1. Korinta 11
11
1Nämt mie toom Biespel, soo aus ekj Christus toom Biespel näm!
Frues em Gottesdeenst
2Ekj low junt doafäa, daut jie aun mie denkjen, un daut jie junt aun de Lia hoolen, soo aus ekj junt dee jeef. 3Oba ekj mucht, daut jie vestonen, daut Christus de Kopp (daut Haupt) es vom Maun, de Maun es de Kopp von de Fru, un Gott es de Kopp von Christus. #1Mo 3,16; 1Kor 3,23; Efs 5,23 4Wan een Maun bät ooda profeetisch rät un haft sienen Kopp bedakjt, entieet hee sienen Kopp. 5Oba wan eene Fru bät ooda profeetisch rät un haft äaren Kopp nich bedakjt, entieet see äaren Kopp. Daut wudd jrod soo sennen, aus wan see kol jeschoaren wia. 6Wan eene Fru sikj nich dän Kopp bedakjen well, dan kunn see sikj uk de Hoa aufschnieden. Daut es fa eene Fru eene Schaund, sikj de Hoa auftoschnieden ooda dän Kopp kol to schäaren, un doawäajen sull see sikj dän Kopp bedakjen. 7Een Maun sull sienen Kopp nich bedakjt haben, wiels hee Gott sien Bilt un Aufglaunz wadaspieejelt. De Fru oba spieejelt däm Maun sien Bilt wada. 8De Maun kjeem nich von de Fru häa, oba de Fru vom Maun. #1Mo 2,21-23 9De Maun wort nich wäajen de Fru jeschaufen, oba de Fru wäajen däm Maun. #1Mo 2,18 10Wäajen de Enjel äat haulwen saul de Fru een Tieekjen von Ordnunk opp däm Kopp droagen. 11Un äwajens, em Harn es nich de Maun waut onen de Fru, un nich de Fru waut onen dän Maun. 12Soo aus de Fru vom Maun kjemt, soo kjemt uk de Maun derch de Fru, oba aules kjemt von Gott. 13Beuadeelt fa junt selfst, auf daut fa eene Fru aunstendich es, Gott auntobäden onen dän Kopp bedakjt to haben. 14Lieet de Natua selfst junt nich, daut daut fa eenen Maun kjeene Iea es, wan hee lange Hoa haft? 15Eene Fru oba woat derch äare lange Hoa jeieet, dee sent ar aus een Bedakjunk jejäft. 16Oba wan wäa ut es no strieden, saul hee weeten, wie haben dee Jewanheit nich, un Gott siene Jemeenten uk nich.
Äwa daut Owentmol
17Waut ekj junt noch wieda to sajen hab, doarenn kaun ekj junt nich lowen, wiels soo aus jie toopkomen, daut es mea toom Schoden aus toom nutzen. 18Aus ieeschtet hia ekj, daut mank junt Spoolungen sent wan jie aus Jemeent toopkomen, un toom Deel jleew ekj daut. #1Kor 1,12; 3,3 19Daut mott uk to Spoolungen mank junt komen, daut et verendach kjemt, wäa ver Gott rajchtschaufen es. #Mat 18,7; 1Joh 2,19 20Wan jie dan toopkomen, hool jie nich werkjlich dän Harn sien Owentmol. 21Wäajen bie junem äten at een jiedra ieescht daut sienje ut, un eena es hungrich jebläwen un de aundra es bedrunken. #Jud 1,12 22Waut es soont? Kjenn jie nich tus äten un drinkjen? Ooda veacht jie Gott siene Jemeent un beschämen dee, dee nuscht haben? Waut saul ekj doatoo sajen? En dit woa ekj junt nich lowen! #Jak 2,5-6
23Waut ekj junt jejäft hab, hab ekj vom Harn jekjräajen: En de Nacht, aus de Har Jesus veroden wort, neem hee Broot, #(23-25) Mat 26,26-28; Mrk 14,22-24; Luk 22,19-20 24un aus hee doafäa jedankt haud, bruak hee daut un säd: Dit es mien Kjarpa, dee fa junt jebroaken woat; #11,24 Eenje oole Schreften sajen mien Kjarpa, dee fa junt es. nämt un ät, om aun mie to denkjen. 25Jrod soo neem hee nom äten uk daut Kuffel un säd: Dit Kuffel es de niea Bunt en mienem Bloot; wan jie daut drinkjen, doot daut, om aun mie to denkjen. 26Jiedatsmol aulsoo, wan jie dit Broot äten un von dit Kuffel drinkjen, saj jie doamet, daut de Har jestorwen es, un daut, soo lang bat hee wada kjemt. #Mat 26,29
Unjasieekjt junt selfst
27Wäa von dit Broot at un von däm Harn sien Kuffel drinkjt, un läft nich soo aus sikj daut jehieet, veschulcht sikj doaderch aum Harn sien Bloot un Kjarpa. #1Kor 11,22 28Doawäajen lot jieda Mensch sikj selfst unjasieekjen, un dan von daut Broot äten un von daut Kuffel drinkjen. #Mat 26,22 29Wiels wäa soo äten un drinkjen deit, daut hee Christus sienen Kjarpa un sien Bloot nich achten deit, dee brinjt doaderch daut Jerecht äwa sikj. #1Kor 10,16-17 30Daut es wuawäajen jie soo väl schwake un kranke mank junt haben, un een Schoof sent jestorwen.#11,30 Eenje oole Schreften haben sent enjeschlopen. 31Wan wie ons selfst rechten wudden, wudd wie nich jerecht woaren. 32Wan wie oba vom Harn jerecht woaren, woa wie doaderch trajcht jeholpen, daut wie nich met de Welt toop vedaumt woaren. #Spr 3,11-12 33Doawäajen miene Breeda, wan jie toopkomen toom äten, dan wacht bat jie aula toop sent. 34Wäa hungrich es, däm lot tus äten, soo daut sikj daut toopkomen nich toom Jerecht entwekjelt. Daut äwaje woa ekj ordnen, wan ekj hankom.
Currently Selected:
1. Korinta 11: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.