Luka 9

Yesu tiyi ɛ-tɔmkpɛlɩkɩyaa hiu nɛ naalɛ

(Mat 10.5-15; Mrk 6.7-13)

1Nakʋyʋ wiye Yesu kpeɣli ɛ-tɔmkpɛlɩkɩyaa hiu nɛ naalɛ nɛ ɛha-wɛ ɖoŋ nɛ abalɩtʋ se pɔɖɔɔnɩnɩ aleewaa tɩŋa nɛ pala nɛ kʋdɔndɩnaa yɔɔ cɛ. 2Pʋwayɩ lɛ, etiyi-wɛ se powolo posusi Ɛsɔ Kewiyaɣ tɔm nɛ pala nɛ kʋdɔndɩnaa yɔɔ cɛ. 3Ɛlɛ́, eheyi-wɛ se: «Ɩɖɛɣ lɛ, ɩtaakpaɣ pʋyʋ: paa ɖaʋ yaa huyuu yaa tɔɔnaɣ yaa liidiye. Nɔɔyʋ ɛtaakpaɣ tokonaa naalɛ. 4Yee ɩtalɩ ɖoli nɛ pamʋ-mɩ ɖɩɣa nakɛyɛ taa lɛ, ɩcaɣ peeɖe nɛ pʋkɔɔ pɩsɩɩnɩ alɩwaatʋ ndʋ́ ɩkʋyʋʋ yɔ. 5Yee ɩtalɩ tɛtʋ natʋyʋ taa nɛ ɛyáa ɛtamʋ-mɩ lɛ, ikpizi-wɛ mɩ-naŋgbanzɩ yɔɔ mʋzʋʋ nɛ ɩɖɛɛ nɛ pɩwɩlɩ se ɩkɔɔlɩ-wɛ nɛ iyebi-wɛ nɛ pa-sʋʋtʋ. 6Peeɖe tɔmkpɛlɩkɩyaa ḿbá pɛɖɛwa nɛ pɔcɔʋ tɛtʋ cikpetu ndɩ ndɩ taa nɛ posusuu Laŋhɛzɩyɛ Tɔm nɛ palakɩ nɛ kʋdɔndɩnaa yɔɔ cɛkɩ paa le.»

Eroodi Antipasɩ pʋtɩ Yesu yɔɔ

(Mat 14.1-12; Mrk 6.14-29)

7Wiyaʋ sɔsɔ Eroodi nɩɣaɣ mbʋ́ pɩtɩŋa pɩlakaɣ ḿbʋ́ yɔ nɛ piliɣtiɣ-i. Mbʋ́ pʋyɔɔ yɔ, ɛyáa lɛlaa tɔŋaɣ se: «Lɩm Sɔʋ Sɔnzɩ Laɖʋ Yohanɛɛsɩ weyi paakʋwa yɔ, ɛnʋ femna.» 8Lɛlaa se: «Náyʋ Elii lɩnɩnɩ ɛsɔdaa nɛ etii.» Lɛlaa ɖɔɖɔ se: «Đooo lɔŋ taa náyaa taa nɔɔyʋ femna.» 9Ɛlɛ́, Eroodi tɔ se: «Meyebi pɛsɛtɩ Yohanɛɛsɩ ñʋʋ lɛ, a-tɔm kpem manɩɣ pɔyɔɔdʋʋ yɔ?» Peeɖe ɛñɩnaɣ se ɛna pʋdʋ.

Yesu ha tɔɔnaɣ samaɣ sɔsɔɔ nɛ kɔtɔɔ

(Mat 14.13-21; Mrk 6.30-44; Yoh 6.1-14)

10Pʋwayɩ lɛ, Yesu tiyiyaa pɩsɩ ɛ-cɔlɔ nɛ pɛkɛdɩ-ɩ mbʋ́ palaba yɔ pɩtɩŋa. Ɛlɛ́, ɛ nɛ wɛ powolo pacaɣ ɖoli nɔɔyʋ pe-ɖeke tɛtʋ ndʋ́ payaɣ se Bɛtsayɩda yɔ tɩ-cɔlɔ. 11Ɛlɛ́, ɛyáa samaɣ nɩɩ nɛ kakʋyɩ katɩŋ pa-wayɩ. Katalaa lɛ, Yesu mʋ-kɛ nɛ eheyi-kɛ Ɛsɔ Kewiyaɣ tɔm nɛ ɛla nɛ mbá pɩɩwɛnɩ-wɛ yɔ pɔ-yɔɔ cɛ.

