Luka 8

Tiyiyaa hiu nɛ naalɛ nɛ halaa nabɛyɛ sɩɣ Yesu

1Pʋwayɩ lɛ, Yesu cɔɔ tɛtʋ sɔsɔtʋ nɛ cikpetu pa-taa nɛ esusuu Ɛsɔ Kewiyaɣ Laŋhɛzɩyɛ Tɔm. Alɩwaatʋ ńdʋ́ lɛ, ɛ-tɔmkpɛlɩkɩyaa hiu nɛ naalɛ 2nɛ halaa mbá ɛɛlɩzɩ-wɛ aleewaa nesi taa nɛ ɛla nɛ pa-kʋdɔmɩŋ cɛ yɔ pasɩɣaɣ-ɩ. Halaa ḿbá yɔ: Maarɩɩ weyi payaɣ se Magdala tʋ nɛ ɛɛɖɔɔnɩ aleewaa lʋbɛ ɛ-wayɩ yɔ 3nɛ Cuuza weyi ɛkɛ Eroodi ɖɩɣa yɔɔ cɔnɩyʋ yɔ ɛ-halʋ Yoana nɛ Sʋzaana nɛ halaa lɛlaa sakɩyɛ mbá pakpakaɣ pa-ñɩm nɛ pasɩŋnɩ Yesu nɛ ɛ-tɔmkpɛlɩkɩyaa yɔ.

Đuyu eduuye

(Mat 13.1-9; Mrk 4.1-9)

4Ɛyáa sakɩyɛ lɩɣaɣnɩ tɛtʋ ndɩ ndɩ taa nɛ powoki Yesu cɔlɔ. Pekpeɣlaa lɛ, etuu-wɛ eduuye se: 5«Abalʋ nɔɔyʋ wɛnɩ ḿbʋ́ nɛ ewolo tɔɔnaɣ pee mɩzʋʋ ɛ-hayɩm taa. Ɛmɩzaɣ lɛ, lɛɛna tɔlɩ nʋmɔʋ nɔɔ nɛ pɛfɛyɩ-yɛ nɛ sumasɩ tii sɩtɔɔ-yɛ. 6Lɛɛna ñɔtɔlɩ ɛwaɣ yɔɔ nɛ alɛ ñɔ nɛ awɩlɩ, mbʋ́ pʋyɔɔ yɔ, niŋkaɣ fɛyɩ. 7Lɛɛna tɔlɩ kpaŋsɔɔ taa nɛ añɔ ɛzɩ aakpa camɩyɛ lɛ, kpaŋsɔɔ lɛɣtɩ. 8Pee lɛɛna ñɔtɔlɩ tɛtʋ kɩbandʋ taa, alɛ ñɔ nɛ apaɣlɩ tɩŋ nɛ paa ŋgʋ́ kʋlʋlɩ pee mɩnʋʋ.» Yesu tɛm-wɛ tuuu eduuye lɛ, eholini-wɛ se: «Weyi ɛwɛnɩ nɩŋgbaaŋ lɛ, ɛnɩɩ.»

Ɛbɛ laba nɛ Yesu tuki aduwa?

(Mat 13.10-17; Mrk 4.10-12)

9Pʋwayɩ lɛ, ɛ-tɔmkpɛlɩkɩyaa pɔzɩ-ɩ se ɛlɩzɩ-wɛ ɖomaɣ eduuye ńɖɩ́ ɖɩ-tɔbʋʋ. 10Peeɖe ecosi-wɛ se: «Ɛsɔ Kewiyaɣ tɔm wɛ mɛsaɣ tɛɛ. Ɛlɛ́ mɩ lɛ, ɛha-mɩ lɛɣtʋ se ɩnɩɩ tɩ-tɔbʋʋ. Piyele lɛlaa yɔ, panɩɣ-tʋ lɛ, tɩkɛnɩ-wɛ aduwa. Pɩlakɩ ḿbʋ́ se:

‹Pɔcɔnɩ camɩyɛ, ɛlɛ́, pataana nɛ

pewelesi camɩyɛ, ɛlɛ́, pataanɩɩ pʋ-tɔbʋʋ.› »

Yesu lɩzɩ ɖomaɣ eduuye tɔbʋʋ

(Mat 13.18-23; Mrk 4.13-20)

