖɛ. 12Zakaarii na-ɩ lɛ, pɩlabɩ-ɩ yaaa nɛ sɔɔndʋ kpa-ɩ. 13Ɛlɛ́, tiyiyu ɛnʋ eheyi-i se: «Zakaarii! Taasɔɔndɩ, Ɛsɔ nɩ ñe-tenduu. Ña-halʋ Elizaabɛɛtɩ hakɩ howa nɛ ɛlʋlɩ abalɩbɩɣa nɛ ŋyaa-kɛ se Yohanɛɛsɩ. 14Pɩlakɩ-ŋ leleŋ nɛ ña-taa hʋlʋmɩ nɛ ɛyáa sakɩyɛ mayɩ amaya nɛ ka-lʋlʋʋ. 15Mbʋ́ pʋyɔɔ yɔ, kɛkɛɣ ɛyʋ sɔsɔ Kɩpaɣlʋ ɛsɩndaa. Kaañɔʋ sʋlʋm mbʋ́ pʋkʋʋ ɛyáa yɔ pɩ-taa nabʋyʋ. Fezuu Kiɖeɖeu wɛɣ kɔ-cɔlɔ ɖooo ko-ɖoo lotu taa. 16Ŋ́gʋ́ yekina nɛ Izrɛɛlɩ ñɩma sakɩyɛ pɩsɩnɩ pa-Kɩpaɣlʋ Ɛsɔ yɔɔ. 17Ka-maɣmaɣ kɛwɛɣnɩ náyʋ Elii lɩmaɣza nɛ e-ɖoŋ nɛ kɛɖɛɛ Kɩpaɣlʋ ɛnʋ nɔɔ nɛ kɛkpɛndɩ caanaa nɛ pe-piya nɛ kokuli kaañamtʋ tɩnaa ɛsɛ nɛ papɩsɩ kʋtʋʋzaa nɛ kɔñɔɔzɩ ɛjaɖɛ taa ñɩma ɖeu nɛ paɖaŋ Kɩpaɣlʋ ɛnʋ kpam.»

18Ɛlɛ́, Zakaarii pɔzɩ tiyiyu ɛnʋ se: «Ɛbɛ wɩlɩɣ-m se pɩkɛ toovenim? Ma nɛ ma-halʋ ɖɩtɛm kpadɩyʋʋ!» 19Peeɖe tiyiyu ɛnʋ ecosi-i se: «Ma Gabrɩyɛɛlɩ, Ɛsɔ cɔlɔ mɛwɛɛ. Ɛnʋ tiyini-m se mɔnkɔɔ meheyi-ŋ tɔm kɩbandʋ tʋnɛ. 20Đenɖe ŋtetisi se mɔn-tɔm kɔŋ labʋ alɩwaatʋ ndʋ́ paɖʋwa yɔ tɩ-yɔɔ yɔ, ŋpɩsɩɣ kaayɔɔdaɣ nɛ pʋkɔɔ pɩsɩɩnɩ kɩyakʋ ŋgʋ́ mɔn-tɔm ńdʋ́ tɩlaba yɔ.»

21Alɩwaatʋ ńdʋ́ lɛ, ɛyáa samaɣ kɛwɛ awayɩ nɛ kaɖaŋ Zakaarii nɛ pɩlabɩ-kɛ piti. Mbʋ́ pʋyɔɔ yɔ, ɛkɩlɩ leɖuu lone kaɖɛ ñɩnɖɛ ńɖɩ́ ɖɩ-taa. 22Ɛlɩwa lɛ, ɛtapɩzɩ ekuli ɛ-nɔɔ nɛ ɛyɔɔdɩnɩ-wɛ. Nesi yem ɛyɔɔdaɣnɩ-wɛ. Peeɖe peɖiɣzinaa se Ɛsɔ wɩlɩ-ɩ pʋyʋ lone ńɖɩ́ ɖɩ-taa. 23Kɩyakɩŋ weyi pʋwɛɛ se Zakaarii ɛlabɩnɩ tʋmɩyɛ Ɛsɔ ɖɩɣa taa yɔ ɩtɛma lɛ, ɛlɩɩ ekpe. 24Pɩlabɩ pazɩ lɛ, ɛ-halʋ Elizaabɛɛtɩ haɣ howa. Ɛlɛ́, ɛmɛlɩ ɖɩɣa fenasɩ kagbaanzɩ. Peeɖe ɛyɔɔdaa se: 25«Mana mbʋ́ Kɩpaɣlʋ labɩ-m yɔ: ɛlabɩ-m lootiye nɛ ɛlɩzɩ-m mbʋ́ pɩkɛnɩ-m fɛyɛ ɛyáa ɛsɩndaa yɔ pɩ-taa.»