12Wɩsɩ caɣaɣ kpem lɛ, ɛ-tɔmkpɛlɩkɩyaa hiu nɛ naalɛ ḿbá powolo ɛ-cɔlɔ nɛ peheyi-i se: «Heyi ɛyáa samaɣ se kowolo tɛtʋ cikpetu taa nɛ ɖɩsɩ nzɩ́ sɩmalɩnɩ cɩnɛ yɔ sɩ-taa nɛ pehiɣ ɖɩsʋyɛ nɛ tɔɔnaɣ. Mbʋ́ pʋyɔɔ yɔ, ɖɩwɛ ñɩtʋ taa.» 13Ɛlɛ́, Yesu cosi-wɛ se: «Ɩha-wɛ tɔɔnaɣ mɩ-maɣmaɣ nɛ pɔtɔɔ.» Peeɖe peheyi-i se: «Tindine hɔɔlasɩ kagbaanzɩ nɛ kpakpasɩ naalɛ pe-ɖeke pɛwɛnɩ ɖɔ-cɔlɔ. Yaa ŋcaɣ se ɖayabɩnɩ tɔɔnaɣ nɛ ɖɩcalɩ ɛyáa samaɣ kanɛ katɩŋa?» 14Ŋgʋ́, abalaa katalɩ ɛzɩ kudokiŋ kagbaanzɩ yɔ. Ɛlɛ́, Yesu heyi ɛ-tɔmkpɛlɩkɩyaa se: «Iheyi ɛyáa ḿbá se pacaɣ cabɩ cabɩ ɛzɩ nɩɩnʋwa nɩɩnʋwa yɔ.» 15Ɛ-tɔmkpɛlɩkɩyaa caɣzɩ patɩŋa payɩ ḿbʋ́ ɖɔɖɔ. 16Pʋwayɩ lɛ, Yesu kpaɣ tindine hɔɔlasɩ kagbaanzɩ ńzɩ́ nɛ kpakpasɩ ńzɩ́ sɩ-naalɛ nɛ ɛkpazɩ ɛ-ɛsɛ ɛsɔdaa nɛ ɛsɛɛ pʋ-yɔɔ Ɛsɔ nɛ ɛcɩyɩ nɛ ɛcɛlɩ ɛ-tɔmkpɛlɩkɩyaa se patayɩ ɛyáa samaɣ ŋ́gá. 17Patɩŋa pɔtɔɔ pahaɣ nɛ pokuu hɔɔlasɩ nzɩ́ sɩkazaa yɔ ɖɔkɩŋ hiu nɛ naalɛ.

Pɩyɛ yɔɔdaa se Yesu lɛ Weyi Ɛsɔ Lɩzaa Yɔ

(Mat 16.13-19; Mrk 8.27-29)

18Nakʋyʋ wiye Yesu sɛɣaɣ Ɛsɔ e-ɖeke nɛ ɛ-tɔmkpɛlɩkɩyaa wɛɛ ɛ-cɔlɔ. Peeɖe ɛpɔzɩ-wɛ se: «Ɛyáa maɣzɩɣ se ma lɛ anɩ?» 19Pocosi-i se: «Nabɛyɛ tɔŋ se ña lɛ Lɩm Sɔʋ Sɔnzɩ Laɖʋ Yohanɛɛsɩ. Lɛlaa se náyʋ Elii lɩnɩnɩ ɛsɔdaa nɛ etii. Lɛlaa ñɔtɔŋ se ɖooo lɔŋ taa náyaa taa nɔɔyʋ femna.» 20Ɛlɛ́, Yesu pɔzɩ-wɛ se: «Mɩ yɔ, mɩhʋʋ se ma lɛ anɩ?» Ɛlɛ́, Pɩyɛ cosi-i se: «Ña lɛ Weyi Ɛsɔ Lɩzaa Yɔ.»