11Peeɖe Yesu heyi-wɛ se: «Ɩɩnaɣ eduuye ńɖɩ́ ɖɩ-tɔbʋʋ: tɔɔnaɣ pee ana, awɛ ɛzɩ Ɛsɔtɔm yɔ. 12Ɛyáa nabɛyɛ wɛɛ, panɩɣ Ɛsɔtɔm ńdʋ́ lɛ, Satanɩ tɩŋ ɛhɔɔzɩ-tʋ pa-taa se pataakɔɔ petisi nɛ pehiɣ ñʋʋ yabʋ. Ḿbá wɛnɩ ɛzɩ nʋmɔʋ nɔɔ ɖenɖe pee tɔlaa yɔ. 13Mbá paba wɛ ɛzɩ ɛwaɣ ŋgá kɔ-yɔɔ pee tɔlaa yɔ, panɩɣ-tʋ lɛ, petisi kpaagbaa nɛ laŋhʋlʋmɩyɛ. Ɛlɛ́, paayeki se tɩlabɩ-wɛ tʋmɩyɛ camɩyɛ. Pɛwɛɣnɩ lidaʋ tɩ-yɔɔ alɩwaatʋ pazɩ nɛ pʋkɔɔ pɩtakɩɣ-wɛ lɛ, pɔlɔ-kʋ. 14Lɛlaa wɛ ɛzɩ kpaŋsɔɔ taa ɖenɖe pee tɔlaa yɔ. Pɛtɛŋ Ɛsɔtɔm nɩʋ lɛ, lɩmaɣza wena akʋʋ ɛyáa yɔ nɛ ñɩm nɛ kedeŋa yɔɔ wondu sɔɔlʋʋ paɖɩɣ-wɛ nʋmɔʋ nɛ paawɛɣnɩ kɛzɛɣa. 15Lɛlaa ñɛwɛ ɛzɩ tɛtʋ kɩbandʋ ndʋ́ tɩ-taa pee tɔlaa yɔ. Pewelesiɣ Ɛsɔtɔm nɛ hɔyɛ kɩbanɖɛ nɛ pamʋ-tʋ nesi naalɛ nɛ pañaɣ pana pɔɖɔ tɩ-yɔɔ nɛ tɩwɛɛ-wɛ kɛzɛɣa.»

Iwelesi camɩyɛ

(Mrk 4.21-25)

16Pʋwayɩ lɛ, Yesu heyi-wɛ se: «Nɔɔyʋ ɛɛsɔkɩ kanɖʋ nɛ ɛpam-kʋ nabʋyʋ tɛɛ yaa ɛsʋzɩ-kʋ kaɖʋ tɛɛ. Ɛlɛ́, ɛsɩɣ-kʋ ɖenɖe pʋkʋyɩ camɩyɛ ñaba yɔ nɛ pɩna mbá patɩŋa pasʋʋ ɖɩɣa taa yɔ. 17Ḿbʋ́ ɖɔɖɔ mbʋ́ pɩtɩŋa payɩ pʋwɛ ɛyáa mɛsaɣ tɛɛ lɛɛlɛɛyɔ yɔ, pʋkɔŋ pʋ-yɔɔ kuluu nɛ paa weyi ɛna.» 18Pʋ-yɔɔ lɛ, ɩɖɔkɩ mɩ-tɩ camɩyɛ nɛ ɛzɩma mbʋ́ ɩnɩɣ Ɛsɔtɔm yɔ. Mbʋ́ pʋyɔɔ yɔ, pʋwɛ ɛzɩ pɔtɔŋʋʋ se: «Weyi ɛwɛna, pɔsɔzɩ-ɩ nɛ weyi ɛ́lɛ́ fɛyɩna yɔ, halɩ pɛtɛzɩɣ lɛɣʋ mbʋ́ ɛmaɣzɩɣ se ɛwɛna yɔ.»

Yesu cejewiye keekee tɔm

(Mat 12.46-50; Mrk 3.31-35)

19Pʋwayɩ lɛ, Yesu newaa nɛ e-ɖoo powolo se pana-ɩ. Ɛyáa samaɣ yɔɔ lɛ, patapɩzɩ patalɩ ɛ-cɔlɔ. 20Peeɖe nɔɔyʋ heyi-i se: «Ño-ɖoo nɛ ñe-newaa pɛwɛ awayɩ nɛ pañɩnɩɣ se pana-ŋ.» 21Ɛlɛ́, Yesu heyi mbá pɛwɛ ɛ-cɔlɔ yɔ se: «Mbá panɩɣ Ɛsɔtɔm nɛ pɔɖɔŋ tɩ-yɔɔ yɔ, ḿbá lɛ mon-ɖoonaa nɛ me-newaa.»

