1 KORINTENA 7
7
Kay lawta vi slita
Mat 19:3-12; Ct 2:18-25
1Wulini capay tam sle ma nigi ɗon kalamna: ŋaa'a kay sa jufna a nam jo cataɗi. 2May kuɗ lawta vi zlata-bulota, sa jufn marige kaw ma sli ca'a, cat tarige kaw ma sli sa jufu. 3Jufna ma hob vun lopna valam ma tam cata, cata tam jufna nala kaw. 4Cata as li va ma na' mina tam sliw tuwa' kay tuwa'ɗi, tuwa' kayn vi jufa'a. Jufna as li va ma nam mina tam sliw tuwam kay tuwamɗi, tuwam kayn vi cata kaw. 5Tap-tuwta vigiya nigi ma hina' goyɗi, may kayni ma li hay ŋra-vunda, kay nigi ma fi liyn neeɗa kay li siɗawta; bugolda nigi fi hot hay tap-tuwta vigiya lo, kay Satan ma fi a nemgiɗi, kay nigi as kay tel tuwgiɗi.
6Nan di kayni kay nigi fi li nala, may tuni kigi ki vun-ma-gatna naɗi. 7Hayan dar a sumun pet ma lak ki nan nala, may gigekaw Lawn vulum vulda-slugota valam ir va'a va'a.
8May tam sa bay-slina hiɗi boy sa duhulla nan di ala: Ŋaat kisiya la nisi lak ki nan nala. 9May la nisi as kay tel tuwsiɗi, hinsi sli'e. Kay la tuwsi torɗaysiya kayni marya nisi sli'e.
10Sa sliyna nan di tisiya, may mi nanɗi, mi Bum-Sumuna, a cata ma mun jara' goy hiɗi jufa'ɗi,
11la cat min mun jara' goy hiɗi jufa'a, ŋaata na' ma mus bay jufu. La naɗi, marya na' ma toy jara' hiɗi jufa'a. Jufna ma gi cata valam goyɗi kaw.
12Tam segena nan di tisiya, may mi Bum-Sumunɗi: La ɓasuyn ka'a ma cata valamu bay vi'e, la na' min mus hiɗi namu, nam ma hina' goyɗi. 13La cata jufa' bay vi'e, may la nam min mus hiɗi na'a, na' ma hinim goyɗi kaw. 14Kay juf ma bay-vina muɗi peldete kuɗ cata valamu, cata bay-vida muɗi peldete kuɗ ɓasuyna kaw, nala nisi ka peldete. La naɗi gurona visi liwisi kaw. May hay na'ta nisi ka peldete. 15May la ma bay-vina min ja jaram goyo, hinim ja'a, ɓasuyna lebo ɓasuyta may juni kuɗ slen kaynɗi. Lawna yay aya kay lak hay toyta. 16Kay nak cata, la nak fi suɗ jufagu, nak fi wi arige? Naŋ jufna, la naŋ fi suɗ cata vaŋu, naŋ wi arige?
17May gigekaw ma poy ki Bum-Sumuna vulum galla valam nala, ki Bum-Sumuna yumawa nala. Nan hatsi slen kayni hay ziyna-Lawna kafe. 18La san fi yita hay li ma nam ka kaay gosaya, nam ma mus hay gosayta valam nala. La san yumi may bay-gosayta, nam ma gar kay ka gosayɗi kaw. 19kay gosayta li vaɗi, bay-gosayta li vaɗi kaw. May va ma ŋolla mi lita kuɗ vun-ma-gatna vi Lawna. 20Nala gigekaw ma mus hay lop ma nam ay jew hayna, hay li ma Lawna yumi hay pana. 21La Lawn yaŋ kayn hay li ma naŋ ay gorvo'o, yor tuwaŋ kay kaynɗi, may la naŋ fi but tuwaŋ goy hay gorvota, naŋ as li kayni may. 22Kay gorvona ma yumi hay Bum-Sumuna nam mi sa ma buti-goyna vi Bum-Sumuna, nala kaw sa ma buti-goyna ma yum hay Bum-Sumuna nam mi gorvona vi Kristu. 23Nigi gusi hiɗi gusta ta lop ŋolo, nala nigi ma li gorvona vi sumunɗi.#7:23 ɗuw 1 Pet 1:18. 24Ɓosiyonna, hin san gigekaw ma mus hay lop ma nam ay hayna hay li ma Lawn yumina.
