1. Korinta 10
10
Woarnunk fa faulsche Sechaheit
1Leewe Breeda, dit sell jie weeten, daut onse Vodasch aula unja de Wolkj wieren un aula derch daut Mäa jinjen. #2Mo 13,21; 14,22 2Aula sent see unja Moses en Wolkj un Mäa jedeept worden. 3Aula eeten daut selwje jeistliche Äten. #2Mo 16,4.35; 5Mo 8,3 4Aula drunken dän selwjen jeistlichen Drunk. See drunken aula von däm jeistlichen Steen, dee met an kjeem, un dee Steen wia Christus. #2Mo 17,6 5Un doch, aun de mieeschte haud Gott kjeen Jefaulen, un hee leet an en de Wiltnis stoawen. #4Mo 14,22-32 6Dit es fa ons aus Väabilt passieet, daut wie ons daut beese nich jankren loten sellen, soo aus jane deeden. #4Mo 11,4 7Jie sellen uk nich Jetta deenen, soo aus mank jane eenje deeden, soo aus jeschräwen steit: “Daut Volkj sad sikj dol, to äten un to drinkjen, un stunt opp toom lostich sennen.” #2Mo 32,6 8Well wie uk nich Huararie driewen, soo aus mank jane eenje deeden, un aun eenem Dach storwen 23.000. #4Mo 25,1.9 9Well wie uk nich onsen Harn #10,9 Eenje oole Schreften sajen nich Christus. vesieekjen, soo aus mank jane eenje deeden, un von Schlangen omjebrocht worden. #4Mo 21,4-6 10Doot uk nich romgrunzen, soo aus mank jane eenje deeden, un worden vom Vedoawa omjebrocht. #4Mo 14,2.35-36; Heb 3,11.17 11Aul dit passieed aun jane ons toom Väabilt, un es fa ons jeschräwen worden, dee wie en de latste Tiet läwen, om ons to woarnen. #1Pet 4,7 12Doawäajen, wäa doa meent, hee steit faust, saul oppaussen, daut hee nich felt. 13Bat nu haben junt noch mau menschlich bekaunde Vesieekjungen jetroffen. Gott es tru, un hee woat daut nich tooloten, daut jie schwanda vesocht woaren, aus jie Krauft haben. Hee woat fa eenen Wajch sorjen, ut de Vesieekjunk rut to komen, soo daut jie daut vedroagen kjennen. #Psa 68,20; 2Pet 2,9
Jettafast un Owentmol paussen nich toop
14Doawäajen miene leewe Breeda, rant wajch vom Jettadeenst! #1Joh 5,21 15Ekj räd to junt aus to vestendje Menschen. Aulsoo uadeelt selfst, waut ekj saj. 16Daut jesäajende Owentmols Kuffel, daut wie säajnen, es daut nich Poat haben aun Christus sienem Bloot? Daut Broot, daut wie bräakjen, es daut nich Poat haben aun Christus sienem Kjarpa? #Mat 26,27; Apost 2,42; 1Kor 11,23-26 17Wiels doa een Broot es, sent wie väle aula toop een Kjarpa, wiels wie aula aun däm eenen Broot deelnämen. #Reema 12,5; 1Kor 12,27 18Kjikjt no daut Volkj Israel. #10,18 Eenje oole Schreften sajen Kjikjt woo daut Volkj Israel läft. Haben dee, dee daut Opfa äten, nich een Poat aum Aultoa? #3Mo 7,6 19Meen ekj dan, daut een Jettaopfa äwahaupt waut es, ooda daut een Aufgott waut es? #1Kor 8,4 20Nä. Oba ekj saj, waut doa jeopfat woat, daut woat de beese Jeista jeopfat, un nich Gott. Un ekj well nich, daut jie met de beese Jeista sellen Jemeenschoft haben. 21Jie kjennen nich tojlikj von däm Harn sien Kuffel drinkjen un von de beese Jeista äat. Un jie kjennen uk nich aun beides tojlikj een Poat haben, aun däm Harn sien Desch un aun de beese Jeista äa Desch. #Mat 6,24; 2Kor 6,15-16 22Ooda proow wie dän Harn entooajren? Sent wie stoakja aus hee?
Waut jeräakjent sennen es mea wieet aus Frieheit
23Wie haben to aules Frieheit, oba daut deent nich aules toom gooden. Wie haben to aules Frieheit, oba nich aules but opp. #1Kor 6,12 24Kjeena saul sien ieejnen nutzen sieekjen, oba daut, waut sienem näakjsten goot deit! #Reema 15,2; Flp 2,4 25Ät irjentwaut daut opp däm Fleesch Moakjt vekoft woat, un om daut Jewessen nich to belausten, froacht nich too väl, wua daut häakjemt. #Reema 14,2-10.22 26Wiels “de Ieed jehieet däm Harn un aules waut doabennen es.” #Psa 24,1 27Wan junt von dee waut nich jleewen wäa enlot un jie wellen hangonen, ät aules, waut see junt väasaten. Un om daut Jewessen nich to belausten, froacht nich wua daut häakjemt. 28Oba wan wäa to junt sajen sull: Dit Fleesch kjemt vom Jettaopfa, dan ät daut nich, om däm sien Jewessen to veschoonen, dee junt daut säd. #1Kor 8,7 29Ekj meen nich jun ieejen Jewessen, oba däm aundren Mensch sient. Fa mie selfst bruck ekj miene Frieheit nich von eenem aundren sien Jewessen bestemmen loten. 30Wan ekj Gott fa mien äten dank, wuarom saul ekj mie dan beschuljen loten, wan ekj ät, wuafäa ekj dank. #1Tim 4,4 31Auf jie äten ooda drinkjen ooda waut jie doonen, doot aules om Gott to ieren. #Kol 3,17 32Jäft kjeenem eene Uasoak, sikj aun junt to steeten, nich de Juden un nich de Griechen un uk nich Gott siene Jemeent. #Reema 14,13 33Doot soo aus ekj, ekj vesieekj aulemaun entjäajen to komen, un sieekj nich mien ieejnen nutzen, oba waut väle toom gooden deent, daut see jerat woaren. #1Kor 9,20-22
Currently Selected:
1. Korinta 10: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.