Luka 7

Yesu laba nɛ Room sɔɔja sɔsɔ nɔɔyʋ tʋmlaɖʋ yɔɔ cɛ

(Mat 8.5-13)

1Yesu tɛm tɔm ńdʋ́ tɩtɩŋa yɔɔdʋʋ lɛ, ɛkʋyɩ ewolo Kapɛrnayum. 2Room sɔɔja sɔsɔ nɔɔyʋ kɛwɛ peeɖe. Ɛɛwɛnɩ tʋmlaɖʋ nɛ ɛ-tɔm kɛdɩnɩ-ɩ pɩŋŋ. Tʋmlaɖʋ ɛnʋ, pɩwɩɣaɣ-ɩ sɩbʋ yɔɔ sɩbʋ yɔɔ. 3Ŋgʋ́, sɔɔja sɔsɔ ɛnʋ, ɛɛnɩ pɔyɔɔdɩ Yesu tɔm se ɛlakɩ nɛ kʋdɔndɩnaa yɔɔ cɛkɩ. Pʋ-yɔɔ etiyi Yuda ñɩma sɔsaa nabɛyɛ ɛ-cɔlɔ se pewini-i nɛ ɛkɔɔ ɛya ɛ-tʋmlaɖʋ ñʋʋ. 4Powoba lɛ, pewini-i cɔɔɔ se: «Abalʋ ɛnʋ ɛmʋnaa se ŋsɩnɩ-ɩ. 5Mbʋ́ pʋyɔɔ yɔ, ɛsɔɔlɩ Yuda ñɩma ɖa nɛ ɛma-ɖʋ Ɛsɔ ɖɩsɛyɛ.» 6Peeɖe Yesu tɩŋ-wɛ nɛ ɛ nɛ wɛ pɛɖɛɛ. Pɔñɔtɩnɩ ɖɩɣa lɛ, sɔɔja ɛnʋ etiyi ɛ-taabalaa se peheyi Yesu se: «Kɩpaɣlʋ, taakʋ ña-tɩ yem, mantamʋna se ŋsʋʋ man-ɖɩɣa taa. 7Ḿbʋ́ labɩna nɛ mantatalɩ man-tɩ tɩŋa ñɔ-cɔlɔ. Pʋ-yɔɔ lɛ, ha nɔɔ nɛ man-tʋmlaɖʋ yɔɔ cɛ. 8Mbʋ́ pʋyɔɔ yɔ, ma lɛ, ma-ñʋʋ yɔɔ ñɩma wɛɛ nɛ mañaŋ-wɛ, mɛn-tɛɛ ñɩma wɛɛ ɖɔɖɔ. Meheyi pa-taa nɔɔyʋ se ewolo peeɖe yɔ yɔ, ewoki. Maya nɔɔyʋ se ɛkɔɔ yɔ, ɛkɔŋ. Meheyi man-tʋmlaɖʋ se ɛla nabʋyʋ yɔ, ɛ́lɛ́ ñalakɩ-pʋ.» 9Powoba nɛ peheyi Yesu ḿbʋ́ lɛ, ɛyɩɣyɩ sɔɔja sɔsɔ ɛnʋ nɛ ɛkɛzɩ ɛ-tɩ nɛ ɛyáa samaɣ ŋgá katɩŋaɣ-ɩ yɔ kɔ-yɔɔ nɛ ɛtɔ se: «Mankaɖɩɣ-mɩ se paa Izrɛɛlɩ ñɩma taa maɣmaɣ, mantanada weyi ɛwɛnɩ lidaʋ nɛ pɩtalɩ-ɩ yɔ.» 10Sɔɔja ɛnʋ e-tiyiyaa pɩsɩ ɖɩɣa lɛ, pamaɣnɩ ɛ-tʋmlaɖʋ ɛnʋ ɛ-yɔɔ cɛba.

