يُوحَنَّا 9

الْفَصْلْ التَّاسْعْ

يَسُوعْ كَيْشَافِي وَاحْدْ الرَّاجْلْ عْمَى

1وْمْلِّي كَانْ يَسُوعْ غَادِي، شَافْ وَاحْدْ الرَّاجْلْ، مْلِّي تّْوْلَدْ وْهُوَ عْمَى. 2وْسْوّْلُوهْ التّْلَامْدْ دْيَاوْلُه وْݣَالُو لِيهْ: «آ سِيدِي، شْكُونْ اللِّي دْنَبْ، وَاشْ هَادْ الرَّاجْلْ وْلَا وَالِدِيهْ حْتَّى تّْزَادْ عْمَى؟». 3وْجَاوْبْهُمْ يَسُوعْ: «رَاهْ مَا دْنَبْ لَا هُوَ وَلَا وَالِدِيهْ، وَلَكِنْ وْقَعْ لِيهْ دَاكْشِّي غِيرْ بَاشْ تْبَانْ أَعْمَالْ اللَّهْ فِيهْ. 4رَاهْ خَاصّْنَا نْدِيرُو الْأَعْمَالْ دْيَالْ هَادَاكْ اللِّي صِيفْطْنِي مَا حَدّْ بَاقِي النّْهَارْ، مْلِّي غَيْجِي اللِّيلْ حْتَّى حَدّْ مَا غَيْقْدَرْ يْخْدَمْ. 5مَا حَدّْنِي فْالدّْنْيَا، أَنَا هُوَ نُورْ الدّْنْيَا».#متى 5‏:14؛ يوحنا 8‏:12

6وْمْنْ بَعْدْمَا ݣَالْ يَسُوعْ هَادْ الْكْلَامْ، دْفَلْ فْالتّْرَابْ، وْصَايْبْ مْنْ الدّْفَالْ شْوِيَّة دْ الْغِيسْ وْحَطُّه عْلَى عِينِينْ الرَّاجْلْ. 7وْݣَالْ لِيهْ: «سِيرْ غْسَلْ فْضَايْةْ سِلْوَامْ» -وْالْمَعْنَى دْيَالْ سِلْوَامْ هُوَ الْمْرْسُولْ-. وْمْشَى وْغْسَلْ، وْرْجَعْ وْهُوَ كَيْشُوفْ.

8وْالجِّيرَانْ وْالنَّاسْ اللِّي كَانُو كَيْشُوفُوهْ مْنْ قْبَلْ كَيْسْعَى، بْدَاوْ كَيْسْوّْلُو رَاسْهُمْ وْكَيْݣُولُو: «وَاشْ هَادْ الرَّاجْلْ مَاشِي هُوَ اللِّي كَانْ كَيْݣْلَسْ وْكَيْسْعَى؟». 9وْݣَالُو شِي وْحْدِينْ: «رَاهْ هُوَ هَادَا!»، وْوْحْدِينْ خْرِينْ ݣَالُو: «لَّا، رَاهْ غِيرْ كَيْشْبَهْ لِيهْ!». وَلَكِنْ هُوَ ݣَالْ: «رَاهْ أَنَا هُوَ!». 10وْهُمَ يْسْوّْلُوهْ: «كِيفَاشْ تّْحَلُّو لِيكْ عِينِيكْ؟». 11وْجَاوْبْهُمْ: «وَاحْدْ الرَّاجْلْ سْمِيّْتُه يَسُوعْ صَايْبْ شْوِيَّة دْيَالْ الْغِيسْ وْدَارُه عْلَى عِينِيَّ وْݣَالْ لِيَّ: سِيرْ لْضَايْةْ سِلْوَامْ وْغْسَلْ. وْأَنَا نْمْشِي وْغْسَلْتْ وْوْلِّيتْ كَنْشُوفْ». 12وْسْوّْلُوهْ: «وْفِينْ هُوَ هَادْ الرَّاجْلْ؟». ݣَالْ لِيهُمْ: «مَا عْرَفْتْشْ!».