Yesu hɛzɩ heɣlim sɔsɔm nabʋyʋ

(Mat 8.23-27; Mrk 4.35-41)

22Nakʋyʋ wiye Yesu nɛ ɛ-tɔmkpɛlɩkɩyaa pakpa kpɩyʋʋ taa. Peeɖe eheyi-wɛ se: «Đɩtɛzɩ teŋgu kidiiliŋ lɛɛkʋ yɔɔ.» Ɛlɛ́, pakʋyɩ se pɛɖɛɣ. 23Pɛwɛ lɩm yɔɔ ḿbʋ́ lɛ, ɖom kpa Yesu nɛ ɛhɛnɩ. Pɩkɛdaa lɛ, heɣlim sɔsɔm nabʋyʋ pazɩ mabʋ nɛ lɩm sʋʋ kpɩyʋʋ taa nɛ pɩcaɣ se pɩlabɩ-wɛ asɛyʋʋ. 24Peeɖe ɛ-tɔmkpɛlɩkɩyaa woba ɛ-cɔlɔ nɛ pefezi-i se: «Wɩlɩyʋ, Wɩlɩyʋ, ɖɩsɩkɩ!»

Ɛlɛ́, Yesu kʋyɩ nɛ eholini heɣlim nɛ lɩm nɛ pɩtɩŋa pɩhɛɛ kpaagbaa niɣ niɣ 25nɛ ɛpɔzɩ ɛ-tɔmkpɛlɩkɩyaa se: «Lidaʋ ŋgʋ́ ɩwɛnɩ mɔ-yɔɔ yɔ, kɩwɛ le?»

Peeɖe payɩɣyɩ-ɩ nɛ sɔɔndʋ kpa-wɛ nɛ pɔpɔzʋʋ pa-tɩ se: «Ɛbɛ ɛnɛ ɛkɛnaa kpem? Halɩ ɛkalɩɣ heɣlim nɛ lɩm nɛ pɩñaŋ-ɩ!»

Yesu ɖɔɔnɩ aleewaa abalʋ nɔɔyʋ wayɩ

(Mat 8.28-34; Mrk 5.1-20)

26Pʋwayɩ lɛ, patalɩnɩ pa-kpɩyʋʋ Geraazaa ɛjaɖɛ taa. Đɩwɛ teŋgu kidiiliŋ lɛɛkʋ yɔɔ nɛ ɖɩha ɛsɛ nɛ Galilee egeetiye. 27Pasɩŋaa nɛ Yesu tiki lɛ, tɩ-taa abalʋ nɔɔyʋ wolo se ɛkatɩɣ-ɩ. Abalʋ ɛnʋ, aleewaa wɛ ɛ-wayɩ ɖooo lɔŋ nɛ pɔcɔzʋʋ-ɩ. Ɛtaasuu wondu, ɛɛtasɩɣ ɖɩɣa sʋʋ ɖɔɖɔ. Ɛlɛ́, pɩlaŋ taa ɛsʋwaɣ. 28‏-29Pɩɩwɛɛ pʋkʋyʋʋnɩ-ɩ. Pʋkʋyɩnɩ-ɩ lɛ, paa paɖʋ e-nesi nɛ ɛ-naŋgbanzɩ pa-taa yoŋgbasɩ yɔ, ɛpʋʋtʋʋ-sɩ, nɛ eleeu wɛɛ nɛ ɛsʋzʋʋ-ɩ ñɩtʋ. Abalʋ ɛnʋ ɛtalɩ Yesu cɔlɔ lɛ, ɛma kubuka nɛ eluŋ ɛ-tɛɛ nɛ ɛyɔɔdɩ ɖoŋ se: «Ɛsɔ Caabiyuu Pɩyalʋ Yesu, ma nɛ ŋ se we? Mentendiɣ-ŋ se ŋtaaɖʋ-m kʋñɔŋ.» Ɛyɔɔdɩ ḿbʋ́, mbʋ́ pʋyɔɔ yɔ, Yesu holini aleewaa ḿbá se pese ɛ-wayɩ. 30Peeɖe Yesu pɔzɩ abalʋ ɛnʋ se: «Payaɣ-ŋ se we?» Ecosi se payaɣ-m se: «You Laɖaa Tikaɣ.» Toovenim taa lɛ, aleewaa sakɩyɛ kɛwɛnɩ ɛ-wayɩ. 31Ɛlɛ́, aleewaa ḿbá petendi-i se ɛtaaɖɔɔnɩ-wɛ se powolo ɖenɖe kʋñɔŋ wɛɛ yɔ.

