Luka 10
10
Yesu tiyi ɛ-tɔmkpɛlɩkɩyaa nɩɩnʋwa nɛ nɩɩlɛ nɛ naalɛ se powolo posusi Ɛsɔ kewiyaɣ tɔm
1Pʋwayɩ lɛ, Kɩpaɣlʋ tasɩ lɩzʋʋ ɛ-tɔmkpɛlɩkɩyaa taa ɛyáa nɩɩnʋwa nɛ nɩɩlɛ nɛ naalɛ nɛ etiyi-wɛ naalɛ naalɛ se pɛɖɛɛ-ɩ nɔɔ nɛ powolo tɛtʋ ndɩ ndɩ nɛ hɔɔlɩŋ weyi ɩ-taa ɛɖʋwa se ewoki yɔ pa-taa. 2Peeɖe eheyi-wɛ se: «Kʋmtʋ ɖɔwa, ɛlɛ́, kʋnɖaa tɔɖɔɔ. Pʋ-yɔɔ lɛ, itendi tɔɔnaɣ ŋ́gá ka-tʋ nɛ ɛsɔzɩ kʋnɖaa nɛ pasɩnɩ-mɩ kʋm. 3Iwolo. Mentiyuu-mɩ yɔ, ɩwɛ ɛzɩ heŋ wɛɣʋ kpemtɔɔyɩsɩ hɛkʋ taa yɔ. 4Ɩɖɛɣ lɛ, ɩtaakpaɣ liidiye yaa huyuu yaa naataŋgbala. Ɩtaasɩŋ nʋmɔʋ taa se ɩsɛɣ nɔɔyʋ. 5Yee ɩsʋ ɖɩɣa nakɛyɛ taa lɛ, iheyi ka-taa ñɩma se: ‹Ɛsɔ ɛhɛzɩ mɩ-laŋa.› 6Yee nɔɔyʋ ɛwɛ ka-taa nɛ ɛñɩnɩɣ laŋhɛzɩyɛ yɔ, mɩ-laŋhɛzɩyɛ tɔm wɛɣ ɛ-cɔlɔ. Pɩtɛkɛ ḿbʋ́, tɩpɩsɩɣ mɩ-maɣmaɣ mɩ-cɔlɔ. 7Ɩsʋ ka-taa lɛ, ɩcaɣ peeɖe nɛ paha-mɩ mbʋ́ lɛ, ɩtɔɔ nɛ ɩñɔɔ. Mbʋ́ pʋyɔɔ yɔ, ḿbʋ́ pʋmʋnaa se pɛhɛyɩ tʋmlaɖʋ ɛ-tʋmɩyɛ yɔɔ. Ɩtaacɔɔ ɖɩsɩ tɩŋa taa yem yem. 8Yee ɩtalɩ tɛtʋ natʋyʋ taa nɛ nɔɔyʋ mʋ-mɩ nɛ ɛha-mɩ pʋyʋ yɔ, ɩtɔɔ. 9Ɩla nɛ kʋdɔndɩnaa mbá pɛwɛ peeɖe yɔ pɔ-yɔɔ cɛ nɛ iheyi-wɛ se Ɛsɔ Kewiyaɣ talɩ mɩ-cɔlɔ kpam. 10Ɛlɛ́, yee ɩtalɩ tɛtʋ natʋyʋ taa nɛ patamʋ-mɩ lɛ, ɩcɔɔ habɛɛ yɔɔ nɛ isusi ɛyáa se: 11‹Đikpizi-mɩ mɩ-tɛtʋ taa mʋzʋʋ ŋgʋ́ kɩkpa ɖa-naŋgbanzɩ yɔɔ yɔ. Ɛlɛ́, ɩtɩlɩ ɖeu se Ɛsɔ Kewiyaɣ talɩ mɩ-cɔlɔ kpam.› 12Mankaɖɩɣ-mɩ se kɩyakʋ ŋgʋ́ Ɛsɔ hʋʋnɩ ɛyáa yɔ, Sodom ñɩma kʋñɔŋ ɛɛtalɩɣ tɛtʋ ńdʋ́ tɩ-taa ñɩma ñɩŋgʋ.»
