1 KORINTENA 10
10
Ligi ŋali hiɗi fuliyana
Heb 3:7-19
1May ɓosiyonna, nan min kay nigi ma wi ala sumiyay sa ɓa-ɓana jik gaa kuɗ ɗugulla, nisi kaf raw hay niy-ŋolla. 2Nisi kaf fi baptisma kuɗ Musus hay ɗugulla, hay niy-lum ŋolla kaw. 3Nisi kafe ti tina vi ŋusta na'ta kepe. 4Nisi kafe ci cina vi ŋusta na'ta kepe. Kay nisi ci kuɗ hiɗiyna vi ŋusta ma ka tap kuɗsiya. Hiɗiy namna kayni mi Kristu.#10:4 Ɗuw kayni hay Kg 13:21; 14:22. 5hiɗi kayn kafe segen ŋolo jarsiya may kir Lawn ŋaaɗi, kay nisi mit goy hay fulda.
6May slen kayni li'e kay ɗekay naya, kay nay ma li hiɗi darta joota ki nisi li naɗi. 7Vigi kuɗ lawayn ma waana ki segen jarsi vi kuɗum naɗi. Ki ɗot ɗo'ay kisi nala ala: Sumuna lakay gaa'a kay ti'e, kay ci'e kaw, bugolda nisi yaway kulo'o kay liwa.#10:7 Ɗuw hay Kg 32:6. 8Kal tuway hay zlata-buloɗi, ki segen jarsiya kal tuwsi hay zlata-bulota nala, hay fat kep ɦawa sumun mit kuɗsi birim dok-ma' yam ɦidi.#10:8 ɗuw hay Ŋɓ 14:37; 25:1-9. 9Nemay Bum-Sumunɗi, ki segena jarsi nemem nala kaw, guyna vatsi goyo. 10Ŋurnaygiɗi kaw, ki segen jarsi nala ŋurnaya, ma ci sumuna vatsi goyo.
11Slen kayni li'e kay vul ɗekka tisiya, nam ɗoya kay vul gatta tay naya, nay sa liyn ma cawna coowa kaya. 12Kay na'ta la sa var ala nam ka coli kulo'o, nam ma li ŋali kay hin tuwam nig gaaɗi. 13Nemda ta suw donota vi sana bay co kigi tuwa noŋo, Lawn ma gasina min hin nemda co kigiya suw donota vigiɗi, may hiɗi nemda nam ma vulgi donota kay nigi ma kal goyo, kay nigi ma ziya'a.
Hot kay ɗifinna vi lawayn ma waana
2 Kor 6:14-18; Rom 14:13-23
14Kay na'ta sa hayan kigina, pirgi kay ɗifinna vi lawayn waana. 15Nan ka law tigiya ki tam sum sa ka hiɗi yamda-wida nala. Nigi kay tuwgi asay kay poŋ ir sle ma nan ka dumna. 16Kaway-ma-cina vi bolda ma nay ka gi bol kalamna kayni may mi tapta-kepta hay busuw Kristuɗi su? Fun ma nay ka ɓurawamna kayni may mi tapta-kepta hay tuw Kristuɗi su? 17Kay fun ka kepe, la nay ka ŋolo kaw tuway mi kepe, kay nay kafe yaw kuɗ fu ma kepna.
18Ɗuwgi sa Israyella kuɗ sliwna tige. Nisi sa ti ɗifin kuɗ tuwsina, nisi tapay kepe tam giwin-ma-ɗifinna ɗisu? 19Nan fi di mige? Nan di kayn ala ɗifinna vi lawayn ma waana ka'a su? Lebo ala lawayn ma waana kay tuwam ka'a su? mayɗi. 20May nan di ala: ɗifin ma nisi ka lumna, nisi lum kayni tam fuliyana, may tam Lawnɗi. May nan min ala nigi ma tap hiɗi fuliyan ma joonɗi. 21Nigi fi ci kaway-ma-cina vi Bum-Sumuna hiɗi kaway-ma-cina vi Bum-Sumuna hiɗi kaway-ma-cina vi fuliyana kuɗ tuwam kepɗi, nigi fi ti tina vi Bum-Sumuna hiɗi tina vi fuliyan kuɗ tuwam kepɗi kaw. 22Nay min jo vun hunayta vi Bum-Sumuna su? Lebo nay dono suwum namu su?
23Nan fi li slen pet telda may kanɗi, may slen may ŋaa'a petɗi. Nan fi li slen pet telda may kanɗi. May slen may in san kulo kafɗi. 24Hin san gigekaw gar va ma lum ŋaan mi nam kay tuwam tutaɗi, may gigekaw ma garam mi va ma li sugolomna ŋaa'a.
25Mige kaw ma nigi gusumay kuɗ lumuna nigi as kay tumu. Nigi as kay jobom cawam kuɗ tap-widaɗi. 26Kay nagata kayni vi Bum-Sumuna, hiɗi sle ma haya' petna kaw.#10:26 Ɗuw hay Nul 24:1; 50:12; Gsm 10:14.
27La sa ma bay-vina vulgi yita, may nigi coowa talamu, nigi ma ti mige pet ma nam tunum vokgiya, jobom cawamu kuɗ tap-widaɗi.
28May la san digiyawa ala kayni mi ɗifinna, hay na'ta nigi as kay tumɗi, kay nam digi goy jewe. Kuɗ tap-wida kaw. 29Nan di tan kayn kay tap-wida vigi nigiɗi, may tap-wida vi sugolaygina. Kay tap-wida vi sa mara'a ma ka kitat kay va ma nan fi li'e kay mige?
30La nan ti'e hiɗi gi-deɓta, nan as fi ŋulda kuɗ va ma nan tum hiɗi gi-deɓta kay mige?
31La nigi ti kla, ci kla, lum hen mige kla, nigi ma lum pet tam gajijita vi Lawna. 32Va ma dab sem sa Yudiyana lebo dab sem Grekŋa lebo dab sem tapna Kristuna kaf nigi ma lumɗi. 33Ki nan nala kaw, nan muɗ tuwan jifiya hay liyn kaf kir sumun kaf, kay gar ŋaata van nan kay tuwanɗi, may ŋaata vi sum sa ŋolla, kay nisi ma fi su'da.
Currently Selected:
1 KORINTENA 10: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001