Lelu nɔɔyʋ pɩyalʋ sɩba nɛ Yesu fezi-i

11Tɛʋ fema lɛ, Yesu kʋyɩ se ewoki tɛtʋ ndʋ́ payaɣ se Nayɩnɩ yɔ tɩ-taa. Ewokaɣ lɛ, ɛ-tɔmkpɛlɩkɩyaa nɛ ɛyáa samaɣ sɔsɔɔ nakɛyɛ patɩŋɩɣ ɛ-wayɩ. 12Pɔñɔtɩnɩ-tʋ lɛ, pakatɩ ɛyáa samaɣ nakɛyɛ, kowokaɣnɩ sɩɖʋ nɔɔyʋ pim, ɛɛkɛ lelu nɔɔyʋ pɩɣa ɛgbamɩyɛ. 13Kɩpaɣlʋ na lelu ɛnʋ lɛ, pɩlabɩ-ɩ pʋtɔdɩyɛ nɛ eheyi-i se: «Taawii!» 14Peeɖe Yesu woba etukuni sɩɖʋ kpataya nɛ sɩɣlɩyaa sɩŋ nɛ ɛtɔ se: «Evebu ña! Meheyiɣ-ŋ se ŋkʋyɩ!» 15Ɛlɛ́, ɛkʋyɩ ɛcaɣ nɛ ɛpazɩ yɔɔdʋʋ nɛ Yesu cɛlɩ-ɩ e-ɖoo. 16Peeɖe sɔɔndʋ kpa patɩŋa nɛ pasaŋ Ɛsɔ nɛ pɔtɔŋ se: «Náyʋ sɔsɔ nɔɔyʋ kɔm ɖɛ-hɛkʋ taa, Ɛsɔ kɔm ɛlɩzɩ ɛ-ɛyáa pɩ-taa.» 17Mbʋ́ Yesu laba yɔ, pʋ-tɔm cɔɔ Yudee egeetiye tɩŋa taa nɛ ɖɩ-cɔlɔ hɔɔlɩŋ tɩŋa taa payɩ.

Lɩm Sɔʋ Sɔnzɩ Laɖʋ Yohanɛɛsɩ tɔm pɔzʋʋ

(Mat 11.2-19)

18Lɩm Sɔʋ Sɔnzɩ Laɖʋ Yohanɛɛsɩ tɔmkpɛlɩkɩyaa nɩ mbʋ́ pɩtɩŋa payɩ Kɩpaɣlʋ lakaɣ yɔ nɛ powolo peheyi pa-caa. Peeɖe ɛya pa-taa naalɛ. 19Etiyi-wɛ Kɩpaɣlʋ cɔlɔ se pɔpɔzɩ-ɩ se: «Ña lɛ Ñʋʋ Yaɖʋ weyi paayɔɔdɩ ɛ-tɔm se ɛkaɣ kɔm yɔ, yaa nɔɔyʋ wɛnɩ wayɩ?» 20Patalɩ Yesu cɔlɔ lɛ, peheyi-i se: «Lɩm Sɔʋ Sɔnzɩ Laɖʋ Yohanɛɛsɩ tiyi-ɖʋ se ɖɩkɔɔ ɖɩpɔzɩ-ŋ nɛ ɖɩna se ña lɛ weyi ɛ-tɔm paayɔɔdaa se ɛkaɣ kɔm yɔ yaa nɔɔyʋ wɛnɩ wayɩ?» 21Ŋgʋ́, alɩwaatʋ ńdʋ́ tɩ-yɔɔ ɖeyi ɖeyi Yesu laba nɛ ɛyáa sakɩyɛ kʋdɔmɩŋ ndɩ ndɩ cɛ nɛ ɛɖɔɔnɩ aleewaa nɛ ekuli yʋlʋmaa sakɩyɛ ɛsɛ. 22Pʋwayɩ lɛ, ecosi-wɛ se: «Iwolo iheyi-i mbʋ́ ɩnawa nɛ ndʋ́ ɩnɩwa yɔ: yʋlʋmaa naɣ nɛ tala tɩnaa ɖɔŋ camɩyɛ nɛ canasɩ yɔɔ cɛkɩ nɛ ndamaa nɩɣ nɛ sɩɖaa feŋ, posusuu kʋñɔndɩnaa Laŋhɛzɩyɛ Tɔm. 23Weyi eekiziɣ mɔn-tɔm yɔ, ehiɣ ɛ-tɩ.»

Yesu yɔɔdʋʋ Lɩm Sɔʋ Sɔnzɩ Laɖʋ Yohanɛɛsɩ tɔm

24Peeɖe Yohanɛɛsɩ tɔmkpɛlɩkɩyaa ḿbá pɛɖɛwa nɛ Yesu pazɩ ɛyáa samaɣ kɛdʋʋ Yohanɛɛsɩ ɛnʋ ɛ-tɔm nɛ ɛpɔzɩ-wɛ se: «Ɛbɛ iwobi naʋ lakʋ taa? Kañɩŋ́gbayaɣ́ ŋgá heɣlim ciɣdaɣ yɔ yaa we? Mantasa. 25Ɛlɛ́, ɛbɛ iwobi naʋ kpem? Nɔɔyʋ suni wondu kɩbandʋ nɛ ɛwɛɛ peeɖe naa we? Ŋgʋ́, mbá posuu ñɩɣlɩ́m wondu nɛ pɛwɛnɩ pɩtɩŋa yɔ, pɛwɛɣ awiya ɖɩsɩ taa. 26Ɛbɛ kpem iiwobi naʋ? Náyʋ nɔɔyʋ yaa we? Toovenim lɛ, meheyiɣ-mɩ se ɩna weyi yɔ, ɛkɩlɩ náyʋ. 27Yohanɛɛsɩ ɛnʋ, ɛ-tɔm Ɛsɔ yɔɔdaa nɛ pama ɛ-Takayaɣ taa se:

‹Na! Mancalɩɣ men-tiyiyu tiyuu nɛ

ɛñɔɔzɩ ña-nʋmɔʋ.› »

28Yesu tasɩ yɔɔdʋʋ se: «Mankaɖɩɣ-mɩ se ɖooo yɔ, patalʋlɩdɩ nɔɔyʋ nɛ ɛkɩlɩ Yohanɛɛsɩ ɛnʋ. Paa ḿbʋ́ yɔ, weyi ɛwɛ Ɛsɔ Kewiyaɣ taa nɛ patakpaɣ-ɩ payaa pʋyʋ yɔ, ɛ́lɛ́ kɩlɩ-ɩ. 29Izrɛɛlɩ ɛjaɖɛ taa ɛyáa tɩŋa welesaɣ Yohanɛɛsɩ tɔm, halɩ pɩkpɛndɩnɩ tikee mʋyaa maɣmaɣ. Pʋ-yɔɔ petisaa nɛ palabɩ-wɛ lɩm sɔʋ sɔnzɩ. Palabɩ ḿbʋ́ nɛ pɩwɩlɩ se Ɛsɔ tʋʋzaa. 30Ɛlɛ́, Farɩsɩ ñɩma nɛ paɣtʋ wɩlɩyaa pekizi se ɛtaalabɩ-wɛ-sɩ. Ḿbʋ́ pawɩlɩnaa se pekizi mbʋ́ Ɛsɔ ñɩnaɣnɩ-wɛ yɔ.» 31Yesu tasɩ yɔɔdʋʋ ɖɔɖɔ se: «Ɛbɛ mɛnkɛdɩɣnɩ pɩtɛ ɛyáa ḿbá lee? Ɛzɩma pɛwɛɛ? 32Pɛwɛ ɛzɩ piya nzɩ́ sɩcaɣ ɛyáa samaɣ ɖikpeɣliye nɛ sikou ɖama yɔɔ se: ‹Đɩhʋlɩ-mɩ hɩsɩ se ɩpaa nɛ ikizi. Đitee kʋñɔŋ hendu nɛ itewii.› 33Ḿbʋ́ pʋwɛɛ: ‹Lɩm Sɔʋ Sɔnzɩ Laɖʋ Yohanɛɛsɩ kɔma, ɛɛtɔkɩ tɔɔnaɣ, ɛɛñɔʋ sʋlʋm. Ɛlɛ́, ɩtɔŋ se ekem aleewaa.› 34Piyele Ɛyʋ Pɩyalʋ ñɔkɔma nɛ ɛtɔkɩ nɛ ɛñɔʋ lɛ, ɩɖaɣnɩɣ yɔɔdʋʋ se: ‹Ɩnaɣʋ ɛyʋ ɛnɛ yɔ, tɔkɩyɛ nɛ ñɔtʋ pɔ-yɔɔ ɖeke ɛmaɣzɩɣ. Ɛkɛ ɖɔɖɔ tikee mʋyaa nɛ kɩwɛɛkɩm laɖaa lɛlaa pa-taabalʋ.› 35Ɛlɛ́, mbá patɩŋa palakɩ mbʋ́ Ɛsɔ liu wɛɛ yɔ, pa-lakasɩ wɩlɩɣnɩ se Ɛsɔ ɛnʋ, ɛwɛnɩ lɔŋ siŋŋ.»