13وْدَّاوْ الرَّاجْلْ اللِّي كَانْ عْمَى عَنْدْ الْفْرِّيسِيِّينْ، 14وْكَانْ دَاكْ النّْهَارْ نْهَارْ السّْبْتْ فَاشْ صَايْبْ يَسُوعْ الْغِيسْ وْحَلّْ عِينِينْ الْعْمَى. 15وْسْوّْلُوهْ الْفْرِّيسِيِّينْ حْتَّى هُمَ كِيفَاشْ وْلَّى كَيْشُوفْ، وْݣَالْ لِيهُمْ: «حَطّْ شْوِيَّة دْيَالْ الْغِيسْ عْلَى عِينِيَّ وْغْسَلْتْ، وْوْلِّيتْ كَنْشُوفْ». 16وْݣَالُو شِي وْحْدِينْ مْنْ الْفْرِّيسِيِّينْ: «مَا يْمْكَنْشْ يْكُونْ هَادْ الرَّاجْلْ مْنْ اللَّهْ، عْلَاحْقَّاشْ مَا كَيْدِيرْشْ بْالْوْصِيَّة دْيَالْ نْهَارْ السّْبْتْ». وْݣَالُو وْحْدِينْ خْرِينْ: «كِيفَاشْ يْقْدَرْ وَاحْدْ مُدْنِبْ يْدِيرْ بْحَالْ هَادْ الْعَلَامَاتْ؟». وْكَانُو مَا مْتَّافْقِينْشْ فْهْضَرْتْهُمْ. 17وْعَاوْدُو سْوّْلُو الرَّاجْلْ اللِّي كَانْ عْمَى: «وْنْتَ آشْ كَتْݣُولْ عْلِيهْ حِيتْ حَلّْ لِيكْ عِينِيكْ؟»، وْهُوَ يْجَاوْبْهُمْ: «رَاهْ هُوَ نْبِي!». 18وْمَا تَاقُوشْ لِيهُودْ بْلِّي هُوَ كَانْ عْمَى وْوْلَّى كَيْشُوفْ حْتَّى عَيْطُو عْلَى وَالِدِيهْ، 19وْسْوّْلُوهُمْ وْݣَالُو: «وَاشْ هَادَا وَلْدْكُمْ اللِّي كَتْݣُولُو تّْوْلَدْ عْمَى؟ إِيوَا كِيفَاشْ كَيْشُوفْ دَابَا؟». 20وْجَاوْبُوهُمْ وَالِدِيهْ: «حْنَا كَنْعَرْفُو بْلِّي هَادَا وَلْدْنَا وْبْلِّي تّْوْلَدْ عْمَى. 21وَلَكِنْ مَا كَنْعَرْفُوشْ كِيفَاشْ وْلَّى كَيْشُوفْ دَابَا، وْمَا كَنْعَرْفُوشْ شْكُونْ اللِّي حَلّْ لِيهْ عِينِيهْ. رَاهْ هُوَ كْبِيرْ فْالْعْمَرْ، سْوّْلُوهْ وْرَاهْ هُوَ يْجَاوْبْكُمْ عْلَى رَاسُه». 22ݣَالُو وَالِدِينْ الرَّاجْلْ هَادْ الْكْلَامْ، عْلَاحْقَّاشْ كَانُو خَايْفِينْ مْنْ لِيهُودْ. حِيتْ لِيهُودْ كَانُو تَّافْقُو بِينَاتْهُمْ مْنْ قْبَلْ بَاشْ اللِّي عْتَرْفْ بْالْمَسِيحْ، يْجْرِّيوْ عْلِيهْ مْنْ دَارْ الصّْلَاة. 23دَاكْشِّي عْلَاشْ ݣَالُو وَالِدِيهْ: «رَاهْ هُوَ كْبِيرْ فْالْعْمَرْ، سْوّْلُوهْ!».