Tɛtʋ ndʋ́ tɩ-taa ñɩma kizi Yesu tɔm yɔ
(Mat 11.20-24)
13Pʋwayɩ lɛ, Yesu tasɩ yɔɔdʋʋ se: «Koraazɛɛ nɛ Bɛtsayɩda ñɩma mɩ! Pʋtɔɔ-mɩ! Mbʋ́ pʋyɔɔ yɔ, palabɩ Ɛsɔ hama lakasɩ nzɩ́ mɩ-hɛkʋ taa yɔ, yee paalabɩ-sɩ Tiiri nɛ Sidɔɔ ñɩma pɔ-cɔlɔ yɔ, paatɛm caɣʋ tɔlɩma taa nɛ posuu kutokiŋ nɛ pɩwɩlɩ se pɛlɛɣzɩ wɛtʋ. 14Toovenim lɛ, kɩyakʋ ŋgʋ́ Ɛsɔ hʋʋnɩ ɛyáa yɔ, Tiiri nɛ Sidɔɔ pɛ-tɛtʋ taa ñɩma kʋñɔŋ ɛɛtalɩɣ mɩ-ñɩŋgʋ. 15Mɩ Kapɛrnayum ñɩma lɛ, ɩmaɣzɩɣ se ɩkpaɣ ɛsɔdaa yaa we? Ɩɩkpaɣ kaʋ. Ɛlɛ́, petisiɣ-mɩ tɛtɛɛ ɖenɖe kʋñɔŋ maatɛŋ wɛɛ yɔ.»
16Pʋwayɩ lɛ, ɛtasɩ ɛ-tɔmkpɛlɩkɩyaa heyuu se: «Weyi ɛnɩɣnɩ-mɩ yɔ, ɛnɩnɩ-m. Weyi ɛlɔʋ-mɩ yɔ, ɛlɔ-m. Weyi ɛ́lɛ́ lɔʋ-m yɔ, ɛlɔ weyi etiyi-m yɔ.»
Yesu tiyiyaa nɩɩnʋwa nɛ nɩɩlɛ nɛ naalɛ pɩsaa pɔkɔɔ
17Pɩkɛdaa lɛ, Yesu tɔmkpɛlɩkɩyaa nɩɩnʋwa nɛ nɩɩlɛ nɛ naalɛ ḿbá papɩsɩ ɛ-cɔlɔ nɛ laŋhʋlʋmɩyɛ nɛ peheyi-i se: «Kɩpaɣlʋ! Pɩkpɛndɩnɩ aleewaa nɛ pañaŋ-ɖʋ alɩwaatʋ ndʋ́ ɖɩkalɩɣ-wɛ nɛ ñɔ-nɔɔ yɔ.» 18Peeɖe Yesu cosi-wɛ se: «Mana Satanɩ, ɛlɩnɩ ɛsɔdaa nɛ ɛtɔlɩ ɛzɩ tɛʋ ñɩlɩsʋʋ yɔ. 19Iwelesi nɛ ɩnɩɩ, maha-mɩ ɖoŋ se ɩɖɔ ɖʋmaa nɛ pɩcasɩ pɔ-yɔɔ nɛ ɩwa Kañadʋ ɖoŋ tɩŋa payɩ. Pʋyʋ nɔɔyʋ ɛɛlakɩ-mɩ. 20Paa ḿbʋ́ yɔ, pɩtaalabɩ-mɩ leleŋ se aleewaa ñaŋ-mɩ. Ɛlɛ́, pɩlabɩ-mɩ leleŋ se Ɛsɔ ma mɩ-hɩla ɛ-takayaɣ taa.»
Yesu heyiɣ ɛ-caa tɔm mbá patakpaɣ-wɛ payaa pʋyʋ yɔ
(Mat 11.25-27; 13.16-17)
21Yesu yɔɔdaɣ ḿbʋ́ lɛ, Fezuu Kiɖeɖeu yele nɛ ɛ-laŋɩyɛ hʋlʋmɩ siŋŋ nɛ ɛtɔ se: «Man-Caa! Ɛsɔdaa nɛ tataa Kɩpaɣlʋ! Mansaŋ-ŋ. Mbʋ́ pʋyɔɔ yɔ, ŋmɛsɩ ñɔ-tɔm lɔŋsɩnɖaa nɛ lɛɣsɩnɖaa nɛ ŋkuli tɩ-yɔɔ nɛ mbá pɛtɛkɛ pʋyʋ yɔ panɩɩ tɩ-tɔbʋʋ. Man-Caa! Ñɔsɔɔlɩna se pɩla ḿbʋ́ nɛ pɩla ɖɔɖɔ.»