32Afanaa tikaɣ sɔsɔɔ nakɛyɛ kɛwɛ peeɖe pʋʋ yɔɔ nɛ kacazɩɣ tɔɔnaɣ. Ɛlɛ́, aleewaa tendi Yesu se ɛha-wɛ nʋmɔʋ nɛ pasʋʋ afanaa ḿbá pa-taa. Peeɖe etisaa 33nɛ aleewaa ḿbá pese abalʋ ɛnʋ ɛ-wayɩ nɛ powolo pasʋʋ pa-taa. Ɛlɛ́, pakpaɣ seya nɛ pʋʋ yɔɔ nɛ petii pafalɩ teŋgu taa nɛ pɔñɔɔ lɩm nɛ pasɩ patɩŋa.

34Ɛyáa mbá pɔcɔŋaɣnɩ afanaa ḿbá pɔ-yɔɔ yɔ, pana mbʋ́ pɩlaba yɔ lɛ, pese nɛ powolo peheyi tɛtʋ sɔsɔtʋ taa ɛyáa nɛ haɖaa cikpema taa ñɩma. 35Peeɖe ɛyáa kʋyaa nɛ powolo se pana mbʋ́ pɩlaba yɔ. Powobi Yesu cɔlɔ lɛ, pamaɣnɩ abalʋ weyi aleewaa kɛwɛ ɛ-wayɩ yɔ. Ɛ-kpaaŋ cɛba nɛ esuu wondu kɩbandʋ nɛ ɛcaɣ Yesu naŋgbanzɩ tɛɛ. Ɛlɛ́, sɔɔndʋ kpa-wɛ. 36Mbá paawɛɛ nɛ pana mbʋ́ pɩtɩŋa payɩ pɩlaba yɔ, pɛkɛdɩ mbá pɔkɔma yɔ ɛzɩma mbʋ́ pɩlaba nɛ ɛ-yɔɔ cɛ yɔ. 37Ɛlɛ́, Geraazaa ñɩma tɩŋa tendi Yesu se ɛkʋyɩ pɛ-tɛ. Mbʋ́ pʋyɔɔ yɔ, sɔɔndʋ kpa-wɛ pɩŋŋ. Pʋ-yɔɔ ɛkpa kpɩyʋʋ taa se ɛɖɛɣ. 38Peeɖe abalʋ weyi aleewaa se ɛ-wayɩ yɔ etendi-i se ɛtɩŋɩɣ-ɩ nɛ ɛwɛɛ ɛ-cɔlɔ. Ɛlɛ́, Yesu kizi nɛ eheyi-i se: 39«Pɩsɩ ña-ñɩma cɔlɔ nɛ ŋheyi-wɛ mbʋ́ pɩtɩŋa Ɛsɔ labɩ-ŋ yɔ.»

Abalʋ ɛnʋ, ɛcaŋ ɛɖɛɛ nɛ eheyi ɛ-tɛtʋ taa ñɩma tɩŋa payɩ mbʋ́ pɩtɩŋa Yesu labɩ-ɩ yɔ.

Yesu wazɩ halʋ nɔɔyʋ ɛ-kʋdɔŋ nɛ efezi halɩbɩɣa nakɛyɛ nɛ sɩm taa

(Mat 9.18-26; Mrk 5.21-43)

40Pʋwayɩ lɛ, Yesu lɩɩnɩ teŋgu kidiiliŋ lɛɛkʋ yɔɔ nɛ ɛpɩsɩ. Ɛtalaa lɛ, ɛyáa samaɣ mʋ-ɩ ɖeu, mbʋ́ pʋyɔɔ yɔ, patɩŋa paaɖaŋ-ɩ. 41Pɩkɛdaa lɛ, Ɛsɔ ɖɩsɛyɛ naɖɩyɛ taa ñʋʋdʋ sɔsɔ weyi payaɣ se Yayiruusi yɔ, ɛtalɩ eluŋ Yesu tɛɛ nɛ ewini-i se ewolo ɛ-tɛ. 42Mbʋ́ pʋyɔɔ yɔ, ɛ-pɩɣa peliɣa caɣ sɩbʋ. Ŋgʋ́, ke-ɖeke koŋ ɛwɛna. Kɛwɛnɩ ɛzɩ pɩnzɩ hiu nɛ naalɛ yɔ.