24وْعَيْطُو مَرَّة خْرَى عْلَى الرَّاجْلْ اللِّي كَانْ عْمَى وْݣَالُو لِيهْ: «عْطِي الْعَزّْ لْلَّهْ، حْنَا رَاهْ كَنْعَرْفُو بْلِّي هَادْ الرَّاجْلْ مُدْنِبْ». 25وْجَاوْبْهُمْ: «وَاشْ هَادَاكْ الرَّاجْلْ مُدْنِبْ؟ مَا كَنْعْرَفْشْ! حَاجَة وَحْدَة اللِّي كَنْعْرَفْ: كْنْتْ عْمَى، وْدَابَا وْلِّيتْ كَنْشُوفْ!». 26وْهُمَ يْݣُولُو لِيهْ تَانِي: «أَشْنُو دَارْ لِيكْ؟ كِيفَاشْ حَلّْ لِيكْ عِينِيكْ؟». 27وْرَدّْ عْلِيهُمْ: «رَانِي ݣْلْتْ لِيكُمْ وْمَا سْمَعْتُونِيشْ! عْلَاشْ بْغِيتُو تْسَمْعُو الْهَضْرَة مَرَّة خْرَى؟ يَاكْمَا بْغِيتُو حْتَّى نْتُمَ تْوَلِّيوْ تْلَامْدُه؟». 28وْهُمَ يْسَبُّوهْ وْݣَالُو: «نْتَ هُوَ التّْلْمِيدْ دْيَالُه، أَمَّا حْنَا رَاهْ تْلَامْدْ مُوسَى. 29وْكَنْعَرْفُو بْلِّي مُوسَى تّْكَلّْمْ مْعَاهْ اللَّهْ، وَلَكِنْ هَادْ الرَّاجْلْ مَا كَنْعَرْفُوشْ مْنِينْ هُوَ!». 30وْجَاوْبْ الرَّاجْلْ وْݣَالْ لِيهُمْ: «إِيوَا رَاهْ الْعْجَبْ هَادَا! مَا كَتْعَرْفُوشْ مْنِينْ هُوَ وَاخَّا حَلّْ لِيَّ عِينِيَّ! 31حْنَا كَنْعَرْفُو بْلِّي اللَّهْ مَا كَيْسْمَعْشْ لْلْمُدْنِبِينْ، وَلَكِنْ كَيْسْمَعْ لْلِّي كَيْتَّاقِيهْ وْكَيْدِيرْ مُرَادُه. 32وْمْنْ قْدِيمْ الزّْمَانْ عَمّْرْنَا مَا سْمَعْنَا بْلِّي شِي وَاحْدْ حَلّْ عِينِينْ شِي وَاحْدْ تّْوْلَدْ عْمَى. 33كُونْ مَا كَانْشْ هَادْ الرَّاجْلْ مْنْ اللَّهْ، كُونْ مَا قْدَرْ يْدِيرْ وَالُو». 34وْجَاوْبُوهْ وْݣَالُو: «نْتَ كُلّْكْ تّْوْلَدْتِي فْالدّْنُوبْ، وْكَتْعَلّْمْنَا!». وْهُمَ يْجْرِّيوْ عْلِيهْ.

35وْسْمَعْ يَسُوعْ بْلِّي الْفْرِّيسِيِّينْ جْرَّاوْ عْلَى الرَّاجْلْ الْعْمَى، وْمْلِّي لْقَاهْ يَسُوعْ ݣَالْ لِيهْ: «وَاشْ كَتْآمْنْ بْوَلْدْ الْإِنْسَانْ؟». 36وْجَاوْبْ دَاكْ الرَّاجْلْ وْݣَالْ: «شْكُونْ هُوَ آ سِيدِي بَاشْ نْآمْنْ بِيهْ؟». 37وْݣَالْ لِيهْ يَسُوعْ: «اللِّي شْفْتِيهْ! وْاللِّي كَيْتّْكَلّْمْ مْعَاكْ دَابَا، رَاهْ هُوَ هَادَاكْ!». 38وْهُوَ يْݣُولْ الرَّاجْلْ: «كَنْآمْنْ آ سِيدِي!». وْسْجَدْ لِيهْ. 39وْݣَالْ يَسُوعْ: «جِيتْ لْلنَّاسْ دْيَالْ هَادْ الدّْنْيَا بَاشْ نْبَيّْنْ دْنُوبْهُمْ: بَاشْ الْعَمْيِينْ يْوَلِّيوْ كَيْشُوفُو، وْاللِّي كَيْشُوفُو يْوَلِّيوْ عَمْيِينْ». 40وْسْمْعُو شِي وْحْدِينْ مْنْ الْفْرِّيسِيِّينْ اللِّي كَانُو مْعَاهْ تْمَّ هَادْ الْكْلَامْ وْݣَالُو لِيهْ: «يَاكْمَا حْتَّى حْنَا عَمْيِينْ؟». 41وْݣَالْ لِيهُمْ يَسُوعْ: «كُونْ كْنْتُو عَمْيِينْ كُونْ ݣَاعْ مَا كَانُو فِيكُمْ الدّْنُوبْ، وَلَكِنْ نْتُمَ دَابَا كَتْݣُولُو بْلِّي كَتْشُوفُو، دَاكْشِّي عْلَاشْ دْنُوبْكُمْ بَاقْيِينْ فِيكُمْ».

Currently Selected:

يُوحَنَّا 9: MSTD

Highlight

Copy