1 KORINTENA 11
11
1Sligi kuɗanu, ki nan sli kuɗ Kristu nala.
Hay li ma cat ka hay ziyda-Lawna
Efes 5:22-24; 1 Tim 2:8-14
2Nan tiygi segiya kay nigi ka var kanu hay slen pet, nigi viy kuɗ vun-ma-gatna vanu ki nan vulum tigi nigi nala kaw. 3May nan min kay nigi ma wi ala: Kristu mi yamda vi juf gige gigekaw, may jufna mi yamda vi cata, Lawna mi yamda vi Kristu may. 4sa juf marige kaw, hay li ma nam siɗawa lebo di vun-jobta, la hiɗi yalam baraya, kayn di ala nam sli yam sa ma ŋolla valam kuloɗi. 5May la cat tarige kaw, la na' siɗawa kla, di vun-jobta Lawna kla hiɗi ya' bay bara, na' sli yam ma ŋolla va' kuloɗi, kayni ŋray ca ki ya' welay goyo nala. 6Kay la cata ya' may barayɗi, marya na' wel ɗuŋusa' goyo, lebo zulo'o kay ka ya' goyo, ŋaata na' bar ya'a. 7Sa jufna as kay bar yalamɗi, kay tuwamu sli tuw Lawna, kay namu mi gajijita vi Lawna kaw, may cata na'a mi gajijita vi sa jufna. 8Kay sa jufna may goy hay tuw cata paɗi, may cata may goy hay tuw sa jufna pa. 9Sa jufna kotom kayni may kay cataɗi, may cat kota' kayni kay sa jufna. 10Kay na'ta, kuɗ sunda-wuralawna, na' ma jun va ka'a, kay ɗek ala na' ka sli yam jufa' kulo'o. 11Nir na'ta kepe, hay Bum-Sumuna cata mus bay sa jufnaɗi, jufna mus bay cataɗi kaw. 12Kay cata may goy hay tuw sa jufna pa, nala kaw sa jufna vuɗay goy hay tuw cata pa, nisi kaf may goy vi Lawna pa may.
13Sargi kayni jar-tuwgi tige, la cata siɗaw Lawna hiɗi ya' bay bara, kayn hay liyam su? 14Sle ma goy jiyna ma Lawn lumna hatgi kaw ala, la sa jufna hin ɗuŋusam wul fiyoko, kayni zulo'o kalamu may naɗi su? 15May la cata hin ɗuŋusna va'a wul fiyoko, kayni vula' gajijita, kay ɗuŋusa' vuli ta'a ki va ma baara nala. 16May la san gar kay ci waya, numa may hatay naɗi, tapna vi Lawna may li naɗi may.
Ɓuraw-funa
Mat 26:26-28; Mark 14:22-25; Luk 22:14-20
17Hay li ma nan vulgi gatta kayni, va ma nan suburumɗin kayn ala, nigi tok yam tuwgi kayni may kay muɗ ŋaa'a suwaɗi, may kay muɗ joo'o suwa. 18Ma jewna, nan hum ala: Hay li ma nigi tok tuwgi hay dakka, ɓurawta ka jargiya, nan var ala kayni ma li gasiya. 19Ŋaa'a kay ci-wayta ma li jargiya, kay sum sa gasina sa ka jargina dirsi ma pat goy haraŋi. 20Kay na'ta hay li ma nigi tok tuwgiya, kayni may kay ti tina vi Bum-Sumunɗi; 21Kay hay li ma nigi ka ti'e, sa hena ti tina valam jewe, sa hena mayt ka cumu, hena hobay ŋolo kaw. 22Ziy ma nigi ti fun haya, ci haya kaw mayɗi su? Lebo nigi pan tapna vi Lawna, sa fisin mayɗina nigi muɗsi zulo'o kaw kayni ŋaa'a su? Nan min digi mige? Nan as di va ma ŋaa'a kigi su? Hay kayni nan as di va ma ŋaa'a kigi noŋɗi.
23Kay slen ma nan vulum tigin kayni nan fumi vi Bum-Sumuni pa, a Bum-Sumuna Yesu hay li ma henjeta di newti kalamna, nam sli funa, 24bugol nam gi bol kalam gina, ɓurawamu di'e: kayni mi tuwanu, ma (vuli goy) kigina, ligi kayni kay humgi gigi kanu. 25Nala kaw nam sli kaway-ma-cina bugol tina, di'e: kaway-ma-cina kayni bonota wulita hay busuwna vanu: ligi kayni dok-dok hay li ma nigi cumu, kay humgi ma gigi kanu. 26Kay dok-dok hay li ma nigi ti fun kayni hiɗi ci kaway-ma-cin kayni, nigi ka li di-goyta kay mitta vi Bum-Sumuna ta-ta mata valamu.
27Kay na'ta, gigekaw ma ti tuwna, ci kaway-ma-cina vi Bum-Sumuna kaw hiɗi dikam bay koti as kalamna, kitata ma ko kalamu kay tuwna hiɗi busuwna vi Bum-Sumuna. 28Hin san gigekaw ɗuw dikam kay tuwamu, bugolda kayni nam ma ti kuɗ funa hiɗi ci kuɗ kaway-ma-cina; 29Kay sa ma ti'e hiɗi ci'e, nam ti'e hiɗi ci'e tam kitat kalamu, la nam wi kay poŋ ir tuwna vi Bum-Sumunɗi. 30Kuɗ na'ta kayni sa maŋayna hiɗi sa moyna ka jargi ŋolo, segena kalay sene kaw. 31May la nay ka kitat kay tuwaya, kitat ma nig kayɗi. 32May hiɗi kitata valamu, Bum-Sumuna ka gataya, kay kitata ma nig kaya hiɗi sa nagatna kuɗ tuwayɗi.
33Kay na'ta ɓosiyonna, hay li ma nigi daka kay ti'e, nigi ma cub tuwgiya jar-tuwgiya. 34La mayt ka ci sa'a, nam ma kal ti vo valamu, kay nigi ma mar kitata kigiɗi. Sle ma hinina nan ma hatgiya hay li ma nan ma coys jargiya.
Currently Selected:
1 KORINTENA 11: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001