21Peeɖe Yesu paɣ́ ɛ-tɔmkpɛlɩkɩyaa ɖeu se pataaheyi nɔɔyʋ mbʋ́ ɛkɛnaa yɔ. 22Ɛtasɩ-wɛ heyuu se pʋwɛɛ se Ɛyʋ Pɩyalʋ ɛla kʋñɔŋ siŋŋ. Yuda ñɩma sɔsaa nɛ pɔ-cɔjɔnaa sɔsaa nɛ pa-paɣtʋ wɩlɩyaa pɔkɔŋ kizuu ɛ-tɔm nɛ pakʋ-ɩ ɛsɩ. Kɩyakʋ naadozo ñɩŋgʋ wiye lɛ, Ɛsɔ fezi-i nɛ sɩm taa.

Ɛzɩma pʋwɛɛ se ɖɩtɩŋ Yesu wayɩ?

23Pʋwayɩ lɛ, eheyi patɩŋa payɩ se: «Weyi e-liu wɛɛ se ɛtɩŋɩɣ ma-wayɩ yɔ, pʋwɛɛ se ɛsɔɔ ɛ-maɣmaɣ ɛ-yɔɔ nɛ etisi nɛ ɛtɔɔ kʋñɔŋ siŋŋ#9.23 Etisi nɛ ɛtɔɔ kʋñɔŋ siŋŋ: ɩcɔnɩ Mat 10.38. paa ɖooye. 24Mbʋ́ pʋyɔɔ yɔ, weyi ɛñɩnɩɣ se ɛcaɣ wezuu tam yɔ, ɛtɛŋnɩ-kʋ lesuu. Weyi ɛ́lɛ́ sɩkɩ mɔ-yɔɔ yɔ, ɛcakɩ wezuu tam. 25Yee ɛyʋ ehiɣ kedeŋa yɔɔ cɩnɛ ñɩm tɩŋa payɩ nɛ elesi e-wezuu yaa ɛ-maɣmaɣ ɛla asɛyʋʋ lɛ, pɩwazɩɣ-ɩ we? 26Yee fɛyɛ ɛkpa nɔɔyʋ ma nɛ mɔn-tɔm ɖɔ-yɔɔ yɔ, ɖɩkaɣ-m kpaʋ ɛ-yɔɔ alɩwaatʋ ndʋ́ Ɛyʋ Pɩyalʋ ma mɛnkpɛndɩɣnɩ mon-koboyaɣ nɛ man-Caa Ɛsɔ ñɩŋga nɛ e-tiyiyaa ñɩŋga nɛ mɔnkɔɔ yɔ. 27Toovenim lɛ, meheyiɣ-mɩ se mbá pɛwɛ cɩnɛ yɔ, pa-taa lɛlaa naɣ Ɛsɔ Kewiyaɣ nɛ pʋcɔ pasɩ.»

Pɩyɛ, Yakubu nɛ Yohanɛɛsɩ pana Yesu Ɛsɔ koboyaɣ taa

(Mat 17.1-8; Mrk 9.2-8)