Ɛsɔ tiyiyu Gabrɩyɛɛlɩ heyi Maarɩɩ se: «Ŋlʋlʋʋ abalɩbɩɣa»

26Pɩlabɩ fenasɩ loɖo ɛzɩ Elizaabɛɛtɩ haɣʋ howa yɔ. Alɩwaatʋ ńdʋ́ʋ́ Ɛsɔ tiyi e-tiyiyu Gabrɩyɛɛlɩ Galilee tɛtʋ ndʋ́ payaɣ-tʋ se Nazarɛɛtɩ yɔ tɩ-taa. 27Etiyi-i pɛlɛ nɔɔyʋ cɔlɔ. Pɛlɛ ɛnʋ, weyi esu-i yɔ, payaɣ-ɩ se Yozɛɛfʋ. Yozɛɛfʋ kɛ wiyaʋ sɔsɔ Daaviidi liɖe taa tʋ. Pɛlɛ ɛnʋ lɛ, payaɣ-ɩ se Maarɩɩ. 28Peeɖe Ɛsɔ tiyiyu woba ɛ-cɔlɔ nɛ ɛsɛɛ-ɩ se: «Weyi ña Ɛsɔ labɩ-ŋ lootiye yɔ, sɛɛ ɖeu! Kɩpaɣlʋ wɛ ñɔ-cɔlɔ.» 29Ɛyɔɔdɩ ḿbʋ́ lɛ, pɩla Maarɩɩ yaaa nɛ ɛpɔzɩ ɛ-tɩ se sɛtʋ ńdʋ́ tɩ-tɔbʋʋ se we? 30Peeɖe Ɛsɔ tiyiyu ɛnʋ eheyi-i se: «Maarɩɩ! Taasɔɔndɩ, Ɛsɔ labɩ-ŋ lootiye. 31Ŋhakɩ howa nɛ ŋlʋlɩ abalɩbɩɣa nɛ ŋyaa-kɛ se Yesu. 32Kɔkɔŋ kɛʋ sɔsɔ nɛ payaa-kɛ se Ɛsɔ Caabiyuu Pɩyalʋ nɛ Kɩpaɣlʋ Ɛsɔ ɛnʋ, ɛcɛlɩ-kɛ kewiyaɣ sɔsɔɔ ɛzɩ kɔ-cɔzɔ Daaviidi ñɩŋga yɔ. 33Ŋ́gá kɔŋnɩ tɔɔʋ kewiyaɣ tam Yakubu liɖe taa. Ke-kewiyaɣ ŋ́gá, kaakɔŋ sɩʋ tɩnaɣ.»

34Peeɖe Maarɩɩ pɔzɩ Ɛsɔ tiyiyu ɛnʋ se: «Ɛzɩma pɩlakɩ ḿbʋ́ nɛ mantasɩ abalʋ?»

