Maarkɩ 16
16
Yesu femnɩ sɩm taa
(Mat 28.1-8; Luk 24.1-12; Yoh 20.1-10)
1Kɩyakʋ kɩhɛzʋʋ ɖɛwa lɛ, Yoosi nɛ Yakubu po-ɖoo Maarɩɩ nɛ Magdala Maarɩɩ nɛ Saloomee powolo paya kɔyɛ sɔzɩŋ ñɩnɖɛ se powoni pataa Yesu yɔɔ. 2Kifem kujuka lɛ, pakʋyɩ tanaŋ cu se patalɩ pɩlaʋ yɔɔ nɛ pʋcɔ wɩsɩ kpa. 3Pɛɖɛɣaɣ lɛ, pɔpɔzʋʋ ɖama se: «Atʋlʋʋ-ɖʋ pɩyɛ nɖɩ́ ɖɩwɛ pɩlaʋ nɔɔ yɔ?» 4Patalaa lɛ, panaɣ pɩtɛm tʋlʋʋ pɩyɛ sɔsɔɖɛ ńɖɩ́ yem nɛ pɩsɩɩ-ɖɩ kɩjaʋ. 5Pasʋ pɩlaʋ taa lɛ, pamaɣnɩ evebu nɔɔyʋ caɣ pa-nɩwaŋ yɔɔ. Esu toko sɔsɔʋ kʋhʋlʋmʋʋ nakʋyʋ waaa, ɛlɛ́ sɔɔndʋ kpa-wɛ. 6Peeɖe evebu ɛnʋ eheyi-wɛ se: «Sɔɔndʋ ɛtaakpa-mɩ. Nazarɛɛtɩ tʋ Yesu weyi paakam kaamaŋkaɣ yɔɔ yɔ, ɛnʋ ɩñɩnɩɣ yaa we? Efema, ɛfɛyɩ cɩnɛ. Ɩcɔnɩ ɩna ɖenɖe paahɛzɩ-ɩ yɔ. 7Iwolo iheyi Pɩyɛ nɛ Yesu tɔmkpɛlɩkɩyaa lɛlaa se ɛɖɛ-wɛ nɔɔ nɛ ewolo Galilee egeetiye taa. Peeɖe pamakɩnɩ-ɩ ɛzɩ eeheyuu-wɛ yɔ.»
8Peeɖe pakpaɣ seya nɛ palɩɩnɩ pɩlaʋ taa nɛ sɔɔndʋ nɛ peseliɣ. Ɛlɛ́, peteheyi nɔɔyʋ natʋyʋ. Mbʋ́ pʋyɔɔ yɔ, sɔɔndʋ kakɩlɩ-wɛ kpaʋ.
Yesu wɩlɩ ɛ-tɩ Magdala tɛtʋ taa Maarɩɩ
(Mat 28.9-10; Yoh 20.11-18)
9Kujuka ŋgá ke-wiye tanaŋ cu Yesu fema yɔ, ɛlɩzɩ ɛ-tɩ nɛ ɛcalɩ wɩlʋʋ Magdala Maarɩɩ weyi ɛ-wayɩ ɛɛɖɔɔnɩ aleewaa lʋbɛ yɔ. 10Peeɖe Magdala Maarɩɩ woba ɛkɛdɩ Yesu tɔmkpɛlɩkɩyaa mbʋ́ ɛnawa yɔ. Ɛtalaa lɛ, ɛmaɣnɩ-wɛ, pacaɣ leɣa nɛ pewiliɣ. 11Eheyi-wɛ se: «Yesu fema nɛ ma-maɣmaɣ mana-ɩ nɛ mɛ-ɛsɛ.» Eheyi-wɛ ḿbʋ́ lɛ, petetisi.
