Luka KAJALAƔ TƆM
KAJALAƔ TƆM
Yesu tiyiyu weyi payaɣ-ɩ se Luka yɔ, ɛma takayɩsɩ naalɛ: ɛ-Laŋhɛzɩyɛ Tɔm Takayaɣ nɛ Yesu tiyiyaa Tʋma Labʋ Tɔm Takayaɣ. Kajalaɣ takayaɣ taa lɛ, Luka yɔɔdʋʋnɩ Krɩstʋ ñɩma mbá pɛtɛkɛ Yuda ñɩma nɛ pɔyɔɔdʋʋ Grɛɛkɩ kʋnʋŋ yɔ. Ɛtazɩɣ-wɛ ka-taa kaɖɛ tɔm pee taa, nɛ ɛlɩzɩɣ-wɛ ɖɔɖɔ Yuda ñɩma sɔnzɩ nzɩ́ paanɩɣ sɩ-taa yɔ, sɩ-tɔbʋʋ. Ḿbʋ́ haɣnɩ nʋmɔʋ kedeŋa kpeekpe yɔɔ ɛyáa mbá pɛtɛkɛ Yuda ñɩma yɔ, se patɩŋa patɩlɩ se Yesu kɛ pa-Ñʋʋ Yaɖʋ.
Hɔɔlɩŋ weyi ɩwɛ Laŋhɛzɩyɛ Tɔm Takayɩsɩ lɛɛsɩ taa yɔ, ɩnɩ wɛnɩ ɖɔɖɔ Luka Laŋhɛzɩyɛ Tɔm Takayaɣ taa. Ɛlɛ́, mbʋ́ kaka ñɔsɔzaa yɔ lɛ se, kɔyɔɔdʋʋ nʋmɔʋ ŋgʋ́ Yesu wobɩ-kʋ kpaɣnɩ Galilee nɛ puwolo Yeruusalɛm yɔ kʋ-tɔm kpayɩ kpayɩ (kpaɣnɩ 9.51 nɛ pɩsɩɩnɩ 19.28 taa). Yeruusalɛm nʋmɔʋ ɖɔm tɔm tʋnɛ tɩ-taa lɛ, ɖenɖe pʋwɛɛ se Yesu sɩkɩ yɔ, Luka kɛdɩɣ-ɖʋ ndʋ́ tɩfɛyɩ Laŋhɛzɩyɛ Tɔm Takayɩsɩ lɛɛsɩ taa yɔ. Ɖɩnaɣ ɛzɩ ɖenɖe Yesu woba Maarta nɛ Maarɩɩ pɛ-tɛ yɔ (10.38-42); Samarɩɩ tʋ kɩbanʋ yaa ñʋʋ yaɖʋ tɔm (10.29-37); nɛ abalʋ weyi ɛ-pɩyalʋ leba nɛ ɛna-ɩ yɔ ɛ-tɔm (15.11-32).
Luka kɛdɩɣ-ɖʋ ndʋ́ ɛmaɣzɩɣ se tɩkɩlɩ wazaɣ Yesu wezuu caɣʋ nɛ ɛ-tɔm yɔɔdʋʋ taa yɔ: Ɛsɔ tiyi Yesu Krɩstʋ se ɛkɔɔ nɛ ɛya mbá pamʋʋ-ɩ yɔ pa-ñʋŋ. Ɛyáa mbá pɛkɛzɩ-wɛ kɩjaʋ yɔ, ḿbá Yesu kɩlɩ sɔɔlʋʋ: ɛzɩ kɩwɛɛkɩm laɖaa, piya, kʋñɔndɩnaa, kʋdɔndɩnaa nɛ agɔmaa.
Krɩstʋ ñɩma mbá Luka ma-wɛ ɛ-Laŋhɛzɩyɛ Tɔm Takayaɣ yɔ, paa pɩɩla ɛzɩma yɔ, paakɛ ñɩm tɩnaa. Luka kɛdɩɣ ɛ-takayaɣ taa tɔm ndʋ́ Yesu yɔɔdaɣ ñɩm yɔɔ yɔ sakɩyɛ. Ɖɩnaɣ tɔm ńdʋ́ ɛzɩ ñʋʋ 12.16-21 taa nɛ ñʋʋ 16 ñɩŋgʋ taa yɔ. Luka heyiɣ Yesu tiyiyaa se pakpaɣ pa-ñɩm nɛ palabɩnɩ Ɛsɔ nɛ ɛyáa tʋmɩyɛ.
Yesu tiyiyaa ɖɔŋ ɛ-nʋmɔʋ taa. Petisaa se pɛlɛɣzɩɣ pɛ-wɛtʋ. Panɩ pɩ-taa se Ɛsɔ wɛ ɖeu nɛ ɛsɔɔlɩ ɛyáa tɩŋa. Ajɛya wena a-taa Room ñɩma mʋ tɛtʋ yɔ, a-taa ɛyáa tɔŋ se: «Tɛtʋ ñʋʋdʋ kɛ Ɛsɔ». Ɛlɛ́, Krɩstʋ ñɩma ñɔtɔŋ se: «Yesu kɛnɩnɩ Ɛsɔ». Toovenim lɛ, Ɛsɔ fezi Yesu nɛ sɩm taa nɛ ɛha-ɩ ɖoŋ se ɛcɔnɩ pɩtɩŋa pʋ-yɔɔ. Luka Laŋhɛzɩyɛ Tɔm Takayaɣ taa lɛ, payaɣ Yesu tam tam se Kɩpaɣlʋ pɩkɩlɩ Laŋhɛzɩyɛ Tɔm Takayɩsɩ lɛɛsɩ taa.
Luka Laŋhɛzɩyɛ Tɔm Takayaɣ taa tɔm pazɩɣnɩ Yeruusalɛm tɛtʋ taa (Ñʋʋ 1 ñɩŋgʋ nɛ naalɛ ñɩŋgʋ), nɛ tɩtɛ peeɖe ɖɔɖɔ (Ñʋʋ 24 ñɩŋgʋ). Yesu wɩlɩ ɛ-tɩ e-tiyiyaa se eheyi-wɛ se ɛ nɛ ɛ-ɛsɛ. Pa-taa la leleŋ pɩtɩɩfɛyɩ. Yesu pazɩ ɛ-tɔm kɛdʋʋ ɛyáa lɛ, ɛɛwɛnɩ ɖoŋ weyi ɩlɩnɩ Ɛsɔ cɔlɔ yɔ. Ɖɔŋ ɩnɩ lɛ Fezuu Kiɖeɖeu (Ñʋʋ 3 ñɩŋgʋ nɛ 4 ñɩŋgʋ). Pʋwayɩ lɛ, Yesu tiyiyaa tasɩ-ɩ katʋʋ ɖɔɖɔ (24.49). Ɛzɩ Yesu yɔ, paba ɖɔɖɔ papɩzɩɣ pɛsɛɛ Ɛsɔ, nɛ pɛɖɛyɩ-ɩ ɛ-camɩyɛ lakasɩ yɔɔ.
Currently Selected:
Luka KAJALAƔ TƆM: KABI
Highlight
Share
Copy
Want to have your highlights saved across all your devices? Sign up or sign in