35Ɛ́lɛ́ cosi-i se: «Ɛsɔ Caabiyuu Fezuu Kiɖeɖeu tiki ñɔ-yɔɔ nɛ ki-ɖoŋ nɛ kihuuzi ñɔ-yɔɔ ɖeu ɛzɩ kuzotuu yɔ. Pʋ-yɔɔ pɩɣa ŋgá ŋlʋlʋʋ yɔ, kɛkɛɣ Ɛsɔ ñɩnʋ nɛ payaa-kɛ se: Ɛsɔ Pɩyalʋ. 36Đɔɖɔ lɛ, ña-ñɩnʋ Elizaabɛɛtɩ weyi pɔtɔŋaɣ-ɩ se ɛkɛ kaalʋlaɣ yɔ, paa ɛkpadɩyaa yɔ, ɛhaɣ howa. E-fenasɩ loɖo yɔ, ɛlʋlʋʋ abalɩbɩɣa. 37Mbʋ́ pʋyɔɔ yɔ, nabʋyʋ fɛyɩ se Ɛsɔ ɛɛpɩzɩɣ ɛlabɩ-pʋ.» 38Peeɖe Maarɩɩ heyi-i se: «Mɛnkɛ Kɩpaɣlʋ tʋmlaɖʋ. Pɩla ɛzɩ ŋheyuu-m yɔ.» Ɛlɛ́, Ɛsɔ tiyiyu ɛnʋ ɛcaŋ ɛɖɛɛ.

Maarɩɩ woba Elizaabɛɛtɩ tɛ

39Pɩlaba pazɩ lɛ, Maarɩɩ ɖɛɛ. Ɛɖɔŋaɣ lɛɛlɛɛ nɛ ɛkpaɣ pʋʋ se ewolo Yudee egeetiye tɛtʋ natʋyʋ taa. 40Ɛtalaa lɛ, ɛsʋʋ Zakaarii ɖɩɣa taa nɛ ɛsɛɛ Elizaabɛɛtɩ. 41Elizaabɛɛtɩ nɩ Maarɩɩ sɛtʋ lɛ, ɛ-pɩɣa ciɣdi ɛ-taa nɛ Fezuu Kiɖeɖeu tii ɛ-yɔɔ. 42Peeɖe ɛmabɩ kubuka se: «Ɛsɔ ɛ́wazɩ ñɔ-yɔɔ nɛ pɩkɩlɩ halaa tɩŋa nɛ ɛ́wazɩ ɖɔɖɔ pɩɣa ŋgá ŋkɔŋ lʋlʋʋ yɔ kɔ-yɔɔ! 43Ma anɩ nɛ ña weyi ŋlʋlʋʋ Kɩpaɣlʋ yɔ, ŋkɔɔ mɛn-tɛ! Ŋɖʋ-m hɩɖɛ siŋŋ! 44Mantɩnɩ ñɛ-sɛtʋ lɛ, pɩla man-taa pɩɣa leleŋ nɛ keciɣdi. 45Ña lɛ, ŋhiɣ ña-tɩ! Mbʋ́ pʋyɔɔ yɔ, ŋtisaa se tɔm ndʋ́ Kɩpaɣlʋ tiyaa nɛ peheyi-ŋ yɔ, tɩla. Tɩkɔŋ labʋ.» 46Elizaabɛɛtɩ yɔɔdɩ ḿbʋ́ lɛ, Maarɩɩ tɔ se: «Mansaŋ Kɩpaɣlʋ siŋŋ! 47Ma-laŋɩyɛ hʋlʋmɩnɩ-ɩ. Ɛnʋ lɛ Ɛsɔ weyi ɛyabɩ ma-ñʋʋ yɔ. 48Etisi ɛ-ɛsɛ nɛ ɛcɔnɩ weyi ma mɛnkɛ halʋ yem nɛ malakɩ ɛ-tʋmɩyɛ yɔ. Pʋ-yɔɔ lɛ, pɩkpaɣʋnɩ lɛɛlɛɛyɔ yɔ, ɛyáa kpeekpe wɛɣ yɔɔdʋʋ yɔɔ se mehiɣ man-tɩ. 49Mbʋ́ pʋyɔɔ yɔ, Đoŋ Tɩŋa Tʋ labɩ-m mbʋ́ pʋwɛ ɖeu pɩŋŋ yɔ. Ɛnʋ lɛ Ɛsɔ. 50Đooo ɛzɩ pʋwɛʋ yɔ, mbá pañaŋ-ɩ yɔ, ɛnaɣ pa-pʋtɔdɩyɛ. 51Ɛ-maɣmaɣ ɛlabɩ tʋma sɔsɔna nɛ e-ɖoŋ: ɛɖɔɔnɩ mbá pakpazɩɣ pa-tɩ yɔ nɛ pese pamɩzɩ ɖama. 52Etisi awiya sɔsɔna a-kpelisi yɔɔ nɛ ɛkpazɩ mbá patakpaɣ-wɛ payaa pʋyʋ yɔ lone kɩbanɖɛ taa. 53Ɛha kʋñɔndɩnaa ñɩm sakɩyɛ nɛ piyele ɛɖɔɔnɩ ñɩm tɩnaa nɛ pɛɖɛɛ nesi kpɛɖɛ yeɣ yeɣ. 54Ɛkɔm Izrɛɛlɩ ñɩma mbá pɛkɛ ɛ-tʋmlaɖaa yɔ sɩnaʋ. Ɛwɩlɩɣ-wɛ tam se ɛsɔɔlɩ-wɛ. 55Ɛtɔsɔɔ ɛ-camɩyɛ lakasɩ nzɩ́ ɛɖʋwa se ɛlakɩ ɖɔ-cɔzɔnaa, Abraham nɛ e-liɖe taa ñɩma yɔ sɩ-yɔɔ kaʋ.»

