1. Korinta 12
12
Waut Gott sien Jeist en junt deit
1Waut jeistliche Gowen #12,1 ooda Waut jeistlich begowde Menschen aunbelangt, Breeda, doaräwa well ekj junt nich em onkloaren loten. 2Jie weeten, aus jie Gott noch nich kjanden, word jie sea stoakj no de stomme Jetta hanjetrocken. #Hab 2,18-19 3Doawäajen saj ekj junt, kjeena woat jäajen Jesus fluchen, dee derch Gott sienen Jeist rät, un kjeena woat Jesus aus Harn aunerkjanen, buta derch dän Heiljen Jeist. #Mrk 9,39; 1Joh 4,2-3
4Doa sent veschiedne Gowen, oba doa es een Jeist. #(4-6) Efs 4,4-6.11; Reema 12,6 5Doa sent veschiedne Deensten, oba doa es een Har. #1Kor 12,28 6Doa sent veschiedne Sorten von Krauft, oba doa es een Gott, dee aules en aulen wirkjt. 7Daut waut de Jeist en jiedrem wirkjt, es doatoo jejäft, daut daut aulen toom nutzen deenen saul. #1Kor 14,26 8Eenem woat daut derch dän Jeist jejäft, en Weisheit to räden. Eenem aundren woat daut derch dän selwjen Jeist jejäft, Erkjantnis verendach to brinjen. 9Eenem aundren es de Gloowen jejäft, derch dän selwjen Jeist. Eenem aundren es de Gow jejäft, to heelen derch dän selwjen Jeist. 10Eenem aundren es de Krauft jejäft, Wunda to doonen. Eenem aundren es jejäft, profeetisch to räden; eenem aundren, Jeista to unjascheeden; eenem aundren, veschiedne Sproaken to räden; un eenem aundren, de Sproaken uttolajen. #Apost 2,4; 1Kor 14,1-40 11Oba aul dit wirkjt een un deeselwja Jeist, un deelt eenem jiedren doano too, aus hee daut well. #Reema 12,3; Efs 4,7
Een Kjarpa met väl Jläda
12Soo aus een Kjarpa een gaunzet es, wan dee uk väl Jläda haft, un aul dee Jläda, soo väl aus daut uk sent, een Kjarpa sent, soo es daut uk met Christus. 13Wie sent aula derch eenen Jeist en eenen Kjarpa nenn jedeept, auf Juden ooda Griechen, auf Sklowen ooda Friee, un wie haben aula dän selwjen Jeist to drinkjen jekjräajen. #Gal 3,28 14Een Kjarpa es nich met een Jlett jemoakt, oba met väle. 15Wan de Foot sajen wudd: Wiels ekj nich eene Haunt sie, sie ekj nich een Poat aum Kjarpa, doawäajen wudd dee emma noch een Poat aum Kjarpa sennen. 16Un wan daut Ua sajen wudd: Wiels ekj nich een Uag sie, sie ekj nich een Poat aum Kjarpa, doawäajen wudd daut noch emma een Poat aum Kjarpa sennen. 17Wan de gaunze Kjarpa een Uag wia, wua wudd daut hieren bliewen? Wan de gaunze Kjarpa Ua wia, woo sull eena rikjen kjennen? 18Oba nu haft Gott daut met de Jläda aum Kjarpa soo toopjestalt aus hee daut fa goot befungen haft. 19Wan dee aula een Organ wieren, woo kunn daut dan een Kjarpa jäwen? 20Oba nu sent doa väl Jläda, oba mau een Kjarpa. 21Daut Uag kaun nich to de Haunt sajen: Ekj bruck die nich. Un de Kopp kaun nich to de Feet sajen: Ekj bruck junt nich. 22Daut es jrod aundasch: Dee Jläda aum Kjarpa, dee ons aum schwaksten väakomen, sent de needichste. 23Un dee Jläda aum Kjarpa, dee no onse Meenunk weinja Iea traft, iea wie aum mieeschten. Un fa dee Jläda, dee wie nich jieren seenen loten, sorj wie besondasch, 24wiels de aundre brucken daut nich soo. Oba Gott haft de Jläda aum Kjarpa soo toopjestalt, un haft de jerinjere, dee daut brucken, mea Iea jejäft. 25Doaräwa saul nich eene Spoolunk em Kjarpa sennen, de Jläda sellen aula jlikj eena fa dän aundren sorjen. 26Wan een Jlett litt, lieden aule Jläda met. Un wan een Jlett jeieet woat, freien de aundre sikj aula met.
27Jie sent nu Christus sien Kjarpa, un een jiedra es een Jlett aun am. #Reema 12,5 28En de Jemeent haft Gott ieeschtens Apostel enjesat, tweedens Profeeten, dreddens Lierasch, dan Wundawirkja, dan soone, dee de Gow haben, to heelen, Helpa, Vewaulta, un soone, dee en veschiedne Sproaken räden. #Efs 4,11-12 29Sent daut aules Apostel? Sent daut aules Profeeten? Sent daut aules Lierasch? Kjennen dee aula Wunda doonen? 30Haben dee aula de Gow to heelen? Kjennen dee aula veschiedne Sproaken räden? Kjennen dee aula utlajen?
31Sträft iernstlich no de hechre Gowen! #1Kor 14,1.12
Un ekj woa junt noch eenen bätren Wajch wiesen.
Currently Selected:
1. Korinta 12: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.