22Pʋwayɩ lɛ, eheyi ɛyáa se: «Man-Caa cɛlɩ-m pɩtɩŋa payɩ. Nɔɔyʋ tasɩ mbʋ́ mɛnkɛnaa yɔ nɛ pɩtasɩnɩ man-Caa nɛ nɔɔyʋ tasɩm-ɩ nɛ pɩtasɩnɩ ɛ-Pɩyalʋ ma nɛ mbá mɔnsɔɔlaa se mawɩlɩ-ɩ-wɛ yɔ.» 23Peeɖe Yesu kɛzɩ ɛ-tɩ nɛ ɛ-tɔmkpɛlɩkɩyaa yɔɔ nɛ eheyi pe-ɖeke se: «Mbá panaɣ ɛzɩ ɩnaɣʋ yɔ, pehiɣ pa-tɩ! 24Pʋ-yɔɔ mankaɖɩɣ-mɩ se: náyaa sakɩyɛ nɛ awiya sɔsɔna sakɩyɛ pañɩnaɣ se pana mbʋ́ ɩnaɣ ɛzʋnɔ yɔ. Ɛlɛ́, patapɩzɩ. Pañɩnaɣ ɖɔɖɔ se panɩɩ ndʋ́ ɩnɩɣ yɔ. Ɛlɛ́, patapɩzɩ.»
Ɖɩsɔɔlɩ Ɛsɔ nɛ ɛyáa lɛlaa
25Yesu yɔɔdaɣ ḿbʋ́ lɛ, paɣtʋ wɩlɩyʋ nɔɔyʋ kʋyɩ ɛñɩ ɛ-nɔɔ cɔlɔ tɔm se: «Wɩlɩyʋ! Ɛbɛ pʋwɛɛ se mala nɛ mehiɣ wezuu maatɛŋ?» 26Ɛlɛ́, Yesu pɔzɩ-ɩ se: «Se we paɖʋ Mooyiizi paɣtʋ taa? Ŋkalɩɣ-tʋ lɛ, se we ŋnɩɣ?» 27Peeɖe paɣtʋ wɩlɩyʋ ɛnʋ ecosi-i se: «Paɖʋwa se: sɔɔlɩ ña-Kɩpaɣlʋ Ɛsɔ nɛ ña-laŋɩyɛ tɩŋa nɛ ñe-liu tɩŋa nɛ ño-ɖoŋ tɩŋa nɛ ña-lɩmaɣza tɩŋa nɛ ŋsɔɔlɩ ña-taabalʋ ɛzɩ ŋsɔɔlʋʋ ña-maɣmaɣ yɔ.» 28Yesu heyi-i se: «Ŋcosi camɩyɛ, la ḿbʋ́ nɛ ŋhiɣ wezuu maatɛŋ.»
Samaarɩɩ tʋ kɩbanʋ nɔɔyʋ tɔm
29Paɣtʋ wɩlɩyʋ ɛnʋ ɛnɩ ḿbʋ́ lɛ, ɛcaɣ se ɛkʋsɩ ɛ-ñʋʋ yɔɔ fɛyɛ. Pʋ-yɔɔ ɛpɔzɩ Yesu se: «Anɩ lɛ man-taabalʋ?» 30Peeɖe Yesu tuu-i eduuye se: «Nakʋyʋ wiye abalʋ nɔɔyʋ lɩnɩ Yeruusalɛm nɛ etiki Yeriikoo. Etikaɣ lɛ, ɛlɩɩ mɩ́láa nabɛyɛ yɔɔ nɛ pakpa-ɩ pɔhɔɔ-ɩ nɛ efiɣni nɛ pɔhɔzɩ ɛ-yɔɔ wondu nɛ pɛpɛɖɩ-ɩ nɛ pacaŋ pɛɖɛɛ. 