1 KORINTENA 6
6
Lawta kay kitata jar sa tapna-Kristuna
Mat 5:38-41
1La sa jargiya, lawta ka jaram hiɗi sugolomu, nam tuɗ vok sa bay-ɗigera, may nam as kota' vok sa peldetnaɗi kay mige? 2Sa peldetna ma ka kitat kay nagata, nigi bay wi kayni su? La ka kitata vi nagat ɗawni si nigiya ni, nigi may nagay kay ka kitat kay law ma guray ma jarginɗi su? 3Nigi may wi ala ma ka kitat kay sunda-wuralawn ɗawn si naya ɗisu? La nala sle ma hay nagatna as suway suwtige? 4Hay li ma lawta ka jargiya kuɗ sle ma hay nagat tanna, sum sa kir tapna waa ɦawana nigi tunsi kay ka kitata. 5Nan di kayni kay muɗgi zulo'o. Ki kayn nala, jargi nigiya, sa kep ma yali ma kaagi kitat jargi may noŋɗi su? 6A san deɓ kay sugolomna vok sa bay-vina kayni litige?
7May nigiya, lawta vi kitat jargi kayni ɓulakgiyawa, a nigi ziy bay-ɗigerta kayni marya ɗisu? La nigi lak ŋali hay li ma nisi yaw slena vigi hiɗi ɗutta kayni marya ɗisu? 8May li bay-ɗigerta si nigiya, yaw slen kay segen si nigiya, may nisi si ɓosiyogina! 9Sa bay-ɗigera as yaw vocota hay mulda-Lawnɗi, nigi bay wi nala su? Ɗutgi tuwgi goyɗi: sa zlata-bulona, sa vi kuɗ lawayn waana, sa hin cata valamu gar tara'a, 10sa kus yoboy ma liwisna, sa bur hiɗi nuroysi jufayna, sa kulla, sa niŋa slena vi nagata, sa ɦoy kuɗ dolayna, sa di joo kay sumuna, sa coŋcoloŋŋa, nisi kaf fi yaw vocota hay mulda-Lawnɗi. 11Nigi ay jew kaw ki kayn nala, segena jargiya kaw. May nigiya, nigi muzi goyo,#6:11 Muzta-goyta tani ɗek poora vi baptisma. may nigiya, liy goy peldete, may nigiya, fi ɗigertawa hay semda vi Bum-Sumuna Yesu Kristu, hay Ŋusta vi Lawna vaya.
12Nan fi li slen pet telda may kanɗi, may slen may ŋaa'a petɗi, nan fi li slen pet telda may kanɗi, may nan as hin tuwan li gorvo kay vaɗi. 13Tina koti kay ruwatna, ruwatna koti kay tina kaw, may nam ma' pet Lawn ma vatam goyo. Tuwn koti kayn kaw may kay zlata-bulotɗi, may kay Bum-Sumuna, Bum-Sumuna mi mulla vi tuwna vaya kaw. 14Lawna ma day Bum-Sumuna kulona, nam ma dayay nay kulo'o hiɗi donota valamu kaw.
15Tuwgi kayni mi ɓetna vi tuw Kristu nigi bay wi nala su? Nan as yaw ɓetna vi tuw Kristu, muɗum goy ɓetna vi tuw cata viyuwta su? May noŋɗi. 16Lebo, sa ma tap tuwam hiɗi cata viyuwta tuwam muɗi kepe hiɗi na'a nigi bay wi nala tuwa su? Nisi ma' sliw tuwsi ma muɗ kepe. Din mi namu. 17May sa ma tap hiɗi Bum-Sumuna ŋusta valam tapay kepe hiɗi namu.
18Pirgi kay zlata-bulota. Suluk hen marige kaw ma san li'e ka goy jiy tuwamu, may sa ma li zlata-bulota, nam li suluk kayn kat sliw-tuwamu. 19Lebo, tuwgiya kayni tempella vi Ŋusta-Peldetta ta ka haygiya, ta nigi fa'ay vi Lawn pa nigi bay wi nala su? Tuwgi kayn may figin kay tuwgiɗi, nigi bay wi nala su? 20Kay nam gusgi hiɗi gusta ta tek ŋolo, kay na'ta subur Lawna hay tuwgiya.
Currently Selected:
1 KORINTENA 6: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001