Kay guro-boyna
25Kuɗ lawta vi guro-boyna, vun-ma-gatna vi Bum-Sumuna ma nan vulum tisiya mayɗi. May nan min vul varta vanu, ki sa ma Bum-Sumuna muɗumawa ɗigere kuɗ lamanda valamu nala.
26Nan var ala bo, san mus malam ɦawa nala, bay sli ca'a, kay makka ka wulin ŋolo. 27La naŋ ka juni tam cata, naŋ ma gar a but tuwaŋ goyɗi, la naŋ may juni tam catɗi, naŋ ma gar catɗi kaw. 28May la naŋ sli ca kaw, naŋ may li sulukɗi, la goot-cat sli sa kaw, na' may li sulukɗi. May nisi ma fi makka hay sliwna. Kay na'ta nan min suɗgi goy vun lawt kayni.
29Humgi dita vanu, ɓosiyonna, liyna hini kiɗaya, kay na'ta, wulini pa nisi sa yaway boyna ma ɗuw tuwsi ki nisi bay yaw boy tuwa nala, 30Nisi sa ka tiya ma ɗuw tuwsi ki nisi ka tiyɗi nala, nisi sa firiya ma ɗuw tuwsi ki nisi ka firiɗi nala, nisi sa ka gusa ma ɗuw tuwsi ki va ma gus may hay ɓisiɗi nala, 31nisi sa li va hiɗi slena vi nagata ma ɗuw tuwsi ki nisi may li va hiɗi namɗi nala, kay sle ma hay nagat tani ma vat goyo.
32May nan min ala nigi ma yor tuwgi kay sle ma ŋom ŋil tuwginɗi. Sa ma bay slina tiy kay slena vi Bum-Sumuna, kay nam ma li kir Bum-Sumun ŋaa'a. 33May ma sliyna tiy kay slena vi nagata, kay nam ma li kir cata valam ŋaa'a. 34Cata hiɗi goot-cata ɓurawaya, ki cata bay sli jufna nala, goot-cata kaw tiy kay slena vi Bum-Sumuna, kay na' min li peldete hay tuwa'a hay varta va' kaw; may na'a ta sliyta tiy kay slena vi nagata, kay na' ma li kir jufa' ŋaa'a.
35Nan di kayni kay gutgi nigiya, may kay gan jawt vokgiɗi, may kay gigi irgi tam sle ma ŋaana, kay nigi ma vi kuɗ Bum-Sumuna hiɗi dono'o.
36May la san var ala, may ŋaa'a kalamu kay busata vi goota valam cap goyɗi, la nam min ala na' mus nala, hinim li va ma nam mina, nam li sulukɗi; hina' sli jufu.#7:36 Ɓiretta tani hum lopo. 37May la san so'ot dikamawa kay tuwamu, kay va telemu, la hiɗi minda valam kay tuwamu kaw, la nam min ala ŋom goota valam waya'a, san kayni li ŋaa'a. 38Nala sa ma vul goota valam goyo li ŋaa'a, may sa ma vul goota valam goyɗi li ŋaa'a suwa.
39Cata juni tam jufa'a ta-ta tam vatta vi irita valamu, may hay li ma jufa' mitawa, kuɗ minda va'a, na' as sli sa ma na' mina, may kayni ma li hay Bum-Sumuna. 40May la na' mus ki na' ka wulin nala, na' ma mus hiɗi firit suwa, kayni kuɗ varta vanu. May nan var ala Ŋusta vi Lawna ka kanu kaw.
Currently Selected:
1 KORINTENA 7: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001