1 KORINTENA 12
12
Vulda vi ŋusta
Efes 4:4-16; Rom 12:3-8
1May ɓosiyonna, kuɗ lawta vi vulda vi ŋusta, nan min ala nigi ma lak hay bay-widaɗi. 2Nigi wi ala, hay li ma nigi ay sa nagatna tuwa, nisi ay tangi tam lawayn ma waana ma numulla, ki nisi ka tangi nala. 3Kay na'ta nan digiya kay nigi ma wi ala: La san gigekaw ka law hiɗi Ŋusta vi Lawna, nam fi di ala Yesu mi Anatema#12:3 Anatema Hiɗi vun Grekŋa, min di ala beɗay goyo. Ɗuw hay Yos 6:18; Gal 1:8-9. noŋɗi. Sa fi di ala Yesu mi Bum-Sumunaɗi kaw, la nam ka law hiɗi Ŋusta Peldettaɗi.
4Vulda slugota ka tak-takɗi, may ŋusta kepe. 5Lop sunda ka tak-taki, may Bum-Sumun kepe. 6Donota kay li lopna ka tak-taki, may Lawna kepe ma vul donot hay kafe. 7Kay Ŋusta vul tam gigekaw tak-taki kayni kay lum mi lop namna ma kepna. 8Tam mara'a, Ŋusta vulum yoboy ma yalla; tam hena, Ŋusta vulum yoboyn ma wida, kuɗ vulda vi Ŋusta na'ta kepe, 9tam sa hena, Ŋusta na'ta vulum vida, tam sa hena lo, Ŋusta na'ta vulum vulda-slugota kay muɗ sa moyna goy ŋaa'a. 10Tam sa hena na' vulum donota kay li sle ma ŋulona, tam hena lo, na' vulum kay di vun-jobta; tam sa hena na' vulum kay poŋ ir ŋusiyana, tam sa hena na' vulum kay wi vun dak-daki, tam sa hena lo, na' vulum kay muɗ vunna. 11Slen namna kayni pet lum ti Ŋusta na'ta kepe, na' ɓuraw tam gige kuɗ minda va'a.
12Nala kaw, ki tuwna ka kepe, la ɓetna valam ka ŋol dak-daki kaw, nam tapay kulo hay tuw ma kepna -- Kristu kaw ka ki kayni nala. 13Kay nay kafe fi baptisma hay Ŋusta na'ta kepe kay tap hay tuw ma kepna, la Yudiyana lebo Grekŋa, la gorvona lebo sa ma vuɗina, nay kafe ci kuɗ Ŋusta na'ta kepe.
14Kay tuwna kayni may mi ɓetna ma kepna ɦawaɗi may ɓetna ŋolo. 15La semda di ala, nan may mi ɓamtaɗi, nan may mi ɓetna vi tuwnaɗi, na' as pat goy hay tuwna kuɗ kayni su? 16La humda di ala: Nan may mi iraɗi, nan may mi ɓetna vi tuwnaɗi, na' as pat goy hay tuwna kuɗ kayni su? 17La tuwna pet mi ira, hay na'ta humda ka arige? La tuwna pet mi humda, hay na'ta hista ka arige? 18May Lawna tun ɓetna kaf hay liyna valamu valamu hay tuwna, ki nam min nala. 19La kaf mi ɓetna kepe, tuwna ka arige? 20May wulini ɓetna ka ŋolo, may tuwna mi kepe.
21Ira as di tam ɓamta ala: Lawta van may hiɗi nakɗi su? Yamda kaw as di tam gayta ala: Lawta van may hiɗi nakɗi su? 22As di naɗi. May ɓetna vi tuwna ma kiray bay donona lopna valam ka kaw. 23Ɓetna vi tuwna ma nay var ala suburta may kuɗum ŋolɗina, nay ka vulum suburta ŋol suwa; ɓetna vi tuwaya ma nay ka li zulo kalamna kayni, nay ka ŋayam suwa kay zulota, 24may ɓetna ma jifiyna hay tuwaya nay may ŋayamɗi. May Lawna tap tuwna kayn ki kayn nala, ma maŋayna nam vulum suburta suwa. 25Kay ɓurawta ma li hay tuwnaɗi, may kay ɓetna ma var kay tuwam jar-tuwamu kaw. 26La kepe jar ɓetna ka ci lasi, ɓetna kaf ka ci las kuɗumu. La kepe jar ɓetna fi suburta, ɓetna kaf li firiya hiɗi namu.
27May wulini nigi mi tuwna vi Kristu, gigekaw mi ɓetna valamu hay lopna valamu valamu. 28Hay tapna kayni, sem ma jewna Lawna cuk sa Apostolayna, sem ma ma'na sa jobta, sem ma ɦidina sa hatna, bugolda sa ka hiɗi vulda-slugota kay li ɗekka, sa ka hiɗi vulda-slugota kay yer sa moyna goyo, kay gut sumuna, kay ŋom sumuna, kay di vun mara'a mara'a kaw. 29Kafe si sa Apostolay su? Kafe sa jobta-Lawna su? Kafe si sa hatna su? Kafe li sle ma ŋulo ŋulona su? 30Kafe vulda-slugota ka kisi kay muɗ sa moyn goy ŋaa'a su? Kafe law vun (mara'a mara'a) su? Kaf muɗ vunna su? 31May gargit ti vulda-slugota ta ŋol suw kafta. Nan min ɗekgi kay hagat tara'a ta ŋaa'a suwa kaw.
Currently Selected:
1 KORINTENA 12: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001