Yesu wɩlɩ ɛ-tɩ e-tiyiyaa naalɛ
(Luk 24.13-35)
12Yesu tɔmkpɛlɩkɩyaa naalɛ wokaɣnɩ tɛtʋ wayɩ. Peeɖe Yesu lɩzɩ ɛ-tɩ nɛ ɛwɩlɩ-wɛ, ɛlɛ́ ɛɛlɛɣzaa. 13Tɔmkpɛlɩkɩyaa ḿbá, pa-naalɛ papɩsaa peheyi-tʋ pa-taabalaa lɛ, paba tetisi-tʋ ɖɔɖɔ.
Yesu wɩlɩ ɛ-tɩ e-tiyiyaa hiu nɛ kʋɖʋm
(Mat 28.16-20; Luk 24.36-49; Yoh 20.19-23; Tʋma 1.6-8)
14Pʋwayɩ lɛ, Yesu lɩzɩ ɛ-tɩ nɛ ɛwɩlɩ ɛ-tɔmkpɛlɩkɩyaa hiu nɛ kʋɖʋm alɩwaatʋ ndʋ́ pacaɣaɣ pɔtɔkɩ tɔɔnaɣ yɔ nɛ ɛkalɩ-wɛ se pɩlabɩ ɛzɩma nɛ pa-laŋa wɛɛ kpɩzɩŋ. Mbʋ́ pʋyɔɔ yɔ, pataatisi ɛyáa mbá peheyaɣ-wɛ se efema yɔ pɔ-tɔm. 15Pʋbʋ wayɩ lɛ, eheyi-wɛ se: «Ɩcɔɔ kedeŋa kpeekpe nɛ isusi ɛyáa Laŋhɛzɩyɛ Tɔm. 16Yee nɔɔyʋ etisaa lɛ, ɩlabɩ-ɩ lɩm sɔʋ sɔnzɩ nɛ Ɛsɔ ya ɛ-ñʋʋ. Ɛlɛ́, yee nɔɔyʋ ekizaa yɔ, Ɛsɔ kʋʋ ɛ-tɔm. 17Ɩɩnaɣ Ɛsɔ hama lakasɩ nzɩ́ mbá pɛwɛnɩ lidaʋ ɛ-yɔɔ yɔ, pɔkɔŋ labʋ yɔ: pɔɖɔɔnʋʋ aleewaa nɛ mon-ɖoŋ nɛ pɔyɔɔdɩ kʋnʋmɩŋ ndɩ ndɩ ɖɔɖɔ. 18Papɩzɩɣ pakpa ɖʋmaa mbá pañasɩɣ ɛyáa nɛ pasɩkɩ yɔ nɛ pe-nesi nɛ pɔñɔɔ mbʋ́ pʋkʋʋ ɛyáa yɔ ɖɔɖɔ, ɛlɛ́, pɩɩlakɩ-wɛ pʋyʋ. Patɩnɩɣ kʋdɔndɩnaa yɔɔ nesi ɖɔɖɔ nɛ pɔ-yɔɔ cɛ.»
19Kɩpaɣlʋ Yesu tɛm ɛ-tɔmkpɛlɩkɩyaa yɔɔdɩnaʋ ḿbʋ́ lɛ, pɩkpazɩ-ɩ ɛsɔdaa yem nɛ ɛcaɣ Ɛsɔ cɔlɔ lone kɩbanɖɛ taa. 20Pʋwayɩ lɛ, ɛ-tɔmkpɛlɩkɩyaa ñɛɖɛɛ nɛ posusuu Laŋhɛzɩyɛ Tɔm paa le. Kɩpaɣlʋ sɩŋaɣnɩ-wɛ pa-tʋmɩyɛ taa nɛ ɛtɩŋɩɣnɩ hama lakasɩ ndɩ ndɩ yɔɔ nɛ ɛwɩlɩɣ se tɔm ndʋ́ posusuu yɔ, tɩkɛ toovenim.
Currently Selected:
Maarkɩ 16: KABI
Highlight
Share
Copy
Want to have your highlights saved across all your devices? Sign up or sign in
