1 KORINTENA 8
8
Sliw ma tuwalla sa vi kuɗ Kristu as tum su?
Rom 14:13-23
1May kay ɗifinna vi lawayn ma waana kayni, nay wi ala nay kaf ka hiɗi wida. Wida sli ya' kuloɗi, may ti-kamda in san kulo'o. 2La san var ala nam wi va'a, nam bay wi va hay liyam tuwa noŋo. 3La san min Lawna, namu Lawna wumu.
4May kay ti ɗifinna vi lawayn ma waan kayni, nay wi ala lawayn ma waana kay nagata may noŋɗi, ka kayni mi Lawn ma kepna. 5Kay la sle ma nisi yum ala lawayna ka kaw, la hay wuralawna lebo la hay nagata kaw -- kay lawayna hiɗi sum sa ŋulona ka ŋolo -- 6May naya, nay wi ala Lawn ka kayn kep, mi Bumna ma kot slen petna, nam ma nay ka hay ɓalamna, Bum-Sumuna mi Yesu Kristu kepe kaw, nam ma slen pet lumi hiɗi namna, nay ka kayn kalam namu kaw.
7May sumun kaf may hiɗi wida na'taɗi. Kuɗ na'ta kayni segena ka jun tuwsi dok-dok tam lawayn ma waana, sliw namna nisi tum ki ɗifini nala, kuɗ kayni tap-wida visi ta maŋayta muɗi gese. 8Tina may muɗay ŋaa'a vok Lawnɗi, la nay tiɗi, nay fi ba va kay kaynɗi, la nay ti'e, nay fi va kuɗ kaynɗi kaw.
9May ŋomgi tuwgi ŋaa'a kay bay-telda vigi kayni ma muɗ mi va ma dab sem sa maŋaynɗi. 10Kay la san waŋ naŋ sa ma ka hiɗi wida musi dam hay ziyna vi lawayn ma waana kay ti ɗifinna valamu, tap-wida valam ta maŋayta zutum kay ti ɗifinna vi lawayn ma waanɗi su? 11Ɓasuŋ ma vida valam maŋayna ma Yesu mit kalamna as ba goyo kuɗ wida vaŋu. 12May la nigi li suluk kat ɓosiyogina sa maŋayna ki kayn nala hay li ma nigi ɓulak tap-wida visiya, nigi li suluk kayn kat Kristu. 13Kay na'ta, la va ma tina dab sem ɓasunna, ta-ta hay vatɗita kaw nan as mut sliwnɗi. Kay nan fi li va ma dab sem ɓasunnaɗi.
Currently Selected:
1 KORINTENA 8: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001