1 KORINTENA 9
9
Lawta kay sa Apostolayna vi Yesu
2 Kor 11:7-12; 12:13-15
1Nan sa ma goy butina ɗisu? Nan mi Apostolla ɗisu? Nan may wi Bum-Sumuna vaya Yesu ɗisu? Nigiya mi lopna vanu hay Bum-Sumuna ɗisu? 2La nan mi Apostolla vi segenɗi kaw, nan mi Apostolla vigi nigiya, kay nigiya mi soona vi lop ma Apostolla vanu hay Bum-Sumuna.
3Sum sa di ala nan may mi Apostolɗina nan min hot dit tisi ki kayn nala: 4Va ma telma kay ti'e hiɗi ci'e ka su? 5Numa as vi cata viyta kuɗma'a hay rogoyta, ki Apostolayn segena nala, ki ɓosiyom Bum-Sumuna nala, ki Kefas nala kaw kayni fi liɗi su? 6Lebo, nanu hiɗi Barnabas hagat may kuma kay li lop hiɗi ɓuma' noŋɗi su? 7Sojena ma li lopna vi sojena ma wurak tuwam kay tuwamu ka su? Sa ma pi guna may ti kuɗ vuɗna valamɗin gige? Lebo sa ma vul hat mi luwayna may cum miramɗin mi gige?
8Nan di kayni ki sumun var ɦawa nala su? Gatta kaw may di nala ɗisu? 9Kay ɗot ɗoy hay Gatta vi Musus ala: Hay li ma putna ka to wana, naŋ ma junum vunamɗi.#9:9 Fi kayni hay Gsm 25:4. Nigi var ala Lawn di kayn kay luwayn tuta su? 10Lebo nam di kayni kuma numa tuta su? Awa, kayni ɗoy kuma numa'a. Kay sa ma zum sinena ma zum hiɗi cubta-sle'ta kaw kay nam ma fi galla valam haya. 11La numa was slena vi ŋusta haygiya, a numa feɗ slena vigi ma nagata kayni kalay ŋol su? 12La segen hagat ka kisi kay job slen tigiya, numa asay a job ŋol suwsi nisiɗi su? May numa may li naɗi; numa hayɗin va' tuma'a, kay va ma tel labara ma firina vi Yesu Kristu numa min a lumɗi.
13Nisi sa sun hay tempella fi tina visiya kuɗ tempella, nisi sa sun vun giwin-ma-ɗifinna fi ir ɓurawta visiya vun giwin-ma-ɗifinna kaw, nigi wi kaynɗi su?#9:13 Ɗuw kayni hay Gsm 18:1-3. 14Nala kaw, Bum-Sumuna col gatta ala: nisi sa kus labara ma firina ma ti vunsi kuɗ labara ma firina kaw.
15May nan hayɗin min li slen kaynɗi, nan ɗo tigi kayn ala nigi ma vulan slenaɗi, kay la va namna ma nan subur tuwam kalamna kayni, la sa min muɗum goy waa'a, marya nan mita! 16Kusta vi labara ma firina kay mi va ma nan subur tuwan kalamɗi, kay lalinige kaw nan ma li kayni, kay la nan kus labara ma firinɗi, joot kanu. 17Kay la nan li kayni kuɗ minda van kay tuwan ɗeŋe, wurakŋa van ka'a, may la nan li kayni hiɗi lalinigeta, nam muɗi kan neke. 18La nala wurakŋa vanu mi mige? Wurakŋa van kayni mi labara ma firina ma nan kusum goy ɦawana, bay job galla ma nan as fum kuɗ kusta vi labara ma firina.
19Kay la lawta vi sa may kanɗi kaw, nan muɗ tuwanawa mi ma sunda vi sumun kafe, kay nan as fisi ŋolsiya. 20Tam sa Yudiyana, nan muɗ tuwan ki Yudiyan nala, kay nan ma fi sum sa Yudiyana; tam sa gaa kuɗ vun-ma-gatna, nan muɗ tuwan ki nan ka gaa kuɗ vun-ma-gatna nala, -- may nan kay tuwanu may gaa kuɗ vun-ma-gatnaɗi -- kay fi nisi sa gaa kuɗ vun-ma-gatna. 21Tam nisi sa bay vun-ma-gatna, nan muɗ tuwan ki bay vun-ma-gatna nala, -- may nan may gaa kuɗ vun-ma-gatna vi Lawnɗi, may kuɗ vun-ma-gatna vi Kristu, -- Kay nan min fi nisi sa bay vun-ma-gatna. 22Nan muɗ tuwan maŋaya hiɗi sa maŋayna, kay nan min fi sa maŋayna. Nan li tuwan ŋray ca hiɗi sarige kaw, kay la linigekaw nan ma suɗ sara jarsiya. 23May nan fi li slen pet hay labara ma firina, kay nan ma fi ir ɓurawta van hayamu.
24Nigi wi ala nisi sa yaw jaŋŋa, nisi kaf ka jaŋa, may kepe fi wurakŋa naɗi su? Jaŋgi nala kaw, kay nigi ma fumu. 25Gigekaw ma min ŋafa, nam ma tel tuwamu kay slen kaf, nisi li kayni kay fi bogoray ma vat-goyna. May nay hayɗin fum mi bogoray ma vat-goyɗina. 26Nala, nan ka jaŋa, may kuɗ ɦaytaɗi, nan ka ci kutopoŋo, may jar simeɗna ɦawaɗi. 27Nala nan ka tel tuwan dono'o, vum gaa gorvo'o kaw, kay hay li ma nan kus yoboyna vi Lawna tam segen kusna, nan kay tuwan kaw ma hinis goyɗi.
Currently Selected:
1 KORINTENA 9: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001