28Yesu tɛm yɔɔdʋʋ ḿbʋ́ nɛ pɩla kɩyakɩŋ ɛzɩ lutozo yɔ lɛ, ɛ́yáa Pɩyɛ nɛ Yohanɛɛsɩ nɛ Yakubu nɛ ɛ nɛ wɛ pakpa pʋʋ yɔɔ se ɛsɛɛ Ɛsɔ. 29Ɛsɛɣaɣ Ɛsɔ lɛ, ɛ-ɛsɩndaa lɛɣzɩ nɛ e-wondu hʋlʋmɩ layɩ layɩ nɛ tiɖeɣ miŋ yem pelu pelu. 30Kpaagbaa ḿbʋ́ lɛ, abalaa naalɛ nabɛyɛ lɩ nɛ pa nɛ ɩ palakɩ lɩmaɣza. Ḿbá lɛ Mooyiizi nɛ Elii. 31Paawɛ Ɛsɔ koboyaɣ taa nɛ pa nɛ Yesu pɔyɔɔdʋʋ ɛzɩma mbʋ́ ɛtɛzɩɣ ɛ-tʋmɩyɛ nɛ sɩm Yeruusalɛm yɔ pʋ-tɔm. 32Alɩwaatʋ ńdʋ́ lɛ, Pɩyɛ nɛ ɛ-taabalaa paawɛ ɖom yɔɔ. Pefema lɛ, pana Yesu e-koboyaɣ taa, abalaa ḿbá pa-naalɛ pasɩŋ ɛ-cɔlɔ. 33Pɩkɛdaa lɛ, abalaa ḿbá pakʋyɩ Yesu cɔlɔ se pɛɖɛɣ. Peeɖe Pɩyɛ heyi Yesu se: «Wɩlɩyʋ! Đɩwɛʋ cɩnɛ yɔ, pʋwɛ ɖeu pɩŋŋ. Pʋmʋnaa se ɖisiɣ kɩɖanɖɩŋ naadozo: ña lɛɛkʋ, Mooyiizi lɛɛkʋ nɛ Elii lɛɛkʋ.» Ɛtaamaɣzɩ nɛ pʋcɔ ɛyɔɔdɩ ḿbʋ́. 34Ɛyɔɔdaɣ ḿbʋ́ lɛ, ɛsɔmɩnʋʋ nakʋyʋ wolo kuhuuzi pɔ-yɔɔ. Yesu tɔmkpɛlɩkɩyaa na ḿbʋ́ lɛ, sɔɔndʋ kpa-wɛ. 35Peeɖe panɩ pʋyɔɔdʋʋnɩ-wɛ nɛ kɩ-tɛɛ se: «Ɛnɛ lɛ man-Pɩyalʋ. Malɩzɩ-ɩ se ɛla man-tʋmɩyɛ, ɩnɩɩnɩ-ɩ.» 36Pʋyɔɔdɩ ḿbʋ́ lɛ, panaɣ Yesu ɖeke peeɖe. Ɛlɛ́, ɛ-tɔmkpɛlɩkɩyaa su ɖiɣ ɖiɣ, peteheyi nɔɔyʋ mbʋ́ panawa yɔ pʋ-tɔm alɩwaatʋ ńdʋ́ tɩ-taa.

Yesu wazɩ pɩɣa ŋgá eleeu nɔɔyʋ wɛ ka-wayɩ yɔ

(Mat 17.14-18; Mrk 9.14-27)

37Tɛʋ fema lɛ, Yesu nɛ ɛ-tɔmkpɛlɩkɩyaa palɩɩnɩ pʋʋ yɔɔ nɛ petiki. Peeɖe ɛyáa samaɣ sɔsɔɔ nakɛyɛ katɩ-ɩ 38nɛ ka-taa abalʋ nɔɔyʋ ma kubuka se: «Wɩlɩyʋ! Mentendiɣ-ŋ se ŋna man-pɩyalʋ ɛgbamɩyɛ ɖɩnɛ ɖɩ-pʋtɔdɩyɛ. 39Eleeu nɔɔyʋ wɛɛ ekpiki-i nɛ ɛmakɩ kobusi nɛ ɛñamsɩɣ-ɩ nɛ huluu ñɛyɩɣ ɛ-nɔɔ. Ɛwɛɛ ɛcɔzʋʋ-ɩ nɛ ɛwɩɣnɩ ɛ-wayɩ seu. 40Mewini ñɔ-tɔmkpɛlɩkɩyaa se pɔɖɔɔnɩ eleeu ɛnʋ, ɛlɛ́, patapɩzɩ.» 41Peeɖe Yesu holaa se: «Heyi! Ɛyáa kɩdɛkɛdaa lidaʋ fɛyɩwaa mɩ! Alɩwaatʋ ɛzɩma mantasɩɣ mɩ-cɔlɔ caɣʋ nɛ pʋwɛɛ se mɔnɖɔkɩ mɔ-hɔyɛ ɖɔɖɔ? Kɔnɩ-m ña-pɩyalʋ cɩnɛ.» 42Ewokaɣnɩ-ɩ nɛ ɛñɔtɩnɩ Yesu lɛ, eleeu co ɛ-pɩyalʋ ɛnʋ nɛ ɛyaɣnɩ tɛtʋ nɛ ɛpɩsɩ-ɩ kpɛndɛɣlɩsɩ. Ɛlɛ́, Yesu holini eleeu ɛnʋ nɛ ɛla nɛ pɩɣa ŋ́gá kɔ-yɔɔ cɛ nɛ ɛcɛlɩ-kɛ ka-caa. 43Peeɖe pɩlabɩ ɛyáa samaɣ ŋ́gá katɩŋa piti nɛ ɛzɩma mbʋ́ Ɛsɔ ɖoŋ paɣlaa yɔ.