56Ɛtɛm yɔɔdʋʋ lɛ, ɛcaɣ Elizaabɛɛtɩ tɛ ɛzɩ fenasɩ naadozo yɔ nɛ pʋcɔ ɛpɩsɩ ekpe.

Lɩm Sɔʋ Sɔnzɩ Laɖʋ Yohanɛɛsɩ lʋlʋʋ tɔm

57Elizaabɛɛtɩ fenaɣ talaa lɛ, ɛlʋlɩ abalɩbɩɣa 58nɛ ɛ-cɔlɔ ñɩma nɛ e-liɖe taa ñɩma panɩɩ se Kɩpaɣlʋ na ɛ-pʋtɔdɩyɛ siŋŋ. Peeɖe pa nɛ ɩ pɛkpɛndaa pamayɩ amaya. 59Pɩɣa ŋgá kalabɩ kɩyakɩŋ lutozo lɛ, powolo se pɛpɛlɩɣ-kɛ nɛ pɔtɔ se payaa-kɛ ka-caa hɩɖɛ se Zakaarii. 60Peeɖe ko-ɖoo cosaa se: «Aayɩ, payaa-kɛ se Yohanɛɛsɩ.» 61Ɛlɛ́, pocosi-i se: «Patayaa ñe-liɖe taa tʋ nɔɔyʋ ḿbʋ́.»

62Peeɖe pɔpɔzɩ ka-caa Zakaarii nɛ nesi wɩlʋʋ taa se e-liu wɛɛ se payaa ɛ-pɩɣa se we? 63Ɛlɛ́, Zakaarii wɩlɩ se powoni-i maʋ kpata. Powonaa lɛ, ɛma kʋ-yɔɔ se: «Ka-hɩɖɛ lɛ Yohanɛɛsɩ.» Peeɖe pɩɖɩɣzɩ ɛyáa tɩŋa. 64Zakaarii tɛm maʋ ḿbʋ́ lɛ, ɛ-nzʋlʋmɩyɛ yɛɖɩ nɛ ɛpazɩ yɔɔdʋʋ nɛ ɛsaŋ Ɛsɔ. 65Ɛlɛ́, sɔɔndʋ kpa ɛ-cɔlɔ ñɩma nɛ Yudee pʋŋ taa ñɩma tɩŋa kɛdɩɣ ɖama mbʋ́ pɩlaba yɔ. 66Mbá patɩŋa panɩ tɔm ńdʋ́ yɔ, pamaɣzɩ pɩŋŋ nɛ pɔpɔzʋʋ pa-tɩ se: «Ɛbɛ pɩɣa pɩcɩɩcɩyɩm ɛnɛ ɛkaɣ kɛʋ?»

Meheyiɣ-mɩ se Kɩpaɣlʋ ɖoŋ kɛwɛ kɔ-yɔɔ siŋŋ.