Yesu woba Siimɔɔ Farɩsɩ tʋ tɛ

36Nakʋyʋ wiye Farɩsɩ tʋ nɔɔyʋ ya Yesu se ewolo ɛ-tɛ nɛ pɔtɔɔ tɔɔnaɣ. Ɛlɛ́, Yesu wolo nɛ ɛcaɣ tɔɔnaɣ ɖɩtɔɔyɛ. 37Halʋ kɩwɛɛkɩm laɖʋ nɔɔyʋ kɛwɛ tɛtʋ ńdʋ́ tɩ-taa nɛ ɛnɩɩ ḿbʋ́. Peeɖe ɛkpaɣ tɩlaaɖɩ fiɣa kɩñɩlɩsaɣ nakɛyɛ taa ɖo 38nɛ ewolo ɛsɩŋ nɛ wayɩ Yesu naŋgbanzɩ#5.37 Pɛŋ: ɩcɔnɩ Mrk 2.22. cɔlɔ nɛ ewiɣ nɛ ɛ-ɛsɩtɛɣlɩm kpeŋ sɩ-yɔɔ. Pikpema lɛ, ɛhɛzɩ-pʋ nɛ ɛ-ñɔsɩ nɛ ɛkpa-sɩ, nɛ pɩwɩlɩ se ɛñam-ɩ nɛ ɛpɩyɩ sɩ-yɔɔ tɩlaaɖɩ. 39Farɩsɩ tʋ weyi ɛya Yesu yɔ, ɛna ḿbʋ́ lɛ, ɛmaɣzɩ ɛ-taa se: «Yee abalʋ ɛnɛ ɛɛkɛ náyʋ yɔ, ɛɛsɩm halʋ weyi etukuuni-i ḿbʋ́ yɔ nɛ ɛzɩma mbʋ́ ɛ-wɛtʋ wɛɛ yɔ: ɛkɛ kɩwɛɛkɩm laɖʋ.» 40Ɛlɛ́, Yesu heyi Farɩsɩ tʋ ɛnʋ se: «Siimɔɔ! Mɛwɛnɩ tɔm natʋyʋ se meheyiɣ-ŋ.» Siimɔɔ cosi-i se: «Wɩlɩyʋ! Yɔɔdɩ.» 41Peeɖe Yesu kɛdɩ-ɩ se: «Abalʋ nɔɔyʋ kɛwɛnɩ kɩndɩyaa naalɛ nabɛyɛ: kajalaɣ tʋ kɩndɩ liidiye pɔɔyɩsɩ taŋga nɛ lɛlʋ pɔɔyɩsɩ nɩɩnʋwa. 42Pa-taa nɔɔyʋ tapɩzɩɣ se ɛhɛyɩ-ɩ nɛ ɛtɛzɩ pa-naalɛ kpeɣu se pataatasɩ-ɩ hɛyʋʋ. Pa-naalɛ pa-taa lɛ, akɩlɩɣ-ɩ sɔɔlʋʋ?» 43Peeɖe Siimɔɔ cosi-i se: «Mamaɣzɩɣ se weyi ɛ-kɩmɩyɛ kɩlɩ paɣlʋʋ yɔ.» Ɛlɛ́, Yesu heyi-i se: «Ŋwɛnɩ toovenim.» 44Pʋwayɩ lɛ, ɛkɛzɩ ɛ-tɩ nɛ halʋ ɛnʋ ɛ-yɔɔ nɛ eheyi Siimɔɔ se: «Ŋnaɣ halʋ ɛnɛ? Mansʋʋ ña-ɖɩɣa taa cɩnɛ yɔ, ŋtaha-m lɩm se pɔkɔ ma-naŋgbanzɩ. Ɛlɛ́, halʋ ɛnɛ ɛ́lɛ́ kɔ ma-naŋgbanzɩ nɛ ɛ-ɛsɩtɛɣlɩm nɛ ɛhɛzɩ sɩ-yɔɔ nɛ ɛ-ñɔsɩ. 45Mɔnkɔm ñɛ-tɛ yɔ, ŋtamʋ-m nɛ ŋsɛ-m ɛzɩ pʋpɔzʋʋ yɔ. Ɛlɛ́, halʋ ɛnɛ ɛ́lɛ́ mʋ-m nɛ halɩ ɛwɛɛ ɛkpaɣ ma-naŋgbanzɩ. 46Ŋtataa ma-ñʋʋ taa sɔzɩŋ num. Ɛlɛ́, halʋ ɛnɛ ɛ́lɛ́ pɩyɩ ma-naŋgbanzɩ yɔɔ tɩlaaɖɩ. 47Pʋ-yɔɔ mankaɖɩɣ-ŋ se sɔɔlɩm sɔsɔm tʋmɩyɛ nɖɩ́ ɛlaba yɔ, ɖɩwɩlɩɣ se pɛtɛm-ɩ kpeɣu ɛ-kɩwɛɛkɩm sakɩyɛ mbʋ́ ɛlaba yɔ. Ɛlɛ́, weyi pekpeɣiɣ-i kɩwɛɛkɩm pazɩ yɔ, ɛwɛɣnɩ sɔɔlɩm pazɩ.» 48Peeɖe Yesu heyi halʋ ɛnʋ se: «Menkpeɣ-ŋ ña-kɩwɛɛkɩm.» 49Ɛlɛ́, ɛ nɛ mbá paawɛ ɖɩtɔɔyɛ yɔ, pamaɣzɩɣ pa-taa se: «Anɩ lɛ ɛnɛ nɛ ɛkatɩ nɛ ɛtɔŋ se ekpeɣ kɩwɛɛkɩm?» 50Ɛlɛ́, Yesu heyi halʋ ɛnʋ se: «Lidaʋ ŋgʋ́ ŋwɛna yɔ, kɩyabɩ ña-ñʋʋ. Kpemni laŋhɛzɩyɛ.»

Currently Selected:

Luka 7: KABI

Highlight

Copy