Yesu yɔɔdɩ nabʋlɛ ñɩm se ɛkɔŋ sɩbʋ

(Mat 17.22-23; Mrk 9.30-32)

Pɩlakaɣ ɛyáa tɩŋa piti nɛ mbʋ́ pɩtɩŋa Yesu lakaɣ yɔ lɛ, eheyi ɛ-tɔmkpɛlɩkɩyaa se: 44«Ɩɖɔkɩ tɔm ndʋ́ meheyiɣ-mɩ lɛɛlɛɛyɔ yɔ camɩyɛ. Pɔkɔŋ Ɛyʋ Pɩyalʋ kpaʋ nɛ paɖʋzɩ ɛyáa nesi taa.» 45Ɛlɛ́, patanɩɩ tɩ-tɔbʋʋ, mbʋ́ pʋyɔɔ yɔ, piihuuzi tɩ-yɔɔ se pataanɩɩ tɩ-tɔbʋʋ. Ŋgʋ́, pataakatɩɣ se pɔpɔzɩ-ɩ natʋyʋ tɩ-yɔɔ.

Anɩ lɛ Yesu tiyiyaa taa sɔsɔ?

(Mat 18.1-5; Mrk 9.33-37)

46Pʋwayɩ lɛ, Yesu tɔmkpɛlɩkɩyaa hɔŋnɩ ɖama tɔm se pana se anɩ lɛ pa-taa sɔsɔ. 47Ɛlɛ́, Yesu na pa-lɩmaɣza ḿbʋ́ nɛ ɛkpaɣ pɩɣa nakɛyɛ nɛ ɛsɩɩ-kɛ ɛ-cɔlɔ 48nɛ eheyi-wɛ se: «Yee nɔɔyʋ ɛmʋ pɩɣa cikpelaɣ ɛzɩ kanɛ yɔ mɔ-yɔɔ yɔ, man-tɩ tɩŋa pʋdʋ mʋwa. Weyi ɛmʋ-m yɔ, ɛmʋ ɖɔɖɔ weyi etiyi-m yɔ. Mbʋ́ pʋyɔɔ yɔ, weyi ɛpɩsɩ ɛ-tɩ mɩ-taa pɩɣa yɔ, ɛnʋ lɛ sɔsɔ.»

Weyi ɛɛkʋyʋʋ Yesu tiyiyaa yɔɔ yɔ, ɛkɛ pa-ñɩnʋ

(Mrk 9.38-40)

49Pʋwayɩ lɛ, Yohanɛɛsɩ heyi Yesu se: «Wɩlɩyʋ, ɖɩna nɔɔyʋ ɖɔɔnaɣ aleewaa nɛ ño-ɖoŋ nɛ ɖɩkʋyɩ se ɖikiziɣni-i se ɛtɛkɛ ɖa-ñɩnʋ.» 50Peeɖe Yesu cosi-i se: «Ɩtaakizini-i, mbʋ́ pʋyɔɔ yɔ, weyi ɛɛkʋyʋʋ mɩ-yɔɔ yɔ, ɛkɛ mɩ-ñɩnʋ.»