Zakaarii saŋ Ɛsɔ

67Pɩɣa pɩcɩɩcɩyɩm ɛnʋ ɛ-caa Zakaarii nzʋlʋmɩyɛ yɛɖaa lɛ, Fezuu Kiɖeɖeu tii ɛ-yɔɔ nɛ ɛpazɩ yɔɔdʋʋ tɔm ndʋ́ tɩlɩnɩ Ɛsɔ cɔlɔ yɔ. Ńdʋ́ lɛ se: 68«Pasa ɖa-Kɩpaɣlʋ Ɛsɔ, mbʋ́ pʋyɔɔ yɔ, ɛkɔm ɛya ɛ-ɛyáa Izrɛɛlɩ ñɩma ɖa ɖa-ñʋʋ. Ɛkɔm se ɖɩhɛzɩ. 69Ɛkɔnɩ-ɖʋ ɖoŋ tʋ ɛ-tʋmlaɖʋ wiyaʋ sɔsɔ Daaviidi liɖe taa. Ɛnʋ yakɩnɩ ɖa-ñʋʋ. 70Pʋwɛ ɛzɩ eeheyuu ɛ-náyaa ɖooo lɔŋ se peheyi-ɖʋ se 71ɛkɔŋ-ɖʋ lɩzʋʋ ɖo-koyindinaa nɛ mbá patɩŋa papaɖɩɣ-ɖʋ yɔ pe-nesi taa yɔ. 72Ḿbʋ́ ɛlakɩ ɖɔ-cɔzɔnaa ɛ-camɩyɛ lakasɩ nɛ ɛtɔzɩ ɛ-nɔɔ haʋ yɔɔ. 73Ḿbʋ́ lɛ mbʋ́ ɛɛɖʋwa se ɛlakɩ ɖɔ-cɔzɔ Abraham yɔ. 74Ɛɖʋwa se ɛkɔŋ-ɖʋ lɩzʋʋ ɖo-koyindinaa nesi taa nɛ ɖɩla ɛ-tʋmɩyɛ, sɔɔndʋ ɛɛkpaɣ-ɖʋ. 75Đɩkpakɩɣ ɖa-tɩ ɖɩcɛlɩ-ɩ nɛ ɖɩla mbʋ́ pʋtʋʋzaa yɔ ɛ-ɛsɩndaa kɩyakɩŋ tɩŋa ɖe-wezuu caɣʋ taa. 76Piyele ña man-pɩɣa lɛ, pakaɣ-ŋ yaʋ se Ɛsɔ Caabiyuu náyʋ. Ŋɖɛɣ Kɩpaɣlʋ nɔɔ nɛ ŋñɔɔzɩ ɛ-nʋmɔʋ nɛ 77ŋwɩlɩ ɛ-ɛjaɖɛ taa ñɩma ɖa se ɛkɔŋ-ɖʋ kpeɣu ɖa-kɩwɛɛkɩm nɛ ɛya ɖa-ñʋʋ. 78Mbʋ́ pʋyɔɔ yɔ, ɖɛ-Ɛsɔ kɛ pʋtɔdɩyɛ náyʋ siŋŋ: etiyiɣni ɛ-ñalɩmɩyɛ nɛ ɖɩñalɩ ɖɔ-yɔɔ ɛzɩ wɩsɩ yɔ. 79Ñalɩmɩyɛ ńɖɩ́ ɖɩñalɩɣ mbá pɛwɛ cɩkpɛndʋʋ taa se pɛtɛŋnɩ sɩm yɔ pɔ-yɔɔ. Đɩhɔŋ-ɖʋ ɖɔɖɔ nɛ ɖiwoni laŋhɛzɩyɛ nʋmɔʋ taa.»

Yohanɛɛsɩ paɣlɩɣ

80Zakaarii pɩɣa ŋ́gá kapaɣlaɣ nɛ kɔ-lɔŋ sɔzʋʋ. Kapaɣlaa lɛ, kowolo kacaɣ lakʋ taa nɛ pʋkɔɔ pɩsɩɩnɩ kɩyakʋ ŋgʋ́ kapazɩ ka-tʋmɩyɛ labʋ Izrɛɛlɩ ñɩma hɛkʋ taa yɔ.

Currently Selected:

Luka 1: KABI

Highlight

Copy