31Pɩkɛdaa lɛ, cɔjɔ nɔɔyʋ ɖɛɣ habɩyɛ ńɖɩ́ ɖɩ-yɔɔ yem. Ɛtalaa nɛ ɛna abalʋ ɛnʋ ḿbʋ́ lɛ, ekoli-i nɛ ɛɖɛɛ. 32Ɛ-wayɩ lɛ, Leevi liɖe taa tʋ nɔɔyʋ talɩ ɛmaɣnɩ-ɩ peeɖe ɖɔɖɔ. Ɛ́lɛ́ na-ɩ ḿbʋ́ lɛ, ekoli-i ɖɔɖɔ nɛ ɛɖɛɛ. 33Ɛ́lɛ́ ɖɛwa lɛ, Samaarɩɩ tʋ nɔɔyʋ wokaɣ nʋmɔʋ. Ɛtalɩ abalʋ ɛnʋ ɛ-cɔlɔ nɛ ɛna-ɩ ḿbʋ́ lɛ, pɩlabɩ-ɩ pʋtɔdɩyɛ pɩŋŋ. 34Peeɖe ewobi ɛ-cɔlɔ nɛ ɛhɛzɩ e-heŋ taa nɛ ɛɖʋ kɔyɛ nɛ ɛhɔkɩ. Ɛtɛma lɛ, ewoni-i ɛcaɣzɩ ɛ-kpaŋaɣ yɔɔ nɛ ewoni-i nʋmɔɖɔnaa ɖɩɣa nakɛyɛ taa nɛ ɛcaɣ ɛ-cɔlɔ. 35Tɛʋ fema lɛ, ɛlɩzɩ kɩyakɩŋ naalɛ tʋmɩyɛ liidiye nɛ ɛcɛlɩ ɖɩɣa ŋ́gá kɔ-yɔɔ cɔnɩyʋ nɛ eheyi-i se: ‹Cɔnɩ abalʋ ɛnɛ ɛ-yɔɔ ɖeu nɛ maapɩsɩɣ lɛ, mantɩŋnɩ cɩnɛ nɛ mbʋ́ ŋcɔnɩnɩ ɛ-yɔɔ yɔ, pɩlɩ ɛzɩma lɛ, maatɛzɩ-ŋ hɛyʋʋ.› » 36Peeɖe Yesu pɔzɩ-ɩ se: «Ŋmaɣzɩɣ se ɛyáa ḿbá pa-naadozo pa-taa lɛ, akɛ weyi mɩ́láa mabɩ-ɩ yɔ ɛ-taabalʋ?» 37Ɛlɛ́, Paɣtʋ wɩlɩyʋ ɛnʋ ecosi-i se: «Weyi ɛna ɛ-pʋtɔdɩyɛ yɔ.» Yesu heyi-i se: «Wolo nɛ ŋla ɛzɩ abalʋ ɛnʋ ɛlabʋ yɔ.»
Yesu woba Maarta nɛ Maarɩɩ pɛ-tɛ
38Nakʋyʋ wiye Yesu nɛ ɛ-tɔmkpɛlɩkɩyaa powokaɣ nʋmɔʋ. Patalɩ tɛtʋ cikpetu natʋyʋ taa lɛ, halʋ nɔɔyʋ mʋ Yesu ɛ-tɛ, payaɣ-ɩ se Maarta. 39Ɛɛwɛnɩ neu nɔɔyʋ, payaɣ-ɩ se Maarɩɩ nɛ ɛ́lɛ́ wolo ɛcaɣ Kɩpaɣlʋ Yesu cɔlɔ nɛ ewelesiɣ ndʋ́ ɛwɩlaɣ yɔ. 40Maarta ñaawɛɛ ɛkʋʋ ɛ-tɩ nɛ mɩzaɣ nɔɔ tʋma. Pɩkɛdaa lɛ, ewolo ɛpɔzɩ Yesu se: «Kɩpaɣlʋ, ɛzɩ me-neu yebuni-m mɩzaɣ nɔɔ tʋmɩyɛ yɔ, piiheyiɣ-ŋ natʋyʋ yaa we? Heyi-i se ɛkɔɔ ɛsɩnɩ-m.» 41Peeɖe Kɩpaɣlʋ cosi-i se: «Maarta! Maarta! Ŋkɩlɩɣ ña-tɩ kʋʋ wondu sakɩyɛ yɔɔ nɛ pɩcɛyɩɣ-ŋ. 42Ŋgʋ́, pʋyʋ kʋɖʋm koŋ wɛnɩ wazaɣ. Maarɩɩ lɩzɩnɩ ɖeu ɖeɖe. Nɔɔyʋ ɛɛpɩzɩɣ ɛmʋ-pʋ ɛ-cɔlɔ kaʋ.»
Currently Selected:
Luka 10: KABI
Highlight
Share
Copy
Want to have your highlights saved across all your devices? Sign up or sign in