Yesu kʋyaa se ewoki Yeruusalɛm

51Alɩwaatʋ wɩzɩ talʋʋ se Yesu ɛkpa ɛsɔdaa. Pʋ-yɔɔ ɛɖʋwa kpem se ewoki Yeruusalɛm. 52Peeɖe etiyi nabɛyɛ se pɛɖɛɛ-ɩ nɔɔ nɛ powolo Samaarɩɩ egeetiye taa nɛ pɔñɔɔzɩ-ɩ mbʋ́ pʋpɔzʋʋ-ɩ yɔ pɩtɩŋa. Patalaa lɛ, pasʋʋ tɛtʋ cikpetu natʋyʋ taa se pala ḿbʋ́. 53Ɛlɛ́, peeɖe ñɩma kizi se paamʋʋ-ɩ, mbʋ́ pʋyɔɔ yɔ, ɛɖɛɣaɣnɩ Yeruusalɛm kiŋ. 54Ɛ-tɔmkpɛlɩkɩyaa Yakubu nɛ Yohanɛɛsɩ panɩ ḿbʋ́ lɛ, pɔpɔzɩ-ɩ se: «Kɩpaɣlʋ! Yaa ɖiyele nɛ miŋ nɩɩyɩ tibini ɛsɔdaa nɛ enezi-wɛ?» 55Ɛlɛ́, Yesu kɛzɩ ɛ-tɩ nɛ pɔ-yɔɔ nɛ ɛkalɩ-wɛ#9.55 Takayɩsɩ lɛɛsɩ taa lɛ, pɔsɔzaa se: nɛ eheyi se: «Ɩɩsɩŋ kalɩzaɣ ŋga keseɣtiɣ-mɩ yɔ, mbʋ pʋyɔɔ yɔ, Ɛyʋ Pɩyalʋ tɔkɔɔ se elesi ɛyaa, ɛlɛ ɛkɔm se ɛya pa-ñʋʋ.». 56Peeɖe pakʋyaa se pɛɖɛɣ lɛɛtʋ taa.

Ɖiyele pɩtɩŋa nɛ ɖɩtɩŋ Yesu wayɩ

(Mat 8.19-22)

57Yesu nɛ ɛ-tɔmkpɛlɩkɩyaa pɛɖɛɣaɣ lɛ, nɔɔyʋ heyi-i se: «Paa le ŋwoki yɔ, mantɩŋɩɣ-ŋ.» 58Peeɖe Yesu cosi-i se: «Pudanaa wɛnɩ pɔŋ nɛ sumasɩ ñɛwɛnɩ ɖandʋ, ɛlɛ́, Ɛyʋ Pɩyalʋ fɛyɩnɩ ñʋʋ ɖɩɖʋyɛ.» 59Ɛlɛ́, eheyi lɛlʋ se: «Kʋyɩ ŋtɩŋ-m.» Ɛ́lɛ́ cosi-i se: «Kɩpaɣlʋ! Yele mowolo menpi man-caa nɛ pʋcɔ mɔnkɔɔ mantɩŋ-ŋ.» 60Peeɖe Yesu cosi-i se: «Yele sɩɖaa nɛ pepi pa-sɩɖaa. Ña lɛ, wolo ŋsusi ɛyáa Ɛsɔ Kewiyaɣ tɔm.» 61Pʋwayɩ lɛ, lɛlʋ tasɩ-ɩ heyuu se: «Kɩpaɣlʋ! Mantɩŋɩɣ-ŋ. Ɛlɛ́, yele mowolo meheyi ma-ñɩma se pɩlabɩ wiɖiyi nɛ mɔnkɔɔ.» 62Peeɖe Yesu cosi ɛ́lɛ́ se: «Yee ɛyʋ ɛkpaɣ hakuu se ɛhayɩɣ nɛ eyele ɛnɩɣnɩ lɛɛbʋ yɔ, ɛtamʋna Ɛsɔ Kewiyaɣ taa tʋmlaɖʋ.»

Currently Selected:

Luka 9: KABI

Highlight

Copy