Yesu kʋyaa se ewoki lɛ, ɛyáa samaɣ ñɩkɩɣ-ɩ cenje. 43Halʋ nɔɔyʋ kɛwɛ pa-taa peeɖe ɖɔɖɔ. Calɩm kɛwɛɛ pikpeŋni-i nɛ pɩcɛyɩɣ-ɩ pɩŋŋ pɩnzɩ hiu nɛ naalɛ yɔ. Halʋ ɛnʋ, e-liidiye tɩŋa tɛmnɩ fɛɖaa tɛ. Ɛlɛ́, nɔɔyʋ tapɩzɩ ɛla nɛ ɛ-yɔɔ cɛ. 44Peeɖe ewobi Yesu cɔlɔ nɛ etukuni e-toko nɔɔ nɛ ɛ-wayɩ nɛ calɩm mbʋ́ pikpeŋaɣnɩ-ɩ yɔ pɩsɩŋ kpaagbaa. 45Ɛlɛ́, Yesu pɔzɩ ɛyáa se: «Atukuni-m?» Patɩŋa pɛkpɛzɩ se patana nɛ Pɩyɛ pɔzɩ-ɩ se: «Wɩlɩyʋ! Ɛyáa samaɣ ñɩkɩɣ-ŋ nɛ ŋtasɩɣ pɔzʋʋ se atukuni-ŋ?» 46Yesu pɩsɩnɩ-ɩ se: «Paa ḿbʋ́ yɔ, nɔɔyʋ tukuni-m. Mbʋ́ pʋyɔɔ yɔ, manɩ ɖoŋ nɩɩyɩ lɩ mɔ-yɔɔ.» 47Peeɖe halʋ ɛnʋ ɛnawa se pʋtʋlʋʋ ɛ-yɔɔ, nɛ ewolo eluŋ Yesu tɛɛ nɛ eseliɣ yem kpa kpa kpa nɛ ɛkɛdɩ-ɩ ɛyáa tɩŋa ɛsɩndaa mbʋ́ pʋ-yɔɔ etukuni-i yɔ nɛ ɛzɩma mbʋ́ ɛ-yɔɔ tɩcɛba yɔ. 48Peeɖe Yesu heyi-i se: «Mɛn-pɛlɛ! Lidaʋ ŋgʋ́ ŋwɛnɩ mɔ-yɔɔ yɔ, kɩyabɩ ña-ñʋʋ. Kpemni laŋhɛzɩyɛ.»

49Ɛyɔɔdaɣ ḿbʋ́ lɛ, petiyi nɔɔyʋ nɛ Yayiruusi ɛnʋ ɛ-tɛ se ewolo eheyi-i se: «Taaɖʋ ɖa-wɩlɩyʋ kʋñɔŋ yem, ña-pɩɣa peliɣa tɛm sɩbʋ.» 50Yesu nɩ ḿbʋ́ lɛ, eheyi Yayiruusi se: «Ña-laŋɩyɛ ɛtaamaa, ñɩtɩ ŋwɛnɩ lidaʋ, ña-pɩɣa ŋ́gá kɔ-yɔɔ cɛkɩ.» 51Patalɩ Yayiruusi tɛ lɛ, Yesu yaa Pɩyɛ nɛ Yohanɛɛsɩ nɛ Yakubu nɛ pɩɣa ŋ́gá ka-caa nɛ ko-ɖoo nɛ pasʋʋ kuduyuu tɛɛ. Ɛlɛ́, ekizi se lɛlaa ɛtaasʋʋ. 52Ɛyáa tɩŋa wilaɣ nɛ patɩmɩɣ. Ɛlɛ́, Yesu heyi-wɛ se: «Ɩtaawii! Pɩɣa ŋ́gá, koɖou kuɖou, katɩsɩ kɩsɩbʋ.» 53Ɛlɛ́, powoŋ-i, mbʋ́ pʋyɔɔ yɔ, pɛtɛm naʋ se pɩɣa ŋ́gá kasɩba. 54Peeɖe Yesu woba ɛ́ɖɔ́kɩ ke-nesi taa nɛ eholi ɖoŋ se: «Pɩɣa ña, kʋyɩ!» 55Kpaagbaa ḿbʋ́ lɛ, ke-fezuu kpa nɛ kakʋyɩ. Pʋwayɩ lɛ, Yesu heyi-wɛ se paha-kɛ tɔɔnaɣ nɛ kɔtɔɔ. 56Peeɖe pɩɖɩɣzɩ ka-ñɩma pɩŋŋ. Ɛlɛ́, ɛpaɣ-wɛ se pataaheyi-tʋ nɔɔyʋ.

Currently Selected:

Luka 8: KABI

Highlight

Copy